ಯಾವುದೇ ಆಸೆ ಆಮಿಷಗಳಿಗೆ ಬಲಿಯಾಗದೆ ನಿರಂತರವಾಗಿ ದಲಿತರ ಅಭಿವೃದ್ಧಿಗೆ ತಮ್ಮ ಜೀವನವನ್ನೇ ಮುಡಿಪಾಗಿಟ್ಟವರು ದಿ.ಹೊಸಹುಡ್ಯ ಗೋಪಿಯವರು ಎಂದು ದಸಂಸ ಹಿರಿಯ ಮುಖಂಡ ಹಾಗೂ ಜಿಲ್ಲಾ ಸಂಘಟನಾ ಸಂಚಾಲಕ ಬಿ.ವೆಂಕಟರಮಣ ಅಭಿಪ್ರಾಯಪಟ್ಟರು.
ಚಿಕ್ಕಬಳ್ಳಾಪುರ ಜಿಲ್ಲೆಯ ಬಾಗೇಪಲ್ಲಿ ಪಟ್ಟಣದ ಖಾಸಗಿ ಮಂಟಪದಲ್ಲಿ ಶುಕ್ರವಾರ ದಸಂಸ ವತಿಯಿಂದ ಆಯೋಜಿಸಿದ್ದ ದಿ.ಹೊಸಹುಡ್ಯ ಗೋಪಿಯವರಿಗೆ ನುಡಿನಮನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಅವರು ಮಾತನಾಡಿದರು.
ಗೋಪಿಯವರು ತಮ್ಮ ಜೀವನ ಪೂರ್ತಿ ದಲಿತ ಸಮುದಾಯಗಳ ಜನತೆಗೆ ನ್ಯಾಯ ಒದಗಿಸಲು ತುಡಿತವನ್ನು ಹೊಂದಿದ್ದರು. ದಲಿತರಿಗೆ ಭೂಮಿ, ನಿವೇಶನಗಳನ್ನು ಒದಗಿಸಲು ಸರಕಾರಗಳ ವಿರುದ್ಧ ರಾಜಿರಹಿತ ಹೋರಾಟಗಳನ್ನು ನಡೆಸುವಲ್ಲಿ ಮುಂದಿದ್ದರು. ಇಂತಹ ಧೀಮಂತ ನಾಯಕ ಸೆ.25 ರಂದು ನಮ್ಮೆಲ್ಲರನ್ನು ಅಗಲಿದರು. ಅಂತಹ ಪ್ರಾಮಾಣಿಕ ನಾಯಕನ ಆದರ್ಶಗಳನ್ನು ಯುವ ಪೀಳಿಗೆ ಪಾಲಿಸಬೇಕು. ಎಷ್ಟೇ ಆಸೆ, ಆಮೀಷಗಳನ್ನು ಒಡ್ಡಿದರೂ ಗೋಪಿಯ ರೀತಿ ತಿರಸ್ಕರಿಸಿ, ಧ್ವನಿ ಇಲ್ಲದವರ ಏಳಿಗೆಗೆ ನಾವೆಲ್ಲರೂ ಶ್ರಮಿಸೋಣ ಎಂದು ಕರೆ ನೀಡಿದರು.
ಸಂಘಟನೆಗೆ ಸಮರ್ಪಣಾ ಭಾವ ಮುಖ್ಯ :
ದಸಂಸ ಜಿಲ್ಲಾ ಸಂಚಾಲಕ ಕೆ.ಸಿ ರಾಜೀಕಾಂತ್ ಮಾತನಾಡಿ, ಗೋಪಿಯವರು ಯಾವುದೇ ಸಂದರ್ಭದಲ್ಲಾಗಲಿ, ರಾಜ್ಯ ಅಥವಾ ನೆರೆಯ ಆಂಧ್ರಪ್ರದೇಶದಲ್ಲಾಗಲಿ ಸಂಘಟನೆಯ ವಿಚಾರದಲ್ಲಿ ಹಾಗೂ ದೌರ್ಜನ್ಯದ ವಿರುದ್ಧ ಧ್ವನಿ ಎತ್ತುವುದರಲ್ಲಿ ಸದಾ ಸಿದ್ದರಿರುತ್ತಿದ್ದರು. ಹಾಗಾಗಿ ಸಂಘಟನೆಗೆ ಸಮರ್ಪಣಾ ಮನೋಭಾವ ಮತ್ತು ಸಂಘರ್ಷ ಅತಿ ಮುಖ್ಯವಾಗಿರುತ್ತದೆ. ಅವೆಲ್ಲವನ್ನು ಗೋಪಿ ಹೊಂದಿದ್ದರು. ತಾಲೂಕಿನ ಕಾನಗಮಾಕಲಪಲ್ಲಿ, ಮಿಟ್ಟೇಮರಿ, ಗೌನಿಪಲ್ಲಿ ಮತ್ತಿತರ ಪ್ರದೇಶಗಳಲ್ಲಿ ನಿವೇಶನ, ವಸತಿ ರಹಿತರಿಗಾಗಿ ಹೋರಾಟಗಳನ್ನು ನಡೆಸಿ, ನ್ಯಾಯ ಒದಗಿಸಿದವರಲ್ಲಿ ಗೋಪಿಯೂ ಒಬ್ಬರಾಗಿದ್ದರು. ಅಂತಹ ನಾಯಕ ನಮ್ಮಿಂದ ದೂರವಾಗಿರುವುದು ನೋವಿನ ವಿಚಾರ ಎಂದರು.
ಈ ಸಭೆಯಲ್ಲಿ ಗಾಯಕ ಗೋಪಿನಾಥ್ ಹಾಗೂ ತಂಡದ ಕಲಾವಿದರಿಂದ ಗೋಪಿಯವರ ಆತ್ಮಕ್ಕೆ ಶಾಂತಿ ಕೋರಿ ಹಲವಾರು ಗೀತೆಗಳನ್ನು ಹಾಡಿ ನುಡಿ ನಮನ ಸಲ್ಲಿಸಿದರು.
ಈ ಸುದ್ದಿ ಓದಿದ್ದೀರಾ? ಚಿಕ್ಕಬಳ್ಳಾಪುರ | ಒಳಮೀಸಲಾತಿಗೆ ಆಗ್ರಹಿಸಿ ದಲಿತ ಸಂಘಟನೆಗಳ ಬೃಹತ್ ಪ್ರತಿಭಟನೆ
ಇದೇ ವೇಳೆ ದಸಂಸ ಮುಖಂಡರಾದ ಸಿ.ಜಿ ಗಂಗಪ್ಪ, ಬಿ.ವಿ ಆನಂದ್, ಎನ್ ಎ ವೆಂಕಟೇಶ್, ಕಡ್ಡೀಲು ವೆಂಕಟರಮಣ, ವಿ.ಗಂಗಪ್ಪ, ನರಸಿಂಹಮೂರ್ತಿ, ರಂಗಪ್ಪ, ಪರಮೇಶ್, ರವಣ, ಚಲಪತಿ, ನರಸಿಂಹಪ್ಪ ಮತ್ತಿತರರು ಇದ್ದರು.
