ಬಾರ್ ಕೌನ್ಸಿಲ್ ಆಫ್ ಇಂಡಿಯಾ (ಬಿಸಿಐ) ನೂತನ ಚುನಾವಣೆ ನಡೆಯುವವರೆಗೆ ಪ್ರಸ್ತುತ ಅಧ್ಯಕ್ಷ ಮನನ್ ಕುಮಾರ್ ಮಿಶ್ರಾ ಅವರು ಕೇವಲ ‘ಹಂಗಾಮಿ’ (ಪ್ರೊ ಟೆಮ್) ಅಧ್ಯಕ್ಷರಾಗಿ ಮಾತ್ರ ಮುಂದುವರಿಯಲಿದ್ದಾರೆ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ. ಅಲ್ಲದೆ, ಬಿಸಿಐ ಕೈಗೊಳ್ಳುವ ಯಾವುದೇ ಪ್ರಮುಖ ನೀತಿ ನಿರ್ಧಾರಗಳಿಗೆ ಅಟಾರ್ನಿ ಜನರಲ್ ಮತ್ತು ಸಾಲಿಸಿಟರ್ ಜನರಲ್ ಅವರ ಸಲಹೆ ಮತ್ತು ಸಮ್ಮತಿ ಪಡೆಯುವುದು ಕಡ್ಡಾಯ ಎಂದು ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಪೀಠ ಮಹತ್ವದ ಆದೇಶ ನೀಡಿದೆ.
ಬಿಸಿಐ ಪದಾಧಿಕಾರಿಗಳ ವಿರುದ್ಧ 2020ರಲ್ಲಿ ಸ್ಥಾಪಿಸಲಾದ ‘ಪರ್ಲ್ ಫಸ್ಟ್ ಟ್ರಸ್ಟ್’ಗೆ ಸಂಬಂಧಿಸಿದಂತೆ ಗಂಭೀರ ಆರೋಪಗಳು ಕೇಳಿಬಂದಿವೆ. ಬಿಸಿಐನ ಆರ್ಥಿಕ ಸಂಪನ್ಮೂಲಗಳನ್ನು ಈ ಹೊಸ ಟ್ರಸ್ಟ್‌ಗೆ ವರ್ಗಾಯಿಸಲಾಗಿದೆ ಮತ್ತು ಹಾಲಿ ಪದಾಧಿಕಾರಿಗಳು ತಮ್ಮ ಬಿಸಿಐ ಅಧಿಕಾರಾವಧಿ ಮುಗಿದರೂ ಈ ಟ್ರಸ್ಟ್‌ನ ಕಾಯಂ ಟ್ರಸ್ಟಿಗಳಾಗಿ ಮುಂದುವರಿಯುವಂತೆ ನಿಯಮ ರೂಪಿಸಿಕೊಂಡಿದ್ದಾರೆ ಎಂದು ಹಿರಿಯ ವಕೀಲ ಗೋಪಾಲ್ ಶಂಕರನಾರಾಯಣನ್ ನ್ಯಾಯಾಲಯದ ಗಮನಕ್ಕೆ ತಂದರು.
ಕಳೆದ 12 ವರ್ಷಗಳಿಂದ ಮನನ್ ಕುಮಾರ್ ಮಿಶ್ರಾ ಅವರೇ ಬಿಸಿಐ ಅಧ್ಯಕ್ಷರಾಗಿ ಮುಂದುವರಿಯುತ್ತಿದ್ದು, ಇದು ಅಧಿಕಾರದ ಕೇಂದ್ರೀಕರಣವಾಗಿದೆ ಎಂದು ವಕೀಲೆ ಶೋಭಾ ಗುಪ್ತಾ ವಾದಿಸಿದರು. ನಿಯಮಗಳ ಪ್ರಕಾರ ಅಧ್ಯಕ್ಷರ ಅಧಿಕಾರಾವಧಿ ಕೇವಲ ಎರಡು ವರ್ಷಗಳಾಗಿದ್ದರೂ, 2025ರ ಏಪ್ರಿಲ್‌ನಲ್ಲಿ ಹೊರಡಿಸಿದ ಅಧಿಸೂಚನೆ ಮೂಲಕ ಅದನ್ನು 2030ರವರೆಗೆ ವಿಸ್ತರಿಸಲಾಗಿದೆ. ಜೊತೆಗೆ ಬಿಸಿಐನ ಅಚ್ಚರಿ ಮೂಡಿಸುವ ಕೋಟ್ಯಂತರ ರೂಪಾಯಿ ಖರ್ಚು-ವೆಚ್ಚಗಳ ಬಗ್ಗೆಯೂ ವಿಚಾರಣೆ ವೇಳೆ ತೀವ್ರ ಕಳವಳ ವ್ಯಕ್ತವಾಯಿತು.
ಈ ಆರೋಪಗಳ ಸುತ್ತ ನಡೆಯುತ್ತಿರುವ ‘ನೆರಳು ಯುದ್ಧ’ಕ್ಕೆ ಉತ್ತೇಜನ ನೀಡಲು ನ್ಯಾಯಾಲಯ ಬಯಸುವುದಿಲ್ಲ. ಆದರೆ ಬಿಸಿಐನ ಸಾಂಸ್ಥಿಕ ಸಮಗ್ರತೆ ಮತ್ತು ವಿಶ್ವಾಸಾರ್ಹತೆಯನ್ನು ಕಾಪಾಡುವ ನಿಟ್ಟಿನಲ್ಲಿ ಮಧ್ಯಪ್ರವೇಶ ಮಾಡುವುದು ಅನಿವಾರ್ಯವಾಗಿದೆ ಎಂದು ಪೀಠದ ಭಾಗವಾಗಿದ್ದ ನ್ಯಾಯಮೂರ್ತಿ ಜಾಯ್‌ಮಾಲ್ಯ ಬಾಗ್ಚಿ ಅಭಿಪ್ರಾಯಪಟ್ಟರು. ಹೀಗಾಗಿಯೇ ಬಿಸಿಐನ ಪದನಿಮಿತ್ತ ಸದಸ್ಯರಾಗಿರುವ ಉನ್ನತ ಕಾನೂನು ಅಧಿಕಾರಿಗಳನ್ನು (ಎಜಿ ಮತ್ತು ಎಸ್‌ಜಿ) ಪ್ರಮುಖ ನಿರ್ಧಾರಗಳ ಪ್ರಕ್ರಿಯೆಯಲ್ಲಿ ಕಡ್ಡಾಯವಾಗಿ ಸೇರಿಸಿಕೊಳ್ಳುವಂತೆ ಸೂಚಿಸಲಾಗಿದೆ ಎಂದರು.
ಇತ್ತೀಚೆಗಷ್ಟೇ ಹೈದರಾಬಾದ್‌ನ ನಲ್ಸಾರ್ (NALSAR) ಕಾನೂನು ವಿವಿಯ 2026ರ ಬ್ಯಾಚ್ ವಿದ್ಯಾರ್ಥಿಗಳ ವೃತ್ತಿಪರ ನೋಂದಣಿಯನ್ನು ರದ್ದುಗೊಳಿಸಲು ಬಿಸಿಐ ಮುಂದಾಗಿ ತೀವ್ರ ಟೀಕೆಗೆ ಗುರಿಯಾಗಿತ್ತು. ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸಿದ್ದಕ್ಕೆ ಅವರನ್ನು ‘ಪರಾವಲಂಬಿಗಳು’ ಎಂದು ಕೀಳಾಗಿ ನಿಂದಿಸಲಾಗಿತ್ತು. ಅಂತಿಮವಾಗಿ ದೇಶಾದ್ಯಂತ ವಿರೋಧ ವ್ಯಕ್ತವಾದಾಗ ಈ ವಿವಾದದಲ್ಲಿ ಮಿಶ್ರಾ ಅವರು ಕ್ಷಮೆಯಾಚಿಸಬೇಕಾಯಿತು ಎಂಬ ಅಂಶವನ್ನೂ ನ್ಯಾಯಾಲಯದಲ್ಲಿ ಉಲ್ಲೇಖಿಸಲಾಯಿತು.
ದೇಶದ ಎಲ್ಲ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳು ಮುಂದಿನ 15 ದಿನಗಳೊಳಗೆ ತಮ್ಮ ರಾಜ್ಯ ಬಾರ್ ಕೌನ್ಸಿಲ್‌ಗಳಿಗೆ ಇಬ್ಬರು ಮಹಿಳಾ ಸದಸ್ಯರನ್ನು ನಾಮನಿರ್ದೇಶನ ಮಾಡಬೇಕು. ತದನಂತರ ಒಂದು ತಿಂಗಳೊಳಗೆ ರಾಜ್ಯ ಬಾರ್ ಕೌನ್ಸಿಲ್‌ಗಳು ತಮ್ಮ ಹೊಸ ಅಧ್ಯಕ್ಷರು, ಉಪಾಧ್ಯಕ್ಷರು ಮತ್ತು ಬಿಸಿಐ ಪ್ರತಿನಿಧಿಯನ್ನು ಅಧಿಕೃತವಾಗಿ ಚುನಾವಣೆ ಮೂಲಕ ಆಯ್ಕೆ ಮಾಡಬೇಕು ಎಂದು ಸುಪ್ರೀಂ ಕೋರ್ಟ್ ನಿರ್ದೇಶನ ನೀಡುವ ಮೂಲಕ ಬಾರ್ ಕೌನ್ಸಿಲ್‌ನ ಪಾರದರ್ಶಕತೆಗೆ ಮುನ್ನುಡಿ ಬರೆದಿದೆ.
