- ದಲಿತ ಸಾಹಿತಿಗಳು ಅಂತ ಇರುವ ಹಾಗೆ, ಬ್ರಾಹ್ಮಣ ಕತೆಗಾರರು ಎಂಬ ಹೆಸರು ಇಲ್ಲದಿರುವದೂ ಒಂದು ಸಾಹಿತ್ಯ ರಾಜಕೀಯ
- ಸಾಹಿತ್ಯ ಎನ್ನುವುದು ಒಂದು ಪ್ರದೇಶವನ್ನು ಅರ್ಥ ಮಾಡಿಕೊಳ್ಳುವುದಕ್ಕೆ ಮುಖ್ಯವಾದ ಸಾಧನವಾಗಿದೆ.
ಹೈದ್ರಾಬಾದ್ ಕರ್ನಾಟಕದ ಕತೆಗಾರರು, ಸಾಹಿತಿಗಳು ಎಂಬ ಹಣೆಪಟ್ಟಿ ಇರುವ ಹಾಗೆ ಕರಾವಳಿ ಕತೆಗಾರರು, ಹಳೆ ಮೈಸೂರು ಕತೆಗಾರರು, ಸಾಹಿತಿಗಳು ಅಂತ ಯಾಕೆ ಇಲ್ಲ ಎಂದು ಹಿರಿಯ ಕತೆಗಾರ ಡಾ.ಚಿದಾನಂದ ಸಾಲಿ ಪ್ರಶ್ನಿಸಿದರು.
ಆಳಂದ ತಾಲೂಕಿನ ಕಡಗಂಚಿಯ ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ ಕನ್ನಡ ವಿಭಾಗವು ʼಬಿಸಿಲ ನಾಡಿನ ಸಣ್ಣಕತೆಗಳುʼ ಎಂಬ ವಿಷಯದ ಮೇಲೆ ನಡೆದ ಒಂದು ದಿವಸದ ವಿಚಾರ ಸಂಕಿರಣದಲ್ಲಿ ಆಶಯ ನುಡಿಗಳನ್ನಾಡಿದ ಅವರು, “ದಲಿತ ಸಾಹಿತಿಗಳು ಅಂತ ಮಾತ್ರ ಇರುವ ಹಾಗೆ, ಆದರೆ ಬ್ರಾಹ್ಮಣ ಕತೆಗಾರರು ಎಂಬ ಹೆಸರು ಇಲ್ಲದಿರುವಂತೆಯೆ ಒಂದು ಸಾಹಿತ್ಯ ರಾಜಕೀಯ. ಕರ್ನಾಟಕದ ಒಂದು ಭಾಗವನ್ನು ಹೀಗೆ ಗುರುತಿಸುವ ಮೂಲಕ ಅದಕ್ಕೂ ಒಂದು ಮಿತಿಯನ್ನು ಹೇರಲಾಗುತ್ತದೆ. ಈ ಮಿತಿಯನ್ನು ಅರಿತುಕೊಳ್ಳಬೇಕಿದೆ ಮತ್ತು ಅದನ್ನು ಒಡೆದು ಅಲ್ಲಿಂದ ಮುಂದಕ್ಕೆ ಸಾಗಬೇಕಿದೆ. ಇದು ನನಗೆ ಮತ್ತು ನಮ್ಮೆಲ್ಲರಿಗೆ ಮುಖ್ಯವಾದ ವಿಚಾರವಾಗಿದೆ” ಎಂದು ಅವರು ಹೇಳಿದರು.
“ಕತೆಗಳಲ್ಲಿ, ವಿವಿಧ ರೀತಿಯ ವರ್ಗೀಕರಣಗಳು ಕೂಡ ಈ ರೀತಿಯ ಕೆಲಸವನ್ನು ಮಾಡುತ್ತಿರುತ್ತವೆ. ಎಡ-ಬಲ ಎಂಬ ಎರಡು ತುದಿಗಳನ್ನು ಹೆಚ್ಚು ಮಾತನಾಡುವುದು ಕಾಣಿಸುತ್ತದೆ. ಎರಡು ಧ್ರುವಗಳ ನಡುವೆ ಇರುವ ಗಾಳಿ ಬೆಳಕನ್ನ, ಬದುಕನ್ನ ಕುರಿತು ಮಾತಾಡುವುದು ಇಲ್ಲವಾಗಿದೆ. ಹಾಗಾದರೆ, ಎಡ-ಬಲ ಎನ್ನುವುದು ಬಿಟ್ಟು ಮಧ್ಯಮ ಎಂಬುದೊಂದು ಇದೆಯೆ? ಇದನ್ನು ಕುಹಕವಾಡುವುದು ಬೇಡ. ಆಧುನಿಕ ಕಾಲದ ಭಾರತದಲ್ಲಿ ಜಾಗತಿಕವಾದ ಎರಡು ಶಕ್ತಿಗಳನ್ನು ಮೀರಿ ಮೂರನೆಯ ಜಗತ್ತಾಗಿ ಭಾರತ ನಿಂತಿರುವುದು ನಮಗೆ ಮಾದರಿಯಾಗಬೇಕಿದೆ” ಎಂದರು.
ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ ಕುಲಪತಿಗಳಾದ ಪ್ರೊ.ಬಟ್ಟು ಸತ್ಯನಾರಾಯಣ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿ, “ಸಾಹಿತ್ಯ ಎನ್ನುವುದು ಒಂದು ಪ್ರದೇಶವನ್ನು ಅರ್ಥ ಮಾಡಿಕೊಳ್ಳುವುದಕ್ಕೆ ಮುಖ್ಯವಾದ ಸಾಧನವಾಗಿದೆ. ಹೈದರಾಬಾದ ಕರ್ನಾಟಕ ಭಾಗವು ಹಿಂದುಳಿದ ಪ್ರದೇಶವಾಗಿರುವುದರಿಂದ ಈ ಭಾಗದ ಸಾಹಿತ್ಯವನ್ನು ವಿಶೇಷವಾಗಿ ಅಧ್ಯಯನ ಮಾಡಬೇಕಿದೆ ಮತ್ತು ಈ ಅಧ್ಯಯನಗಳು ಪಾಲಸಿಗಳನ್ನು ಮಾಡುವುದಕ್ಕೆ ಸಹಾಯಕವಾಗುವಂತೆ ಬರಬೇಕಿದೆ” ಎಂದು ಹೇಳಿದರು
ವಿಚಾರ ಸಂಕಿರಣದ ಸಂಯೋಜಕರಾದ ವಿಭಾಗದ ಮುಖ್ಯಸ್ಥ ಪ್ರೊ.ಬಸವರಾಜ ಕೋಡಗುಂಟಿ ಅವರು ಮಾತನಾಡಿ, “ಹೈದರಬಾದ ಕರ್ನಾಟಕ ಪ್ರದೇಶವು ಭೂರಚನೆಯ ಕಾಲದಿಂದ ವಿಶಿಷ್ಟ ಶಿಲಾರಚನೆ, ಮತ್ತು ಫಲವತ್ತಾದ ಮಣ್ಣನ್ನು ಹೊಂದಿ ಶಿಲಾಯುಗದ ಮಹತ್ವದ ಕೇಂದ್ರವಾಗಿ ಬೆಳೆಯಿತು. ಒಕ್ಕಲುತನ ಮೊದಲಾಗಿ ನಾಗರಿಕತೆ ಬೆಳೆದು ಸಂಕೀರ್ಣತೆ ಹೆಚ್ಚು ಇಲ್ಲಿ ಬೆಳೆದಿದೆ. ಈ ಸಂಕೀರ್ಣ ಪರಿಸರವನ್ನು ಅರಿತುಕೊಳ್ಳುವ ಆಶಯದೊಂದಿಗೆ ಈ ವಿಚಾರ ಸಂಕಿರಣವನ್ನು ಆಯೋಜಿಸಿದೆ” ಎಂದು ನುಡಿದರು.
ಈ ಸುದ್ದಿ ಓದಿದ್ದೀರಾ? ‘ಈ ದಿನ’ ಸಂಪಾದಕೀಯ | ಬಗರ್‌ ಹುಕುಂ ಸಮಸ್ಯೆ ಬಗೆಹರಿಸಿದರಷ್ಟೇ ಅರಣ್ಯ ಒತ್ತುವರಿ ತೆರವು ಸಲೀಸು
ಕಾರ್ಯಕ್ರಮದಲ್ಲಿ ಮಾನವಿಕ ಮತ್ತು ಭಾಷಾ ನಿಕಾಯದ ಡೀನ ಪ್ರೊ.ವಿಕ್ರಮ ವಿಸಾಜಿ, ಸಂಗೀತ ವಿಭಾಗದ ಡಾ.ಜಯದೇವಿ ಜಂಗಮಶೆಟ್ಟಿ ಉಪಸ್ಥಿತರಿದ್ದರು. ಡಾ.ಸ್ವಪ್ನಿಲ್ ಚಾಪೇಕರ್ ಅವರು ಪ್ರಾರ್ಥಿಸಿದರು ವಿಜಯಲಕ್ಷ್ಮಿ ನಿರೂಪಿಸಿದರು.
