ಆಹಾರ ಉತ್ಪನ್ನಗಳ ತಪಾಸಣೆ ಮತ್ತು ಪರವಾನಗಿ ನೀಡುವ ಅಧಿಕಾರಕ್ಕೆ ಸಂಬಂಧಿಸಿದಂತೆ ಮಹಾರಾಷ್ಟ್ರ ಸರ್ಕಾರ ಮತ್ತು ‘ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ’ದ (FSSAI) ನಡುವೆ ಕಾನೂನು ಸಮರ ಆರಂಭವಾಗಿದೆ. ಕೇಂದ್ರ ಸರ್ಕಾರದ ಅಧೀನದಲ್ಲಿರುವ FSSAI ರಾಜ್ಯಗಳ ಅಧಿಕಾರವನ್ನು ಕಸಿದುಕೊಳ್ಳುತ್ತಿದೆ ಎಂದು ಆರೋಪಿಸಿರುವ ಮಹಾರಾಷ್ಟ್ರ ಸರ್ಕಾರ, FSSAI ನಿಯಮಗಳ ಸಾಂವಿಧಾನಿಕ ಸಿಂಧುತ್ವವನ್ನು ಪ್ರಶ್ನಿಸಿ ಬಾಂಬೆ ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದೆ.
ಸರ್ಕಾರವು ತನ್ನ ಅರ್ಜಿಯಲ್ಲಿ; “FSSAI ‘ಕೇಂದ್ರೀಯ ಆಹಾರ ಸುರಕ್ಷತಾ ಅಧಿಕಾರಿಗಳನ್ನು’ ನೇಮಿಸುವ ಮೂಲಕ ಅಕ್ರಮವಾಗಿ ಪರ್ಯಾಯ ವ್ಯವಸ್ಥೆಯನ್ನು ಸೃಷ್ಟಿಸಿದೆ ಮತ್ತು 2006ರ ಕಾಯ್ದೆಯಡಿ ರಾಜ್ಯ ಕಮಿಷನರ್‌ಗಳಿಗೆ ಇದ್ದ ಪರವಾನಗಿ ಮತ್ತು ಜಾರಿ ಅಧಿಕಾರಗಳನ್ನು ಕಸಿದುಕೊಂಡಿದೆ” ಎಂದು ಪ್ರತಿಪಾದಿಸಿದೆ.
ಅಲ್ಲದೆ, FSSAI ಸಂಸ್ಥೆ 2023ರ ಮೇನಲ್ಲಿ ಹೊರಡಿಸಿದ್ದ ಆದೇಶವನ್ನು ಸರ್ಕಾರ ವಿರೋಧಿಸಿದೆ. ಈ ಆದೇಶದ ಪ್ರಕಾರ, ಕೇಂದ್ರದ ಪರವಾನಗಿ ಹೊಂದಿರುವ ಕಂಪನಿಗಳ ಮೇಲೆ ತಪಾಸಣೆ ನಡೆಸದಂತೆ ರಾಜ್ಯದ ಅಧಿಕಾರಿಗಳಿಗೆ ನಿಷೇಧ ಹೇರಲಾಗಿತ್ತು. ಅಷ್ಟೇ ಅಲ್ಲದೆ, ‘ಫಾಸ್ಕೋಸ್’ (FoSCoS – Food Safety Compliance System) ವೆಬ್‌ಸೈಟ್ ಮೂಲಕವೇ ಎಲ್ಲ ಉದ್ಯಮಗಳನ್ನು ಕೇಂದ್ರೀಕೃತಗೊಳಿಸಲಾಗಿತ್ತು. ಫಾಸ್ಕೋಸ್ ಎಂಬುದು 2012ರಿಂದ ಜಾರಿಯಲ್ಲಿದ್ದ ಎಫ್‌ಎಲ್‌ಆರ್‌ಎಸ್ ವ್ಯವಸ್ಥೆಯ ನವೀಕೃತ ಆವೃತ್ತಿಯಾಗಿದ್ದು, ದೇಶಾದ್ಯಂತ ಪರವಾನಗಿ ನೀಡುವುದನ್ನು ನಿಯಂತ್ರಿಸುತ್ತದೆ.
ಈ ಆದೇಶವನ್ನು ಸಂವಿಧಾನಬಾಹಿರವೆಂದು ಕರೆದಿರುವ ಸರ್ಕಾರವು, “FSSAI ಹೊರಡಿಸಿದ ನಿಯಮಗಳನ್ನು ತಕ್ಷಣವೇ ರದ್ದುಗೊಳಿಸಬೇಕು, ತಪಾಸಣೆ ಮೇಲಿನ ನಿಷೇಧಕ್ಕೆ ತಡೆ ನೀಡಬೇಕು, ಪರವಾನಗಿ ಡೇಟಾಬೇಸ್ ಅನ್ನು ಮತ್ತೆ ರಾಜ್ಯದ ನಿಯಂತ್ರಣಕ್ಕೆ ನೀಡಬೇಕು” ಎಂದು ನ್ಯಾಯಾಲಯವನ್ನು ಕೋರಿದೆ.
ಈ ಅರ್ಜಿಯ ವಿಚಾರಣೆಯನ್ನು ಬಾಂಬೆ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ ಮಹೇಶ್ ಸಿ. ತ್ರಿಪಾಠಿ ಮತ್ತು ನ್ಯಾಯಮೂರ್ತಿ ಅದ್ವೈತ್ ಸೇಥ್ನಾ ಅವರನ್ನೊಳಗೊಂಡ ಪೀಠವು ಕೈಗೆತ್ತಿಕೊಳ್ಳಲಿದೆ ಎಂದು ಕೋರ್ಟ್ ಮೂಲಗಳು ತಿಳಿಸಿವೆ.
2006ರ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಕಾಯ್ದೆಯಡಿ ಸ್ಥಾಪನೆಯಾದ FSSAI, ಆಹಾರ ಸಂಬಂಧಿತ ಮಾನದಂಡಗಳನ್ನು ರೂಪಿಸುವುದು, ಪ್ರಮಾಣೀಕರಣ ಸಂಸ್ಥೆಗಳು ಹಾಗೂ ಪ್ರಯೋಗಾಲಯಗಳ ಮಾನ್ಯತೆಗೆ ಮಾರ್ಗಸೂಚಿಗಳನ್ನು ಸಿದ್ಧಪಡಿಸುವುದು ಮತ್ತು ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಗೆ ವೈಜ್ಞಾನಿಕ ಸಲಹೆ ನೀಡುವುದು ಸೇರಿದಂತೆ ಪ್ರಮುಖ ಜವಾಬ್ದಾರಿಗಳನ್ನು ನಿರ್ವಹಿಸುತ್ತದೆ.
