ಭಾರತೀಯ ಸ್ಟೇಟ್ ಬ್ಯಾಂಕ್ (SBI) ಮೇಲೆ ಸೈಬರ್ ದಾಳಿ ನಡೆದಿದ್ದು, ಸುಮಾರು 3,897 ಗ್ರಾಹಕರ ಖಾಸಗಿ ಮಾಹಿತಿಗಳು ಡಾರ್ಕ್ ವೆಬ್‌ನಲ್ಲಿ (Dark Web) ಸೋರಿಕೆಯಾಗಿರುವುದನ್ನು ಬ್ಯಾಂಕ್ ಅಧಿಕೃತವಾಗಿ ಖಚಿತಪಡಿಸಿದೆ. ಗ್ರಾಹಕರ ಹೆಸರು, ಫೋನ್ ಸಂಖ್ಯೆ, ಗುರುತಿನ ಚೀಟಿ ಹಾಗೂ ಸಾಲದ ವಿವರಗಳು ಹ್ಯಾಕರ್‌ಗಳ ಕೈಸೇರಿವೆ ಎಂದು ಬ್ಯಾಂಕ್ ತಿಳಿಸಿದೆ.
ಷೇರುಪೇಟೆಗಳಿಗೆ ಸಲ್ಲಿಸಿರುವ ವರದಿಯಲ್ಲಿ ಎಸ್‌ಬಿಐ ಈ ವಿಚಾರವನ್ನು ಸ್ಪಷ್ಟಪಡಿಸಿದೆ. ಅಕ್ಟೋಬರ್ 16 ರಂದು ‘ಥ್ರೆಟ್ ಇಂಟೆಲಿಜೆನ್ಸ್ ಸರ್ವೀಸ್ ಪ್ರೊವೈಡರ್’, ‘ಡಿಫೆನ್ಸ್ ಸೈಬರ್ ಏಜೆನ್ಸಿ’ ಹಾಗೂ ‘ಸರ್ಟ್-ಇನ್’ (CERT-In) ಸಂಸ್ಥೆಗಳಿಂದ ಗ್ರಾಹಕರ ಡೇಟಾ ಸೋರಿಕೆಯಾಗಿರುವ ಶಂಕೆಯ ಬಗ್ಗೆ ಬ್ಯಾಂಕ್‌ಗೆ ಎಚ್ಚರಿಕೆ ರವಾನೆಯಾಗಿತ್ತು. ಡಾರ್ಕ್ ವೆಬ್‌ನಲ್ಲಿದ್ದ ಸುಮಾರು 3.75 ಲಕ್ಷ ದಾಖಲೆಗಳ ಪ್ರಾಥಮಿಕ ವಿಶ್ಲೇಷಣೆ ನಡೆಸಿದಾಗ, ಅದರಲ್ಲಿ 3,897 ಎಸ್‌ಬಿಐ ಗ್ರಾಹಕರ ವೈಯಕ್ತಿಕ ಮಾಹಿತಿಗಳು (PII) ಇರುವುದು ಪತ್ತೆಯಾಗಿದೆ.
ಸೋರಿಕೆಯಾದ ಮಾಹಿತಿಯಲ್ಲಿ ಗ್ರಾಹಕರ ನೋಂದಾಯಿತ ಮೊಬೈಲ್ ಸಂಖ್ಯೆ, ಹುಟ್ಟಿದ ದಿನಾಂಕ, ಹೆಸರು, ಲಿಂಗ, ಇಮೇಲ್ ಮತ್ತು ವಾಸದ ವಿಳಾಸಗಳು ಸೇರಿವೆ. ಇದರ ಜೊತೆಗೆ ಬ್ಯಾಂಕ್ ಶಾಖೆಯ ವಿವರಗಳು, ಕಸ್ಟಮರ್ ಇನ್ಫಾರ್ಮೇಷನ್ ಫೈಲ್ (CIF) ಐಡಿಗಳು, ಸಾಲದ ವಿವರಗಳಿಗೆ ಸಂಬಂಧಿಸಿದ ಮೆಟಾಡೇಟಾ ಕೂಡ ಬಹಿರಂಗವಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಗ್ರಾಹಕರ ಡೇಟಾ ಸೋರಿಕೆಯಾಗಿದ್ದರೂ, ಬ್ಯಾಂಕಿನ ಪ್ರಮುಖ ವಹಿವಾಟು ಅಥವಾ ಆರ್ಥಿಕ ಸೇವೆಗಳ ಮೇಲೆ ಯಾವುದೇ ಪ್ರತಿಕೂಲ ಪರಿಣಾಮ ಬೀರಿಲ್ಲ ಎಂದು ಎಸ್‌ಬಿಐ ಅಭಯ ನೀಡಿದೆ. “ಬ್ಯಾಂಕಿನ ಕೋರ್ ಬ್ಯಾಂಕಿಂಗ್ ಸೇವೆಗಳು ಎಂದಿನಂತೆ ಯಾವುದೇ ಅಡೆತಡೆಯಿಲ್ಲದೆ ಕಾರ್ಯನಿರ್ವಹಿಸುತ್ತಿವೆ. ಸೈಬರ್ ದಾಳಿಯನ್ನು ನಿಯಂತ್ರಿಸಲು ಹಾಗೂ ಭದ್ರತೆ ಹೆಚ್ಚಿಸಲು ಅಗತ್ಯವಿರುವ ಎಲ್ಲಾ ತುರ್ತು ನಿಯಂತ್ರಣ ಕ್ರಮಗಳನ್ನು ತಕ್ಷಣವೇ ಜಾರಿಗೊಳಿಸಲಾಗಿದೆ” ಎಂದು ಬ್ಯಾಂಕ್ ಸ್ಪಷ್ಟಪಡಿಸಿದೆ.
ಸೋರಿಕೆಯಾಗಿರುವ ಮಾಹಿತಿಯ ನಿಖರತೆ, ಅದರ ಮೂಲ ಮತ್ತು ಗ್ರಾಹಕರಿಗೆ ಒದಗಿಬರಬಹುದಾದ ಅಪಾಯಗಳ ಬಗ್ಗೆ ಸಮಗ್ರ ತನಿಖೆ ನಡೆಸಲಾಗುತ್ತಿದೆ. ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದ್ದು, ತನಿಖೆ ಮುಂದುವರಿದಂತೆ ನಿಯಮಾವಳಿಗಳ ಪ್ರಕಾರ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಬ್ಯಾಂಕ್ ಹೇಳಿದೆ.
ಈ ಹಿಂದೆ ‘ಸಿರಿಯಸ್‌ಸಿಮ್’ (Siriusim) ಎಂಬ ಅನಾಮಧೇಯ ಹ್ಯಾಕರ್ ಗುಂಪೊಂದು 3.75 ಲಕ್ಷ ಎಸ್‌ಬಿಐ ಗ್ರಾಹಕರ ಡೇಟಾವನ್ನು ಕದ್ದಿರುವುದಾಗಿ ಡಾರ್ಕ್ ವೆಬ್ ವೇದಿಕೆಯಾದ ‘ಬ್ರೀಚ್‌ಫೋರಮ್ಸ್’ನಲ್ಲಿ ಹೇಳಿಕೊಂಡಿತ್ತು. ಇದೇ ವರ್ಷದ ಜುಲೈ ತಿಂಗಳಲ್ಲಿ ಬ್ಯಾಂಕ್ ಆಫ್ ಬರೋಡಾದ 1 ಟಿಬಿ (TB) ಯಷ್ಟು ಗ್ರಾಹಕರ ಡೇಟಾ ಕೂಡ ಸೈಬರ್ ದಾಳಿಯಿಂದ ಸೋರಿಕೆಯಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.
