ಕೇರಳದ ಎಡಪಂಥೀಯ ನಾಯಕ, ಮಾಧ್ಯಮಗಳ ಚರ್ಚೆಯಲ್ಲಿ ಎಡ ಪಕ್ಷಗಳ ಮುಖವಾಗಿದ್ದ ರೆಜಿ ಲುಕೋಸ್ ಅವರು ಬಿಜೆಪಿ ಸೇರಿದ್ದಾರೆ. ರಾಜ್ಯದಲ್ಲಿ ಸಿಪಿಐ(ಎಂ) ಕೋಮು ವಿಭಜನೆ ಸೃಷ್ಟಿಸುತ್ತಿದೆ ಎಂದು ಆರೋಪಿಸಿದ್ದಾರೆ.
ರೆಜಿ ಲುಕೋಸ್ ಅವರು ಮಾಧ್ಯಮಗಳ ಚರ್ಚೆಯಲ್ಲಿ ಎಡಪಕ್ಷದ ಪರವಾಗಿ ಭಾಗಿಯಾಗಿತ್ತುದ್ದರು. ಸಿಪಿಐ(ಎಂ)ನ ಫೈಯರ್‌ಬ್ರಾಂಡ್‌ ಪ್ರತಿಪಾದಕರಾಗಿದ್ದರು. ಇದೀಗ, ಅವರು ಸಿಪಿಐ(ಎಂ) ತೊರೆದು ಬಿಜೆಪಿ ಸೇರಿಸಿದ್ದಾರೆ. ಬಿಜೆಪಿ ರಾಜ್ಯ ಪ್ರಧಾನ ಕಚೇರಿಯಲ್ಲಿ ರಾಜ್ಯ ಬಿಜೆಪಿ ಅಧ್ಯಕ್ಷ ರಾಜೀವ್ ಚಂದ್ರಶೇಖರ್‌ ಸಮ್ಮುಖದಲ್ಲಿ ಬಿಜೆಪಿಗೆ ಸೇರ್ಪಡೆಯಾಗಿದ್ದಾರೆ.
“ಕಳೆದ 35 ವರ್ಷಗಳಿಂದ, ನಾನು ಸಿಪಿಐ(ಎಂ)ನಲ್ಲಿದ್ದೇನೆ. ಇತ್ತೀಚಿನ ತಿಂಗಳಲ್ಲಿ ಸಿಪಿಐ(ಎಂ)ನ ಸೈದ್ಧಾಂತಿಕ ವಿಚಲನದಿಂದ ನನಗೆ ನೋವಾಗಿದೆ” ಎಂದು ಅವರು ಹೇಳಿದ್ದಾರೆ.
ಈ ಲೇಖನ ಓದಿದ್ದೀರಾ?: ಕೈಲಾಶ್ ವಿಜಯವರ್ಗೀಯ ಎಂಬ ಗುಟುರು ಗೂಳಿಗೆ ಕಡಿವಾಣ ಹಾಕುವುದೇ ಬಿಜೆಪಿ?
“ಸಿಪಿಐ(ಎಂ) ಈಗ ರಾಜ್ಯದಲ್ಲಿ ಕೋಮು ವಿಭಜನೆಯನ್ನು ಸೃಷ್ಟಿಸಲು ಪ್ರಯತ್ನಿಸುತ್ತಿದೆ. ಕೋಮುವಾದದ ವಿರುದ್ಧ ಆ ಪಕ್ಷವು ಹೋರಾಟ ಮಾಡುತ್ತಿದ್ದ ಕಾರಣಕ್ಕಾಗಿ ನನ್ನಂತಹ ವ್ಯಕ್ತಿಗಳು ಹಲವು ವರ್ಷಗಳಿಂದ ಸಿಪಿಐ(ಎಂ) ಜೊತೆ ನಿಂತಿದ್ದರು. ಆದಾಗ್ಯೂ, ಇತ್ತೀಚೆಗೆ ಪಕ್ಷವು ಕೋಮುವಾದವನ್ನು ಬೆಂಬಲಿಸುತ್ತಿದೆ” ಎಂದು ಅವರು ಆರೋಪಿಸಿದ್ದಾರೆ.
“ಬಿಜೆಪಿಯ ‘ಅಭಿವೃದ್ಧಿ ಕಾರ್ಯಸೂಚಿಯಿಂದ ಪ್ರೇರಿತನಾಗಿ ಬಿಜೆಪಿ ಸೇರಿದ್ದೇನೆ. ನಾವು ಹಳತಾದ ಸಿದ್ಧಾಂತದೊಂದಿಗೆ ಮುಂದುವರೆದರೆ, ಕೇರಳ ಶೀಘ್ರದಲ್ಲೇ ವೃದ್ಧಾಶ್ರಮವಾಗಿ ಬದಲಾಗುತ್ತದೆ. ಉತ್ತರ ಭಾರತದಲ್ಲಿ ನಡೆದಿರುವ ಅಭಿವೃದ್ಧಿ ನನ್ನನ್ನು ಅಚ್ಚರಿಗೊಳಿಸಿದೆ. ಇನ್ನು ಮುಂದೆ ನಾನು ಬಿಜೆಪಿಯ ಧ್ವನಿಯಾಗುತ್ತೇನೆ” ಎಂದಿದ್ದಾರೆ.
ಹಿರಿಯ ಸಿಪಿಐ(ಎಂ) ನಾಯಕ, ಸಚಿವ ವಿ.ಎನ್ ವಾಸವನ್ ಅವರು, “ಲೂಕೋಸ್ ಅವರು ಸಿಪಿಐ(ಎಂ)ನಲ್ಲಿ ಯಾವುದೇ ಹುದ್ದೆಯನ್ನು ಹೊಂದಿರಲಿಲ್ಲ. ಆದ್ದರಿಂದ ಅವರು ಪಕ್ಷ ತೊರೆದಿದ್ದಾರೆ. ಇಂತಹ ಬೆಳವಣಿಗೆಗಳಿಂದ ಚುನಾವಣೆಗಳಲ್ಲಿ ಎಲ್‌ಡಿಎಫ್‌ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ” ಎಂದಿದ್ದಾರೆ.
