‘ತಮ್ಮ ಮುಂಬರುವ ಸ್ಟ್ಯಾಂಡ್-ಅಪ್ ಕಾಮಿಡಿ ಕಾರ್ಯಕ್ರಮಕ್ಕೆ ಅಡ್ಡಿಪಡಿಸಲು ಕಿಡಿಗೇಡಿಗಳು ಬಂದರೆ ರಕ್ಷಣೆ ನೀಡುತ್ತೀರಾ’? ಎಂದು ಖ್ಯಾತ ಹಾಸ್ಯ ಕಲಾವಿದ ಕುನಾಲ್ ಕಮ್ರಾ ಮುಂಬೈ ಪೊಲೀಸರನ್ನು ಪ್ರಶ್ನಿಸಿದ್ದಾರೆ.
ಕಳೆದ ವರ್ಷ ಮುಂಬೈನಲ್ಲಿ ನಡೆದ ಅವರ ಕಾರ್ಯಕ್ರಮವೊಂದು ಭಾರಿ ರಾಜಕೀಯ ವಿವಾದಕ್ಕೆ ಕಾರಣವಾಗಿ, ಅವರ ವಿರುದ್ಧ ಪ್ರಕರಣ ದಾಖಲಾಗಿದ್ದಲ್ಲದೆ, ಕಾರ್ಯಕ್ರಮ ನಡೆದ ಸ್ಥಳದ ಮೇಲೆ ದಾಳಿಯೂ ನಡೆದಿತ್ತು.
”ನನ್ನ ಮುಂದಿನ ಕಾರ್ಯಕ್ರಮ ಯಾವಾಗ ಎಂದು ಕೇಳುವವರಿಗೆ ನನ್ನದೂ ಅದೇ ಪ್ರಶ್ನೆಯಿದೆ. ಮನರಂಜನಾ ರಾಜಧಾನಿ ಮುಂಬೈನಲ್ಲಿ ನಾನು ಯಾವಾಗ ಪ್ರದರ್ಶನ ನೀಡಬಹುದು? ಇದನ್ನು ಮುಂಬೈ ಪೊಲೀಸರೇ ತಿಳಿಸಬೇಕು,” ಎಂದು ಭಾನುವಾರ ಎಕ್ಸ್ (X) ಖಾತೆಯಲ್ಲಿ ಕಮ್ರಾ ಬರೆದುಕೊಂಡಿದ್ದಾರೆ. ಕಾನೂನಿನ ಚೌಕಟ್ಟಿನೊಳಗೆ ಕೇವಲ 100 ಪ್ರೇಕ್ಷಕರಿರುವ ಒಳಾಂಗಣದಲ್ಲಿ ಈ ಕಾರ್ಯಕ್ರಮ ನಡೆಯಲಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
”ನಾನು ಕೇಳುತ್ತಿರುವುದು ಇಷ್ಟೇ, ಟಿಕೆಟ್ ಖರೀದಿಸದೆ ಬರುವ 40-50 ಮಂದಿ ಹಾಸ್ಯಪ್ರಜ್ಞೆ ಇಲ್ಲದ ವ್ಯಕ್ತಿಗಳು ಕಾರ್ಯಕ್ರಮವನ್ನು ರದ್ದುಗೊಳಿಸಲು, ಅಡ್ಡಿಪಡಿಸಲು ಅಥವಾ ಸ್ಥಳಕ್ಕೆ ಹಾನಿ ಮಾಡಲು ಬಂದರೆ, ನೀವು ಅವರಿಗೆ ಅವಕಾಶ ನೀಡುತ್ತೀರಾ? ಸ್ವಾತಂತ್ರ್ಯದ ಅರ್ಥವೇನು ಎಂಬುದನ್ನು ಈ ಜನರು ನಿರ್ಧರಿಸುತ್ತಾರೆಯೇ? ಅಂತಿಮವಾಗಿ ನನ್ನ ಪ್ರಶ್ನೆ ಇಷ್ಟೇ: ನೀವು ಕಿಡಿಗೇಡಿಗಳ ಪರವೋ ಅಥವಾ ಕಾನೂನಿನ ಪರವೋ?” ಎಂದು ಅವರು ಖಾರವಾಗಿ ಪ್ರಶ್ನಿಸಿದ್ದಾರೆ. ಸದ್ಯಕ್ಕೆ ಅವರು ತಮ್ಮ ಮುಂಬರುವ ಕಾರ್ಯಕ್ರಮದ ದಿನಾಂಕ ಅಥವಾ ಸ್ಥಳವನ್ನು ಪ್ರಕಟಿಸಿಲ್ಲ.
2025ರ ಫೆಬ್ರವರಿ 2ರಂದು ಖಾರ್‌ನ ‘ದಿ ಹ್ಯಾಬಿಟಾಟ್’ನಲ್ಲಿ ಕಮ್ರಾ ಅವರ ‘ನಯಾ ಭಾರತ್’ ಕಾರ್ಯಕ್ರಮ ನಡೆದಿತ್ತು. ಇದರಲ್ಲಿ 1997ರ ‘ದಿಲ್ ತೋ ಪಾಗಲ್ ಹೈ’ ಚಿತ್ರದ ‘ಭೋಲಿ ಸಿ ಸೂರತ್’ ಹಾಡಿನ ವಿಡಂಬನೆ ಮಾಡಲಾಗಿತ್ತು. 2022ರಲ್ಲಿ ಶಿವಸೇನೆ ಇಬ್ಭಾಗವಾಗಿ ಏಕನಾಥ್ ಶಿಂಧೆ ಬಂಡಾಯವೆದ್ದಿದ್ದನ್ನು ಈ ಹಾಡಿನಲ್ಲಿ ಪರೋಕ್ಷವಾಗಿ, ಆದರೆ ಸ್ಪಷ್ಟವಾಗಿ ಅಣಕಿಸಲಾಗಿತ್ತು. ಈ ವಿಡಿಯೋ ಮಾರ್ಚ್ 2025ರಲ್ಲಿ ವೈರಲ್ ಆಗಿ ತೀವ್ರ ವಿವಾದ ಸೃಷ್ಟಿಸಿತ್ತು.
ಇದರ ಬೆನ್ನಲ್ಲೇ ಶಿವಸೇನೆ ಶಾಸಕ ಮುರ್ಜಿ ಪಟೇಲ್ ನೀಡಿದ ದೂರಿನ ಮೇರೆಗೆ ಕಮ್ರಾ ವಿರುದ್ಧ ಎಫ್‌ಐಆರ್ ದಾಖಲಾಗಿತ್ತು. ವಿಚಾರಣೆಗೆ ಹಾಜರಾಗುವಂತೆ ಪೊಲೀಸರು ಮೂರು ಬಾರಿ ಸಮನ್ಸ್ ನೀಡಿದ್ದರೂ ಕಮ್ರಾ ಹಾಜರಾಗಿರಲಿಲ್ಲ. ಬಳಿಕ ಮಾರ್ಚ್ 2025ರಲ್ಲಿ ಮದ್ರಾಸ್ ಹೈಕೋರ್ಟ್ ಅವರಿಗೆ ಮಧ್ಯಾಂತರ ನಿರೀಕ್ಷಣಾ ಜಾಮೀನು ಮಂಜೂರು ಮಾಡಿತ್ತು. ಇದೇ ವೇಳೆ ಶಿವಸೇನೆ ಕಾರ್ಯಕರ್ತರು ‘ದಿ ಹ್ಯಾಬಿಟಾಟ್’ ಮೇಲೆ ದಾಳಿ ನಡೆಸಿ, ಹಾನಿ ಮಾಡಿದ್ದರಿಂದ ಸ್ಥಳವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿತ್ತು.
ಈ ವಿವಾದ ಮಹಾರಾಷ್ಟ್ರ ವಿಧಾನಮಂಡಲವನ್ನೂ ತಲುಪಿತ್ತು. ಬಿಜೆಪಿ ಎಂಎಲ್‌ಸಿ ಪ್ರವೀಣ್ ದರೇಕರ್ ಅವರು ಕಮ್ರಾ ವಿರುದ್ಧ ಹಕ್ಕುಚ್ಯುತಿ ನೋಟಿಸ್ ಮಂಡಿಸಿದ್ದರು. 2026ರಲ್ಲಿ ವಿಧಾನ ಪರಿಷತ್ತಿನ ಹಕ್ಕುಬಾಧ್ಯತಾ ಸಮಿತಿಯ ಮುಂದೆ ಹಾಜರಾಗಿದ್ದ ಕಮ್ರಾ, “ನಾನು ಯಾವುದೇ ತಪ್ಪು ಮಾಡಿಲ್ಲ. ಕ್ಷಮೆಯಾಚಿಸುವುದು ಪ್ರಾಮಾಣಿಕ ಎನಿಸಿಕೊಳ್ಳುವುದಿಲ್ಲ” ಎಂದು ಹೇಳಿ ಕ್ಷಮೆಯಾಚಿಸಲು ನಿರಾಕರಿಸಿದ್ದರು.
