777 ವಿದೇಶಿ ಕೈಗಡಿಯಾರಗಳನ್ನು ಅಕ್ರಮವಾಗಿ ಭಾರತಕ್ಕೆ ಕಳ್ಳಸಾಗಣೆ ಮಾಡಿದ ಪ್ರಕರಣದಲ್ಲಿ ಬರೋಬ್ಬರಿ 41 ವರ್ಷಗಳ ಬಳಿಕ ಆರೋಪಿಯನ್ನು ಅಪರಾಧಿ ಎಂದು ಸುಪ್ರೀಂ ಕೋರ್ಟ್ ಘೋಷಿಸಿದೆ. ಆದಾಗ್ಯೂ, ಅಪರಾಧಿಗೆ ವಿಧಿಸಬೇಕಿದ್ದ ಜೈಲು ಶಿಕ್ಷೆಯನ್ನು ರದ್ದುಗೊಳಿಸಿದೆ. ಇದಕ್ಕೆ, ಆರೋಪಿಯು ಈಗಾಗಲೇ ಒಂದು ವರ್ಷ ಜೈಲು ಶಿಕ್ಷೆ ಅನುಭವಿಸಿದ್ದಾರೆ ಎಂಬುದನ್ನು ಪರಿಗಣಿಸಿ, ಮತ್ತೆ ಅವರಿಗೆ ಜೈಲು ಶಿಕ್ಷೆ ನೀಡುವುದು ಬೇಡವೆಂದು ನ್ಯಾಯಾಲಯ ನಿರ್ಧರಿಸಿರುವುದಾಗಿ ವರದಿಯಾಗಿದೆ.
1985ರಲ್ಲಿ ದಾಖಲಾಗಿದ್ದ ಪ್ರಕರಣ ಇದಾಗಿದೆ. ಉದಾರೀಕರಣಕ್ಕೂ ಹಿಂದಿನದ್ದಾದ ಆ ವರ್ಷ ಅವರು ಪರವಾನಗಿ ಇಲ್ಲದೆ ವಿದೇಶಿ ಎಲೆಕ್ಟ್ರಾನಿಕ್ ಸರಕುಗಳನ್ನು ಆಮದು ಮಾಡಿಕೊಳ್ಳಲು ಸಾಧ್ಯವಿರಲಿಲ್ಲ. ಹೀಗಾಗಿ, ಅವರು Seiko, Citizen ಮತ್ತು Ricoh ರೀತಿಯ ಬ್ರಾಂಡ್‌ಗಳ ಕೈಗಡಿಯಾರಗಳನ್ನು ಕಳ್ಳಸಾಗಣೆಗೆ ಮೂಲಕ ಭಾರತಕ್ಕೆ ತಂದಿದ್ದಾರೆ ಎಂದು ಆರೋಪಿಸಲಾಗಿತ್ತು.
ಪ್ರಕರಣದ ವಿಚಾರಣೆಯು ಭುಜ್ ವಿಚಾರಣಾ ನ್ಯಾಯಾಲಯದಲ್ಲಿ 18 ವರ್ಷ, ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯದಲ್ಲಿ ಎರಡು ವರ್ಷ, ಗುಜರಾತ್ ಹೈಕೋರ್ಟ್‌ನಲ್ಲಿ ಐದು ವರ್ಷ ವಿಚಾರಣೆ ನಡೆದಿದ್ದವು. ಈ ಎಲ್ಲ ನ್ಯಾಯಾಲಯಗಳು ಆರೋಪಿಯನ್ನು ಅಪರಾಧಿ ಎಂದೇ ಘೋಷಿಸಿದ್ದರು. ಆದರೆ, ಅವರು ಮೇಲ್ಮನವಿ ಸಲ್ಲಿಸುತ್ತಲೇ ಬಂದಿದ್ದರು. ಅಂತಿಮವಾಗಿ, ಸುಪ್ರೀಂ ಕೋರ್ಟ್‌ನಲ್ಲಿಯೂ 15 ವರ್ಷಗಳ ಕಾಲ ವಿಚಾರಣೆ ನಡೆದಿದೆ. ಇದೀಗ, ಸುಪ್ರೀಂ ಕೋರ್ಟ್ ಕೂಡ ಆರೋಪಿಯನ್ನು ಅಪರಾಧಿ ಎಂದು ಘೋಷಿಸಿದೆ. ಜೊತೆಗೆ, ಆರೋಪಿಯು ಈಗಾಗಲೇ ಅನುಭವಿಸಿದ ಸುಮಾರು ಒಂದು ವರ್ಷದ ಜೈಲು ಶಿಕ್ಷೆಯನ್ನೇ ಪರಿಗಣಿಸಿ ಅವರನ್ನು ಬಿಡುಗಡೆ ಮಾಡಿದೆ.
ತೀರ್ಪು ನೀಡುವಾಗ; ಪ್ರಕರಣವು ಹಲವು ವರ್ಷಗಳಿಂದ ಬಾಕಿ ಉಳಿದಿದ್ದದ್ದು ಮತ್ತು ಆರೋಪಿಯ ವಯೋವೃದ್ಧಪ್ಯವನ್ನು ಗಮನದಲ್ಲಿಟ್ಟುಕೊಂಡು ಅವರನ್ನು ಜೈಲಿಗೆ ಕಳಿಸುವುದು ಬೇಡವೆಂದು ನ್ಯಾಯಾಲಯ ಹೇಳಿರುವುದಾಗಿ ವರದಿಯಾಗಿದೆ.
ಈ ಲೇಖನ ಓದಿದ್ದೀರಾ?: ಇರಾನ್ ಇತಿಹಾಸ, ಕಚ್ಚಾತೈಲ ಮತ್ತು ಅಮೆರಿಕದ ಆಟ!
“ಅಪರಾಧಿಯು ಎಸಗಿರುವ ಅಪರಾಧಕ್ಕೆ ಗರಿಷ್ಠ ಐದು ವರ್ಷಗಳ ಶಿಕ್ಷೆ ವಿಧಿಸಬಹುದಿತ್ತು. ಆದರೆ, ವ್ಯಾಜ್ಯವು 41 ವರ್ಷಗಳ ಕಾಲ ಮುಂದುವರೆದಿದೆ. ಅಪರಾಧಿಯು ಈಗ ವಯೋವೃದ್ಧರಾಗಿದ್ದಾರೆ ಮತ್ತು ಗಣನೀಯ ಅವಧಿಯವರೆಗೆ, ಅಂದರೆ ಸುಮಾರು ಒಂದು ವರ್ಷ ಜೈಲು ಶಿಕ್ಷೆಯನ್ನು ಅನುಭವಿಸಿದ್ದಾರೆ. ಇದು ಅಂದಿನ ಕಾಲದ ಕಸ್ಟಮ್ಸ್ ಆಕ್ಟ್-1962ರ ಸೆಕ್ಷನ್ 135 (1)(ಬಿ)(i) ರ ಅಡಿಯಲ್ಲಿ ನಿಗದಿಪಡಿಸಲಾದ ಕನಿಷ್ಠ ಆರು ತಿಂಗಳ ಶಿಕ್ಷೆಗಿಂತ ಹೆಚ್ಚಾಗಿದೆ” ಎಂದು ಸುಪ್ರೀಂ ಕೋರ್ಟ್ ಹೇಳಿದೆ.
“ಈ ಹಿನ್ನೆಲೆಯಲ್ಲಿ, ಘಟನೆ ನಡೆದು ಸುಮಾರು ನಾಲ್ಕು ದಶಕಗಳಾಗಿರುವುದು, ಮೇಲ್ಮನವಿದಾರರು (ಅಪರಾಧಿ) ಈಗಾಗಲೇ ಅನುಭವಿಸಿದ ಜೈಲು ಶಿಕ್ಷೆಯ ಅವಧಿ, ಪ್ರಕರಣದ ಸುದೀರ್ಘ ಬಾಕಿ ಇರುವಿಕೆ ಹಾಗೂ ಮೇಲ್ಮನವಿದಾರರ ವಯಸ್ಸನ್ನು ಒಳಗೊಂಡಂತೆ ಒಟ್ಟಾರೆ ಸಂದರ್ಭಗಳನ್ನು ಪರಿಗಣಿಸಿದರೆ, ಈ ಹಂತದಲ್ಲಿ ಅವರಿಗೆ ಮತ್ತೆ ಜೈಲು ಶಿಕ್ಷೆ ವಿಧಿಸುವುದು ಅನ್ಯಾಯವಾಗುತ್ತದೆ” ಎಂದು ಕೋರ್ಟ್ ಹೇಳಿದೆ.
