ಸದ್ದಿಲ್ಲದೆ ಅಡುಗೆ ಎಣ್ಣೆ ಬೆಲೆ ದಿಢೀೕರ್‌ ಏರಿಕೆ ಕಂಡಿರುವುದು ಹಬ್ಬದ ಬಜೆಟ್‌ ಏರು ಪೇರಾಗುವಂತೆ ಮಾಡುತ್ತಿದೆ. ತಾಳೆ(ಪಾಮ್‌) ಎಣ್ಣೆ ಬೆಲೆ ಒಮ್ಮೆಲೆ 130 ರೂ. ಆಸುಪಾಸು ಏರಿಕೆ ಕಂಡಿರುವುದು ಗ್ರಾಹಕರ ಜೇಬು ಬಿಸಿಯಾಗುವಂತೆ ಮಾಡಿದೆ.
ಕಳೆದ ತಿಂಗಳು ಮಧ್ಯಭಾಗದವರೆಗೆ ಅಡುಗೆ ಎಣ್ಣೆ ಅದರಲ್ಲೂ ತಾಳೆ ಎಣ್ಣೆ ಬೆಲೆ ಸೆ.10ರ ವರೆಗೆ 100 ರೂ. ಒಳಗಿತ್ತು. ಹೋಲ್‌ಸೇಲ್‌ನಲ್ಲಿ 90 ರೂ. ಮಾರಾಟ ಕಂಡಿದ್ದರೆ, ರಿಟೇಲ್‌ ಆಗಿ 95 ರೂ. ಮಾರಾಟವಾಗುತ್ತಿತ್ತು. ಇದೀಗ ಒಂದು ತಿಂಗಳ ಅಂತರದಲ್ಲಿ ಸುಮಾರು ಶೇ.40ರಷ್ಟು ಹೆಚ್ಚಳ ಕಂಡಿದೆ. ಇದರಿಂದ ಸದ್ಯ ಮಾರುಕಟ್ಟೆಯಲ್ಲಿ 130ರಿಂದ 135 ರೂ. ಪ್ರತಿ ಲೀಟರ್‌ ಮಾರಾಟ ಕಾಣುತ್ತಿದೆ.
ಪಾಮ್‌ ಎಣ್ಣೆ ಜತೆ ಸೂರ್ಯಕಾಂತಿ ಎಣ್ಣೆ ಬೆಲೆಯೂ ಹೆಚ್ಚಳ ಕಂಡಿದೆ. ಸೆ.10ರವರೆಗೆ 110ರಿಂದ 115 ರೂ. ಪ್ರತಿ ಲೀಟರ್‌ಗೆ ದರ ಇತ್ತು. ಇದೀಗ ಬ್ರ್ಯಾಂಡೆಡ್‌ ಎಣ್ಣೆ ಬೆಲೆ 140 ರೂ. ದಾಟಿದೆ. ಕೆಲವು ಬ್ರ್ಯಾಂಡ್‌ ಎಣ್ಣೆಗಳ ದರ 150 ರೂ. ಮುಟ್ಟಿದೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಸಂಶಯ ಪರಿಹರಿಸಿ, ನ್ಯಾಯಾಂಗದ ಘನತೆ ಎತ್ತಿ ಹಿಡಿದ ನ್ಯಾಯಮೂರ್ತಿ
ಕಳೆದ ತಿಂಗಳು ಕೇಂದ್ರ ಸರಕಾರ ಪಾಮ್‌ ಹಾಗೂ ಸೂರ್ಯಕಾಂತಿ ಎಣ್ಣೆ ಆಮದು ಮೇಲೆ ಸುಂಕ ಹೆಚ್ಚಳ ಮಾಡಿತ್ತು. ಅದು ನೇರವಾಗಿ ಪ್ರಭಾವ ಬೀರಿದ್ದು ಶೇ.20ರಷ್ಟು ದರ ಹೆಚ್ಚಳ ಕಂಡಿತ್ತು. ಇನ್ನೂ ಹಬ್ಬದ ಸೀಸನ್‌ ಆಗಿದ್ದರಿಂದ ಇನ್ನುಳಿದ ಶೇ.20ರಷ್ಟು ಬೆಲೆ ಹೆಚ್ಚಳ ಕಂಡಿದೆ ಎಂದು ಎಣ್ಣೆ ವ್ಯಾಪಾರಿಗಳು ಹೇಳುತ್ತಿದ್ದಾರೆ. ಪಾಮ್‌ ಎಣ್ಣೆ ದೇಶದಲ್ಲಿಉತ್ಪಾದನೆಗಿಂತ ಆಮದಿನ ಮೇಲೆ ಹೆಚ್ಚಿನ ಅವಲಂಬನೆ ಹೊಂದಿದೆ. ಇದರಿಂದ ಸುಂಕ ಹೆಚ್ಚಳ ನೇರವಾಗಿ ಪ್ರಭಾವ ಬೀರಿದೆ ಎನ್ನಲಾಗುತ್ತಿದೆ.
ಮುಖ್ಯವಾಗಿ ನವರಾತ್ರಿ ವೇಳೆ ಉತ್ತರ ಕರ್ನಾಟಕದಲ್ಲಿಎಣ್ಣೆ ಬಳಕೆ ಹೆಚ್ಚಳ ಆಗುತ್ತದೆ. ಪ್ರತಿ ಮನೆಗಳಲ್ಲೂ9 ದಿನ ಘಟ ಸ್ಥಾಪನೆ ಮಾಡಲಾಗುತ್ತದೆ. ಈ ವೇಳೆ ನಿರಂತರ ದೇವಿ ಹೆಸರಿನಲ್ಲಿಜ್ಯೋತಿ ಪ್ರಜ್ವಲನೆ ಮಾಡಲಾಗುತ್ತದೆ. ಇದರಿಂದ ಪ್ರತಿ ಬಾರಿ ಹಬ್ಬದ ವೇಳೆ ಬೆಲೆ ತುಸು ಹೆಚ್ಚಳ ಕಾಣುತ್ತಿತ್ತು. ಆದರೆ, ಈ ಬಾರಿ ಕೇಂದ್ರದ ಆಮದು ಸುಂಕ ಹೆಚ್ಚಳ ಹಿನ್ನೆಲೆ ಒಂದು ಬಾರಿಗೆ ಶೇ.30ರಿಂದ 40 ರಷ್ಟು ಹೆಚ್ಚಳ ಕಾಣುವಂತಾಗಿದೆ.
