ತಮಿಳುನಾಡು ಬಿಜೆಪಿ ಘಟಕದ ಅಧ್ಯಕ್ಷರಾಗಿದ್ದ ಮಾಜಿ ಐಪಿಎಸ್‌ ಅಧಿಕಾರಿ ಅಣ್ಣಾಮಲೈ ಅವರು ಬಿಜೆಪಿ ತೊರೆದಿದ್ದಾರೆ. ಪಕ್ಷದ ಸಾಮಾನ್ಯ ಸದಸ್ಯಕ್ಕೆ ರಾಜೀನಾಮೆ ನೀಡಿದ್ದಾರೆ. ತಮಿಳುನಾಡಿನಲ್ಲಿ ಅಭಿವೃದ್ಧಿ-ಆಧಾರಿತ ಮತ್ತು ಸಾಂಸ್ಕೃತಿಕ ರಾಜಕೀಯದ ಕುರಿತು ಬಿಜೆಪಿ ಹೈಕಮಾಂಡ್‌ ಮತ್ತು ತಮ್ಮ ಆಲೋಚನೆಗಳ ನಡುವೆ ಭಾರೀ ಭಿನ್ನತೆಗಳಿವೆ. ತಮಿಳುನಾಡಿಗೆ ಸಂಬಂಧಿಸಿದಂತೆ ನಮ್ಮ ದೃಷ್ಟಿಕೋನಗಳು ಪರಸ್ಪರ ಹೊಂದಿಕೆಯಾಗುತ್ತಿಲ್ಲ ಆದ್ದರಿಂದ, ನನ್ನ ನಿರಂತರ ಆಲೋಚನೆಗಳಿಂದ ಉನ್ನತ ನಾಯಕತ್ವಕ್ಕೆ ಹೊರೆಯಾಗಲು ನಾನು ಬಯಸುವುದಿಲ್ಲ ಎಂದು ಅಣ್ಣಾಮಲೈ ಹೇಳಿದ್ದಾರೆ.
ಬಿಜೆಪಿ ರಾಷ್ಟ್ರಾಧ್ಯಕ್ಷ ನಿತಿನ್ ನಬಿನ್ ಅವರಿಗೆ ಅಣ್ಣಾಮಲೈ ರಾಜೀನಾಮೆ ಪತ್ರ ಸಲ್ಲಿಸಿದ್ದಾರೆ. ಅದರಲ್ಲಿ; “ನಮ್ಮ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ನಾಯಕತ್ವದಿಂದ ಪ್ರೇರಿತನಾಗಿ, ತಮಿಳುನಾಡಿನಲ್ಲಿ ಸಕಾರಾತ್ಮಕ ಬದಲಾವಣೆಯನ್ನು ತರಲು ಮತ್ತು ರಾಜ್ಯ ರಾಜಕೀಯವನ್ನು ಸುಧಾರಿಸುವ ಉದ್ದೇಶದೊಂದಿಗೆ ನಾನು ಆರು ವರ್ಷಗಳ ಹಿಂದೆ ಭಾರತೀಯ ಜನತಾ ಪಾರ್ಟಿಗೆ ಸೇರಿದೆ. ಎಲ್ಲಕ್ಕಿಂತ ಮುಖ್ಯವಾಗಿ, ರಾಜಕೀಯ ಎನ್ನುವುದು ಕೇವಲ ಗಣ್ಯರು ಮತ್ತು ಆಯ್ದ ಕೆಲವರಿಗೆ ಮಾತ್ರ ಇರುವ ಮಾರ್ಗವೇ ಹೊರತು ಸಾಮಾನ್ಯ ಮನುಷ್ಯನಿಗಲ್ಲ ಎಂಬ ಕಲ್ಪನೆಯನ್ನು ಬದಲಾಯಿಸಲು ನಾನು ಬಯಸಿದ್ದೆ. ಅತ್ಯಂತ ಕಿರಿಯ ಮತ್ತು ಯಾವುದೇ ಅನುಭವವಿಲ್ಲದ ನನ್ನ ಮೇಲೆ ನಂಬಿಕೆ ಇಟ್ಟು, ದೊಡ್ಡ ಜವಾಬ್ದಾರಿ ಹಾಗೂ ನಾಯಕತ್ವದ ಸ್ಥಾನಗಳನ್ನು ನೀಡಿದ ಬಿಜೆಪಿ ನಾಯಕತ್ವಕ್ಕೆ ನಾನು ಆತ್ಯಂತ ಕೃತಜ್ಞನಾಗಿದ್ದೇನೆ” ಎಂದಿದ್ದಾರೆ.
“ರಾಜ್ಯದ ಜನರು ಹಲವು ದಶಕಗಳಿಂದ ಸಾಮಾನ್ಯ ರಾಜಕೀಯ ಭಾಷಣಗಳಿಂದ ಆಯಾಸಗೊಂಡಿದ್ದರು ಮತ್ತು ಬದಲಾವಣೆಗಾಗಿ ಹಂಬಲಿಸುತ್ತಿದ್ದರು. ಕಳೆದ ದಶಕದಲ್ಲಿ ಹಲವು ಸಂದರ್ಭಗಳಲ್ಲಿ ಬದಲಾವಣೆಗಳು ಬಂದವಾದರೂ, ಅವು ಜನರ ನೆನಪಿನಿಂದ ಬೇಗನೆ ಮರೆಯಾದವು. ರಾಷ್ಟ್ರೀಯ ಪಕ್ಷಗಳು ತಮಿಳುನಾಡಿನ ಜನರಿಗೆ ಅರ್ಥವಾಗುವ ಭಾಷೆಯಲ್ಲಿ ಎಂದಿಗೂ ಮಾತನಾಡಲಿಲ್ಲ. ನಾನು ಈ ನಂಬಿಕೆಯನ್ನು ಬದಲಾಯಿಸಲು ಪ್ರಯತ್ನಿಸಿದೆ ಮತ್ತು ಒಳಗಿನಿಂದ ಹಾಗೂ ಹೊರಗಿನಿಂದ ಬಂದ ಹಲವಾರು ಅಡೆತಡೆಗಳು, ಗೋಡೆಗಳು ಹಾಗೂ ಅಡಚಣೆಗಳ ನಡುವೆಯೂ ಗಮನಾರ್ಹ ಯಶಸ್ಸನ್ನು ಕಂಡುಕೊಂಡಿದ್ದೇನೆ” ಎಂದು ಹೇಳಿದ್ದಾರೆ.
“ಪ್ರಾದೇಶಿಕ ಆಕಾಂಕ್ಷೆಗಳಲ್ಲಿ ಆಳವಾಗಿ ಬೇರೂರಿರುವ ಒಬ್ಬ ರಾಷ್ಟ್ರವಾದಿಯಾಗಿ, ನನ್ನ ಭಾಷೆಯ ಶ್ರೀಮಂತಿಕೆ, ನನ್ನ ಸಂಸ್ಕೃತಿಯ ವೈವಿಧ್ಯತೆ ಹಾಗೂ ನನ್ನ ಪ್ರದೇಶದ ವಿಶಿಷ್ಟ ಪರಂಪರೆಯ ಬಗ್ಗೆ ನಾನು ಅಪಾರ ಹೆಮ್ಮೆ ಪಡುತ್ತೇನೆ. ಬಲಿಷ್ಠ ಮತ್ತು ಒಗ್ಗಟ್ಟಿನ ಭಾರತವು ಅದರ ಅನೇಕ ಪ್ರದೇಶಗಳು ಮತ್ತು ಸಮುದಾಯಗಳ ಬಲ, ಘನತೆ ಹಾಗೂ ಆಕಾಂಕ್ಷೆಗಳ ಮೇಲೆಯೇ ನಿರ್ಮಾಣವಾಗುತ್ತದೆ ಎಂದು ನಾನು ದೃಢವಾಗಿ ನಂಬುತ್ತೇನೆ. ನಾನು ಕಾಲಕಾಲಕ್ಕೆ ನಿರಂತರವಾಗಿ ಗಮನಕ್ಕೆ ತರುತ್ತಿದ್ದ ವಿಷಯಗಳು ಮತ್ತು ಕಳಕಳಿಗಳಿಗೆ ಅಚಲ ಬೆಂಬಲವನ್ನು ನೀಡಿದ ಭಾರತೀಯ ಜನತಾ ಪಾರ್ಟಿಯ ಹಿರಿಯ ನಾಯಕತ್ವಕ್ಕೆ ನಾನು ಧನ್ಯವಾದಗಳನ್ನು ಅರ್ಪಿಸುತ್ತೇನೆ” ಎಂದಿದ್ದಾರೆ.
ಈ ಲೇಖನ ಓದಿದ್ದೀರಾ?: ಅಂಗನವಾಡಿಗಳಲ್ಲಿ ಜಾತಿಭೂತ: ಹಸುಳೆಗಳ ಊಟ- ಆಟದ ಅಂಗಳಗಳಲ್ಲಿ ಜಾತೀಯತೆಯ ಅದೃಶ್ಯ ಗೋಡೆಗಳು
“ಇದೇ ಸಂದರ್ಭದಲ್ಲಿ, ನಾನು ಉನ್ನತ ನಾಯಕತ್ವದೊಂದಿಗೆ ನಡೆಸಿದ ಬಹುಸಂಖ್ಯಾತ ಮಾತುಕತೆಗಳನ್ನು ಮತ್ತು ಕಳೆದ 18 ತಿಂಗಳುಗಳಲ್ಲಿ ನಾನು ವ್ಯಕ್ತಪಡಿಸಿದ ಭಿನ್ನಾಭಿಪ್ರಾಯಗಳನ್ನು ನೆನಪಿಸಿಕೊಳ್ಳಲು ಬಯಸುತ್ತೇನೆ. ತಮಿಳುನಾಡಿನಲ್ಲಿ ಅಭಿವೃದ್ಧಿ-ಆಧಾರಿತ ಮತ್ತು ಸಾಂಸ್ಕೃತಿಕವಾಗಿ ಬೇರೂರಿರುವ ರಾಜಕೀಯದ ಮುಂದಿನ ಹಾದಿಯ ಕುರಿತಾದ ನನ್ನ ನಿರಂತರ ಆಲೋಚನೆಗಳಿಂದ ಉನ್ನತ ನಾಯಕತ್ವಕ್ಕೆ ಇನ್ನು ಮುಂದೆ ಹೊರೆಯಾಗಲು ನಾನು ಬಯಸುವುದಿಲ್ಲ. ನಮ್ಮ ಹಿರಿಯ ನಾಯಕತ್ವದೊಂದಿಗೆ ಮಾತುಕತೆ ನಡೆಸಿದ ನಂತರ, ತಮಿಳುನಾಡಿಗೆ ಸಂಬಂಧಿಸಿದಂತೆ ನಮ್ಮ ದೃಷ್ಟಿಕೋನಗಳು ಪರಸ್ಪರ ಹೊಂದಿಕೆಯಾಗುತ್ತಿಲ್ಲ ಎಂಬ ತೀರ್ಮಾನಕ್ಕೆ ನಾನು ಬಂದಿದ್ದೇನೆ” ಎಂದು ವಿವರಿಸಿದ್ದಾರೆ.
“I believe the time has come for me to step out of the
— Vasudha Venugopal (@Vasudha156) June 5, 2026
party, reflect on the actual purpose of my entering politics, and sail where the winds take me in the future.” K Annamalai’s resignation pic.twitter.com/wJAQvIXLZH
“ದೀರ್ಘ ಆಲೋಚನೆಯ ನಂತರ, ನಾನು ಪಕ್ಷದಿಂದ ಹೊರಬರಲು, ನಾನು ರಾಜಕೀಯಕ್ಕೆ ಪ್ರವೇಶಿಸಿದ ನಿಜವಾದ ಉದ್ದೇಶದ ಬಗ್ಗೆ ಮರುಚಿಂತನೆ ನಡೆಸಲು ಮತ್ತು ಭವಿಷ್ಯದಲ್ಲಿ ಗಾಳಿ ಬೀಸುವ ಕಡೆಗೆ ಸಾಗಲು ಸೂಕ್ತ ಸಮಯ ಬಂದಿದೆ ಎಂದು ನಾನು ನಂಬುತ್ತೇನೆ. ನನ್ನ ಸಾಂಸ್ಥಿಕ ಜವಾಬ್ದಾರಿಗಳಿಂದ ನನ್ನನ್ನು ತಕ್ಷಣವೇ ಮುಕ್ತಗೊಳಿಸಬೇಕು ಮತ್ತು ಬಿಜೆಪಿಯ ಪ್ರಾಥಮಿಕ ಸದಸ್ಯತ್ವಕ್ಕೆ ನಾನು ನೀಡಿರುವ ರಾಜೀನಾಮೆಯನ್ನು ತಕ್ಷಣದಿಂದಲೇ ಜಾರಿಗೆ ಬರುವಂತೆ ಅಂಗೀಕರಿಸಬೇಕೆಂದು ನಾನು ವಿನಮ್ರವಾಗಿ ವಿನಂತಿಸುತ್ತೇನೆ” ಎಂದು ಅಣ್ಣಾಮಲೈ ಕೇಳಿದ್ದಾರೆ.
