ಭಾರತದ ಆರ್ಥಿಕತೆಯು ನಿರೀಕ್ಷೆಗಿಂತಲೂ ವೇಗವಾಗಿ 7.8%ರಷ್ಟು ಪ್ರಗತಿ ಸಾಧಿಸಿದೆ ಎಂದು ಕೇಂದ್ರ ಸರ್ಕಾರ ಹೇಳಿಕೊಂಡಿದೆ. ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ (MoSPI) ಈ ದತ್ತಾಂಶ ಕುರಿತು ಆರ್‌ಬಿಐ ಮಾಜಿ ಗವರ್ನರ್ ರಘುರಾಮ್ ರಾಜನ್ ತೀವ್ರ ಸಂಶಯ ವ್ಯಕ್ತಪಡಿಸಿದ್ದಾರೆ. ‘ದೇಶದ ಜಿಡಿಪಿ ನಿಜವಾಗಿಯೂ ಈ ವೇಗದಲ್ಲಿ ಬೆಳೆದಿರುವುದು ಸತ್ಯವೇ? ಅಥವಾ ಕಾಗದಕ್ಕೆ ಮಾತ್ರ ಸೀಮಿತವೇ’ ಎಂದಿದ್ದಾರೆ.
ಸುದ್ದಿ ಸಂಸ್ಥೆ ‘ಪಿಟಿಐ’ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಅವರು, “ಆರ್ಥಿಕ ಬೆಳವಣಿಗೆಯ ಅಂಕಿ-ಅಂಶಗಳು ನಿಜವೇ ಎಂಬ ಅನುಮಾನ ಪ್ರತಿಯೊಬ್ಬರಲ್ಲೂ ಮೂಡುತ್ತಿದ್ದು, ದತ್ತಾಂಶಗಳಲ್ಲಿ ಕೆಲವು ವ್ಯತ್ಯಾಸಗಳಿವೆ ಎಂಬುದು ಕಳವಳಕಾರಿ. ಆರ್ಥಿಕತೆ ಶರವೇಗದಲ್ಲಿ ಧಾವಿಸುತ್ತಿದ್ದರೆ ಉತ್ತಮ ಉದ್ಯೋಗಗಳು ಏಕೆ ಹುಟ್ಟುತ್ತಿಲ್ಲ, ಉದ್ಯಮಿಗಳು ಹೊಸ ಹೂಡಿಕೆಗೆ ಏಕೆ ಹಿಂಜರಿಯುತ್ತಿದ್ದಾರೆ ಹಾಗೂ ವಿದೇಶಿ ನೇರ ಹೂಡಿಕೆ (FDI) ನಿರೀಕ್ಷಿತ ಮಟ್ಟದಲ್ಲಿ ಏಕೆ ಬರುತ್ತಿಲ್ಲ” ಎಂದು ಪ್ರಶ್ನಿಸಿದ್ದಾರೆ.
“ದೇಶದಲ್ಲಿ ಉದ್ಯೋಗ ಸೃಷ್ಟಿಗೆ ಮತ್ತು ಪ್ರಸ್ತುತ ಇರುವ ವಲಯಗಳಲ್ಲಿ ಭಾರತದ ಮುನ್ನಡೆಯನ್ನು ಕಾಯ್ದುಕೊಳ್ಳಲು ಸರ್ಕಾರ ಸೂಕ್ತ ಕ್ರಮ ಕೈಗೊಳ್ಳುತ್ತಿದೆಯೇ? ಸದ್ಯ ಭಾರತವು ಅತ್ಯಧಿಕ ಯುವಜನರನ್ನು ಹೊಂದಿರುವ ‘ಜನಸಂಖ್ಯಾ ಲಾಭಾಂಶ’ದ (Population Dividend) ಹಂತದಲ್ಲಿದೆ. ಈ ಅಮೂಲ್ಯ ಸಮಯದಲ್ಲಿ ಪ್ರತಿಯೊಬ್ಬರಿಗೂ ಉದ್ಯೋಗ ಕಲ್ಪಿಸಲು ವಿಫಲವಾದರೆ, ದೇಶಕ್ಕೆ ದೊರೆತಿರುವ ಬೃಹತ್ ಅವಕಾಶವನ್ನು ಕೈಚೆಲ್ಲಿದಂತಾಗುತ್ತದೆ. ಖಾಸಗಿ ವಲಯವು ಸಾಕಷ್ಟು ಉದ್ಯೋಗಗಳನ್ನು ಸೃಷ್ಟಿಸುತ್ತಿಲ್ಲ. ಇದರಿಂದಾಗಿ, ಇಂದು ಯುವಜನರು ಸಾರ್ವಜನಿಕ ಸೇವೆಯ ಆಸಕ್ತಿಗಿಂತ ಹೆಚ್ಚಾಗಿ ಸುರಕ್ಷಿತ ಉದ್ಯೋಗಕ್ಕಾಗಿ ಸಿವಿಲ್ ಸೇವೆಗಳ ಕಡೆಗೆ ಮುಖ ಮಾಡುತ್ತಿದ್ದಾರೆ” ಎಂದೂ ಅವರು ಅಭಿಪ್ರಾಯಪಟ್ಟಿದ್ದಾರೆ.
ರಘುರಾಮ್ ರಾಜನ್ ಅವರ ಹೇಳಿಕೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಚರ್ಚೆ ಹುಟ್ಟುಹಾಕಿದೆ. ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಇನ್ಫೋಸಿಸ್ ಮಾಜಿ ಸಿಎಫ್‌ಒ, ಆರಿನ್ ಕ್ಯಾಪಿಟಲ್‌ನ ಅಧ್ಯಕ್ಷ ಮೋಹನ್‌ದಾಸ್ ಪೈ, “ದೇಶದ ಉದ್ಯೋಗ ಸೃಷ್ಟಿಯ ಕುರಿತು ಕಾಯಂ ಹಿತಾಸಕ್ತಿಗಳು ‘ಸುಳ್ಳು ನಿರೂಪಣೆ’ಯನ್ನು ಸೃಷ್ಟಿಸುತ್ತಿವೆ” ಎಂದು ಆರೋಪಿಸಿದ್ದಾರೆ.
“ಖಾಸಗಿ ಸಂಸ್ಥೆ ಇಪಿಎಫ್‌ಒ ನೀಡುತ್ತಿದ್ದ ಮಾಸಿಕ ಉದ್ಯೋಗ ದತ್ತಾಂಶದ ವರದಿಯನ್ನು ತಕ್ಷಣವೇ ಪುನರಾರಂಭಿಸಬೇಕು. ಈ ವರದಿಯು ವಯಸ್ಸು, ಲಿಂಗ, ಕೈಗಾರಿಕೆ ಹಾಗೂ ರಾಜ್ಯವಾರು ಉದ್ಯೋಗ ಸೃಷ್ಟಿಯ ನಿಖರ ಮಾಹಿತಿಯನ್ನು ನೀಡುತ್ತಿತ್ತು. ಇದು ಸ್ಥಗಿತಗೊಂಡಿರುವುದರಿಂದಲೇ ಇಂತಹ ಅಪಪ್ರಚಾರಗಳಿಗೆ ಜಾಗ ಸಿಗುತ್ತಿದೆ” ಎಂದು ಪ್ರಧಾನಿ ಕಚೇರಿಯನ್ನು ಮೋಹನ್‌ದಾಸ್ ಒತ್ತಾಯಿಸಿದ್ದಾರೆ.
