ಶಿವಮೊಗ್ಗ ಜಿಲ್ಲೆಯ ಸಾಗರದ ಗಾಂಧಿನಗರ ಯುವಜನ ಸಂಘದಿಂದ 31ನೇ ವರ್ಷದ ರಾಷ್ಟ್ರಮಟ್ಟದ ವಿಜಯದಶಮಿ ಅಂಗವಾಗಿ ಕುಸ್ತಿ ಪಂದ್ಯಾವಳಿಯನ್ನು ಅ.21 ರಂದು ಬುಧವಾರ ಮಧ್ಯಾಹ್ನ 2 ಗಂಟೆಗೆ ಸಾಗರದ ಸಂಗೊಳ್ಳಿರಾಯಣ್ಣ ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿದೆ ಎಂದು ಯುವಜನ ಸಂಘದ ಅಧ್ಯಕ್ಷ ಧರ್ಮರಾಜ್ ಹೇಳಿದರು.
ಪತ್ರಿಕಾಭವನದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, “ಗಾಂಧಿನಗರ ಯುವಜನ ಸಂಘವನ್ನು ಕೋರಿ ಶಿವಾನಂದಪ್ಪನವರು ಕಳೆದ ೫೧ ವರ್ಷಗಳ ಹಿಂದೆ ಸ್ಥಾಪಿಸಿದ್ದಾರೆ.ಅಂದಿನಿಂದ ಇಂದಿನವರೆಗೂ ಹಲವಾರುಜನ ಕ್ರಿಯಾಶೀಲ ಅಧ್ಯಕ್ಷರು,ಪದಾಧಿಕಾರಿಗಳು ನಿರಂತರ ಕೆಲಸಮಾಡಿದ್ದಾರೆ.ಸಾಂಸ್ಕೃತಿಕ,ಕ್ರೀಡಾ ಉತ್ಸವಗಳನ್ನು ಆಯೊಜಿಸುವ ಮೂಲಕ ರಾಷ್ಟ್ರಮಟ್ಟದಲ್ಲಿ ಯುವಜನ ಸಂಘದ ಕೀರ್ತಿ ವಿಸ್ತರಿಸಿದೆ” ಎಂದರು.
“ಪುರುಷರ ಕುಸ್ತಿ ಪಂದ್ಯಾವಳಿಯ ಜೊತೆಗೆ ಮಕ್ಕಳ ಕುಸ್ತಿ ಹಾಗೂ ಮಹಿಳಾ ಕುಸ್ತಿಗಳ ಆಯೋಜಿಸುವ ಮೂಲಕ ಸಾಂಪ್ರದಾಯಿಕ ಕುಸ್ತಿ ಕ್ರೀಡೆಯನ್ನು ಪ್ರೋತ್ಸಾಹಿಸಿ,ಬೆಳೆಸುವ ಮೂಲಕ ಗಾಂಧಿನಗರ ಯುವಜನ ಸಂಘ ಕ್ರೀಡಾ-ಸಾಂಸ್ಕೃತಿಕ ಕೃಷಿಯಲ್ಲಿ ಪ್ರಾಮಾಣಿಕ ಪ್ರಯತ್ನ ಮುಂದುವರಿಯುತ್ತದೆ. ಸಂಘದಲ್ಲಿ ಯಾವುದೇ ಆರ್ಥಿಕ ಆಧಾಯವಿಲ್ಲದಿದ್ದರೂ ಪ್ರತಿ ವರ್ಷದ ದಸರಾ ಕುಸ್ತಿಗೆ ಸಾಗರದಿಂದ ಬೆಂಗಳೂರುವರೆಗಿನ ದಾನಿಗಳ ತುಂಬುಹೃದಯದ ಸಹಕಾರವನ್ನು ನಿರಂತರ ಸ್ಮರಿಸುತ್ತೇವೆ” ಎಂದು ಹೇಳಿದರು.
“ರಾಷ್ಟ್ರಮಟ್ಟದ ಕುಸ್ತಿ ಪಂದ್ಯಾವಳಿಯಾಗಿದ್ದರಿಂದ ಕರ್ನಾಟಕದ ದಾವಣಗೆರೆ,ಬೆಳಗಾವಿ,ರೋಣ ಸೇರಿದಂತೆ ಕುಸ್ತಿ ಪಟುಗಳು ಆಗಮಿಸುತ್ತಾರೆ. ಮಹಾರಾಷ್ಟ್ರ,ದೆಹಲಿ,ಹರಿಯಾಣ,ಪಂಜಾಬ್ ಮೊದಲಾದ ರಾಜ್ಯಗಳಿಂದಲೂ ಸಾಗರಕ್ಕೆ ಕುಸ್ತಿಪಟುಗಳು ಆಗಮಿಸುತ್ತಾರೆ.ಮೈಸೂರು ದಸರಾದಲ್ಲಿ ಕುಸ್ತಿ ಪಂದ್ಯಾವಳಿಗೆ ಆಗಮಿಸಿರುವ ನುರಿತ ಕುಸ್ತಿಪಟುಗಳು ನೇರವಾಗಿ ಸಾಗರಕ್ಕೆ ಆಗಮಿಸುತ್ತಾರೆ” ಎಂದು ತಿಳಿಸಿದರು.
10 ಲಕ್ಷ ರೂಗಳ ಅಂದಾಜು ವೆಚ್ಚವಾಗುವಂತಹ ಕುಸ್ತಿಪಂದ್ಯಾವಳಿಯಲ್ಲಿ ಕುಸ್ತಿಪಟುಗಳಿಗೆ ನಮ್ಮ ಶಕ್ತಿಮೀರಿ ಆರ್ಥಿಕ ನೆರವು ಬಹುಮಾನ ರೂಪದಲ್ಲಿ ನೀಡುತ್ತೇವೆ. ವಿಶೇಷವಾಗಿ ಪರ್ಯಾಯ ಬೆಳ್ಳಿಗದೆ, ಬಂಗಾರದ ಬಳೆ ಮತ್ತು ಅಖಾಡ ಬಳೆ, ಪರ್ಸಿ ಬಳೆ ಸೇರಿದಂತೆ ಆಕರ್ಷಕ ನಗದು ಬಹುಮಾನಗಳನ್ನು ನೀಡಲಾಗುತ್ತಿದೆ ಎಂದರು.
ಮಹಿಳಾ ಕುಸ್ತಿ ಆಯೋಜನೆ:ಕಳೆದ ೧೦ ವರ್ಷಗಳಿಂದ ಮಹಿಳಾ ಕುಸ್ತಿಯನ್ನು ವಿಶೇಷವಾಗಿ ಆಯೋಜಿಸುತ್ತಿದ್ದೇವೆ. ಸಾಗರದ ಇಂದಿರಾಗಾಂಧಿ ಮಹಿಳಾ ಪ್ರಥಮ ದರ್ಜೆ ಕಾಲೇಜಿನಲ್ಲಿ ೩೨ ಜನ ಮಹಿಳಾ ಕುಸ್ತಿಪಟುಗಳಿದ್ದಾರೆ.ಜೋಗ-ಕಾರ್ಗಲ್ ನಿಂದಲೂ ಕುಸ್ತಿಪಟುಗಳು ಆಗಮಿಸುತ್ತಾರೆ.ದಾವಣಗೆರೆ,ರಾಣೆಬೆನ್ನೂರು ,ಶಿವಮೊಗ್ಗ ,ದಕ್ಷಿಣ ಕನ್ನಡ ಸೇರಿದಂತೆ ವಿವಿಧ ವಿಶ್ವ ವಿದ್ಯಾನಿಲಯಗಳಿಂದಲೂ ಮಹಿಳಾ ಕುಸ್ತಿಪಟುಗಳು ಸಾಗರಕ್ಕೆ ಈ ಕುಸ್ತಿ ಪಂದ್ಯಾವಳಿಗೆ ಆಗಮಿಸುತ್ತಾರೆ ಎಂದರು.
ಉದ್ಘಾಟನೆ ಮತ್ತು ವೇದಿಕೆ ಕಾರ್ಯಕ್ರಮ:
ಗಾಂಧಿನಗರ ಯುವಜನ ಸಂಘದಿಂದ ೫೧ನೇ ವರ್ಷದ ರಾಷ್ಟ್ರಮಟ್ಟದ ವಿಜಯದಶಮಿ ಅಂಗವಾಗಿ ಕುಸ್ತಿ ಪಂದ್ಯಾವಳಿಯನ್ನು ಕ್ಷೇತ್ರ ಶಾಸಕರು,ಕರ್ನಾಟಕ ರಾಜ್ಯ ಅರಣ್ಯ ಕೈಗಾರಿಕಾ ಅಭಿವೃದ್ದಿ ನಿಗಮದ ಅಧ್ಯಕ್ಷ ಗೋಪಾಲಕೃಷ್ಣ ಬೇಳೂರು ಉದ್ಘಾಟಿಸುವರು.ಹಿರಿಯ ಮುತ್ಸದ್ದಿ ರಾಜಕಾರಣಿ ದೇವರಾಜು ಅರಸು ಪ್ರಶಸ್ತಿ ಪುರಸ್ಕೃತರುರಡು ವಿಶ್ವವಿದ್ಯಾನಿಲಯಗಳ ಗೌರವ ಡಾಕ್ಟರೇಟ್ ಪದವಿ ಪಡೆದ ಕರ್ನಾಟಕ ರಾಜ್ಯದ ವಿಧಾನಸಭೆಯ ಮಾಜಿ ಸ್ಪೀಕರ್ ಕಾಗೋಡುತಿಮ್ಮಪ್ಪನವರು ಆಗಮಿಸುವರು.
ಪ್ರಮುಖವಾಗಿ ಲೋಕಸಭಾ ಸದಸ್ಯ ಬಿ.ವೈ.ರಾಘವೇಂದ್ರ ಅವರು ಕುಸ್ತಿ ಪಂದ್ಯಾವಳಿ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಳ್ಳುವರು.ಸಾಗರದ ವಿವಿಧ ಪ್ರಮುಖ ಗಣ್ಯಾತಿಗಣ್ಯರು ಆಗಮಿಸಲಿದ್ದು,ಹೆಚ್ಚಿನ ಸಂಖ್ಯೆಯಲ್ಲಿ ಪ್ರೇಕ್ಷಕರು ಆಗಮಿಸುವ ಮೂಲಕ ರಾಷ್ಟ್ರಮಟ್ಟದ ವಿಜಯದಶಮಿ ಕುಸ್ತಿ ಪಂದ್ಯಾವಳಿಯನ್ನು ಬೆಂಬಲಿಸುವಂತೆ ಮನವಿ ಮಾಡಿದರು.
