ಹಾವನೂರು ಪ್ರತಿಷ್ಠಾನವು ಪ್ರತಿ ವರ್ಷದಂತೆ ಶಿಕ್ಷಕರ ದಿನಾಚರಣೆಗೆ ನೀಡುವ ಅತ್ಯುತ್ತಮ ಶಿಕ್ಷಕ ಪ್ರಶ್ತಸ್ತಿಯನ್ನು ಅಂಧ ಶಿಕ್ಷಕ ಮಂಜುನಾಥ ಕಮ್ಮಾರಗೆ ಲಭಿಸಿದೆ.
ಹಾವೇರಿ ಪಟ್ಟಣದ ವಿನಾಯಕ ನಗರದಲ್ಲಿರುವ ಜ್ಞಾನ ಜ್ಯೋತಿ ಅಂಧರ ಶಾಲೆಯಲ್ಲಿ ಅಂಧ ಮಕ್ಕಳ ವಸತಿಯುತ ಪ್ರಾಥಮಿಕ ಹಾಗೂ ಪ್ರೌಢ ಶಾಲೆಯ ಅಂಧ ಸಂಗೀತ ಶಿಕ್ಷಕ ಮಂಜುನಾಥ ಎಸ್. ಕಮ್ಮಾರ ಅವರಿಗೆ ಪಟ್ಟಣದ ಇಜಾರಿಲಕಮಾಪುರದ ಜ್ಞಾನ ಪ್ರಜ್ಞಾ ಶಿಕ್ಷಣ ಸಂಸ್ಥೆಯಲ್ಲಿ ಹಾವನೂರು ಪ್ರತಿಷ್ಠಾನವು ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಯಿತು.
ನಂತರ ಹಿರಿಯ ಸಾಹಿತಿ ಹನಮಂತ ಗೊಲ್ಲರ ಮಾತನಾಡಿ, “ದೈಹಿಕವಾಗಿ ಎಲ್ಲವನ್ನೂ ಪಡೆದವರಿಗಿಂತ ವಿಕಲಾಂಗರಿಗೆ ಪ್ರಶಸ್ತಿ ನೀಡುವುದು ಸಮಾಜಪರವಾದ ಒಳ್ಳೆ ಕೆಲಸ. ಅಂಧರಾದ ಮಂಜುನಾಥ ಸಂಗೀತ ಶಿಕ್ಷಕರಾಗಿ ನೂರಾರು ಮಕ್ಕಳಿಗೆ ತಮ್ಮ ಪ್ರತಿಭೆಯನ್ನು ಧಾರೆ ಎರೆದವರು. ಇಂಥವರನ್ನು ಹಾವನೂರು ಪ್ರತಿಷ್ಠಾನು ಗುರುತಿಸಿ ಸನ್ಮಾನಿಸುತ್ತಿರುವುದು ಮಾದರಿಯ ಕೆಲಸ” ಎಂದು ನುಡಿದರು.
ಮುಖ್ಯ ಅತಿಥಯಾಗಿದ್ದ ಹಾವೇರಿ ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷರು ವಾಯ್.ಬಿ.ಆಲದಕಟ್ಟಿ – “ಅಲಕ್ಷಿತ ಮತ್ತು ಉಪೇಕ್ಷೆಗೊಳಗಾದವರನ್ನು ಸಮಾಜ ಗುರುತಿಸಬೇಕು. ಅಂತಹ ಕೆಲಸವನ್ನು ಹಾವನೂರು ಪ್ರತಿಷ್ಠಾ ಮೂರು ದಶಕಗಳಿಂದ ಮಾಡುತ್ತಿರುವುದು ಪ್ರಶಂಸನೀಯ” ಎಂದರು.
ಹಾವನೂರು ಪ್ರತಿಷ್ಠನದ ಅಧ್ಯಕ್ಷ ವಿರೂಪಾಕ್ಷ ಹಾವನೂರು ಮಾತನಾಡಿ, “ಶಿಕ್ಷಕರ ದಿನಾಚರಣೆಯ ನಿಮಿತ್ತ ‘ಅತ್ಯುತ್ತಮ ಶಿಕ್ಷಕ’ ಪ್ರಶಸ್ತಿಗೆ ಶಿಕ್ಷಕ ಮಂಜುನಾಥ ಕಮ್ಮಾರ ಅವರನ್ನು ಆಯ್ಕೆ ಮಾಡಲಾಗಿದೆ. ಅವರು ಅವಿರತವಾಗಿ ಸಂಗೀತ ಸೇವೆಯಲ್ಲಿಯೇ ತೊಡಗಿಸಿಕೊಂಡಿದ್ದು, ಅವರ ಸಂಗೀತ ಸೇವೆ ಹಾಗೂ ಪ್ರತಿಭೆಯನ್ನು ಗುರುತಿಸಿ ಗೌರವಿಸಲಾಗಿದೆ” ಎಂದು ಹೇಳಿದರು.
ಈ ಸಂರ್ಭದಲ್ಲಿ ಪ್ರಶಸ್ತಿ ಪುರಸ್ಕೃತರಾದ ಮಂಜುನಾಥ ಕಮ್ಮಾರ ಮತ್ತು ಪತ್ನಿ ಶ್ರೀಮತಿ ಕವಿತಾ ಅವರನ್ನು ಪ್ರತಿಷ್ಠಾನದ ಅಧ್ಯಕ್ಷರಾದ ವಿರೂಪಾಕ್ಷ ಹಾವನೂರ ಹಾಗೂ ವೇದಿಕೆ ಗಣ್ಯರು ಪ್ರಶಸ್ತಿ ಫಲಕ ನೀಡಿ ಸನ್ಮಾನಿಸಿದರು.
ಸಮಾರಂಭವನ್ನು ಉದ್ದೇಶಿಸಿ ಹಿರಿಯ ನ್ಯಾಯವಾದಿ ಕೆ.ಸಿ. ಪಾವಲಿ, ಮುಖ್ಯೋಪಾಧ್ಯಾಯರಾದ ವಸಂತ ಮಾಗಣಿನವರ, ಗುರುಪಾದಗೌಡ ಪಾಟೀಲ, ಸುಭಾಸ ಹುಲ್ಯಾಳದ, ಹಿರಿಯ ಸಾಹಿತಿ ಸತೀಶ ಕುಲಕರ್ಣಿ ಮುಂತಾದವರು ಮಾತನಾಡಿದರು. ಗಣ್ಯರಾದ ಸರ್ವಶ್ರೀ ಈರಣ್ಣ ಬೆಳವಡಿ, ಮನೋಹರ ಅರ್ಕಸಾಲಿ, ಜಗದೀಶ ಚೌಟಗಿ, ಶಿಕ್ಷಕಿ ಲಿಂಗಾಮಣಿ ಮುಂತಾದವರು ಉಪಸ್ಥಿತರಿದ್ದರು. ಆರಂಭದಲ್ಲಿ ಚಂದ್ರಶೇಖರ ಮಾಳಗಿ ಸ್ವಾಗತಿಸಿದರು. ಎಸ್.ಆರ್. ಹಿರೇಮಠ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಕಾರ್ಯಕ್ರಮವನ್ನು ಶಿಕ್ಷಕಿ ಶ್ರೀದೇವಿ ಹಾವನೂರು ನಡೆಸಿಕೊಟ್ಟರೆ, ಎನ್.ಬಿ.ಕಾಳೆ ಎಲ್ಲರನ್ನು ವಂದಿಸಿದರು.
