ಚಾಕೊಲೇಟ್ ಕದ್ದಿರಬಹುದೆಂದು ಶಂಕಿಸಿ ತಂದೆಯೇ ತನ್ನ 12 ವರ್ಷದ ಮಗಳಿಗೆ ಕೋಲಿನಿಂದ ಹೊಡೆದು ಕೊಂದಿರುವ ಘಟನೆ ಉತ್ತರ ಪ್ರದೇಶದ ಬುಲಂದ್‌ಶಹರ್‌ನ ನರೋರಾದ ರತನ್‌ಪುರ ಗ್ರಾಮದಲ್ಲಿ ನಡೆದಿದೆ.
ನಿಮ್ಮ ಮಗಳು ಪೂಜಾ ಹಣ ನೀಡದೆಯೇ ಚಾಕೊಲೇಟ್ ಪ್ಯಾಕೆಟ್ ತೆಗೆದುಕೊಂಡಿದ್ದಾಳೆ ಎಂದು ಅಂಗಡಿಯವರು ಹೇಳಿದ್ದರು. ಇದರಿಂದ ಸಿಟ್ಟಿಗೆದ್ದ ತಂದೆ ಪುಷ್ಪೇಂದ್ರ ಸಂಜೆಯ ವೇಳೆ ಮದ್ಯಪಾನ ಮಾಡಿ ಮನೆಗೆ ಬಂದು ಕೋಲಿನಿಂದ ಮಗಳಿಗೆ ಹೊಡೆದಿದ್ದಾನೆ.
ಇದನ್ನು ಓದಿದ್ದೀರಾ? ರಾತ್ರಿಯಿಡೀ ತಲೆಕೆಳಗಾಗಿ ನೇತುಹಾಕಿ ಬಾಲಕಿಯನ್ನು ಕೊಂದ ವಿಕೃತ ತಂದೆ
ಈ ಬಗ್ಗೆ ಆರೋಪಿಯ ಪತ್ನಿ ದೂರು ನೀಡಿದ್ದು, ನಮ್ಮ ಮಗಳ ಮೇಲೆ ಆತ ಕೋಲಿನಿಂದ ಹೊಡೆಯುವಾಗ ನಾನು ತಡೆಯಲು ಹೋದೆ. ನನಗೂ ಹಲ್ಲೆ ನಡೆಸಿದರು ಎಂದು ಹೇಳಿದ್ದಾರೆ.
ಇನ್ನು ಮಗಳಿಗೆ ತಂದೆ ಕ್ರೂರವಾಗಿ ಥಳಿಸಿದ್ದು, ಪೂಜಾ ತಲೆಗೆ ಗಂಭೀರವಾದ ಗಾಯವಾಗಿ ಆಕೆ ಪ್ರಜ್ಞಾಹೀನಳಾಗಿದ್ದಳು. ಆಕೆಯನ್ನು ಆಸ್ಪತ್ರೆಗೆ ದಾಖಲಿಸುವ ಬದಲಾಗಿ ತಂದೆ ಆಕೆಯನ್ನು ಮತ್ತು ತನ್ನ ಪತ್ನಿಯನ್ನು ಮನೆಯೊಳಗೆ ಕೂಡುಹಾಕಿ ಪರಾರಿಯಾಗಿದ್ದಾನೆ ಎಂದು ಆರೋಪಿಸಲಾಗಿದೆ.
ತಾಯಿ ನೆರೆಹೊರೆಯವರನ್ನು ಕರೆದಿದ್ದು, ಬಳಿಕ ಬಾಗಿಲು ತೆಗೆದು ಬಾಲಕಿಯನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಅಷ್ಟರಲ್ಲಿ ಬಾಲಕಿ ಮೃತಪಟ್ಟಿದ್ದಾಳೆ. ಮರಣೋತ್ತರ ಪರೀಕ್ಷೆಯಲ್ಲಿ ಆಕೆಯ ದೇಹದಲ್ಲಿ 10ರಿಂದ 12 ಗಾಯಗಳು ಕಂಡುಬಂದಿದೆ. ತಲೆಬುರುಡೆಗೆ ತೀವ್ರವಾದ ಏಟಾಗಿರುವುದೂ ತಿಳಿದುಬಂದಿದೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಗಾಗಿ ಹುಡುಕಾಟ ಆರಂಭಿಸಿದ್ದು, ಆರೋಪಿ ಪ್ರಸ್ತುತ ತಲೆಮರೆಸಿಕೊಂಡಿದ್ದಾನೆ.
ಇದೇ ರೀತಿಯ ಘಟನೆ ಮಹಾರಾಷ್ಟ್ರದ ಸಾಂಗ್ಲಿ ಜಿಲ್ಲೆಯಲ್ಲೂ ನಡೆದಿದೆ. ಸಂಬಂಧಿಕರ ಮನೆಯಿಂದ ಹಣ ಕಳ್ಳತನ ಮಾಡಿದ್ದಾಳೆ ಎಂಬ ಶಂಕೆಯ ಮೇಲೆ, ತಂದೆಯೊಬ್ಬ ತನ್ನ 10 ವರ್ಷದ ಮಗಳನ್ನು ರಾತ್ರಿಯಿಡೀ ತಲೆಕೆಳಗಾಗಿ ನೇತುಹಾಕಿ ಚಿತ್ರಹಿಂಸೆ ನೀಡಿದ್ದು, ಆಕೆ ಮೃತಪಟ್ಟಿದ್ದಾಳೆ. ಬಾಲಕಿಯ ತಂದೆ ದಾದು ಅಲಿಯಾಸ್ ನಾನಾ ಯಮಗರ್ ಎಂಬಾತನನ್ನು ಪೊಲೀಸರು ಬಂಧಿಸಿದ್ದಾರೆ.
