‘ಊರು ಕೊಳ್ಳೆ ಹೊಡೆದ ಮೇಲೆ ಕೋಟೆ ಬಾಗಿಲು ಹಾಕಿದರು’ ಎಂಬ ನಾಣ್ಣುಡಿಯಂತೆ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯ ಸಾರ್ವಕಾಲಿಕ ಕುಸಿತ ಕಂಡು ಪಾತಾಳ ತಲುಪಿದ ಬಳಿಕ, ಕೇಂದ್ರ ಸರ್ಕಾರ ತಡವಾಗಿ ಎಚ್ಚೆತ್ತುಕೊಂಡಿದೆ. ದೇಶದ ಆರ್ಥಿಕತೆಯಿಂದ ಲಕ್ಷಾಂತರ ಕೋಟಿ ರೂಪಾಯಿಗಳ ವಿದೇಶಿ ಬಂಡವಾಳ ಈಗಾಗಲೇ ಸಂಪೂರ್ಣವಾಗಿ ಗುಳೆಯೆದ್ದ ಬಳಿಕ, ಆ ಬಂಡವಾಳವನ್ನು ಮರಳಿ ಸೆಳೆಯಲು ತೆರಿಗೆ ವಿನಾಯಿತಿ ನೀಡುವ ಸುಗ್ರೀವಾಜ್ಞೆಯನ್ನು ಸರ್ಕಾರ ಹೊರಡಿಸಿದೆ. ಆದರೆ, ಕಾಲ ಮಿಂಚಿದ ಮೇಲೆ ಕೈಗೊಂಡಿರುವ ಸರ್ಕಾರದ ಈ ವಿಳಂಬ ನೀತಿಯು ಆರ್ಥಿಕ ವಲಯದಲ್ಲಿ ತೀವ್ರ ಟೀಕೆಗೆ ಗುರಿಯಾಗಿದೆ.
ಕಳೆದೆರಡು ವರ್ಷಗಳಿಂದ ರೂಪಾಯಿ ಮೌಲ್ಯವು ಸತತವಾಗಿ ಕುಸಿಯುತ್ತಿದ್ದರೂ ಕೇಂದ್ರದ ಮೋದಿ ಸರ್ಕಾರ ಮಾತ್ರ ಪ್ರೇಕ್ಷಕನಂತೆ ಮೌನ ವಹಿಸಿತ್ತು. ಇದರ ನೇರ ಪರಿಣಾಮವಾಗಿ ದೇಶದಲ್ಲಿ ಆಮದು ವೆಚ್ಚ ದುಬಾರಿಯಾಗಿ, ಪೆಟ್ರೋಲ್, ಡೀಸೆಲ್ ಸೇರಿದಂತೆ ಅಗತ್ಯ ವಸ್ತುಗಳ ಬೆಲೆ ಗಗನಕ್ಕೇರಿ ಹಣದುಬ್ಬರ ಮಿತಿಮೀರಿತು. ಕಚ್ಚಾತೈಲದ ಆಮದು ವೆಚ್ಚ ಹೆಚ್ಚಾಗಿ ಆರ್ಥಿಕ ಹೊರೆ ದುಪ್ಪಟ್ಟಾಯಿತು. ಸಾಮಾನ್ಯ ಜನರ ಬದುಕು ಮೂರಾಬಟ್ಟೆಯಾಗಿ, ದೇಶದ ಆರ್ಥಿಕತೆಗೆ ಅಪಾರ ಹಾನಿ ಸಂಭವಿಸಿದ ಮೇಲೆ ಇದೀಗ ತೆರಿಗೆ ರಿಯಾಯಿತಿಯ ಮೊರೆ ಹೋಗಿರುವುದು ಸರ್ಕಾರದ ಆರ್ಥಿಕ ದೂರದೃಷ್ಟಿಯ ಕೊರತೆಯನ್ನು ಎತ್ತಿ ತೋರಿಸುತ್ತಿದೆ.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (FII) ಏಕಾಏಕಿ ಒಂದೇ ದಿನದಲ್ಲಿ ಬಂಡವಾಳ ಹಿಂಪಡೆದಿಲ್ಲ. ಜಾಗತಿಕ ಮಾರುಕಟ್ಟೆಯ ಬದಲಾವಣೆಗಳು ಹಾಗೂ ಅಮೆರಿಕದ ಫೆಡರಲ್ ರಿಸರ್ವ್ ಬಡ್ಡಿದರ ಏರಿಕೆಯ ಮುನ್ಸೂಚನೆ ಇದ್ದರೂ, ಸರ್ಕಾರ ಸಕಾಲದಲ್ಲಿ ಹೂಡಿಕೆದಾರರ ವಿಶ್ವಾಸ ಉಳಿಸಿಕೊಳ್ಳಲು ಮುಂದಾಗಲಿಲ್ಲ. ಬದಲಿಗೆ, ಕಣ್ಣೆದುರಲ್ಲೇ ಲಕ್ಷಾಂತರ ಕೋಟಿ ರೂಪಾಯಿಗಳ ಬೃಹತ್ ಬಂಡವಾಳ ದೇಶದಿಂದ ದಿನೇ ದಿನೇ ಹೊರಹರಿಯುತ್ತಿದ್ದರೂ ನಿರ್ಲಕ್ಷ್ಯ ವಹಿಸಲಾಯಿತು. ಈಗ ಆರ್ಥಿಕತೆ ಹಳ್ಳ ಹಿಡಿದ ಮೇಲೆ, ಅದೇ ಬಂಡವಾಳವನ್ನು ಮರಳಿ ತರಲು ತೆರಿಗೆ ಕಡಿತದ ಕೆಂಪು ಹಾಸು ಹಾಸುತ್ತಿರುವುದು ವಿಪರ್ಯಾಸವೇ ಸರಿ.
ಇದನ್ನು ಓದಿದ್ದೀರಾ? 28 ವರ್ಷಗಳ ಟಿಎಂಸಿ ಸಾಮ್ರಾಜ್ಯ ಕೇವಲ 13 ದಿನಗಳಲ್ಲಿ ಕುಸಿದದ್ದು ಹೇಗೆ?
ಇನ್ನೊಂದೆಡೆ, ರೂಪಾಯಿ ಪತನವನ್ನು ತಡೆಯಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ತನ್ನ ವಿದೇಶಿ ವಿನಿಮಯ ಮೀಸಲು ನಿಧಿಯಿಂದ (Forex Reserves) ಸಾವಿರಾರು ಕೋಟಿ ಡಾಲರ್‌ಗಳನ್ನು ಮಾರುಕಟ್ಟೆಗೆ ಸುರಿದು ಅಕ್ಷರಶಃ ಕೈಸುಟ್ಟುಕೊಂಡಿದೆ. ದೇಶದ ಬೊಕ್ಕಸಕ್ಕೆ ಭಾರಿ ನಷ್ಟವಾದರೂ ಕುಸಿತ ತಡೆಯಲು ಸಾಧ್ಯವಾಗಲಿಲ್ಲ. ಆರ್‌ಬಿಐನ ಎಲ್ಲಾ ಪ್ರಯತ್ನಗಳು ವಿಫಲವಾಗಿ, ಮೀಸಲು ನಿಧಿ ಕರಗಿದ ನಂತರ, ಅಂತಿಮವಾಗಿ ಬೇರೆ ದಾರಿಯಿಲ್ಲದೆ ಸರ್ಕಾರ ಈ ಸುಗ್ರೀವಾಜ್ಞೆಯ ಮೊರೆ ಹೋಗಿದ್ದು, ಇದು ‘ರೋಗಿ ಸತ್ತ ಮೇಲೆ ವೈದ್ಯ ಬಂದಂತೆ’ ಆಗಿದೆ.
ಹಲವು ಆರ್ಥಿಕ ತಜ್ಞರು ಸರ್ಕಾರದ ಈ ವಿಳಂಬ ಧೋರಣೆಯನ್ನು ಕಟುವಾಗಿ ಟೀಕಿಸಿದ್ದಾರೆ. “ಈಗ ನೀಡಿರುವ ತೆರಿಗೆ ರಿಯಾಯಿತಿಗಳನ್ನು ಕನಿಷ್ಠ ಆರು ತಿಂಗಳ ಮುಂಚೆಯೇ ನೀಡಿದ್ದರೆ ಬಂಡವಾಳ ಹೊರಹೋಗುವುದನ್ನೇ ತಡೆಯಬಹುದಿತ್ತು” ಎಂಬುದು ತಜ್ಞರ ಸ್ಪಷ್ಟ ಅಭಿಪ್ರಾಯ. ಹೊಸ ಸುಗ್ರೀವಾಜ್ಞೆಯಿಂದಾಗಿ ಭವಿಷ್ಯದಲ್ಲಿ ವಿದೇಶಿ ಬಂಡವಾಳ ಮರಳಿ ಬರಬಹುದಾದರೂ, ಅಷ್ಟರಲ್ಲಾಗಲೇ ದೇಶದ ಆರ್ಥಿಕತೆ, ರೂಪಾಯಿ ಮೌಲ್ಯ ಮತ್ತು ವಿದೇಶಿ ವಿನಿಮಯ ಮೀಸಲು ನಿಧಿಗೆ ಆಗಿರುವ ಬೃಹತ್ ಹಾನಿಯನ್ನು ಸರಿಪಡಿಸಲು ಬಹಳಷ್ಟು ವರ್ಷಗಳೇ ಬೇಕಾಗಲಿದೆ ಎಂಬುದು ಸದ್ಯದ ಕಟು ವಾಸ್ತವ.
