ದೇಶದ ಮೊದಲ ನದಿ ಜೋಡಣೆ ಯೋಜನೆಯಾದ ‘ಕೆನ್-ಬೆಟ್ವಾ ಲಿಂಕ್ ಯೋಜನೆ’ಯನ್ನು ವಿರೋಧಿಸಿ ಮಧ್ಯಪ್ರದೇಶದ ಛತ್ತರಪುರ ಜಿಲ್ಲೆಯ ಕುಪಿ ಗ್ರಾಮದಲ್ಲಿ ಕಳೆದ ಎರಡು ವಾರಗಳಿಂದ ಬೃಹತ್ ಪ್ರತಿಭಟನೆಗಳು ನಡೆಯುತ್ತಿವೆ. ಪ್ರತಿಭಟನೆಯನ್ನು ಹತ್ತಿಕ್ಕಲು ಯತ್ನಿಸುತ್ತಿದ್ದ ಸರ್ಕಾರ, ಪೊಲೀಸರ ಮೂಲಕ ಪ್ರತಿಭಟನಾಕಾರರನ್ನು ಬಂಧಿಸಿದೆ. ಯೋಜನೆಯ ವಿರುದ್ಧ ಸತತ 14 ದಿನಗಳಿಂದ ಅಮರಣಾಂತ ಉಪವಾಸ ನಡೆಸುತ್ತಿದ್ದ ಹೋರಾಟಗಾರ ಅಮಿತ್ ಭಟ್ನಾಗರ್ ಅವರನ್ನು ಪೊಲೀಸರು ಹೊತ್ತೊಯ್ದಿದಿದ್ದು, ಆಸ್ಪತ್ರೆಗೆ ದಾಖಲಿಸಿದೆ.
ಸುಮಾರು 44,605 ಕೋಟಿ ರೂಪಾಯಿ ವೆಚ್ಚದ ಈ ಯೋಜನೆಯಿಂದಾಗಿ ಮುಳುಗಡೆಯಾಗಲಿರುವ ದೌಧನ್ ಜಲಾಶಯ ವ್ಯಾಪ್ತಿಯ ಸುಮಾರು 2,000 ಕುಟುಂಬಗಳಿಗೆ ಸಮರ್ಪಕ ಪರಿಹಾರ ನೀಡಿಲ್ಲ. ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ ವ್ಯಾಪಕ ಭ್ರಷ್ಟಾಚಾರ ನಡೆದಿದೆ ಎಂದು ಆರೋಪಿಸಿ ಜುಲೈ 3 ರಿಂದ ಈ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿತ್ತು.
ಭಾನುವಾರ ಮುಂಜಾನೆ, ಪೊಲೀಸರು ಪ್ರತಿಭಟನಾ ಸ್ಥಳಕ್ಕೆ ಆಗಮಿಸುತ್ತಿದ್ದಂತೆ, ಭಟ್ನಾಗರ್ ಮತ್ತು ಇತರ ಪ್ರತಿಭಟನಾಕಾರರು ನದಿಗೆ ಇಳಿದು ಪೊಲೀಸರು ವಾಪಸ್ ಹೋಗುವಂತೆ ಘೋಷಣೆಗಳನ್ನು ಕೂಗಿದರು. ಆದರೂ, ಪೊಲೀಸರು ಸುಮಾರು 150 ಪ್ರತಿಭಟನಾಕಾರರನ್ನು ವಶಕ್ಕೆ ಪಡೆದು, ಬಸ್‌ನಲ್ಲಿ ಕರೆದೊಯ್ದಿದ್ದಾರೆ.
ತಮ್ಮ ಕಾರ್ಯಾಚರಣೆ ಬಗ್ಗೆ ಮಾತನಾಡಿದರು ಛತ್ತರಪುರ ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಆದಿತ್ಯ ಪಾಟ್ಲೆ, “ಸತತ ಎರಡು ವಾರಗಳಿಂದ ಆಹಾರ ತ್ಯಜಿಸಿ ತೀವ್ರವಾಗಿ ಅಸ್ವಸ್ಥರಾಗಿದ್ದ ಭಟ್ನಾಗರ್ ಅವರ ಆರೋಗ್ಯ ಸ್ಥಿತಿಯನ್ನು ಪರಿಗಣಿಸಿ, ಅವರನ್ನು ವಶಕ್ಕೆ ಪಡೆದು ಚಿಕಿತ್ಸೆಗಾಗಿ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಉಳಿದ ಪ್ರತಿಭಟನಾಕಾರರನ್ನು ಪನ್ನಾ ಜಿಲ್ಲೆಗೆ ರವಾನಿಸಲಾಗಿದೆ” ಎಂದು ತಿಳಿಸಿದ್ದಾರೆ.
ತಮ್ಮ ಬಂಧನಕ್ಕೂ ಮುನ್ನ ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿದ್ದ ಹೋರಾಟಗಾರ ಅಮಿತ್ ಭಟ್ನಾಗರ್, “ಸರ್ಕಾರದ ಭೂಸ್ವಾಧೀನ ಪ್ರಕ್ರಿಯೆಯು ಪಾರದರ್ಶಕವಾಗಿಲ್ಲ. ಪರಿಹಾರ ವಿತರಣೆಯಲ್ಲಿ ಕೋಟ್ಯಂತರ ರೂಪಾಯಿ ಅವ್ಯವಹಾರ ನಡೆದಿದೆ” ಎಂದು ಗಂಭೀರ ಆರೋಪ ಮಾಡಿದ್ದಾರೆ.
“ರತಿಯಾ, ಕರಿ ಮತ್ತು ಖಜ್ನಾವಿ ಸೇರಿದಂತೆ ಹಲವು ಗ್ರಾಮ ಪಂಚಾಯತ್‌ಗಳ ಸಭಾ ನಡಾವಳಿಗಳ ಪುಸ್ತಕದಲ್ಲಿ ಒಂದೇ ರೀತಿಯ ಒಕ್ಕಣೆಯನ್ನು ನಕಲು ಮಾಡಿ ಬರೆಯಲಾಗಿದೆ. ಅಲ್ಲದೆ, ಖರಿಹಾನಿ ಗ್ರಾಮದಲ್ಲಿ ಮನೆಗಳ ಪರಿಹಾರಕ್ಕಾಗಿ ಮಂಜೂರಾಗಿದ್ದ 11 ಕೋಟಿ ರೂಪಾಯಿಗಳ ಪೈಕಿ ಸುಮಾರು 8 ಕೋಟಿ ರೂಪಾಯಿಯನ್ನು ಆ ಗ್ರಾಮಕ್ಕೆ ಸಂಬಂಧವೇ ಇಲ್ಲದ ಹಾಗೂ ದಶಕಗಳ ಹಿಂದೆಯೇ ವಲಸೆ ಹೋಗಿದ್ದ ವ್ಯಕ್ತಿಗಳ ಹೆಸರಿಗೆ ವಿತರಿಸಲಾಗಿದೆ” ಎಂದು ಅವರು ದಾಖಲೆ ಸಮೇತ ದೂರಿದ್ದಾರೆ.
ಆದಾಗ್ಯೂ, ಈ ಎಲ್ಲಾಆರೋಪಗಳನ್ನು ಛತ್ತರಪುರ ಜಿಲ್ಲಾಧಿಕಾರಿ ಪಾರ್ಥ್ ಜೈಸ್ವಾಲ್ ತಳ್ಳಿಹಾಕಿದ್ದಾರೆ. “ಪ್ರತಿಭಟನೆಯಲ್ಲಿ ತೊಡಗಿರುವವರಲ್ಲಿ 90%ರಷ್ಟು ಜನರು ಈ ಯೋಜನೆಯಿಂದ ಸಂತ್ರಸ್ತರಾದವರೇ ಅಲ್ಲ. ಗ್ರಾಮ ಸಭೆಯ ದಾಖಲೆಗಳು ನಕಲಿ ಎಂಬ ಆರೋಪ ಸುಳ್ಳಾಗಿದ್ದು, ಜಿಲ್ಲಾಡಳಿತವು ನಿಯಮಾನುಸಾರವೇ ಪರಿಹಾರ ವಿತರಿಸಿದೆ. ನೆರೆಯ ಪನ್ನಾ ಜಿಲ್ಲೆಯ ಇತರ ಅಣೆಕಟ್ಟು ಯೋಜನೆಗಳ ಕುರಿತು ಅಸಮಾಧಾನ ಹೊಂದಿರುವ ಕೆಲವು ಹೊರಗಿನ ವ್ಯಕ್ತಿಗಳು ಇಲ್ಲಿ ಬಂದು ಗೊಂದಲ ಸೃಷ್ಟಿಸುತ್ತಿದ್ದಾರೆ” ಎಂದು ಪ್ರತಿಭಟನಾಕಾರರ ವಿರುದ್ಧ ಆರೋಪ ಮಾಡಿದ್ದಾರೆ.
