ವಿಜಯಪುರದ ವೀರಶೈವ ಲಿಂಗಾಯತ ಸಾಂಸ್ಕೃತಿಕ ಭವನದಲ್ಲಿ ಅಕ್ಟೋಬರ್ 29ರಿಂದ ನವೆಂಬರ್ 1ರವರೆಗೆ ಆಯೋಜಿಸಿರುವ 22ನೇ ಶರಣ ತತ್ವ ಕಮ್ಮಟದಲ್ಲಿ ಪಾಲ್ಗೊಳ್ಳುವಂತೆ ಕೈಗಾರಿಕೆ, ಮೂಲಸೌಲಭ್ಯ ಅಭಿವೃದ್ಧಿ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಎಂ.ಬಿ. ಪಾಟೀಲ ಅವರಿಗೆ ಸಂಘಟಕರು ಆಹ್ವಾನ ನೀಡಿದರು.
ದಾವಣಗೆರೆಯ ಲಿಂ. ಶರಣೆ ಪುಟ್ಟಮ್ಮ ಹಾಗೂ ಲಿಂ. ಶರಣ ಬಸವರಾಜಪ್ಪ ಅಜ್ಜಂಪುರ ಶೆಟ್ರು ಸೇವಾ ಟ್ರಸ್ಟ್ ಮತ್ತು ಬಸವ ಬಳಗದ ಪದಾಧಿಕಾರಿಗಳು ಸಚಿವರ ಗೃಹ ಕಚೇರಿಯಲ್ಲಿ ಅವರನ್ನು ಭೇಟಿ ಮಾಡಿ ಕಮ್ಮಟದ ಕುರಿತು ಮಾಹಿತಿ ಹಂಚಿಕೊಂಡರು. ನಾಲ್ಕು ದಿನಗಳ ಕಾಲ ನಡೆಯುವ ಕಾರ್ಯಕ್ರಮದಲ್ಲಿ ಒಂದು ದಿನ ಭಾಗವಹಿಸುವಂತೆ ಟ್ರಸ್ಟ್ ಪ್ರತಿನಿಧಿ ವಿಜಯ ಸಿಂದಗಿ ಮನವಿ ಮಾಡಿದರು.
ಅಕ್ಟೋಬರ್ 29ರಂದು ಸಂಜೆ 6.30ಕ್ಕೆ ಕಮ್ಮಟಕ್ಕೆ ಚಾಲನೆ ದೊರೆಯಲಿದೆ. ಶರಣರ ವಚನಗಳಲ್ಲಿನ ಸೃಷ್ಟಿಯ ಪರಿಕಲ್ಪನೆ, ಸೃಷ್ಟಿ ಮತ್ತು ಮಾನವ ಜೀವನದ ನಡುವಿನ ಸಂಬಂಧ, ಗುರುವಿನ ಮಹತ್ವ, ವಿಭೂತಿ, ಲಿಂಗ, ಪಾದೋದಕ, ಪ್ರಸಾದ ಹಾಗೂ ಅಷ್ಟಾಂಗ ಯೋಗ ಸೇರಿದಂತೆ ಶರಣ ತತ್ವದ ವಿವಿಧ ಆಯಾಮಗಳ ಕುರಿತು ಗೋಷ್ಠಿಗಳು ನಡೆಯಲಿವೆ. ವಿವಿಧ ಪ್ರದೇಶಗಳಿಂದ ಶರಣ ತತ್ವದ ಆಸಕ್ತರು ಕಮ್ಮಟದಲ್ಲಿ ಪಾಲ್ಗೊಳ್ಳುವ ನಿರೀಕ್ಷೆಯಿದೆ.
ಕಾರ್ಯಕ್ರಮದ ಅಂಗವಾಗಿ ಪ್ರತಿದಿನ ಬೆಳಿಗ್ಗೆ ಶಿವಯೋಗದ ಪ್ರಾತ್ಯಕ್ಷಿಕೆ ಹಾಗೂ ಪಥಸಂಚಲನ ಹಮ್ಮಿಕೊಳ್ಳಲಾಗಿದೆ. ಶರಣರ ಆದರ್ಶ, ತತ್ವ ಹಾಗೂ ಸಂದೇಶಗಳನ್ನು ಜನಸಾಮಾನ್ಯರಿಗೆ ವ್ಯವಸ್ಥಿತವಾಗಿ ತಲುಪಿಸಿ, ಅವುಗಳ ಕುರಿತು ಅರಿವು ಮೂಡಿಸುವುದು ಕಮ್ಮಟದ ಪ್ರಮುಖ ಆಶಯವಾಗಿದೆ ಎಂದು ಸಂಘಟಕರು ಸಚಿವರಿಗೆ ತಿಳಿಸಿದರು. ಈ ಸಂದರ್ಭದಲ್ಲಿ ಶರಣ ತತ್ವದ ಪ್ರಸಾರಕರಾದ ಡಾ. ಜೆ.ಎಸ್ ಪಾಟೀಲ ಮತ್ತು ರಾಜು ಜತ್ತಿ ಉಪಸ್ಥಿತರಿದ್ದರು.
