ರಾಜಕೀಯದಲ್ಲಿ ಸಾಮಾನ್ಯ ಕಾರ್ಯಕರ್ತರಿಗೆ ಮತ್ತು ಹೊಸ ನಾಯಕತ್ವಕ್ಕೆ ಸಮಾನ ಅವಕಾಶ ಕಲ್ಪಿಸುವ ಮೂಲಕ ಕುಟುಂಬ ರಾಜಕಾರಣಕ್ಕೆ ಕಡಿವಾಣ ಹಾಕಬೇಕು. ಅಧಿಕಾರವೆಂಬುದು ಕುಟುಂಬದ ಆಸ್ತಿಯಲ್ಲ, ಅದು ಜನರ ವಿಶ್ವಾಸದಿಂದ ದೊರೆತ ಜವಾಬ್ದಾರಿ ಎಂದು ಗ್ರಾಮ ಸ್ವರಾಜ್ಯ ಕರ್ನಾಟಕದ ರಾಜ್ಯ ಉಪಾಧ್ಯಕ್ಷ ಪ್ರದೀಪ್ ಚ. ಪಾಟೀಲ್ ನಾಗರದಿನ್ನಿ ಹೇಳಿದರು.
ವಿಜಯಪುರ ನಗರದಲ್ಲಿ ಮಾತನಾಡಿದ ಅವರು, “ಒಂದು ಕಾಲದಲ್ಲಿ ಸಾಮಾನ್ಯ ಕಾರ್ಯಕರ್ತರ ಸೇವೆ, ಸಂಘಟನಾ ಸಾಮರ್ಥ್ಯ ಹಾಗೂ ಜನರೊಂದಿಗಿನ ನಿರಂತರ ಸಂಪರ್ಕವನ್ನು ಗುರುತಿಸಿ ಅವರನ್ನು ನಾಯಕತ್ವದ ಹಂತಕ್ಕೆ ಬೆಳೆಸುವ ರಾಜಕೀಯ ವ್ಯವಸ್ಥೆ ಇತ್ತು. ಆದರೆ, ಇಂದು ರಾಜಕೀಯವು ನಿಧಾನವಾಗಿ ಕುಟುಂಬ ರಾಜಕಾರಣದತ್ತ ಸಾಗುತ್ತಿರುವುದು ಪ್ರಜಾಪ್ರಭುತ್ವದ ಆರೋಗ್ಯದ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕುತ್ತಿದೆ” ಎಂದು ಅಭಿಪ್ರಾಯಪಟ್ಟರು.
“ಮುಂಬರುವ ಜಿಲ್ಲಾ ಪಂಚಾಯಿತಿ ಮತ್ತು ತಾಲೂಕು ಪಂಚಾಯಿತಿ ಚುನಾವಣೆಗಳಲ್ಲಿ ಮಾಜಿ ಶಾಸಕರು ಹಾಗೂ ಸಂಸದರು ತಮ್ಮ ಮಕ್ಕಳನ್ನು ಚುನಾವಣಾ ಕಣಕ್ಕೆ ಇಳಿಸಲು ಸಿದ್ಧತೆ ನಡೆಸುತ್ತಿರುವುದು ಚರ್ಚೆಗೆ ಗ್ರಾಸವಾಗಿದೆ. ಇಂತಹ ಸಂದರ್ಭದಲ್ಲಿ ಜನರು ವ್ಯಕ್ತಿಗಳ ಸೇವೆ, ಸಾಮರ್ಥ್ಯ ಮತ್ತು ಜನಪರ ಕಾರ್ಯಗಳನ್ನು ಆಧರಿಸಿ ಸೂಕ್ತ ನಿರ್ಧಾರ ಕೈಗೊಳ್ಳಬೇಕು. ಕಾರ್ಯಕರ್ತರು ಕೇವಲ ಮತಗಳನ್ನು ತರುವ ಯಂತ್ರಗಳಲ್ಲ; ಅವರೇ ಭವಿಷ್ಯದ ನಾಯಕರು ಎಂದು ಪ್ರತಿಪಾದಿಸಿದ ಅವರು, ಗ್ರಾಮ ಪಂಚಾಯಿತಿಯಿಂದ ವಿಧಾನಸಭೆ ಮತ್ತು ಲೋಕಸಭೆಯವರೆಗೆ ಹೊಸ ಮುಖಗಳಿಗೆ ಅವಕಾಶ ದೊರೆಯುವಂತಹ ರಾಜಕೀಯ ಸಂಸ್ಕೃತಿ ನಿರ್ಮಾಣವಾಗಬೇಕು” ಎಂದರು.
“ಚುನಾವಣೆಯಲ್ಲಿ ಹಣಬಲ, ಕುಟುಂಬದ ಪ್ರಭಾವ ಅಥವಾ ರಾಜಕೀಯ ಪರಂಪರೆಗಿಂತ ಜನರೊಂದಿಗೆ ನಿರಂತರವಾಗಿ ಕೆಲಸ ಮಾಡುವ ವ್ಯಕ್ತಿಯ ಸೇವೆ ಮತ್ತು ಸಾಮರ್ಥ್ಯಕ್ಕೆ ಆದ್ಯತೆ ನೀಡಬೇಕು. ಕಾರ್ಯಕರ್ತರನ್ನು ನಾಯಕತ್ವದ ಹಂತಕ್ಕೆ ಬೆಳೆಸುವ ರಾಜಕಾರಣಿಗಳು ಬೇಕೇ ಹೊರತು, ಅವರನ್ನು ಅಧಿಕಾರ ತಲುಪುವ ಮೆಟ್ಟಿಲುಗಳಾಗಿ ಬಳಸಿಕೊಳ್ಳುವ ರಾಜಕೀಯ ವ್ಯವಸ್ಥೆ ಬೇಡ. ಇಂದು ದೇಶಕ್ಕೆ ಮತ್ತು ರಾಜ್ಯಕ್ಕೆ ಅಗತ್ಯವಿರುವುದು ಕುಟುಂಬದ ಆಧಾರದ ಮೇಲಿನ ನಾಯಕತ್ವವಲ್ಲ, ಜನರಿಂದ ಬೆಳೆದುಬಂದ ನಾಯಕತ್ವ. ಅಧಿಕಾರ ಕೆಲವೇ ವ್ಯಕ್ತಿಗಳ ಅಥವಾ ಕುಟುಂಬಗಳ ಕೈಯಲ್ಲಿ ಕೇಂದ್ರೀಕೃತವಾಗದೆ, ಸಾಮಾನ್ಯ ಜನರ ಪಾಲ್ಗೊಳ್ಳುವಿಕೆಯ ಮೂಲಕ ಕೆಳಮಟ್ಟದಿಂದ ಮೇಲ್ಮಟ್ಟದವರೆಗೆ ಹೊಸ ನಾಯಕತ್ವ ಬೆಳೆಯುವ ವ್ಯವಸ್ಥೆ ನಿರ್ಮಾಣವಾಗಬೇಕು” ಎಂದು ತಿಳಿಸಿದರು.
ಸಮಾನ ಅವಕಾಶವೇ ನಿಜವಾದ ಪ್ರಜಾಪ್ರಭುತ್ವದ ಆಶಯವಾಗಿದೆ. ಕಾರ್ಯಕರ್ತರಿಗೆ ಅವಕಾಶ, ಹೊಸ ನಾಯಕತ್ವಕ್ಕೆ ಪ್ರೋತ್ಸಾಹ ಹಾಗೂ ಜನರಿಗೆ ಅಧಿಕಾರ ಎಂಬ ತತ್ವದೊಂದಿಗೆ ರಾಜಕೀಯ ಪಕ್ಷಗಳು ಮುನ್ನಡೆಯಬೇಕು ಎಂದು ಪ್ರದೀಪ್ ಚ. ಪಾಟೀಲ್ ಒತ್ತಾಯಿಸಿದರು.
