ಪ್ಯಾರಿಸ್‌ನಿಂದ ಹಿಂದಿರುಗುತ್ತಿದ್ದ ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಅವರನ್ನು ಭಾನುವಾರ ದೆಹಲಿ ವಿಮಾನ ನಿಲ್ದಾಣದಲ್ಲಿ ಮೂರು ಗಂಟೆಗಳ ಕಾಲ ತಡೆಹಿಡಿಯಲಾಗಿದ್ದು, 50,000 ರೂ. ದಂಡ ವಿಧಿಸಲಾಗಿದೆ ಎಂದು ಆಮ್ ಆದ್ಮಿ ಪಾರ್ಟಿ (ಎಎಪಿ) ಆರೋಪಿಸಿದೆ. ಪಂಜಾಬ್‌ನ ಪ್ರಗತಿಗೆ ಅಡ್ಡಿಯುಂಟುಮಾಡಲು ಕೇಂದ್ರ ಸರ್ಕಾರ ಈ ರೀತಿ “ಅಡೆತಡೆಗಳನ್ನು” ಸೃಷ್ಟಿಸುತ್ತಿದೆ ಎಂದು ಎಎಪಿ ದೂರಿದೆ.
ಮುಖ್ಯಮಂತ್ರಿಗಳನ್ನು ತಡೆಹಿಡಿದು ದಂಡ ವಿಧಿಸಲು ನಿಖರ ಕಾರಣವೇನು ಎಂಬುದನ್ನು ಪಕ್ಷ ಸ್ಪಷ್ಟಪಡಿಸಿಲ್ಲ. ಆದರೆ, “ಮೇಲಿನಿಂದ ತೀವ್ರ ಒತ್ತಡವಿದ್ದ” ಕಾರಣ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಎಎಪಿ ಹೇಳಿದೆ. ವಿಮಾನ ನಿಲ್ದಾಣದಲ್ಲಿ ಮೂರು ಗಂಟೆಗಳ ಕಾಲ ಕಾಯಿಸಿದ ನಂತರ, ಮಾನ್ ಅವರು ತಮ್ಮ ಲಗೇಜ್ ಅನ್ನು ವಾಹನದಲ್ಲಿ ಇಟ್ಟುಕೊಂಡು ಹೊರಡಲು ಮುಂದಾದಾಗ, ಅಧಿಕಾರಿಗಳು ಓಡಿಬಂದು 50,000 ರೂ. ದಂಡದ ಚಲನ್ ನೀಡಿದರು ಎಂದು ಪಂಜಾಬ್ ಎಎಪಿ ಮಾಧ್ಯಮ ಉಸ್ತುವಾರಿ ಬಲ್ತೇಜ್ ಪನ್ನು ವಿವರಿಸಿದ್ದಾರೆ. ಅಧಿಕಾರಿಗಳು ‘ನಿಮ್ಮ ಲಗೇಜ್ ಇನ್ನೂ ಬರುತ್ತಿದೆ’ ಮತ್ತು ‘ಪರಿಶೀಲನೆ ನಡೆಯುತ್ತಿದೆ’ ಎಂಬ ಸುಳ್ಳು ನೆಪಗಳನ್ನು ನೀಡಿದ್ದರು ಎಂದು ಅವರು ಆರೋಪಿಸಿದ್ದಾರೆ.
ಅಕ್ಟೋಬರ್ 17 ರಿಂದ 21 ರವರೆಗೆ ನಡೆಯುತ್ತಿರುವ ವಿಶ್ವದ ಎರಡನೇ ಅತಿದೊಡ್ಡ ಆಹಾರ ವ್ಯಾಪಾರ ಪ್ರದರ್ಶನವಾದ ‘ಸಿಯಾಲ್ ಪ್ಯಾರಿಸ್ 2026’ (SIAL Paris 2026) ದಲ್ಲಿ ಪಂಜಾಬ್‌ನ ಉತ್ಪನ್ನಗಳನ್ನು ಬಿಡುಗಡೆ ಮಾಡಲು ಮಾನ್ ಪ್ಯಾರಿಸ್‌ಗೆ ತೆರಳಿದ್ದರು. ಕೇಂದ್ರ ಸರ್ಕಾರವು ಮಾನ್ ಅವರ ವಿದೇಶಿ ಪ್ರವಾಸಕ್ಕೆ ಕನಿಷ್ಠ ನಾಲ್ಕು ಬಾರಿ ಅನುಮತಿಯನ್ನು ನಿರಾಕರಿಸಿತ್ತು. ಮುಖ್ಯಮಂತ್ರಿಗಳು ವಿದೇಶಕ್ಕೆ ತೆರಳಿ ಬಂಡವಾಳ ತಂದರೆ ಪಂಜಾಬ್ ಅಭಿವೃದ್ಧಿಯ ಹಾದಿಯಲ್ಲಿ ಸಾಗುತ್ತದೆ ಎಂಬ ಭಯ ಮೋದಿ ಸರ್ಕಾರಕ್ಕಿದೆ ಎಂದು ಪನ್ನು ಟೀಕಿಸಿದ್ದಾರೆ. ಕೇಂದ್ರದ ಈ ತೀರ್ಮಾನವನ್ನು ಪ್ರಶ್ನಿಸಿ ರಾಜ್ಯ ಸರ್ಕಾರ ಸಲ್ಲಿಸಿದ್ದ ಅರ್ಜಿಯನ್ನು ಪುರಸ್ಕರಿಸಿದ್ದ ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್, ಮಾನ್ ಅವರ ಪ್ರವಾಸಕ್ಕೆ ಅವಕಾಶ ನೀಡಿತ್ತು. ಹೈಕೋರ್ಟ್ ಸ್ಪಷ್ಟ ನಿರ್ದೇಶನದ ಹೊರತಾಗಿಯೂ, ಪ್ಯಾರಿಸ್‌ನಲ್ಲಿರುವ ಭಾರತೀಯ ಕಾನ್ಸುಲ್ ಜನರಲ್ ಅವರು ಮುಖ್ಯಮಂತ್ರಿಗಳನ್ನು ಭೇಟಿಯಾಗಲು ಬರಲಿಲ್ಲ, ಇದು ಕೇಂದ್ರದ ದುರುದ್ದೇಶವನ್ನು ತೋರುತ್ತದೆ ಎಂದು ಪನ್ನು ದೂರಿದ್ದಾರೆ.
ಯಾವುದೇ ರಾಜ್ಯದ ಮುಖ್ಯಮಂತ್ರಿಯನ್ನು ಈ ರೀತಿ ಮೂರು ಗಂಟೆಗಳ ಕಾಲ ವಿಮಾನ ನಿಲ್ದಾಣದಲ್ಲಿ ತಡೆಹಿಡಿದು, 50,000 ರೂ. ದಂಡ ವಿಧಿಸಿ ಅವಮಾನಿಸಿದ ಉದಾಹರಣೆ ಇದೆಯೇ ಎಂದು ಪನ್ನು ಪ್ರಶ್ನಿಸಿದ್ದಾರೆ. ಭಗವಂತ್ ಮಾನ್ ಅವರು ಪಂಜಾಬಿ ಎಂಬ ಏಕೈಕ ಕಾರಣಕ್ಕೆ ಹಾಗೂ ರಾಜ್ಯದ ಒಳಿತಿಗಾಗಿ ಹಗಲಿರುಳು ಶ್ರಮಿಸುತ್ತಿರುವುದರಿಂದ ಈ ರೀತಿ ಮಾಡಲಾಗುತ್ತಿದೆ ಎಂದಿದ್ದಾರೆ.
ಪ್ರಧಾನಿ ನರೇಂದ್ರ ಮೋದಿ ಮತ್ತು ಅವರ ಸರ್ಕಾರ ಪಂಜಾಬ್ ಮತ್ತು ಪಂಜಾಬಿ ಅಸ್ಮಿತೆಗೆ ಧಕ್ಕೆ ತರಲು ಯಾವುದೇ ಅವಕಾಶವನ್ನು ಬಿಡುತ್ತಿಲ್ಲ ಎಂದು ಅವರು ಆರೋಪಿಸಿದ್ದಾರೆ. ರೈತರನ್ನು ದೆಹಲಿ ಗಡಿಯಲ್ಲಿ ಒಂದೂವರೆ ವರ್ಷಗಳ ಕಾಲ ಬಲವಂತವಾಗಿ ತಡೆದಿದ್ದು ಮತ್ತು ಪಂಜಾಬ್‌ಗೆ ಬರಬೇಕಾದ ಅನುದಾನವನ್ನು ತಡೆಹಿಡಿದಿರುವುದು ಸೇರಿದಂತೆ, ಕೇಂದ್ರ ಸರ್ಕಾರವು ಪ್ರತಿಯೊಂದು ಹಂತದಲ್ಲೂ ಪಂಜಾಬ್‌ನ ಕತ್ತು ಹಿಸುಕಲು ಪ್ರಯತ್ನಿಸುತ್ತಿದೆ ಎಂದು ಅವರು ಗಂಭೀರವಾಗಿ ಆರೋಪಿಸಿದ್ದಾರೆ.
