ಬಿಡದಿ ಟೌನ್‌ಶಿಪ್ ಯೋಜನೆಗೆ ತೀವ್ರ ವಿರೋಧ ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ಬೈರಮಂಗಲ ಗ್ರಾಮದಲ್ಲಿ ಟೌನ್‌ಶಿಪ್ ಯೋಜನೆ ವಿರುದ್ಧ ಘೋಷಣೆಗಳಿದ್ದ ಬ್ಯಾನರ್‌ಗಳಿಗೆ ರಕ್ತ ಹಚ್ಚುವ ಮೂಲಕ ರೈತರು ಮತ್ತು ರೈತ ಮಹಿಳೆಯರು ಪ್ರತಿಭಟನೆ ಕೈಗೊಂಡರು.
ಭೂ ಸ್ವಾಧೀನ ಯೋಜನೆಯನ್ನು ವಿರೋಧಿಸಿ, “ರಕ್ತ ಕೊಡುವೆವು ಹೊರತು ಭೂಮಿ ಕೊಡುವುದಿಲ್ಲ” ಎಂಬ ಘೋಷಣೆಯೊಂದಿಗೆ ಬೆರಳು ಚುಚ್ಚಿಕೊಂಡು ರಕ್ತದಲ್ಲಿ ಬ್ಯಾನರ್‌ಗಳ ಮೇಲೆ ಬರೆಯುವ ಮೂಲಕ “ಜೀವ ಬಿಟ್ಟರೂ ಭೂಮಿ ಬಿಡುವುದಿಲ್ಲ” ಎಂದು ಸಾಂಕೇತಿಕ ಹೋರಾಟಕ್ಕೆ ಮುಂದಾದರು.
ಬಲವಂತದ ಭೂಸ್ವಾಧೀನ ಮಾಡುವುದಿಲ್ಲ ಎಂಬ ಹೇಳಿಕೆ ನೀಡುವ ಸರ್ಕಾರ, ಈಗಾಗಲೇ 4,940 ಎಕರೆ ಭೂಮಿ ಸ್ವಾಧೀನಪಡಿಸುವ ಅಂತಿಮ ಅಧಿಸೂಚನೆ ಹೊರಡಿಸಿದೆ. ಇದು ಸರ್ಕಾರ ತನ್ನ ಹೇಳಿಕೆಗೆ ಬದ್ಧವಾಗಿಲ್ಲ ಎಂಬುದಕ್ಕೆ ಸಾಕ್ಷಿ ಎಂದು ಪ್ರತಿಭಟನಾಕಾರರು ಆರೋಪಿಸಿದ್ದಾರೆ.
ಜಂಟಿ ಮಾಪನ ಸಮೀಕ್ಷೆ (JMC Survey) ನಡೆಸುವ ವೇಳೆ ಪ್ರತಿಭಟನಾನಿರತ ರೈತರು ಅಧಿಕಾರಿಗಳಿಗೆ ಸಮೀಕ್ಷೆ ನಡೆಸಲು ಅಡ್ಡಿ ಪಡಿಸಿದರು ಎಂಬ ಕಾರಣಕ್ಕೆ ಸ್ಥಳದಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿತ್ತು. ತರುವಾಯ ರಾಜ್ಯ ಸರ್ಕಾರ ಜಂಟಿ ಮಾಪನ ಸಮೀಕ್ಷೆ ಪ್ರಕ್ರಿಯೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ.
ಸರ್ಕಾರ ಬಿಡದಿ ಟೌನ್‌ಶಿಪ್ ಯೋಜನೆ ಕೈಬಿಡದಿದ್ದರೆ ಮುಂದಿನ ದಿನಗಳಲ್ಲಿ ಹೋರಾಟ ತೀವ್ರಗೊಳಿಸಲಾಗುತ್ತದೆ. ಒತ್ತಡಕ್ಕೆ ಮಣಿದು ಭೂಮಿ ಬಿಟ್ಟುಕೊಡುವ ನಿರ್ಧಾರವನ್ನು, ರೈತರಿಂದ ನಿರೀಕ್ಷಿಸದಿರಲಿ ಎಂದು ರೈತರು ಸರ್ಕಾರವನ್ನು ಎಚ್ಚರಿಸಿದ್ದಾರೆ.
