ಉತ್ತರ ಕನ್ನಡ ಜಿಲ್ಲೆಯ ಆಡಳಿತಕ್ಕೆ ಬೇಕಿದೆ ‘ಖಾಯಂ’ ಅಧಿಕಾರಿಗಳ ಭಾಗ್ಯ, ಒಂದು ಜಿಲ್ಲೆಯ ಅಭಿವೃದ್ಧಿಯ ರಥ ಸಾಗಬೇಕಾದರೆ ಅದರ ಆಡಳಿತಾತ್ಮಕ ಚಕ್ರಗಳು ಸುಸ್ಥಿತಿಯಲ್ಲಿರಬೇಕು. ಆದರೆ, ಪ್ರಕೃತಿ ಸಂಪನ್ಮೂಲಗಳಿಂದ ಸಮೃದ್ಧವಾಗಿರುವ ಜಿಲ್ಲೆಯಲ್ಲಿ ಇಂದು ಆಡಳಿತ ಯಂತ್ರವೇ ಹಳಿ ತಪ್ಪಿದಂತಿದೆ.
ನಾಲ್ಕು ಪ್ರಮುಖ ಉಪವಿಭಾಗಗಳ ಪೈಕಿ ಮೂರು ವಿಭಾಗಗಳಾದ ಶಿರಸಿ, ಭಟ್ಕಳ, ಕಾರವಾರ ಉಪವಿಭಾಗ ಗಳು’ಪ್ರಭಾರ’ ಅಧಿಕಾರಿಗಳ ನಂಬಿಕೆಯಲ್ಲಿ ನಡೆಯುತ್ತಿರುವುದು ಜಿಲ್ಲೆಯ ದುರ್ದೈವವೇ ಸರಿ. ಕೇವಲ ಕುಮಟಾ ಉಪವಿಭಾಗದಲ್ಲಿ ಮಾತ್ರ ಖಾಯಂ ಉಪವಿಭಾಗಾಧಿಕಾರಿಗಳು ಕಾರ್ಯನಿರ್ವಹಿಸುತ್ತಿದ್ದಾರೆ. ಇಡೀ ಜಿಲ್ಲೆಯಲ್ಲಿ ಒಬ್ಬರೆ ಖಾಯಂ ಅಧಿಕಾರಿಗಳು ಇರುವುದನ್ನು ಗಮನಿಸಿದರೆ ಜಿಲ್ಲೆಯ ಆಡಳಿತಾತ್ಮಕ ಯಾವ ಸ್ಥಾನದಲ್ಲಿ ಇದೆ ಎಂಬುದಕ್ಕೆ ಸಾಕ್ಷಿಯಾಗಿದೆ.
ಉಪವಿಭಾಗಾಧಿಕಾರಿ (AC) ಎನ್ನುವ ಹುದ್ದೆ ಕೇವಲ ಕಚೇರಿಯ ಒಂದು ಕುರ್ಚಿಯಲ್ಲ ಅದು ಹತ್ತಾರು ಇಲಾಖೆಗಳ ಸಮನ್ವಯಕಾರ, ಸಾವಿರಾರು ರೈತರ ಕಂದಾಯ ಸಮಸ್ಯೆಗಳ ಪರಿಹಾರ ಮತ್ತು ಭೂ ಸ್ವಾಧೀನದಂತಹ ಸಂಕೀರ್ಣ ಪ್ರಕ್ರಿಯೆಗಳ ಬಗೆಹರಿಸುವ ಅಧಿಕಾರಿ ವಾಗಿದೆ.
ಕಾರವಾರ,ಮತ್ತು ಭಟ್ಕಳದಂತಹ ಪ್ರದೇಶಗಳಲ್ಲಿ ಒಂದೂವರೆ ವರ್ಷದಿಂದ ಖಾಯಂ ಅಧಿಕಾರಿಗಳಿಲ್ಲ ಶಿರಸಿಯಲ್ಲಿ ಇದ್ದ ಉಪವಿಭಾಗಾಧಿಕಾರಿ ಕೆ ಕಾವ್ಯ ರಾಣಿ ಅವರನ್ನು ಹುಣಸೂರು ಉಪವಿಭಾಗಕ್ಕೆ ವರ್ಗಾವಣೆ ಮಾಡಲಾಗಿದೆ ಅವರೇ ಹೆಚ್ಚುವರಿಯಾಗಿ ಭಟ್ಕಳ ಉಪವಿಭಾಗವನ್ನು ನೋಡಿಕೊಳ್ಳುತ್ತಿದ್ದರು ಆದರೆ ಅವರ ವರ್ಗಾವಣೆಯಿಂದ ಎರಡು ಉಪವಿಭಾಗಗಳು ಪ್ರಭಾರಿ ಅಧಿಕಾರಿಗಳಿಂದ ನಡೆಯಬೇಕಾದ ಸ್ಥೀತಿಗೆ ಬಂದಿದೆ.
ಪ್ರಸ್ತುತ ಜಿಲ್ಲೆಯ ಬೆಳವಣಿಗೆ ಗಮನಿಸಿದರೆ ಸರ್ಕಾರಕ್ಕೆ ಈ ಜಿಲ್ಲೆಯ ಬಗ್ಗೆ ಇರುವ ಕಾಳಜಿ ಎಷ್ಟೆಂಬುದು ಸ್ಪಷ್ಟವಾಗುತ್ತದೆ. ತಹಶೀಲ್ದಾರ್‌ಗಳಿಗೆ ಉಪವಿಭಾಗದ ಹೆಚ್ಚುವರಿ ಜವಾಬ್ದಾರಿ ನೀಡುವುದರಿಂದ ಅವರ ಮೂಲ ತಾಲ್ಲೂಕುಗಳ ಕೆಲಸಗಳೂ ಕುಂಠಿತಗೊಳ್ಳುತ್ತಿವೆ.
ಪರಿಣಾಮವಾಗಿ, ಸಾಮಾನ್ಯ ಜನರಿಗೆ ಸಿಗಬೇಕಾದ ತ್ವರಿತ ನ್ಯಾಯ ಮರೀಚಿಕೆಯಾಗುತ್ತಿದೆ. ವಿಪರ್ಯಾಸವೆಂದರೆ, ಜಿಲ್ಲಾ ಉಸ್ತುವಾರಿ ಸಚಿವ ಮಂಕಾಳ ವೈದ್ಯ ಅವರು ಪ್ರತಿನಿಧಿಸುವ ಕ್ಷೇತ್ರವೂ ಸೇರಿದಂತೆ ಜಿಲ್ಲೆಯ ಪ್ರಮುಖ ಉಪವಿಭಾಗಗಳಲ್ಲಿ ಅಧಿಕಾರಿಗಳ ಕೊರತೆ ಎದ್ದು ಕಾಣುತ್ತಿದೆ. ಅಧಿಕಾರಿಗಳ ನೇಮಕಾತಿಯಲ್ಲಿ ರಾಜಕೀಯ ಇಚ್ಛಾಶಕ್ತಿಯ ಕೊರತೆ ಅಥವಾ ಜನಪ್ರತಿನಿಧಿಗಳ ನಡುವಿನ ಸಮನ್ವಯದ ಕೊರತೆಯು ಜಿಲ್ಲೆಯ ಅಭಿವೃದ್ಧಿಗೆ ಮುಳುವಾಗುತ್ತಿದೆ.
ಈ ಸುದ್ದಿ ಓದಿದ್ದೀರಾ ? ಉತ್ತರ ಕನ್ನಡ | ಕಾರವಾರ ಮತ್ತು ಹಳಿಯಾಳ ಕ್ರೀಡಾ ವಸತಿ ನಿಲಯ ಪ್ರವೇಶಕ್ಕೆ ಜಿಲ್ಲಾದ್ಯಂತ ಆಯ್ಕೆ ಪ್ರಕ್ರಿಯೆ ಆರಂಭ
ಗಡಿ ಜಿಲ್ಲೆ ಎಂಬ ಕಾರಣಕ್ಕೆ ಅಧಿಕಾರಿಗಳು ಇಲ್ಲಿಗೆ ಬರಲು ಹಿಂದೇಟು ಹಾಕುತ್ತಿದ್ದಾರೆ ಎಂಬ ವಾದವು ಆಡಳಿತದ ಅಸಮರ್ಥತೆಯನ್ನು ಮುಚ್ಚಿಡುವ ನೆಪದಂತಿದೆ. ದಕ್ಷ ಅಧಿಕಾರಿಗಳನ್ನು ಕರೆತರುವುದು ಮತ್ತು ಅವರಿಗೆ ಪೂರಕ ವಾತಾವರಣ ನಿರ್ಮಿಸುವುದು ಸರ್ಕಾರದ ಆದ್ಯತೆಯಾಗಬೇಕು.
ಕೇವಲ ಕಂದಾಯವಲ್ಲದೆ ಜಿಲ್ಲೆಯ ಶಿಕ್ಷಣ, ಆರೋಗ್ಯ ಮತ್ತು ಭೂವಿಜ್ಞಾನದಂತಹ ಹತ್ತು ಹಲವು ಇಲಾಖೆಗಳು ಜಿಲ್ಲಾ ಮಟ್ಟದ ಅಧಿಕಾರಿಗಳಿಲ್ಲದೆ ಪ್ರಭಾರಿ ಅಧಿಕಾರಿಗಳಿಂದ ನಡೆಯಬೇಕಾದ ಸ್ಥೀತಿಗೆ ಬಂದಿವೆ. ಸ್ಥಳೀಯ ಸಂಸ್ಥೆಗಳ ಆಡಳಿತ ಅವಧಿ ಮುಗಿದು ಅಲ್ಲಿಗೆ ಆಡಳಿತಾಧಿಕಾರಿಗಳ ಅನಿವಾರ್ಯತೆ ಇರುವಾಗ, ಅಧಿಕಾರಿಗಳ ಕೊರತೆಯು ನಗರ ಮತ್ತು ಪಟ್ಟಣಗಳ ಸ್ವಚ್ಛತೆ, ಅಭಿವೃದ್ಧಿ ಹಾಗೂ ಮೂಲಸೌಕರ್ಯಗಳ ಮೇಲೆ ನೇರ ಪೆಟ್ಟು ನೀಡುತ್ತಿದೆ.
ಸರ್ಕಾರ ಈಗಲಾದರೂ ಎಚ್ಚೆತ್ತುಕೊಳ್ಳಬೇಕು. ‘ಪ್ರಭಾರ’ ಎಂಬ ತಾತ್ಕಾಲಿಕ ವ್ಯವಸ್ಥೆಯಿಂದ ಹೊರಬಂದು, ಜಿಲ್ಲೆಯ ಆಡಳಿತ ಯಂತ್ರಕ್ಕೆ ಚೈತನ್ಯ ತುಂಬಲು ಖಾಯಂ ಅಧಿಕಾರಿಗಳನ್ನು ತಕ್ಷಣವೇ ನೇಮಿಸಬೇಕಿದೆ. ರಾಜಕೀಯ ಹಗ್ಗಜಗ್ಗಾಟಗಳು ಆಡಳಿತದ ಮೇಲೆ ಪರಿಣಾಮ ಬೀರಬಾರದು. ಜಿಲ್ಲೆಯ ಜನರ ಹಿತದೃಷ್ಟಿಯಿಂದ ಹಾಗೂ ಸ್ಥಗಿತಗೊಂಡಿರುವ ಕೆಲಸಗಳಿಗೆ ಆಡಳಿತಾತ್ಮಕ ವೇಗ ತುಂಬಲು ಜಿಲ್ಲೆಯ ಉಪವಿಭಾಗಾಧಿಕಾರಿಗಳ ‘ಖಾಲಿ’ ಭಾಗ್ಯಕ್ಕೆ ಕೂಡಲೇ ವಿದಾಯ ಹೇಳಿ ಅಧಿಕಾರಿಗಳನ್ನು ನೇಮಕ ಮಾಡುವಲ್ಲಿ ಸರ್ಕಾರ ವಿಶೇಷ ಆಸಕ್ತಿ ತೋರಿಸಬೇಕಾಗಿದೆ.
