2019ರ ಆಗಸ್ಟ್‌ನಲ್ಲಿ 370ನೇ ವಿಧಿ ರದ್ದತಿಯ ನಂತರ, ಜಮ್ಮು ಕಾಶ್ಮೀರದಲ್ಲಿ ಉಗ್ರರ ನೇಮಕಾತಿ ಸೇರಿದಂತೆ ಕೆಲವು ಭಯೋತ್ಪಾದಕ ಚಟುವಟಿಕೆಗಳಲ್ಲಿ ಹೆಚ್ಚಳ ಕಂಡುಬಂದಿದ್ದು, ಕಳೆದ ಸುಮಾರು ನಾಲ್ಕು ವರ್ಷಗಳಿಂದ ಏರಿಕೆಯಾಗಿದೆ ಎಂದು ಸರ್ಕಾರದ ಅಧಿಕೃತ ಮಾಹಿತಿಯೊಂದು ಬಹಿರಂಗಪಡಿಸಿದೆ.
ಅಂಕಿಅಂಶಗಳ ಪ್ರಕಾರ, ಆಗಸ್ಟ್ 5, 2019 ಮತ್ತು ಜೂನ್ 16, 2023 ರ ನಡುವೆ ಜಮ್ಮು ವಿಭಾಗದಲ್ಲಿ 231 ಉಗ್ರರು ಮತ್ತು ಅವರ ಭೂಗತ ಕೆಲಸಗಾರರ ಬಂಧನವಾಗಿದೆ. ಅಕ್ಟೋಬರ್ 27, 2015 – ಆಗಸ್ಟ್ 4, 2019ರ ನಡುವೆ ದಾಖಲಾದ ಬಂಧನಗಳಿಗಿಂತ ಇದು ಶೇಕಡ 71 ರಷ್ಟು ಹೆಚ್ಚಾಗಿದೆ.
ಕೇಂದ್ರ ಸರ್ಕಾರವು ಆಗಸ್ಟ್ 5, 2019 ರಂದು ಜಮ್ಮು ಮತ್ತು ಕಾಶ್ಮೀರಕ್ಕೆ ವಿಶೇಷ ಸ್ಥಾನಮಾನವನ್ನು ನೀಡುವ 370 ನೇ ವಿಧಿಯನ್ನು ರದ್ದುಗೊಳಿಸಿತ್ತು. ರಾಜ್ಯವನ್ನು ಜಮ್ಮು ಮತ್ತು ಕಾಶ್ಮೀರ, ಲಡಾಖ್ ಕೇಂದ್ರಾಡಳಿತ ಪ್ರದೇಶಗಳಾಗಿ ವಿಭಜಿಸಿತ್ತು.
ಈ ಸುದ್ದಿ ಓದಿದ್ದೀರಾ? ತೆಲಂಗಾಣ | ಚುನಾವಣೆ ಘೋಷಣೆಗೂ ಮುನ್ನವೇ ಬಹುತೇಕ ಅಭ್ಯರ್ಥಿಗಳ ಹೆಸರು ಬಿಡುಗಡೆ ಮಾಡಿದ ಕೆಸಿಆರ್
ಅಕ್ಟೋಬರ್ 27, 2015 ರಿಂದ ಆಗಸ್ಟ್ 4, 2019 ರವರೆಗೆ ಸ್ಫೋಟಕ ಸಾಧನ (ಐಇಡಿ) ದಾಳಿಗಳು ನಾಲ್ಕರಿಂದ ಏಳಕ್ಕೆ ಏರಿಕೆಯಾಗಿವೆ ಎಂದು ದಾಖಲೆಗಳು ತಿಳಿಸಿವೆ.
370ನೇ ವಿಧಿ ರದ್ದಾಗಿ ನಾಲ್ಕು ವರ್ಷಗಳ ನಂತರದ ಅವಧಿಯನ್ನು ಹೋಲಿಸಿದಾಗ, ಉಗ್ರರ ಬಂದೂಕಿನ ದಾಳಿ, ವಾಹನದ ಸ್ಫೋಟಗಳು ನಾಲ್ಕರಿಂದ ಏಳಕ್ಕೆ ಏರಿಕೆಯಾಗಿದೆ. ಶೇಕಡವಾರಿನಲ್ಲಿ 40 ರಷ್ಟು ಹೆಚ್ಚಾಗಿದೆ. ಭಯೋತ್ಪಾದಕ ನೇಮಕಾತಿಯ ಘಟನೆಗಳು 8 ರಿಂದ 13ಕ್ಕೆ ಹೆಚ್ಚಳಗೊಂಡಿದೆ. ಅಂದರೆ ಶೇಕಡ 39 ರಷ್ಟು ಏರಿಕೆಯಾಗಿವೆ.
ಆದರೆ ಈ ವರದಿಯ ಬಗ್ಗೆ ಅಧಿಕಾರಿಗಳನ್ನು ಪ್ರಶ್ನಿಸಿದರೆ, ಭಯೋತ್ಪಾದನೆ ಸಂಬಂಧಿತ ಘಟನೆಗಳು ಹೆಚ್ಚಾಗಿ ಅವಳಿ ಗಡಿ ಜಿಲ್ಲೆಗಳಾದ ರಜೌರಿ ಮತ್ತು ಪೂಂಚ್‌ಗೆ ಸೀಮಿತವಾಗಿವೆ ಎನ್ನುತ್ತಾರೆ. ಅಲ್ಲಿ ಆಗಸ್ಟ್ 5, 2019 ರಿಂದ ಕಳೆದ ನಾಲ್ಕು ವರ್ಷಗಳಲ್ಲಿ ವಿವಿಧ ಎನ್‌ಕೌಂಟರ್‌ಗಳಲ್ಲಿ 65ಕ್ಕೂ ಹೆಚ್ಚು ಭಯೋತ್ಪಾದಕರು ಹತರಾಗಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
ಈ ನಡುವೆ 370 ವಿಧಿ ರದ್ದತಿ ಪ್ರಶ್ನಿಸಿ ಸುಪ್ರೀಂ ಕೋರ್ಟ್‌ಗೆ ಸಲ್ಲಿಸಲಾಗಿದ್ದ ಅರ್ಜಿಗಳನ್ನು, ನಾಲ್ಕು ವರ್ಷಗಳ ನಂತರ ವಿಚಾರಣೆಗೆ ಎತ್ತಿಕೊಳ್ಳಲಾಗಿದೆ. 370ನೇ ವಿಧಿಯ ಅಡಿಯಲ್ಲಿ ನೀಡಲಾಗಿದ್ದ ವಿಶೇಷ ಸ್ಥಾನವನ್ನು ಕೇಂದ್ರ ಸರ್ಕಾರ ಹೇಗೆ ವಾಪಸ್ ಪಡೆಯಿತು ಎಂಬುದರ ಚರ್ಚೆ ನ್ಯಾಯಾಲಯದಲ್ಲಿ ನಡೆಯುತ್ತಿದೆ.
