ಭಾರತದಲ್ಲಿ ಪ್ರತಿ ವರ್ಷ ಸುಮಾರು 6 ಲಕ್ಷ ಶಿಶುಗಳು ಜನ್ಮಜಾತ ವೈಕಲ್ಯಗಳೊಂದಿಗೆ ಜನಿಸುತ್ತವೆ. ಆದರೂ, ಈ ಶಿಶುಗಳನ್ನು ಪತ್ತೆಹಚ್ಚಲು ಅಥವಾ ಅವರ ಆರೋಗ್ಯವನ್ನು ಮೇಲ್ವಿಚಾರಣೆ ಮಾಡಲು ದೇಶದಲ್ಲಿ ಯಾವುದೇ ರಾಷ್ಟ್ರೀಯ ನೋಂದಣಿ ವ್ಯವಸ್ಥೆ ಇಲ್ಲವೆಂಬ ಆಘಾತಕಾರಿ ಸುದ್ದಿ ಬಹಿರಂಗವಾಗಿದೆ.
‘ಸ್ಮೈಲ್ ಟ್ರೈನ್ ಇಂಡಿಯಾ’ ಮತ್ತು ‘ಬರ್ತ್ ಡಿಫೆಕ್ಟ್ಸ್ ರಿಸರ್ಚ್ ಫೌಂಡೇಶನ್’ ಜಂಟಿಯಾಗಿ ಬಿಡುಗಡೆ ಮಾಡಿದ ವರದಿಯು ಈ ಆತಂಕಕಾರಿ ಸಂಗತಿಯನ್ನು ವಿವರಿಸಿದೆ. “ಸಾಂಕ್ರಾಮಿಕ ರೋಗಗಳಿಂದ ಉಂಟಾಗುವ ಶಿಶು ಮರಣಗಳ ಪ್ರಮಾಣ ಕಡಿಮೆಯಾಗುತ್ತಿದೆ. ಆದರೆ, ಜನ್ಮಜಾತ ದೋಷಗಳಿಂದ ಸಂಭವಿಸುವ ಮರಣಗಳ ಪಾಲು ಹೆಚ್ಚುತ್ತಿದೆ. ಈ ಹಿನ್ನೆಲೆಯಲ್ಲಿ, ಇವುಗಳ ಮೇಲೆ ನಿಗಾ ಇಡುವುದು ಮತ್ತು ಸಮನ್ವಯದ ಆರೈಕೆಯನ್ನು ಒದಗಿಸುವುದು ಇಂದಿನ ತುರ್ತು ಅಗತ್ಯವಾಗಿದೆ ಎಂದು ತಜ್ಞರು ಹೇಳುತ್ತಾರೆ. ಇತ್ತೀಚಿನ ಅಂದಾಜಿನ ಪ್ರಕಾರ, ಜನ್ಮಜಾತ ದೋಷಗಳಿಗೆ ಸಂಬಂಧಿಸಿದ ಜಾಗತಿಕ ಮರಣಗಳಲ್ಲಿ ಭಾರತದ ಪಾಲು 16% ರಷ್ಟಿದೆ” ಎಂದು ಹೇಳಿದೆ.
ಶಿಶುಗಳ ಮರಣ ತಡೆಗಟ್ಟುವಿಕೆ, ಆರಂಭಿಕ ರೋಗನಿರ್ಣಯ ಹಾಗೂ ರಚನಾತ್ಮಕ ದೀರ್ಘಕಾಲೀನ ಆರೈಕೆಗೆ ಒತ್ತು ನೀಡಲು ‘ಸ್ಮೈಲ್ ಟ್ರೈನ್ ಇಂಡಿಯಾ’ ಮತ್ತು ‘ಬರ್ತ್ ಡಿಫೆಕ್ಟ್ಸ್ ರಿಸರ್ಚ್ ಫೌಂಡೇಶನ್’ ಜಂಟಿಯಾಗಿ ‘ಬರ್ತ್ ಅನಾಮಲೀಸ್ ನೆಟ್‌ವರ್ಕ್ ಆಫ್ ಇಂಡಿಯಾ’ (BIND) ಎಂಬ ವೇದಿಕೆಯನ್ನು ಆರಂಭಿಸಿವೆ. ಸೋಮವಾರ ದೆಹಲಿಯಲ್ಲಿ ಅನಾವರಣಗೊಳಿಸಿವೆ.
ದೇಶದಾದ್ಯಂತ ವಿಶ್ವಾಸಾರ್ಹ ದತ್ತಾಂಶವನ್ನು (Data) ಸಂಗ್ರಹಿಸಲು, ತಡೆಗಟ್ಟಬಹುದಾದ ಅಪಾಯಕಾರಿ ಅಂಶಗಳನ್ನು ಗುರುತಿಸಲು ಹಾಗೂ ಆರೋಗ್ಯ ಯೋಜನೆಯನ್ನು ರೂಪಿಸಲು ‘ರಾಷ್ಟ್ರೀಯ ಜನ್ಮಜಾತ ವೈಕಲ್ಯಗಳ ನೋಂದಣಿ’ (National Birth Anomalies Registry) ವ್ಯವಸ್ಥೆಯನ್ನು ಸ್ಥಾಪಿಸುವುದು ಈ ವೇದಿಕೆಯ ಮುಖ್ಯ ಉದ್ದೇಶವಾಗಿದೆ.
ಪ್ರಸ್ತುತ ಇರುವ ನಿಗಾ ವ್ಯವಸ್ಥೆಯು ಚದುರಿಹೋಗಿದೆ, ತಪಾಸಣೆಯು ಅಸಮರ್ಪಕವಾಗಿದೆ ಎಂದು ತಜ್ಞರು ಹೇಳಿದ್ದಾರೆ.
ಜನ್ಮಜಾತ ಆರೋಗ್ಯ ಸಮಸ್ಯೆಗಳಲ್ಲಿ ಹೃದಯ ಕಾಯಿಲೆ, ಸೀಳು ತುಟಿ ಮತ್ತು ಅಂಗುಳು,ಬೆನ್ನುಮೂಳೆಯ ದೋಷ, ಪಾದದ ವಕ್ರತೆ, ಡೌನ್ ಸಿಂಡ್ರೋಮ್ ಹಾಗೂ ದೃಷ್ಟಿ ಮತ್ತು ಶ್ರವಣದೋಷಗಳು ಗಣನೀಯವಾಗಿವೆ. ಇವುಗಳಲ್ಲಿ ಹೆಚ್ಚಿನವುಗಳನ್ನು ಮೊದಲೇ ಪತ್ತೆಹಚ್ಚಿದರೆ ಗುಣಪಡಿಸಬಹುದು. ಆದರೆ, ಇವುಗಳನ್ನು ಪತ್ತೆ ಹಚ್ಚುವ ವ್ಯವಸ್ಥೆ ಅಸಮರ್ಪಕವಾಗಿದೆ ಎಂದು ತಜ್ಞರು ಹೇಳಿದ್ದಾರೆ.
