ಇತಿಹಾಸ ಗೊತ್ತಿಲ್ಲದವನು ವಿಜ್ಞಾನವನ್ನು ಓದಲಾರ. ನಮ್ಮ ಸಂಸ್ಕೃತಿ ಮತ್ತು ಪರಂಪರೆ ಮುಂದಿನ ಪೀಳಿಗೆಗೆ ತಲುಪಬೇಕಾದರೆ ಅಧ್ಯಯನ ಪೀಠಗಳು ಕೇವಲ ಸಾಹಿತ್ಯಕ್ಕೆ ಸೀಮಿತವಾಗದೆ ರಾಜಮನೆತನದ ಆಳ್ವಿಕೆ ಸೇರಿದಂತೆ ಹತ್ತು ಹಲವು ವಿಷಯಗಳ ಕುರಿತು ಸಂಶೋಧನೆ ನಡೆಸಬೇಕು. ಇತಿಹಾಸದ ಅರಿವಿನಿಂದ ಮಾತ್ರ ಸುಂದರ ಸಮಾಜ ನಿರ್ಮಾಣ ಸಾಧ್ಯ ಎಂದು ಮಾಜಿ ಸಚಿವ ಜೆ. ಸಿ. ಮಾಧುಸ್ವಾಮಿ ಅಭಿಪ್ರಾಯಪಟ್ಟರು.
ತುಮಕೂರು ವಿಶ್ವವಿದ್ಯಾನಿಲಯ ಹಾಗೂ ನೊಳಂಬ ಲಿಂಗಾಯತ ಸಂಘದ ಸಹಯೋಗದಲ್ಲಿ ಮೇ 14 ಗುರುವಾರ ದಂದು ಹಮ್ಮಿಕೊಂಡಿದ್ದ ನೊಳಂಬ ಸಂಸ್ಕೃತಿ ಅಧ್ಯಯನ ಪೀಠದ ಉದ್ಘಾಟನೆ, ಲಾಂಛನ ಲೋಕಾರ್ಪಣೆ ಹಾಗೂ ನೊಳಂಬ ಸಂಸ್ಕೃತಿ ಸಂಪದ ವಿಚಾರ ಸಂಕಿರಣ ಉದ್ಘಾಟಿಸಿ ಮಾತನಾಡಿದರು.
ನಾವು ಅಸೂಯೆಯ ಪರಕಾಷ್ಠೆ ತಲುಪಿದ್ದೇವೆ. ಪಿತೂರಿ ಮಾಡುವುದನ್ನು ಬಿಟ್ಟು ಬೆಳೆಯುವವರನ್ನು ಪ್ರೋತ್ಸಾಹಿಸಬೇಕು. ನೊಳಂಬ ರಾಜಮನೆತನದ ಇತಿಹಾಸ ಜಗತ್ತಿಗೆ ಸರಿಯಾಗಿ ಪರಿಚಯವಾಗಿಲ್ಲ. ಸಿದ್ದರಾಮಣ್ಣನ ಮೆಂಟರ್ ಚಮಲಾದೇವಿ ಏಳು ನೊಳಂಬ ರಾಜಮನೆತನಗಳನ್ನು ಸಾಕಿದ ದೇವತೆ ಎಂಬಂತಹ ಸತ್ಯಗಳು ಹೊರಬರಬೇಕಿದೆ. ಅಧ್ಯಯನ ಪೀಠದ ಅನುದಾನವು ಕೇವಲ ಆಚರಣೆಗಲ್ಲದೆ, ಆಳವಾದ ಸಂಶೋಧನೆಗೆ ಬಳಕೆಯಾಗಲಿ ಎಂದರು.
ಶಾಸಕ ಕೆ. ಷಡಕ್ಷರಿ ಮಾತನಾಡಿ 16ನೇ ಶತಮಾನದವರೆಗೂ ನೊಳಂಬ ಸಮಾಜ ನೀಡಿದ ಅಪಾರ ಕೊಡುಗೆಗಳು ಬೆಳಕಿಗೆ ಬಾರದಿರುವುದು ನೋವಿನ ಸಂಗತಿ. ಸಮಾಜವಿಲ್ಲದೆ ನಾವಿಲ್ಲ, ಸಮಾಜ ನಮಗೆ ನೀಡಿದ ಕೊಡುಗೆಗೆ ಪ್ರತಿಯಾಗಿ ನಾವೂ ಏನಾದರೂ ನೀಡಬೇಕು. ಈ ಅಧ್ಯಯನ ಪೀಠವು ಅಭಿವೃದ್ಧಿ ಪಥದತ್ತ ಸಾಗಲಿ ಎಂದರು.
ಶಾಸಕ ಜ್ಯೋತಿಗಣೇಶ್ ಮಾತನಾಡಿ ನೊಳಂಬ ಸಮಾಜದವರು ಕೇವಲ ಜಯಂತಿಗಳಿಗೆ ಸೀಮಿತವಾಗಬಾರದು. ಆಧುನಿಕ ತಂತ್ರಜ್ಞಾನ ಮತ್ತು ಡಿಜಿಟಲ್ ವೇದಿಕೆಗಳನ್ನು ಬಳಸಿಕೊಂಡು ಸಮಾಜದ ಇತಿಹಾಸವನ್ನು ವಿಶ್ವದಾದ್ಯಂತ ಪಸರಿಸಬೇಕು. ಅಭಿವೃದ್ಧಿ ಕಾರ್ಯಗಳಿಗೆ ಕೈಲಾದಷ್ಟು ಧನಸಹಾಯ ಮಾಡಬೇಕು ಎಂದು ಕರೆ ನೀಡಿದರು.
ದಿಕ್ಸೂಚಿ ಭಾಷಣ ಮಾಡಿದ ಹಂಪಿ ವಿವಿ ಕುಲಪತಿ ಪ್ರೊ. ಡಿ. ವಿ. ಪರಶಿವಮೂರ್ತಿ , ಅಧ್ಯಯನ ಪೀಠಗಳು ವಿಘಟನೆಗಾಗಿ ಅಲ್ಲ, ಸಂಘಟನೆಗಾಗಿ ಇರಬೇಕು. ಮರೆಯಾಗಿರುವ ಕೃಷಿ, ಸಾಹಿತ್ಯ ಮತ್ತು ಕಲೆಗಳ ಬಗ್ಗೆ ಅಧ್ಯಯನ ನಡೆಯಬೇಕು. ತುಮಕೂರು ವಿವಿಯಲ್ಲಿ ಈ ಪೀಠ ಸ್ಥಾಪನೆಯಾಗಿರುವುದು ಶೈಕ್ಷಣಿಕ ಮೆರಗು ತಂದಿದೆ ಎಂದರು.
ತುಮಕೂರು ವಿಶ್ವವಿದ್ಯಾನಿಲಯದ ಕುಲಪತಿ ಪ್ರೊ. ಎಂ. ವೆಂಕಟೇಶ್ವರಲು ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಅಧ್ಯಯನ ಪೀಠವು ಕೇವಲ ಹೆಸರಿಗೆ ಸೀಮಿತವಾಗದೆ ಕ್ರಿಯಾತ್ಮಕವಾಗಿ ಕೆಲಸ ಮಾಡಲಿದೆ ಎಂದು ಭರವಸೆ ನೀಡಿದರು.
ನೊಳಂಬ ಲಿಂಗಾಯತ ಸಂಘದ ಅಧ್ಯಕ್ಷರಾದ ಬಿ. ಕೆ. ಚಂದ್ರಶೇಖರ್, ನೊಳಂಬ ಲಿಂಗಾಯತ ಸಂಘದ ನಿಕಟ ಪೂರ್ವ ಅಧ್ಯಕ್ಷರಾದ ಎಸ್. ಆರ್. ಪಾಟೀಲ್, ತುಮಕೂರು ವಿವಿ ನಿಕಟ ಪೂರ್ವ ಸಿಂಡಿಕೆಟ್ ಸದಸ್ಯರಾದ ಟಿ. ಎಸ್. ಸುನೀಲ್ ಪ್ರಸಾದ್ ಮಾತನಾಡಿದರು.
ತುಮಕೂರು ವಿವಿ ನೊಳಂಬ ಸಂಸ್ಕೃತಿ ಅಧ್ಯಯನ ಪೀಠದ ನಿರ್ದೇಶಕರಾದ ಡಾ. ನೀಲಕಂಠ ಎನ್.ಟಿ. ಅವರು ಸ್ವಾಗತಿಸಿದರೆ, ಪ್ರೊ. ಬಿ.ರವೀಂದ್ರ ಕುಮಾರ್ ಅವರು ನಿರೂಪಿಸಿದರು.
