ಸೋಮವಾರ ನಡೆದ ಪ್ರತಿಭಟನೆಯ ಸಂದರ್ಭದಲ್ಲಿ, ಸಾಮಾನ್ಯ ಉಡುಪು (ಶರ್ಟ್, ಪ್ಯಾಂಟ್ ಮತ್ತು ಚಪ್ಪಲಿ) ಧರಿಸಿದ್ದ ಕೆಲವರು, ತಲೆಗೆ ಪೊಲೀಸ್ ಹೆಲ್ಮೆಟ್ ಹಾಕಿಕೊಂಡು ಮತ್ತು ಕೈಯಲ್ಲಿ ಲಾಠಿ ಹಿಡಿದು ಗುಂಪನ್ನು ನಿಯಂತ್ರಿಸುತ್ತಿರುವ ದೃಶ್ಯಗಳು ಭಾರಿ ವಿವಾದಕ್ಕೆ ಕಾರಣವಾಗಿವೆ. ಸಮವಸ್ತ್ರ ಮತ್ತು ಹೆಸರಿನ ಬ್ಯಾಡ್ಜ್ (Name tag) ಇಲ್ಲದೆ ಕಾನೂನು ಸುವ್ಯವಸ್ಥೆ ಕಾಪಾಡುವ ಕರ್ತವ್ಯಕ್ಕೆ ಇವರನ್ನು ನಿಯೋಜಿಸಿದ್ದು ಎಷ್ಟು ಸರಿ? ಇವರು ಯಾರು? ಎಂಬ ಟೀಕೆಗಳು ಮತ್ತು ಪ್ರಶ್ನೆಗಳು ಸಾರ್ವಜನಿಕ ವಲಯದಿಂದ ವ್ಯಾಪಕವಾಗಿ ವ್ಯಕ್ತವಾಗಿವೆ.
ಈ ದೃಶ್ಯಗಳು ವೈರಲ್ ಆಗುತ್ತಿದ್ದಂತೆ, ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ನೆಟ್ಟಿಗರು ಈ ಮಫ್ತಿ ಪೊಲೀಸರ ವಿಳಾಸ, ಇನ್‌ಸ್ಟಾಗ್ರಾಮ್ ಖಾತೆಗಳು ಹಾಗೂ ಫೋನ್ ನಂಬರ್‌ಗಳನ್ನು ಹಂಚಿಕೊಂಡು ಟೀಕಿಸಿದ್ದಾರೆ. ಇವರಲ್ಲಿ ಒಬ್ಬರನ್ನು ‘ಹನಿ ಡಾಗರ್’ (Honey Dagar) ಎಂದು ಗುರುತಿಸಲಾಗಿದ್ದು, ಆತನ ವಿಡಿಯೋ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಸಮವಸ್ತ್ರವಿಲ್ಲದೆ, ಗುರುತು ಸಿಗದಂತೆ ಸಿಬ್ಬಂದಿಯನ್ನು ಭದ್ರತಾ ಕರ್ತವ್ಯಕ್ಕೆ ನಿಯೋಜಿಸುವ ಪೊಲೀಸ್ ಇಲಾಖೆಯ ಕ್ರಮದ ಬಗ್ಗೆ ಈಗ ದೊಡ್ಡ ಚರ್ಚೆಯೇ ಶುರುವಾಗಿದೆ.
ಈ ವಿವಾದದ ಕುರಿತು ಸ್ಪಷ್ಟನೆ ನೀಡಿರುವ ಪೊಲೀಸ್ ಇಲಾಖೆ, ಗುಪ್ತಚರ ಮತ್ತು ವಿಶೇಷ ಪತ್ತೆದಾರಿ ಘಟಕದ ಸಿಬ್ಬಂದಿ ಕಾರ್ಯಾಚರಣೆಯ ಭಾಗವಾಗಿ ಮಫ್ತಿಯಲ್ಲಿ (ಗಡ್ಡ ಬಿಟ್ಟುಕೊಂಡು, ಟಿ-ಶರ್ಟ್, ಜೀನ್ಸ್ ಧರಿಸಿ) ಕೆಲಸ ಮಾಡುವುದು ಸಹಜ ಎಂದಿದೆ. ಬೃಹತ್ ಪ್ರತಿಭಟನೆಗಳ ವೇಳೆ ಸಮಾಜಘಾತುಕ ಶಕ್ತಿಗಳು ಒಳನುಸುಳಿ ಹಿಂಸಾಚಾರ ಅಥವಾ ಬೆಂಕಿ ಹಚ್ಚುವಂತಹ ಕೃತ್ಯಗಳನ್ನು ಎಸಗುವ ಅಪಾಯವಿರುತ್ತದೆ. ಇಂತಹವರನ್ನು ಪತ್ತೆಹಚ್ಚಿ, ಗುಪ್ತಚರ ಮಾಹಿತಿ ಕಲೆಹಾಕಲು ವಿಶೇಷ ವಿಭಾಗದ ಸಿಬ್ಬಂದಿ ಸಾಮಾನ್ಯ ಜನರಂತೆ ಗುಂಪಿನಲ್ಲಿ ಬೆರೆತಿರುತ್ತಾರೆ ಎಂದು ಸಮರ್ಥಿಸಿಕೊಂಡಿದೆ.
ಪ್ರತಿಭಟನಾಕಾರರ ಸಂಖ್ಯೆ ಮಿತಿಮೀರಿದಾಗ, ವ್ಯವಸ್ಥಾಪನಾ (Logistical) ಕಾರಣಗಳಿಗಾಗಿ ಮಫ್ತಿಯಲ್ಲಿರುವ ಪೊಲೀಸರನ್ನೂ ಗುಂಪು ನಿಯಂತ್ರಣಕ್ಕೆ ಕರೆಯುವುದು ಅನಿವಾರ್ಯವಾಗುತ್ತದೆ. ಕಾನೂನು ಮತ್ತು ಸುವ್ಯವಸ್ಥೆ ಕಾಪಾಡುವುದು ಇಲಾಖೆಯ ಮೊದಲ ಆದ್ಯತೆಯಾಗಿರುವುದರಿಂದ, ತುರ್ತು ಸಂದರ್ಭದಲ್ಲಿ ಎಲ್ಲ ಸಿಬ್ಬಂದಿಯೂ ನೆರವಿಗೆ ಬರುತ್ತಾರೆ. ಪ್ರಮುಖ ಸ್ಥಳಗಳಲ್ಲಿ ಕಡ್ಡಾಯವಾಗಿ ಸಮವಸ್ತ್ರಧಾರಿ ಸಿಬ್ಬಂದಿಯೇ ಭದ್ರತೆ ಒದಗಿಸುತ್ತಾರೆ. ಮಫ್ತಿ ಪೊಲೀಸರ ಬಳಕೆ ಇಲಾಖೆಗೆ ಹೊಸ ಅಭ್ಯಾಸವೇನಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಪೊಲೀಸ್ ಸಿಬ್ಬಂದಿ ಸಮವಸ್ತ್ರದಲ್ಲಿರಲಿ ಅಥವಾ ಸಾಮಾನ್ಯ ಉಡುಪಿನಲ್ಲಿರಲಿ, ಕರ್ತವ್ಯ ಲೋಪ ಅಥವಾ ಕಾನೂನುಬಾಹಿರ ಕೃತ್ಯಗಳಲ್ಲಿ ಭಾಗಿಯಾಗಿದ್ದರೆ ಅವರ ವಿರುದ್ಧ ಕಠಿಣ ಇಲಾಖಾ ಕ್ರಮ ಕೈಗೊಳ್ಳಲಾಗುತ್ತದೆ ಎಂದು ಪೊಲೀಸ್ ಇಲಾಖೆ ಭರವಸೆ ನೀಡಿದೆ. ಸಮವಸ್ತ್ರವಿಲ್ಲದ ಕಾರಣಕ್ಕೆ ಯಾರೊಬ್ಬರೂ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸುವ ಮೂಲಕ, ಸಾರ್ವಜನಿಕರಲ್ಲಿ ಮೂಡಿರುವ ಗೊಂದಲ ಹಾಗೂ ಆತಂಕವನ್ನು ದೂರ ಮಾಡಲು ಇಲಾಖೆ ಪ್ರಯತ್ನಿಸಿದೆ.
