SIR ಪ್ರಕ್ರಿಯೆಯನ್ನು ವಿರೋಧಿಸಿ, CEC ಗ್ಯಾನೇಶ್ ಕುಮಾರ್ ರಾಜೀನಾಮೆಗೆ ಆಗ್ರಹಿಸಿ ಅಕ್ಟೋಬರ್ 23ರಂದು ದೆಹಲಿಗೆ ಮೆರವಣಿಗೆ ನಡೆಸಲು ಸಂಯುಕ್ತ ಕಿಸಾನ್ ಮೋರ್ಚಾ (ಎಸ್‌ಕೆಎಂ) ನೇತೃತ್ವದಲ್ಲಿ ವಿವಿಧ ರೈತ ಸಂಘಟನೆಗಳು ನಿರ್ಧರಿಸಿವೆ.
ಈ ಕುರಿತು ಶುಕ್ರವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅಖಿಲ ಭಾರತ ಕಿಸಾನ್ ಸಭಾ (ಎಐಕೆಎಸ್) ಅಧ್ಯಕ್ಷ ಹಾಗೂ ಎಸ್‌ಕೆಎಂ ಹಿರಿಯ ನಾಯಕ ಅಶೋಕ್ ಧವಳೆ, ಬೇಡಿಕೆಗೆ ಬೆಂಬಲವಾಗಿ ದೇಶದ ಎಲ್ಲ ಜಿಲ್ಲೆ, ತಾಲೂಕು ಹಾಗೂ ಬ್ಲಾಕ್ ಕೇಂದ್ರಗಳಲ್ಲಿ ಏಕಕಾಲದಲ್ಲಿ ಪ್ರತಿಭಟನೆ ನಡೆಸಲಾಗುವುದು ಎಂದು ತಿಳಿಸಿದರು.
ಜಂತರ್ ಮಂತರ್ ಸುತ್ತಮುತ್ತ ಪ್ರತಿಭಟನೆಗಳಿಗೆ ನಿಷೇಧವಿರುವ ಕುರಿತು ಕೇಳಿದ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಅವರು, ರೈತರು ದೊಡ್ಡ ಮಟ್ಟದ ಹೋರಾಟಕ್ಕೆ ಸಿದ್ಧರಿದ್ದಾರೆ. SIR ವಿರುದ್ಧದ ಅತ್ಯಂತ ದೊಡ್ಡ ಹೋರಾಟಗಳಲ್ಲಿ ಇದೂ ಒಂದಾಗಲಿದೆ. ದಮನಕಾರಿ ಕ್ರಮಗಳಿಗೆ ನಾವು ಹೆದರುವುದಿಲ್ಲ. ಅಧಿಕಾರಿಗಳು ಏನು ಮಾಡಬೇಕೆಂದಿದ್ದಾರೋ ಮಾಡಲಿ ಎಂದು ಸವಾಲು ಹಾಕಿದರು. ವಿದ್ಯಾರ್ಥಿಗಳು, ಯುವಜನರು, ಮಹಿಳೆಯರು, ನಾಗರಿಕ ಸಮಾಜದ ಸಂಘಟನೆಗಳು ಹಾಗೂ ಕಾರ್ಮಿಕ ಸಂಘಟನೆಗಳ ಸದಸ್ಯರೂ ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಅವರು ತಿಳಿಸಿದರು.
ಎಐಕೆಎಸ್‌ನ 36ನೇ ಅಖಿಲ ಭಾರತ ಸಮ್ಮೇಳನ ನವೆಂಬರ್ 15ರಿಂದ 18ರವರೆಗೆ ತೆಲಂಗಾಣದ ನಲ್ಗೊಂಡದಲ್ಲಿ ನಡೆಯಲಿದೆ. ಈ ಸಮ್ಮೇಳನದ ಲಾಂಛನವನ್ನು ಅಶೋಕ್ ಧವಳೆ ಹಾಗೂ ಎಐಕೆಎಸ್ ಪ್ರಧಾನ ಕಾರ್ಯದರ್ಶಿ ವಿಜಯೂ ಕೃಷ್ಣನ್ ಬಿಡುಗಡೆ ಮಾಡಿದರು.
ಐತಿಹಾಸಿಕ ತೆಲಂಗಾಣ ಸಶಸ್ತ್ರ ರೈತ ಹೋರಾಟದ ಪ್ರಮುಖ ಕೇಂದ್ರವಾಗಿದ್ದ ಕಾರಣ ನಲ್ಗೊಂಡವನ್ನು ಸಮ್ಮೇಳನದ ಸ್ಥಳವಾಗಿ ಆಯ್ಕೆ ಮಾಡಲಾಗಿದೆ. ಎಐಕೆಎಸ್ 90 ವರ್ಷಗಳನ್ನು ಪೂರೈಸಿದ್ದು, 1.58 ಕೋಟಿಗೂ ಅಧಿಕ ಸದಸ್ಯರನ್ನು ಹೊಂದಿರುವ ವಿಶ್ವದ ಅತಿದೊಡ್ಡ ರೈತ ಸಂಘಟನೆಯಾಗಿ ಬೆಳೆದಿದೆ. ಸಾಮ್ರಾಜ್ಯಶಾಹಿ ಮತ್ತು ಊಳಿಗಮಾನ್ಯ ವ್ಯವಸ್ಥೆಗಳ ವಿರುದ್ಧದ ಹೋರಾಟದ ಪರಂಪರೆಯನ್ನು ಮುಂದುವರಿಸಿರುವ ಸಂಘಟನೆ, ತೆಲಂಗಾಣ, ತೆಭಾಗಾ, ವಾರ್ಲಿ ಆದಿವಾಸಿ, ಪುನ್ನಪ್ರ-ವಯಲಾರ್ ಹಾಗೂ ಸುರ್ಮಾ ಕಣಿವೆ ಸೇರಿದಂತೆ ಹಲವು ಐತಿಹಾಸಿಕ ಹೋರಾಟಗಳಿಂದ ಪ್ರೇರಣೆ ಪಡೆದಿದೆ. ನವ ಉದಾರವಾದಿ ಆರ್ಥಿಕ ನೀತಿಗಳ ವಿರುದ್ಧ ಪ್ರತಿರೋಧ ಕಟ್ಟುವ ನಿಟ್ಟಿನಲ್ಲಿ ಸಂಘಟನೆ ನಿರಂತರ ಹೋರಾಟಗಳನ್ನು ನಡೆಸುತ್ತಿದೆ ಎಂದರು.
ಅಮೆರಿಕದೊಂದಿಗಿನ ಪ್ರಸ್ತಾವಿತ ವ್ಯಾಪಾರ ಒಪ್ಪಂದ ಸೇರಿದಂತೆ ಮುಕ್ತ ವ್ಯಾಪಾರ ಒಪ್ಪಂದಗಳ ವಿರುದ್ಧ ನವೆಂಬರ್ 26ರಿಂದ ಮತ್ತಷ್ಟು ತೀವ್ರ ಪ್ರತಿಭಟನೆಗಳನ್ನು ನಡೆಸಲು ಸಂಯುಕ್ತ ಕಿಸಾನ್ ಮೋರ್ಚಾ ನಿರ್ಧರಿಸಿದೆ ಎಂದು ಅಶೋಕ್ ಧವಳೆ ತಿಳಿಸಿದರು.
ಅಮೆರಿಕದೊಂದಿಗೆ ವ್ಯಾಪಾರ ಒಪ್ಪಂದ ಜಾರಿಯಾದರೆ, ಭಾರೀ ಸಬ್ಸಿಡಿ ಪಡೆಯುವ ವಿದೇಶಿ ಕಾರ್ಪೊರೇಟ್ ಕೃಷಿ ಉತ್ಪನ್ನಗಳು ಆಮದು ಸುಂಕವಿಲ್ಲದೆ ಭಾರತೀಯ ಮಾರುಕಟ್ಟೆ ಪ್ರವೇಶಿಸುವ ಅಪಾಯವಿದೆ. ಇದರಿಂದ ದೇಶದ ರೈತರು, ಹೈನುಗಾರರು, ತೋಟಗಾರಿಕಾ ಬೆಳೆಗಾರರು, ಮೀನುಗಾರರು ಹಾಗೂ ಮೀನು ಕಾರ್ಮಿಕರ ಉತ್ಪನ್ನಗಳ ಬೆಲೆ ಕುಸಿಯಬಹುದು ಎಂದು ಅವರು ಆತಂಕ ವ್ಯಕ್ತಪಡಿಸಿದರು.
ಇದನ್ನೂ ಓದಿ: 20 ತಿಂಗಳಲ್ಲಿ 20 ಮುಖ್ಯ ಚುನಾವಣಾಧಿಕಾರಿಗಳ ವರ್ಗಾವಣೆ: ಗ್ಯಾನೇಶ್ ಕುಮಾರ್ ದಾಖಲೆ!
ಇಂತಹ ಒಪ್ಪಂದಗಳು ಭಾರತೀಯ ರೈತರು ಮತ್ತು ಗ್ರಾಮೀಣ ಬಡವರ ಬದುಕು ಹಾಗೂ ಜೀವನೋಪಾಯಕ್ಕೆ ಗಂಭೀರ ಅಪಾಯವನ್ನುಂಟುಮಾಡಲಿವೆ. ಭಾರತೀಯ ಕೃಷಿಯ ಭವಿಷ್ಯಕ್ಕೂ ಧಕ್ಕೆ ತರಲಿವೆ ಎಂದು ಎಚ್ಚರಿಸಿದರು. ನಲ್ಗೊಂಡದಲ್ಲಿ ನಡೆಯಲಿರುವ ಎಐಕೆಎಸ್ ಸಮ್ಮೇಳನವು ವಿವಿಧ ರೈತ ಸಂಘಟನೆಗಳನ್ನು ಒಗ್ಗೂಡಿಸಿ, ರೈತರ ಮೇಲಿನ ದಾಳಿಗಳ ವಿರುದ್ಧ ಸಾಮೂಹಿಕ ಹೋರಾಟ ರೂಪಿಸಲು ವೇದಿಕೆಯಾಗಲಿದೆ ಎಂದು ಅವರು ಹೇಳಿದರು. ಕೇರಳದ ಕೋಝಿಕ್ಕೋಡ್‌ನ ಅಶ್ವತ್ ಮಾಧವನ್ ವಿನ್ಯಾಸಗೊಳಿಸಿದ ಸಮ್ಮೇಳನದ ಲಾಂಛನವನ್ನು ದೇಶದ ವಿವಿಧ ಭಾಗಗಳಿಂದ ಬಂದ ವಿನ್ಯಾಸಗಳ ಪೈಕಿ ಆಯ್ಕೆ ಮಾಡಲಾಗಿದೆ.
1936ರಿಂದ ಇಂದಿನವರೆಗಿನ ರೈತ ಹೋರಾಟಗಳ ನಿರಂತರತೆಯನ್ನು ಈ ಲಾಂಛನ ಬಿಂಬಿಸುತ್ತದೆ. ಹಿನ್ನಲೆಯಲ್ಲಿ ನಲ್ಗೊಂಡಕ್ಕೆ ನೀರಾವರಿ ಸೌಲಭ್ಯ ಒದಗಿಸುವ ನಾಗಾರ್ಜುನ ಸಾಗರ ಅಣೆಕಟ್ಟಿನ ಚಿತ್ರವಿದ್ದು, ಮುನ್ನಡೆಯುತ್ತಿರುವ ರೈತರ ಚಿತ್ರವನ್ನು ಇದರಲ್ಲಿ ಬಳಸಲಾಗಿದೆ ಎಂದು ವಿಜಯೂ ಕೃಷ್ಣನ್ ವಿವರಿಸಿದರು. ಲಾಂಛನದಲ್ಲಿನ ಮೆರವಣಿಗೆಯ ಚಿತ್ರವು ತೆಲಂಗಾಣ ರೈತ ಹೋರಾಟ, ಇತ್ತೀಚಿನ ಕಿಸಾನ್ ಲಾಂಗ್ ಮಾರ್ಚ್ ಹಾಗೂ ಮುಂಬರುವ ಹೋರಾಟಗಳನ್ನು ಪ್ರತಿನಿಧಿಸುತ್ತದೆ ಎಂದರು.
