ತಮ್ಮ ಮತವನ್ನು ‘ಸ್ಥಳಾಂತರ’ದ ಅಡಿಯಲ್ಲಿ ವರ್ಗೀಕರಿಸಿ, ಅಳಿಸಿ ಹಾಕಲಾಗಿದೆ ಎಂದು ಎಎಪಿಯಿಂದ ಬಿಜೆಪಿಗೆ ಪಕ್ಷಾಂತರಗೊಂಡ ರಾಜ್ಯಸಭಾ ಸದಸ್ಯ ರಾಘವ್ ಚಡ್ಡಾ ಆರೋಪಿಸಿದ್ದಾರೆ. ಅವರ ಆರೋಪವು ಪಂಜಾಬ್‌ನಲ್ಲಿ ರಾಜಕೀಯ ವಿವಾದ ಹುಟ್ಟುಹಾಕಿದೆ. ಅವರ ಆರೋಪಕ್ಕೆ ಪ್ರತಿಕ್ರಿಯಿಸಿರುವ ಪಂಜಾಬ್ ಚುನಾವಣಾಧಿಕಾರಿ, ‘ಆಗಸ್ಟ್‌ 13ರಂದು ಪ್ರಕಟಿಸಲಾಗಿದ್ದು ಕೇವಲ ಕರಡು ಮತದಾರರ ಪಟ್ಟಿಯಷ್ಟೇ. ರಾಜ್ಯದ ಅಂತಿಮ ಪಟ್ಟಿಯಲ್ಲ” ಎಂದಿದ್ದಾರೆ.
ಮುಂದುವರೆದು, “ಚಡ್ಡಾ ಅವರ ವಿಷಯವನ್ನು ಸಂಪೂರ್ಣವಾಗಿ ಪರಿಶೀಲಿಸಲಾಗುತ್ತಿದೆ. ಆಯೋಗದ ನಿರ್ದೇಶನಗಳಿಗೆ ಅನುಗುಣವಾಗಿ ಸೂಕ್ತ ಬದಲಾವಣೆಗಳನ್ನು ಮಾಡಲಾಗುತ್ತದೆ. ಅಕ್ಟೋಬರ್ 12 ರಂದು ಪ್ರಕಟವಾಗಲಿರುವ ಅಂತಿಮ ಮತದಾರರ ಪಟ್ಟಿಯಲ್ಲಿ ಅಗತ್ಯ ತಿದ್ದುಪಡಿಗಳನ್ನು ಮಾಡಿ, ಪ್ರಕಟಿಸಲಾಗುತ್ತದೆ” ಎಂದು ಹೇಳಿದ್ದಾರೆ.
ಪಂಚಾಬ್‌ನ ಮೊಹಾಲಿಯಲ್ಲಿ ಮತದಾರರ ನೋಂದಣಿ ಹೊಂದಿರುವ ಸಂಸದ ರಾಘವ್ ಚಡ್ಡಾ, “ಕರಡು ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರನ್ನು ‘ಸ್ಥಳಾಂತರಿತ’ ಎಂದು ಗುರುತಿಸಲಾಗಿದೆ. ಎಎಪಿ ಸರ್ಕಾರವು ರಾಜಕೀಯ ದ್ವೇಷದಿಂದ ಈ ರೀತಿ ಮಾಡಿದೆ” ಎಂದು ಆರೋಪಿಸಿದ್ದರು.
ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದ ಚಡ್ಡಾ, “ನಾನು ಪಂಜಾಬ್‌ನಿಂದ ಆಯ್ಕೆಯಾದ ಹಾಲಿ ರಾಜ್ಯಸಭಾ ಸಂಸದ. ನನ್ನ ಹೆಸರನ್ನು ‘ಸ್ಥಳಾಂತರಿತ’ ಎಂದು ವರ್ಗೀಕರಿಸಿರುವುದು ಸರಿಯಲ್ಲ” ಎಂದು ಹೇಳಿದ್ದರು.
“ಎಸ್ಐಆರ್ ನಿಯಮಾವಳಿಗಳ ಪ್ರಕಾರ ಸಂಸದರು ಮತ್ತು ಶಾಸಕರು ಸೇರಿದಂತೆ ಜನಪ್ರತಿನಿಧಿಗಳಿಗೆ ನೀಡಲಾಗುವ ‘ಸಂರಕ್ಷಿತ ಪಟ್ಟಿ’ಯ ನಿಯಮಗಳನ್ನು ತಮ್ಮ ವಿಷಯದಲ್ಲಿ ಉದ್ದೇಶಪೂರ್ವಕವಾಗಿಯೇ ಉಲ್ಲಂಘಿಸಲಾಗಿದೆ. ತಮ್ಮ ಸಮಸ್ಯೆಗೆ ಎಸ್ಐಆರ್ ಮಾರ್ಗದರ್ಶಿಸೂತ್ರಗಳಡಿಯಲ್ಲೇ ಕಾನೂನಾತ್ಮಕ ಪರಿಹಾರಗಳನ್ನು ಕಂಡುಕೊಳ್ಳುತ್ತಿದ್ದೇನೆ” ಎಂದೂ ಹೇಳಿಕೊಂಡಿದ್ದರು.
ಮತ್ತೊಂದೆಡೆ, ರಾಘವ್ ಚಡ್ಡಾ ಅವರ ಆರೋಪಗಳನ್ನು ಎಎಪಿ ನಿರಾಕರಿಸಿದೆ. “ಚಡ್ಡಾ ಅವರು ತಮ್ಮ ಮತದಾರರ ನೋಂದಣಿಯನ್ನು ದೆಹಲಿಗೆ ವರ್ಗಾಯಿಸಲು ಪ್ರಯತ್ನಿಸುತ್ತಿದ್ದಾರೆ. ಅಲ್ಲದೆ, ಮತದಾರರ ಪಟ್ಟಿ ತಯಾರಿಕೆಯಲ್ಲಿ ಪಂಜಾಬ್ ಸರ್ಕಾರದ ಯಾವುದೇ ಪಾತ್ರವಿಲ್ಲ. ಅದು ಸಂಪೂರ್ಣವಾಗಿ ಚುನಾವಣಾ ಆಯೋಗದ ಸುಪರ್ದಿಯಲ್ಲಿದೆ” ಎಂದು ಎಎಪಿ ಸ್ಪಷ್ಟಪಡಿಸಿದೆ.
ಅಂದಹಾಗೆ, ಎಸ್ಐಆರ್ ಪ್ರಕ್ರಿಯೆಯಲ್ಲಿ ಸಂಸದರು ಮತ್ತು ಶಾಸಕರಿಗೆ ‘ಸಂರಕ್ಷಿತ ಪಟ್ಟಿ’ಯಡಿ ವಿನಾಯಿತಿ ನೀಡಿ, ಸಾಮಾನ್ಯ ಜನರನ್ನು ಕಡೆಗಣಿಸಿರುವುದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ನಾಯಕರಿಗೆ ಸುಲಭ ವಿನಾಯಿತಿ ಸಿಗುವಾಗ, ಸಾಮಾನ್ಯ ನಾಗರಿಕರು ಮಾತ್ರ ತಮ್ಮ ಹಕ್ಕು ಸಾಬೀತುಪಡಿಸಲು ನೋಟಿಸ್, ಆಕ್ಷೇಪಣೆ ಹಾಗೂ ಮೇಲ್ಮನವಿಗಳ ಹೆಸರಿನಲ್ಲಿ ಸರ್ಕಾರಿ ಕಚೇರಿಗಳಿಗೆ ಅಲೆಯುವ ಪರಿಸ್ಥಿತಿ ತಂದೊಡ್ಡಿರುವುದರ ವಿರುದ್ಧ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
“ಜನಪ್ರತಿನಿಧಿಗಳಿಗೆ ಮಾತ್ರ ವಿಶೇಷ ಹಕ್ಕು ನೀಡಿ, ಸಾರ್ವಜನಿಕರನ್ನು ಸಾಲಿನಲ್ಲಿ ನಿಲ್ಲಿಸುವುದು ಪ್ರಜಾಪ್ರಭುತ್ವದ ಮೂಲ ಆಶಯಕ್ಕೇ ಎಸಗುವ ದ್ರೋಹ. ಸಂವಿಧಾನದಲ್ಲಿ ಪ್ರತಿಯೊಬ್ಬ ಪ್ರಜೆಯೂ ಸಮಾನ. ಮತದಾರರ ಪಟ್ಟಿ ಪರಿಷ್ಕರಣೆ ಹೆಸರಿನಲ್ಲಿ ಸಾಮಾನ್ಯ ಜನರಿಗೆ ಅನಗತ್ಯ ಅಲೆದಾಟ ಹಾಗೂ ಕಿರುಕುಳ ನೀಡುವುದನ್ನು ತಕ್ಷಣವೇ ನಿಲ್ಲಿಸಿ, ಸಾರ್ವಜನಿಕರಿಗೂ ಸರಳ ಹಾಗೂ ಸುಲಭ ವ್ಯವಸ್ಥೆಯನ್ನು ಕಲ್ಪಿಸಬೇಕು” ಎಂದು ನಾಗರಿಕ ಸಂಘಟನೆಗಳು ಆಗ್ರಹಿಸಿವೆ.
