ಬಾಗೇಶ್ವರ ಧಾಮದ ಮುಖ್ಯಸ್ಥ ಧೀರೇಂದ್ರ ಕೃಷ್ಣ ಶಾಸ್ತ್ರಿ (ಬಾಗೇಶ್ವರ ಬಾಬಾ) ಅವರು ಪಶ್ಚಿಮ ಬಂಗಾಳದಲ್ಲಿ ದುರ್ಗಾಪೂಜೆ ಹಾಗೂ ನವರಾತ್ರಿ ಆಚರಣೆ ವೇಳೆ ಪೂಜಾ ಪಂಡಾಲ್‌ಗಳ ಬಳಿ ಮಾಂಸಾಹಾರ ಮಾರಾಟ ಹಾಗೂ ಸೇವನೆ ಮಾಡಬಾರದು ಎಂದು ಕರೆ ನೀಡಿದ್ದರು. ಈ ಹೇಳಿಕೆ ರಾಜ್ಯದಲ್ಲಿ ತೀವ್ರ ರಾಜಕೀಯ ಮತ್ತು ಸಾಂಸ್ಕೃತಿಕ ಚರ್ಚೆಗೆ ಗ್ರಾಸವಾದ ಬೆನ್ನಲ್ಲೇ, ಪಶ್ಚಿಮ ಬಂಗಾಳದ ಭಾರತೀಯ ಜನತಾ ಪಾರ್ಟಿ (ಬಿಜೆಪಿ) ಈ ಹೇಳಿಕೆಯಿಂದ ಅಂತರ ಕಾಯ್ದುಕೊಂಡಿದೆ.
ಪಶ್ಚಿಮ ಬಂಗಾಳ ಬಿಜೆಪಿ ರಾಜ್ಯಾಧ್ಯಕ್ಷ ಶಮಿಕ್ ಭಟ್ಟಾಚಾರ್ಯ ಅವರು ಸೋಮವಾರ ಮಾಧ್ಯಮಗಳೊಂದಿಗೆ ಮಾತನಾಡಿ, “ಬಂಗಾಳಿಗಳು ತಮ್ಮ ಸಾಂಪ್ರದಾಯಿಕ ಆಹಾರ ಸಂಸ್ಕೃತಿಯನ್ನೇ ಮುಂದುವರಿಸಲಿದ್ದಾರೆ. ಯಾರೂ ಕೂಡ ಬಂಗಾಳಿಗಳ ತಟ್ಟೆಯಲ್ಲಿ ಏನಿರಬೇಕು ಎಂದು ನಿರ್ದೇಶಿಸಲು ಸಾಧ್ಯವಿಲ್ಲ. ನವರಾತ್ರಿಯ ಅಷ್ಟಮಿ ದಿನ ಪೂರಿ ಮತ್ತು ನವಮಿ ದಿನ ಮಟನ್ ಸೇವಿಸುವುದು ಬಂಗಾಳಿಗಳ ಪರಂಪರೆ. ಧೀರೇಂದ್ರ ಶಾಸ್ತ್ರಿ ಅವರ ಹೇಳಿಕೆ ಅವರ ವೈಯಕ್ತಿಕ ಅಭಿಪ್ರಾಯವೇ ಹೊರತು, ಪಕ್ಷಕ್ಕೂ ಅದಕ್ಕೂ ಸಂಬಂಧವಿಲ್ಲ” ಎಂದು ಹೇಳಿಕೊಂಡಿದ್ದಾರೆ. ಸದ್ಯ ರಾಜಕೀಯ ವಿರೋಧಾಭಾಸ ಮತ್ತು ದ್ವಂದ್ವ ನಿಲುವುಗಳ ಕುರಿತು ತೀವ್ರ ಚರ್ಚೆ ನಡೆಯುತ್ತಿದೆ.
ಇದನ್ನೂ ಓದಿ: ಮತಕ್ಕಾಗಿ ಮೀನೂಟ ಜಪ: ಅಧಿಕಾರಕ್ಕೇರಿ ಬಡ ಮಕ್ಕಳ ಕೈಯಿಂದ ಮೊಟ್ಟೆ ಕಿತ್ತುಕೊಂಡ ಬಿಜೆಪಿ!
ಉತ್ತರ ಭಾರತ ಹಾಗೂ ಇತರೆ ಬಿಜೆಪಿ ಆಡಳಿತವಿರುವ ರಾಜ್ಯಗಳಲ್ಲಿ (ಉದಾಹರಣೆಗೆ ಉತ್ತರ ಪ್ರದೇಶ, ಮಧ್ಯಪ್ರದೇಶ, ಗುಜರಾತ್) ಶ್ರಾವಣ ಮಾಸ, ನವರಾತ್ರಿ ಅಥವಾ ಸಾಲು-ಸಾಲು ಹಬ್ಬಗಳ ಸಮಯದಲ್ಲಿ ಮಾಂಸದಂಗಡಿಗಳನ್ನು ಮುಚ್ಚಿಸುವುದು, ಬಹಿರಂಗ ಮಾಂಸ ಮಾರಾಟವನ್ನು ವಿರೋಧಿಸುವುದು ಮತ್ತು ಮಾಂಸಾಹಾರದ ವಿರುದ್ಧ ಧ್ವನಿ ಎತ್ತುವುದು ಬಿಜೆಪಿಯ ಪ್ರಮುಖ ಸಿದ್ಧಾಂತ ಹಾಗೂ ಕಾರ್ಯಸೂಚಿಯಾಗಿ ಕಂಡುಬರುತ್ತದೆ. ಆದರೆ, ಅದೇ ಪಕ್ಷವು ಪಶ್ಚಿಮ ಬಂಗಾಳ, ಈಶಾನ್ಯ ರಾಜ್ಯಗಳು (ಅಸ್ಸಾಂ, ಮೇಘಾಲಯ, ನಾಗಾಲ್ಯಾಂಡ್) ಹಾಗೂ ಕೇರಳದಂತಹ ರಾಜ್ಯಗಳಿಗೆ ಬಂದಾಗ ತನ್ನ ನಿಲುವನ್ನು ಸಂಪೂರ್ಣವಾಗಿ ಬದಲಾಯಿಸುತ್ತದೆ.
ಉತ್ತರ ಭಾರತದಲ್ಲಿ ‘ಸಖಾಹಾರಿ/ಸಾತ್ವಿಕ’ ಸಂಸ್ಕೃತಿಯನ್ನು ಧರ್ಮದ ಸಂಕೇತವಾಗಿ ಬಿಂಬಿಸುವ ಬಿಜೆಪಿ, ಬಂಗಾಳ ಮತ್ತು ಈಶಾನ್ಯ ರಾಜ್ಯಗಳಲ್ಲಿ ಸ್ಥಳೀಯ ಸಂಸ್ಕೃತಿ ಹಾಗೂ ಮತಬ್ಯಾಂಕ್ ಕಳೆದುಕೊಳ್ಳುವ ಭಯದಿಂದ ಮಾಂಸಾಹಾರದ ಪರವಾಗಿ ಮಾತನಾಡುತ್ತದೆ. ಬಂಗಾಳದಲ್ಲಿ ಶೇ. 90ಕ್ಕೂ ಹೆಚ್ಚು ಜನಸಂಖ್ಯೆ ಮೀನು-ಮಾಂಸ ಸೇವಿಸುವ ಹಿನ್ನೆಲೆಯಲ್ಲಿ, ಅಲ್ಲಿ ಮಾಂಸಾಹಾರ ವಿರೋಧಿಸಿದರೆ ರಾಜಕೀಯವಾಗಿ ಹಿನ್ನಡೆಯಾಗಲಿದೆ ಎಂಬುದು ಇದಕ್ಕೆ ಪ್ರಮುಖ ಕಾರಣ.
ಇತರ ರಾಜ್ಯಗಳಲ್ಲಿ ಶಾಖಾಹಾರವನ್ನು ‘ಆದರ್ಶ ಧಾರ್ಮಿಕ ನಡೆ’ ಎಂದು ವ್ಯಾಖ್ಯಾನಿಸುವ ರಾಜಕಾರಣಿಗಳು, ಬಂಗಾಳಕ್ಕೆ ಬಂದ ತಕ್ಷಣ “ಮಾಂಸಾಹಾರವು ಬಂಗಾಳಿ ಶಕ್ತ ಆರಾಧನೆ ಮತ್ತು ದುರ್ಗಾಪೂಜೆಯ ಭಾಗ” ಎಂದು ಸಮರ್ಥಿಸಿಕೊಳ್ಳುತ್ತಾರೆ. ಟಿಎಂಸಿ (ತೃಣಮೂಲ ಕಾಂಗ್ರೆಸ್) ಸೇರಿದಂತೆ ವಿಪಕ್ಷಗಳು ಬಿಜೆಪಿಯ ಈ ನಡೆಗಳನ್ನು “ದ್ವಂದ್ವ ನೀತಿ” ಎಂದು ಟೀಕಿಸಿವೆ. “ಉತ್ತರ ಭಾರತದಲ್ಲಿ ಮಾಂಸಾಹಾರವನ್ನು ‘ಅಪವಿತ್ರ’ ಎಂದು ಕರೆದು, ಬಂಗಾಳದಲ್ಲಿ ಚುನಾವಣಾ ಲಾಭಕ್ಕಾಗಿ ಮಾಂಸಾಹಾರದ ಬೆಂಬಲಕ್ಕೆ ನಿಲ್ಲುವುದು ಬಿಜೆಪಿಯ ಬೂಟಾಟಿಕೆ” ಎಂದು ಆರೋಪಿಸಿವೆ.
