ನಯಿ ದುನಿಯಾ ಫೌಂಡೇಶನ್ ನೀಡುವ ‘ಮೀಡಿಯಾ ಫಾರ್ ಯೂನಿಟಿ ಡಿಜಿಟಲ್’ ಪ್ರಶಸ್ತಿಯನ್ನು ನೀಡಿ ಪತ್ರಕರ್ತರು, ಚಲನಚಿತ್ರ ನಿರ್ಮಾಪಕರು ಮತ್ತು ಬರಹಗಾರರನ್ನು ಏಪ್ರಿಲ್ 19ರಂದು ಸನ್ಮಾನಿಸಲಾಯಿತು. ಹಿರಿಯ ಪತ್ರಕರ್ತ, ದಿ ವೈರ್‌ನ ಸ್ಥಾಪಕ ಸಂಪಾದಕ ಸಿದ್ಧಾರ್ಥ್ ವರದರಾಜನ್ ಅವರೂ ಈ ಪ್ರಶಸ್ತಿಗೆ ಭಾಜನರಾದರು.
ದೆಹಲಿಯ ಇಂಡಿಯಾ ಇಂಟರ್‌ನ್ಯಾಷನಲ್ ಸೆಂಟರ್‌ನಲ್ಲಿ ನಡೆದ ಸಮಾರಂಭದಲ್ಲಿ ನ್ಯಾಯ, ಶಾಂತಿ ಮತ್ತು ಸಾಮಾಜಿಕ ಸಾಮರಸ್ಯದ ಮೌಲ್ಯಗಳನ್ನು ಎತ್ತಿಹಿಡಿಯುವ ಪತ್ರಕರ್ತರಿಗೆ ನೀಡಲಾಗುವ ಮೊದಲ ಮೀಡಿಯಾ ಫಾರ್ ಯೂನಿಟಿ ಪ್ರಶಸ್ತಿಯನ್ನು ನೀಡಲಾಗಿದೆ.
ಇದನ್ನು ಓದಿದ್ದೀರಾ? ಹಿರಿಯ ಪತ್ರಕರ್ತ ಮತ್ತಿಹಳ್ಳಿ ಮದನ ಮೋಹನ ನಿಧನ
ಚಲನಚಿತ್ರ ನಿರ್ಮಾಪಕ ಅನುಭವ್ ಸಿನ್ಹಾ, ಹಿರಿಯ ಪತ್ರಕರ್ತ ಮೃಣಾಲ್ ಪಾಂಡೆ, ದಿ ವೈರ್‌ನ ಸ್ಥಾಪಕ ಸಂಪಾದಕ ಸಿದ್ಧಾರ್ಥ್ ವರದರಾಜನ್, ದಿ ಹಿಂದೂನ ಸುಹಾಸಿನಿ ಹೈದರ್ ಮತ್ತು ಬರಹಗಾರ-ಪತ್ರಕರ್ತ ಅರುಣ್ ಶೌರಿ ಸೇರಿದಂತೆ ಹಲವು ಮಂದಿಗೆ ಈ ಪ್ರಶಸ್ತಿ ನೀಡಲಾಗಿದೆ. ಮುದ್ರಣ, ಡಿಜಿಟಲ್, ದೂರದರ್ಶನ, ರಂಗಭೂಮಿ ಮತ್ತು ಸಾಹಿತ್ಯದ ಅತ್ಯುತ್ತಮ ಸಾಧನೆಗಳಿಗಾಗಿ ಅವರನ್ನು ಸನ್ಮಾನಿಸಲಾಯಿತು.
ಮಾಜಿ ಮುಖ್ಯ ಚುನಾವಣಾ ಆಯುಕ್ತ ಡಾ. ಎಸ್.ವೈ. ಖುರೇಷಿ ನೇತೃತ್ವದ ಸಮಿತಿಯು ವಿವಿಧ ಮಾಧ್ಯಮ ವೇದಿಕೆಗಳಲ್ಲಿ ಕಲೆ, ಸಾಹಿತ್ಯ ಮತ್ತು ಪತ್ರಿಕೋದ್ಯಮದಲ್ಲಿ ಸಾಧನೆ ಮಾಡಿದ ವ್ಯಕ್ತಿಗಳನ್ನು ಆಯ್ಕೆ ಮಾಡಿದೆ.
ಕಾರ್ಯಕ್ರಮದಲ್ಲಿ ಮುಖ್ಯ ಭಾಷಣ ಮಾಡಿದ ನ್ಯಾಯಮೂರ್ತಿ ಮದನ್ ಲೋಕೂರ್, “ಪತ್ರಿಕಾ ಸ್ವಾತಂತ್ರ್ಯದ ಮೇಲೆ ಮತ್ತು ನ್ಯಾಯಾಂಗದ ಸ್ವಾತಂತ್ರ್ಯದ ಮೇಲೆ ನಿರಂತರ ದಾಳಿ ನಡೆಯುತ್ತಿದೆ. ಹಲ್ಲೆಯ ವಿಧಾನವು ವಿಭಿನ್ನವಾಗಿರಬಹುದು, ಆದರೆ ಪರಿಣಾಮ ಒಂದೇ ಆಗಿರುತ್ತದೆ” ಎಂದು ಹೇಳಿದರು.
“ಪತ್ರಕರ್ತರನ್ನು ಜಾಮೀನು ಇಲ್ಲದೆ ವರ್ಷಗಳ ಕಾಲ ಜೈಲಿನಲ್ಲಿ ಇರಿಸಲಾಗುತ್ತಿದೆ. ಪತ್ರಕರ್ತರು ಮಾತ್ರವಲ್ಲ, ಉಮರ್ ಖಾಲಿದ್ ಮತ್ತು ಗುಲ್ಫಿಶಾ ಫಾತಿಮಾ ಅವರಂತಹ ಜನರು ಜಾಮೀನು ಇಲ್ಲದೆ ನಾಲ್ಕು ವರ್ಷಗಳಿಗೂ ಹೆಚ್ಚು ಕಾಲ ಜೈಲಿನಲ್ಲಿದ್ದಾರೆ. ಯಾಕೆ? ನ್ಯಾಯಾಂಗದಲ್ಲಿ ಏನಾದರೂ ನ್ಯೂನತೆ ಇದೆಯೇ? ಅಥವಾ ಯಾವುದೇ ಪುರಾವೆಗಳಿಲ್ಲದಿದ್ದರೂ ನ್ಯಾಯಾಂಗವು ಜಾಮೀನು ನೀಡಲು ಹೆದರುತ್ತಿದೆಯೇ? ಇವು ನಾವು ಕೇಳಬೇಕಾದ ಪ್ರಶ್ನೆಗಳು” ಎಂದು ಹೇಳಿದರು.
“ಫಾದರ್ ಸ್ಟಾನ್ ಸ್ವಾಮಿ ಅನಾರೋಗ್ಯವಿದ್ದರೂ ಜಾಮೀನು, ಸರಿಯಾದ ಚಿಕಿತ್ಸೆ ಲಭಿಸದೆ ಜೈಲಿನಲ್ಲಿ ನಿಧನರಾದರು. ಬಹುತೇಕ ಶೇಕಡ 100ರಷ್ಟು ಅಂಗವಿಕಲರಾಗಿರುವ ಪ್ರೊಫೆಸರ್ ಸಾಯಿ ಬಾಬಾ ಅವರಿಗೆ ಜಾಮೀನು ನೀಡುವ ಮೊದಲು ವರ್ಷಗಳ ಕಾಲ ಜೈಲಿನಲ್ಲಿ ಇರಿಸಲಾಗಿತ್ತು. ಅದು ಪತ್ರಿಕಾ ಅಥವಾ ನ್ಯಾಯಾಂಗವಾಗಲಿ, ಇವು ಇಂದು ನಾವು ಎದುರಿಸುತ್ತಿರುವ ಗಂಭೀರ ಸಮಸ್ಯೆಗಳು” ಎಂದು ಅಭಿಪ್ರಾಯಿಸಿದರು.
