“ಸಮಾಜ ಕಲ್ಯಾಣ ಇಲಾಖೆ ವ್ಯಾಪ್ತಿಗೆ ಬರುವ ಡಾ. ಬಿ. ಆರ್. ಅಂಬೇಡ್ಕರ್ ಬಾಲಕರ ಮೆಟ್ರೀಕ್ ನಂತರದ ವಸತಿ ನಿಲಯದಲ್ಲಿ ಸುಮಾರು 120 ವಿದ್ಯಾರ್ಥಿಗಳ ಇದ್ದಾರೆ. ನಿಲಯದಲ್ಲಿ ಮೂಲಭೂತ ಸೌಲಭ್ಯಗಳು ವಿದ್ಯಾರ್ಥಿಗಳಿಗೆ ದೊರೆಯುತ್ತಿಲ್ಲ” ಎಂದು ಗದಗ ಜಿಲ್ಲೆಯ ರೋಣ ಪಟ್ಟಣದ ವಸತಿ ನಿಲಯದ ಮುಂದೆ ಎಸ್ ಎಫ್ ಐ ವತಿಯಿಂದ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸಿದರು.
ಪ್ರತಿಭಟನೆಯಲ್ಲಿ ಎಸ್ಎಫ್ಐ ಜಿಲ್ಲಾಧ್ಯಕ್ಷ ಚಂದ್ರು ರಾಠೋಡ ಮಾತನಾಡಿ, “ಈ ವಸತಿ ನಿಲಯದಲ್ಲಿ ದಿನನಿತ್ಯ ಸುಮಾರು ನೂರು ಜನ ವಿದ್ಯಾರ್ಥಿಗಳು ಸೌಲಭ್ಯ ಪಡೆಯುತ್ತಿದ್ದಾರೆ. ಆದರೆ ವಿದ್ಯಾರ್ಥಿಗಳಿಗೆ ಸರಿಯಾದ ಮೂಲಭೂತ ಸೌಕರ್ಯಗಳು ಇಲ್ಲ. ಸೋಪ್ ಕೀಟ್, ಹಾಸಿಗೆ ಹೋದಿಕೆ, ಆಟದ ಸಾಮಗ್ರಿಗಳು ಇಲ್ಲ. ಶೌಚಾಲಯ ಸ್ವಚ್ಛತೆ ಇಲ್ಲ, ಗ್ರಂಥಾಲಯ ಇಲ್ಲ, ಬಿಲ್ಡಿಂಗ್ ಸೋರಿಕೆಯಾಗುತ್ತದೆ. ಇಷ್ಟೆಲ್ಲ ಸಮಸ್ಯೆಗಳು ಇದ್ದರೂ ಅಧಿಕಾರಿಗಳು ಕಣ್ತೆರೆದು ನೋಡುತ್ತಿಲ್ಲ” ಎಂದು ಕಿಡಿಕಾರಿದರು.
“ಈ ಶೈಕ್ಷಣಿಕ ವರ್ಷ ಆರಂಭವಾಗಿ ಸುಮಾರು ಆರು ತಿಂಗಳು ಗತಿಸಿದರೂ ಕೂಡ ಹಾಸ್ಟೆಲ್ ವಿದ್ಯಾರ್ಥಿಗಳಿಗೆ ಕನಿಷ್ಠ ಮೂಲಭೂತ ಸೌಕರ್ಯಗಳು ಸಿಗದೇ ಇರುವುದು ಖೇದಕರ. ರೋಣ ಶಾಸಕರು ಜಿ. ಎಸ್. ಪಾಟೀಲ ಅವರು ಸ್ಥಳೀಯರಾಗಿದ್ದು, ಗ್ರಾಮೀಣ ಭಾಗದಿಂದ ಬಂದ ಹಾಸ್ಟೆಲ್ ವಿದ್ಯಾರ್ಥಿಗಳ ಸಮಸ್ಯೆಗಳ ಕೂಗು ಕೇಳಲಿಲ್ಲ ಅನಿಸುತ್ತದೆ. ಆದರೆ ಎಸ್ಎಫ್ಐ ಸಂಘಟನೆ ಅವುಗಳನ್ನು ಖಂಡಿಸಿ ವಿದ್ಯಾರ್ಥಿಗಳಿಗೆ ನ್ಯಾಯ ಒದಗಿಸಲು ವಿದ್ಯಾರ್ಥಿಗಳ ಪರವಾಗಿ ಪ್ರತಿಭಟನೆ ಮಾಡುತ್ತಿದ್ದೇವೆ” ಎಂದರು.
ಇಂದು ವಸತಿ ನಿಲಯದಲ್ಲಿ ವಿದ್ಯಾರ್ಥಿಗಳು ಸಮಸ್ಯೆಗಳನ್ನು ಸರಿಪಡಿಸಲು ಎಸ್ ಎಫ್ ಐ ನೇತೃತ್ವದಲ್ಲಿ ಹೋರಾಟ ಮಾಡಿದ್ದಾರೆ. ಸಂಬಂಧಪಟ್ಟ ಇಲಾಖೆಯ ಜಿಲ್ಲಾಧಿಕಾರಿಗಳು ಹಾಗೂ ತಾಲೂಕಾ ಅಧಿಕಾರಿಗಳು ಬಾಲಕರ ಮೆಟ್ರಿಕ್ ನಂತರದ ಡಾಕ್ಟರ್ ಬಿ ಆರ್ ಅಂಬೇಡ್ಕರ್ ವಸತಿ ನಿಲಯದ ವಿದ್ಯಾರ್ಥಿಗಳಿಗೆ ಮೂಲಭೂತ ಸೌಕರ್ಯಗಳನ್ನು ಕೊಡಬೇಕು ” ಎಂದು ಆಗ್ರಹಿಸಿದರು.
ಪ್ರತಿಭಟನೆ ಸ್ಥಳಕ್ಕೆ ಭೇಟಿ ನೀಡಿದ ತಾಲೂಕ ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿಗಳು ಗೀತಾ ಆಲೂರ ಅವರು, “ಎಲ್ಲ ಸೌಲಭ್ಯಗಳನ್ನು ಒದಗಿಸಲು ಸಮಯಬೇಕು” ಎಂದಾಗ ವಿದ್ಯಾರ್ಥಿಗಳು ತಿರಸ್ಕರಿಸಿದರು.
“ತಕ್ಷಣಕ್ಕೆ ಕೆಲವು ಸಮಸ್ಯೆಗಳನ್ನು ಪರಿಹರಿಸಲು ಮುಂದಾಗಿದ್ದು, ಸೋಪ್ ಕೀಟ್, ಹಾಸಿಗೆ ಹೋದಿಕೆ, ನೀರು, ಶೌಚಾಲಯ ಸ್ವಚ್ಛತೆ, ಆಟದ ಸಾಮಗ್ರಿಗಳು, ಸ್ನಾನಕ್ಕೆ ಬಕೆಟ್ ಇವುಗಳನ್ನು ಕಲ್ಪಿಸಿದರು. ಇನ್ನೂ ಕೆಲವು ಬೇಡಿಕೆಗಳು ಕಟ್ಟಡ ಸೋರಿಕೆ, ಕೀಟಕಿ ರೀಪೇರಿ, ಸೋಳ್ಳೇ ಪರದೆ, ಕಂಪ್ಯೂಟರ್ ಲ್ಯಾಬ್ ಇವುಗಳನ್ನು ಒಂದು ತಿಂಗಳ ಅವಧಿಯಲ್ಲಿ ಸರಿಪಡಿಸುತ್ತೇವೆಂದು ಲಿಖಿತ ರೂಪದಲ್ಲಿ ಭರವಸೆ” ನೀಡಿದರು.
ಪ್ರತಿಭಟನೆಯಲ್ಲಿ ಮೇಲ್ವಿಚಾರಕರು ಅಲಿ ನದಾಫ, ಗಜೇಂದ್ರಗಡ ಎಸ್ ಎಫ್ ಐ ತಾಲೂಕ ಅಧ್ಯಕ್ಷರು ಅನಿಲ್ ಆರ್, ಹಾಸ್ಟೆಲ್ ಉಪ ಸಮಿತಿಯ ಸಹ ಸಂಚಾಲಕರು ಶರಣು ಮಾಟರಂಗಿ ಹಾಗೂ ದುರಗಪ್ಪ ಮಾದರ, ಸುನೀಲ್ ರಾಠೋಡ, ಪರಶುರಾಮ ಲಮಾಣಿ ಮಹಾಂತೇಶ, ಹನುಮಂತಪ್ಪ ನೆಲ್ಲೂರ, ಸಂಗಪ್ಪ ಮಾದರ, ಮಾಂತೇಶ್ ದ್ಯಾಮಣ್ಣವರ, ರಾಜೇಶ ಮಾದರ ದರ್ಶನ್ ಚಲವಾದಿ, ಗಂಗಾಧರ್ ಲಮಾಣಿ ಹಾಗೂ ವಸತಿ ನಿಲಯದ ನೂರಾರು ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
