ಮತದಾರರ ಪಟ್ಟಿ ವಿಶೇಷ ತೀವ್ರ ಪರಿಷ್ಕರಣೆ ನಡೆಸುತ್ತಿರುವ ಚುನಾವಣಾ ಆಯೋಗವು ಪ್ರಕ್ರಿಯೆಯ ಅಡಿಯಲ್ಲಿ ಹೊಸದಾಗಿ ಮತದಾರರ ಪಟ್ಟಿಗೆ ಸೇರ್ಪಡೆಯಾಗಲು ಬಯಸುವ ಹೊಸ ಮತದಾರರಿಗೆ ಆಯೋಗವು ಹೊಸದೊಂದು ಕಡ್ಡಾಯ ನಿಯಮವನ್ನು ಜಾರಿಗೆ ತಂದಿದೆ. ಹೊಸ ನಿಯಮದ ಪ್ರಕಾರ, ಹೊಸದಾಗಿ ಅರ್ಜಿ ಸಲ್ಲಿಸುವ ಮತದಾರರು ಎಸ್‌ಐಆರ್ ಪ್ರಕ್ರಿಯೆಯಲ್ಲಿ ದಾಖಲಾಗಿರುವ ತಮ್ಮ ಪೋಷಕರ (ತಂದೆ/ತಾಯಿ/ಪೋಷಕರು) ಸಂಪೂರ್ಣ ವಿವರಗಳನ್ನು ನೀಡುವುದನ್ನು ಕಡ್ಡಾಯಗೊಳಿಸಲಾಗಿದೆ. ಆದರೆ, ಅಧಿಕೃತ ಶಾಸನಬದ್ಧ ನಿಯಮಗಳಿಗೆ ಯಾವುದೇ ತಿದ್ದುಪಡಿ ತರದೆ, ಕೇವಲ ಆನ್‌ಲೈನ್ ಪೋರ್ಟಲ್‌ನಲ್ಲಿ ಈ ಹೊಸ ನಿಯಮವನ್ನು ಸೇರಿಸಿರುವುದು ಈ ವಿರೋಧಕ್ಕೆ ಕಾರಣವಾಗಿದೆ.
ಚುನಾವಣಾ ಆಯೋಗವು ಇತ್ತೀಚೆಗೆ ಬಿಹಾರ ಸೇರಿದಂತೆ ದೇಶದ ಹಲವು ಭಾಗಗಳಲ್ಲಿ SIR ಪ್ರಕ್ರಿಯೆಯನ್ನು ನಡೆಸಿದೆ. ಈ ವೇಳೆ ಹಲವಾರು ಅರ್ಹರೂ ತಮ್ಮ ಮತದಾನದ ಹಕ್ಕನ್ನು ಕಳೆದುಕೊಂಡಿದ್ದಾರೆ. ಇದೀಗ ತೀವ್ರ ವಿರೋಧದ ನಡುವೆಯೂ ದೇಶ ಹಲವು ರಾಜ್ಯಗಳಲ್ಲಿ ಎಸ್‌ಐಆರ್ ನಡೆಸುತ್ತಿದೆ. ಇದೀಗ ಹೊಸ ನಿಯಮವನ್ನು ವಿಸ್ತರಿಸಲಾಗಿದ್ದು ಹೊಸ ಮತದಾರರು ತಮ್ಮ ಪೋಷಕರು ಈಗಾಗಲೇ ಎಸ್‌ಐಆರ್‌ನಲ್ಲಿ ಮಾನ್ಯತೆ ಪಡೆದಿರುವ ದಾಖಲೆಗಳನ್ನು ಹೊಂದಿದ್ದಾರೆಯೇ ಎಂಬುದನ್ನು ಸಾಬೀತುಪಡಿಸಬೇಕಾಗುತ್ತದೆ.
ಇದನ್ನೂ ಓದಿ: ಬಂಗಾಳದಲ್ಲಿ 93.71% ಮತದಾನ; ದೇಶದ ಚುನಾವಣಾ ಇತಿಹಾಸದಲ್ಲೇ ಅತ್ಯಧಿಕ: ಚುನಾವಣಾ ಆಯೋಗ
ಇದರಂತೆ ಇನ್ನು ಮುಂದೆ 18 ವರ್ಷ ತುಂಬಿ ಹೊಸದಾಗಿ ಮತದಾರರ ಗುರುತಿನ ಚೀಟಿಗೆ ಅರ್ಜಿ ಸಲ್ಲಿಸುವ ಯುವಕ-ಯುವತಿಯರು ಅಥವಾ ಹೊಸದಾಗಿ ಹೆಸರು ನೊಂದಾಯಿಸುವವರು ಕೇವಲ ತಮ್ಮ ವೈಯಕ್ತಿಕ ದಾಖಲೆಗಳನ್ನು ನೀಡಿದರೆ ಸಾಲದು. ಅದರೊಂದಿಗೆ ಈ ಹಿಂದಿನ SIR ಪ್ರಕ್ರಿಯೆಯ ವೇಳೆ ಅವರ ಪೋಷಕರ ಹೆಸರು ಯಾವ ಭಾಗದ (Part Number) ಮತದಾರರ ಪಟ್ಟಿಯಲ್ಲಿದೆ ಎಂಬ ವಿವರ ನೀಡಬೇಕು. ಪೋಷಕರ Voter ID ಸಂಖ್ಯೆ (EPIC Number) ಮತ್ತು ಅವರ ಕುಟುಂಬದ ಲಿಂಕ್ ಅನ್ನು ಅರ್ಜಿಯಲ್ಲಿ ಸ್ಪಷ್ಟವಾಗಿ ನಮೂದಿಸಬೇಕಾಗುತ್ತದೆ.
ಚುನಾವಣಾ ಆಯೋಗದ ಅಧಿಕೃತ ‘ಇಸಿನೆಟ್’ (ECINET) ಪೋರ್ಟಲ್‌ನಲ್ಲಿ ಇರುವ ಆನ್‌ಲೈನ್ ಫಾರ್ಮ್ 6 ರಲ್ಲಿ ಮಾತ್ರ ಈ ಹೊಸ ನಿಯಮದಂತೆ ಕಾಲಂ ಇದೆ. ಆದರೆ, ಇದೇ ವೆಬ್‌ಸೈಟ್‌ನಲ್ಲಿ ಆಫ್‌ಲೈನ್ ಸಲ್ಲಿಕೆಗಾಗಿ ಲಭ್ಯವಿರುವ ಡೌನ್‌ಲೋಡ್ ಮಾಡಬಹುದಾದ ಫಾರ್ಮ್‌ನಲ್ಲಿ ಈ ಬದಲಾವಣೆ ಇಲ್ಲ. ಇದು ಹೊಸ ಮತದಾರರಲ್ಲಿ ಗೊಂದಲ ಉಂಟು ಮಾಡಿದೆ.
ಭಾರತೀಯ ಚುನಾವಣಾ ಆಯೋಗವು ದೇಶದಲ್ಲಿ ನಡೆಸುತ್ತಿರುವ ಎಸ್‌ಐಆರ್ ಪ್ರಕ್ರಿಯೆ ಆರಂಭದಲ್ಲಿ ಮತದಾರರ ಪಟ್ಟಿಯಿಂದ ಸುಮಾರು 6 ಕೋಟಿ ಮತದಾರರ ಹೆಸರುಗಳನ್ನು ಡಿಲೀಟ್ ಮಾಡಲಾಗಿದೆ. ಇದರಲ್ಲಿ ಬಹುತೇಕರು ಅರ್ಹರಾದರೂ ತಮ್ಮ ಮತದಾನದ ಹಕ್ಕನ್ನು ಕಳೆದುಕೊಂಡವರು. ಈಗ ತಮ್ಮ ಪೋಷಕರ ಹೆಸರು ಪಟ್ಟಿಯಿಂದ ಡಿಲೀಟ್ ಆಗಿದ್ದರೆ ಹೊಸ ಮತದಾರರು ತಮ್ಮ ಮತದಾನದ ಹಕ್ಕು ಕಳೆದುಕೊಳ್ಳುವ ಆತಂಕ ಉಂಟಾಗಿದೆ.
ಬಡವರು, ಅಲೆಮಾರಿಗಳು ಮತ್ತು ವಲಸೆ ಕಾರ್ಮಿಕರ ಪೋಷಕರು ಹಳೆಯ SIR ದಾಖಲೆಗಳನ್ನು ಹೊಂದಿಲ್ಲದಿರಬಹುದು. ಇದು ಅರ್ಹ ಯುವ ಮತದಾರರನ್ನು ವ್ಯವಸ್ಥಿತವಾಗಿ ಹೊರಗಿಡಲು ಕಾರಣವಾಗುತ್ತದೆ ಎಂಬುದು ಹೋರಾಟಗಾರರ ವಾದವಾಗಿದೆ.
