ಅತ್ಯಾಚಾರ ಪ್ರಕರಣದಲ್ಲಿ ಜೀವಾವಧಿ ಶಿಕ್ಷೆಗೆ ಗುರಿಯಾಗಿರುವ ಸ್ವಯಂಘೋಷಿತ ದೇವಮಾನವ ಆಸಾರಾಮ್ ಬಾಪು ಅವರ ಎರಡು ವರ್ಷಗಳ ನಿರಂತರ ಜಾಮೀನು ಪರ್ವಕ್ಕೆ ರಾಜಸ್ಥಾನ ಹೈಕೋರ್ಟ್ ಅಂತ್ಯಹಾಡಿದೆ. ಅನಾರೋಗ್ಯದ ಕಾರಣ ನೀಡಿ ಪದೇ ಪದೇ ಜಾಮೀನು ಪಡೆಯುತ್ತಿದ್ದ ಆಸಾರಾಮ್ ಅವರ ಜಾಮೀನನ್ನು ರದ್ದುಗೊಳಿಸಿರುವ ನ್ಯಾಯಾಲಯವು, ‘ಆರೋಪಿಯ ಅನಾರೋಗ್ಯದ ನೆಪವೊಡ್ಡಿ ಸಂತ್ರಸ್ತೆಯ ಧ್ವನಿಯನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ’ ಎಂಬ ಕಟುಮಾತುಗಳೊಂದಿಗೆ ಶರಣಾಗುವಂತೆ ಆದೇಶಿಸಿದೆ.
ಕಳೆದ ಎರಡು ವರ್ಷಗಳಲ್ಲಿ ಆಸಾರಾಮ್ ಬಾಪು ತಮ್ಮ ಹದಗೆಡುತ್ತಿರುವ ಆರೋಗ್ಯದ ಕಾರಣ ನೀಡಿ, ವೈದ್ಯಕೀಯ ಚಿಕಿತ್ಸೆ, ತುರ್ತು ಪೆರೋಲ್ ಮತ್ತು ಮಧ್ಯಂತರ ಜಾಮೀನುಗಳ ಮೂಲಕ ಒಟ್ಟು 15 ಬಾರಿ ನ್ಯಾಯಾಲಯದಿಂದ ವಿನಾಯಿತಿ ಪಡೆದಿದ್ದರು. ದಾಖಲೆಗಳ ಪ್ರಕಾರ, 2024ರ ಮಾರ್ಚ್ 21 ರಿಂದ 2026ರ ಮೇ 25ರ ಅವಧಿಯಲ್ಲಿ ಡಜನ್‌ಗೂ ಹೆಚ್ಚು ಬಾರಿ ಇಂತಹ ವೈದ್ಯಕೀಯ ವಿನಾಯಿತಿಗಳನ್ನು ಪಡೆಯಲಾಗಿತ್ತು. ಮೇ 28ರಂದು (2026) ಶರಣಾಗುವುದಕ್ಕೂ ಮುನ್ನ ಆಸಾರಾಮ್ ಬರೋಬ್ಬರಿ ಏಳು ತಿಂಗಳ ಕಾಲ ಮಧ್ಯಂತರ ಜಾಮೀನಿನ ಮೇಲೆ ಜೈಲಿನಿಂದ ಹೊರಗಿದ್ದರು. ಅದಕ್ಕೂ ಮೊದಲು ಮಾರ್ಚ್ 2024ರಿಂದ ವಿವಿಧ ಆಸ್ಪತ್ರೆಗಳಲ್ಲಿ ಅವರು ದೀರ್ಘಕಾಲ ಕಳೆದಿದ್ದರು.
2001 ಮತ್ತು 2006ರ ನಡುವೆ ಅಹಮದಾಬಾದ್ ಬಳಿಯ ಮೊಟೆರಾ ಆಶ್ರಮದಲ್ಲಿ ವಾಸಿಸುತ್ತಿದ್ದ ಸೂರತ್ ಮೂಲದ ಅಪ್ರಾಪ್ತ ಶಿಷ್ಯೆಯ ಮೇಲೆ ಅತ್ಯಾಚಾರವೆಸಗಿದ ಪ್ರಕರಣದಲ್ಲಿ ಆಸಾರಾಮ್ ದೋಷಿಯಾಗಿದ್ದಾರೆ. ಪ್ರಸ್ತುತ 86 ವರ್ಷ ವಯಸ್ಸಿನ ಅವರು, ವಿನಾಯಿತಿ ಸೇರಿ ಒಟ್ಟು 12 ವರ್ಷ, 11 ತಿಂಗಳು ಮತ್ತು 27 ದಿನಗಳ ಶಿಕ್ಷೆಯನ್ನು ಪೂರೈಸಿದ್ದು, ಇದರಲ್ಲಿ 11 ವರ್ಷ, 6 ತಿಂಗಳು ಮತ್ತು 3 ದಿನಗಳ ಕಾಲ ವಾಸ್ತವವಾಗಿ ಜೈಲುವಾಸ ಅನುಭವಿಸಿದ್ದಾರೆ.
ಇದನ್ನು ಓದಿದ್ದೀರಾ? ಕಾಗದದ ನೋಟುಗಳಿಗೆ ಗುಡ್ ಬೈ? ಭಾರತಕ್ಕೆ ಬರಲಿದೆಯೇ ಪಾಲಿಮರ್ ಕರೆನ್ಸಿ
ರಾಜಸ್ಥಾನ ಹೈಕೋರ್ಟ್ ಆಸಾರಾಮ್ ಅವರ ಜೀವಾವಧಿ ಶಿಕ್ಷೆಯನ್ನು ಎತ್ತಿಹಿಡಿದು, ಜಾಮೀನು ರದ್ದುಗೊಳಿಸಿ ಮಹತ್ವದ ತೀರ್ಪು ನೀಡಿದೆ. “ಆರೋಪಿಯು ಈಗ 86 ವರ್ಷದವರಾಗಿದ್ದು, ವಯಸ್ಸು ಮತ್ತು ಅನಾರೋಗ್ಯದಿಂದ ಬಳಲುತ್ತಿರಬಹುದು. ಆದರೆ, ಅವರ ದೌರ್ಬಲ್ಯದ ನೆಪದಲ್ಲಿ ಸಂತ್ರಸ್ತೆಯ ಧ್ವನಿಯನ್ನು ನಿರ್ಲಕ್ಷಿಸುವುದು ನ್ಯಾಯಸಮ್ಮತವಲ್ಲ. ಹಾಗೆ ಮಾಡುವುದು ಕ್ರಿಮಿನಲ್ ನ್ಯಾಯಾಂಗ ವ್ಯವಸ್ಥೆಯ ಮೇಲಿನ ಸಮಾಜದ ನಂಬಿಕೆಯನ್ನು ಅಲುಗಾಡಿಸುತ್ತದೆ, ಜೊತೆಗೆ ಸಮಾಜಕ್ಕೆ ತಪ್ಪು ಸಂದೇಶ ರವಾನಿಸಿದಂತಾಗುತ್ತದೆ” ಎಂದು ಪೀಠವು ತೀರ್ಪಿನಲ್ಲಿ ಉಲ್ಲೇಖಿಸಿದೆ.
ಆಸಾರಾಮ್ ಅವರು ಜಾಮೀನಿನ ಷರತ್ತುಗಳನ್ನು ಉಲ್ಲಂಘಿಸಿ ವಿವಿಧ ನಗರಗಳಿಗೆ (ಉಜ್ಜಯಿನಿ, ಅಯೋಧ್ಯೆ, ಗುಜರಾತ್) ಪ್ರವಾಸ ಮಾಡುತ್ತಿದ್ದು, ಗುಂಪುಗುಂಪಾಗಿ ಭಕ್ತರನ್ನು ಭೇಟಿಯಾಗಿ ಪ್ರವಚನಗಳನ್ನು ನೀಡುತ್ತಿದ್ದಾರೆ ಎಂದು ಸಂತ್ರಸ್ತೆಯ ಪರ ವಕೀಲರಾದ ಪಿ.ಸಿ. ಸೋಲಂಕಿ ಮತ್ತು ಶೋಭಾ ಗುಪ್ತಾ ನ್ಯಾಯಾಲಯದ ಗಮನಕ್ಕೆ ತಂದಿದ್ದರು.
ಇದನ್ನು ಆಸಾರಾಮ್ ಪರ ವಕೀಲರು ನಿರಾಕರಿಸಿದ್ದರು.
ತೀರ್ಪಿನ ಬಳಿಕ ಪ್ರತಿಕ್ರಿಯಿಸಿರುವ ಆಸಾರಾಮ್ ಪರ ವಕೀಲ ನಿಶಾಂತ್ ಬೋರಾ, ‘ಆಸಾರಾಮ್ ಅವರ ಆರೋಗ್ಯದಲ್ಲಿ ಯಾವುದೇ ಸುಧಾರಣೆಯಾಗಿಲ್ಲ, ನಾವು ಶೀಘ್ರದಲ್ಲೇ ಸುಪ್ರೀಂ ಕೋರ್ಟ್‌ಗೆ ಮೇಲ್ಮನವಿ ಸಲ್ಲಿಸುತ್ತೇವೆ’ ಎಂದು ತಿಳಿಸಿದ್ದಾರೆ. ಮತ್ತೊಂದೆಡೆ, ಆಸಾರಾಮ್ ಅವರನ್ನು ಮರಳಿ ಜೈಲಿಗೆ ಕಳುಹಿಸಿರುವುದು ನ್ಯಾಯಕ್ಕೆ ಸಿಕ್ಕ ದೊಡ್ಡ ಜಯ ಎಂದು ಸಂತ್ರಸ್ತೆಯ ಪರ ವಕೀಲರು ಹರ್ಷ ವ್ಯಕ್ತಪಡಿಸಿದ್ದಾರೆ.
