ಸಾಮಾಜಿಕ ಜಾಲತಾಣದಲ್ಲಿ ಅತಿ ಶೀಘ್ರವಾಗಿ ವೈರಲ್ ಆದ ಒಂದು ವಿಡಂಬನಾತ್ಮಕ ರಾಜಕೀಯ ಚಳವಳಿ ಕಾಕ್ರೋಚ್ ಜನತಾ ಪಾರ್ಟಿಗೆ ಹಲವು ನಾಯಕರ ಬೆಂಬಲ ಸಿಗುತ್ತಿದೆ. ಈಗಾಗಲೇ ಸಿಜೆಪಿ ನೀಟ್ ಪ್ರಶ್ನೆ ಪತ್ರಿಕೆ ಸೋರಿಕೆ, ನಿರಂತರ ಪರೀಕ್ಷೆಗಳ ವಿವಾದದಲ್ಲೇ ಮುಳುಗಿರುವ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡಬೇಕು ಎಂದು ಒತ್ತಾಯಿಸಿ ದೆಹಲಿಯಲ್ಲಿ ಜೂನ್ 6ರಂದು ಪ್ರತಿಭಟನೆಗೆ ಮುಂದಾಗಿದ್ದಾರೆ. ಈ ಪ್ರತಿಭಟನೆಗೆ ಲಡಾಖ್ ಹೋರಾಟಗಾರ, ಪರಿಸರವಾದಿ ಸೋನಮ್ ವಾಂಗ್‌ಚುಕ್ ಕೂಡಾ ಬೆಂಬಲ ನೀಡಿದ್ದಾರೆ. ಹಾಗೆಯೇ ತಾವು ಕಾಕ್ರೋಚ್ ಜನತಾ ಪಾರ್ಟಿ ಸೇರಿದ್ದು ಯಾಕೆ ಎಂಬ ಬಗ್ಗೆ ವಿವರಣೆ ನೀಡಿದ್ದಾರೆ.
ಸೋನಮ್ ವಾಂಗ್‌ಚುಕ್ ಹೇಳುವಂತೆ, ಇಂದಿನ ರಾಜಕೀಯ ವ್ಯವಸ್ಥೆ, ಪರಿಸರ ಮಾಲಿನ್ಯ ಮತ್ತು ಸಮಾಜದ ಗಂಭೀರ ಸಮಸ್ಯೆಗಳನ್ನು ಯುವ ಪೀಳಿಗೆಗೆ ತಲುಪಿಸಲು ಸಾಂಪ್ರದಾಯಿಕ ವಿಧಾನಗಳಿಗಿಂತ ವಿಡಂಬನೆ ಮತ್ತು ಹಾಸ್ಯ ಹೆಚ್ಚು ಪರಿಣಾಮಕಾರಿ. ಗಂಭೀರವಾದ ವಿಷಯಗಳನ್ನು ಲಘುವಾಗಿ, ಆದರೆ ಮಾರ್ಮಿಕವಾಗಿ ಪ್ರಸ್ತುತಪಡಿಸುವ ಈ ವಿಶಿಷ್ಟ ಪ್ರಯತ್ನ ಯುವಕರನ್ನು ಆಕರ್ಷಿಸುತ್ತದೆ. ತಾವು ಮೊದಲ ಬಾರಿಗೆ ಈ ಚಳವಳಿಗೆ ಬೆಂಬಲ ನೀಡಿ “ನಾನು ಗೌರವಾನ್ವಿತ ಜಿರಳೆ” ಎಂದು ಘೋಷಿಸಿಕೊಂಡಾಗಿನಿಂದ ಸೋನಮ್ ಈ ವಿಶಿಷ್ಟ ಪರಿಕಲ್ಪನೆಯನ್ನು ಶ್ಲಾಘಿಸಿದ್ದಾರೆ.
ಇದನ್ನು ಓದಿದ್ದೀರಾ? ನೀಟ್ ಸೋರಿಕೆ: ಜೂ.6ರಂದು ನಡೆಯಲಿರುವ ಸಿಜೆಪಿ ಪ್ರತಿಭಟನೆಯಲ್ಲಿ ಸೋನಮ್ ವಾಂಗ್‌ಚುಕ್ ಭಾಗಿ
ಇನ್ನು ಕಾಕ್ರೋಚ್ ಜನತಾ ಪಾರ್ಟಿ ಸಂಸ್ಥಾಪಕರಲ್ಲಿ ಒಬ್ಬರಾದ ಸಾಮಾಜಿಕ ಕಾರ್ಯಕರ್ತ ಅಭಿಜೀತ್ ದೀಪ್ಕೆ ಪ್ರಾಮಾಣಿಕತೆಯ ಬಗ್ಗೆಯೂ ವಾಂಗ್‌ಚುಕ್ ಅಪಾರ ಗೌರವ ಹೊಂದಿದ್ದಾರೆ. ಈ ಬಗ್ಗೆ ಸ್ವತಃ ಅವರೇ ಹೇಳಿದ್ದಾರೆ. “ಅಭಿಜೀತ್ ದೀಪ್ಕೆ ಒಬ್ಬ ಸಾಚಾ ವ್ಯಕ್ತಿ ಮತ್ತು ನಿಷ್ಕಲ್ಮಶ ದೇಶಪ್ರೇಮಿ. ಅವರ ಆಲೋಚನೆಗಳ ಹಿಂದೆ ಯಾವುದೇ ದುರುದ್ದೇಶಗಳಿಲ್ಲ, ಬದಲಿಗೆ ದೇಶಕ್ಕೆ ಮತ್ತು ಸಮಾಜಕ್ಕೆ ಒಳ್ಳೆಯದನ್ನು ಮಾಡಬೇಕೆಂಬ ತೀವ್ರ ಹಂಬಲವಿದೆ” ಎನ್ನುತ್ತಾರೆ ಸೋನಮ್ ವಾಂಗ್‌ಚುಕ್.
ಹಾಗೆಯೇ, “ಈ ಸಂಘಟನೆ ಅಥವಾ ಪಕ್ಷದ ಹಿಂದೆ ಯಾವುದೇ ವಿದೇಶಿ ಶಕ್ತಿಗಳಾಗಲಿ, ತಪ್ಪು ಪ್ರೇರಣೆಗಳಾಗಲಿ ಇಲ್ಲ. ಇದು ಸಂಪೂರ್ಣವಾಗಿ ಭಾರತದ ಆಂತರಿಕ ಸಮಸ್ಯೆಗಳನ್ನು ಮತ್ತು ಪರಿಸರ ಕಾಳಜಿಯನ್ನು ಎತ್ತಿಹಿಡಿಯಲು ನಮ್ಮದೇ ಯುವಕರು ಹುಟ್ಟುಹಾಕಿದ ವೇದಿಕೆ” ಎಂದೂ ಸೋನಮ್ ಹೇಳುತ್ತಾರೆ. ಈ ಖಾತೆಯು ಪಾಕಿಸ್ತಾನ ಪ್ರೇರಿತ ಎಂಬ ಸುಳ್ಳು ಸುದ್ದಿಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದಂತೆ ಸೋನಮ್, ದೀಪ್ಕೆ ಜತೆ ಮಾತನಾಡಿ ಈ ಚಳವಳಿಗೆ ಬೆಂಬಲ ನೀಡಿದ್ದಾರೆ.
ವಾಂಗ್‌ಚುಕ್ ಹೇಳುವಂತೆ ಈ ಚಳವಳಿಯು ಮುಖ್ಯವಾಗಿ ಮೂರು ವಿಷಯಗಳ ಮೇಲೆ ಗಮನ ಹರಿಸುತ್ತದೆ. ಯುವಕರಲ್ಲಿ ಪರಿಸರ ಪ್ರಜ್ಞೆ ಮೂಡಿಸುವುದು, ಪ್ರಜಾಪ್ರಭುತ್ವದಲ್ಲಿ ಪ್ರಜೆಗಳು ಕೇವಲ ವೀಕ್ಷಕರಾಗದೆ ಪ್ರಶ್ನಿಸುವ ಜಿಜ್ಞಾಸೆ ಬೆಳೆಸಿಕೊಳ್ಳುವುದು, ರಾಜಕೀಯ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರ ಮತ್ತು ಡೋಂಗಿತನವನ್ನು ಹಾಸ್ಯದ ಮೂಲಕವೇ ತರಾಟೆಗೆ ತೆಗೆದುಕೊಳ್ಳುವುದು. ಈ ಸಂದರ್ಭದಲ್ಲೇ ಈ ಚಳವಳಿಯನ್ನು ಹಿಂಸಾಚಾರಕ್ಕೆ ತಿರುಗದಂತೆ ನೋಡಿಕೊಳ್ಳಲೂ ಸೋನಮ್ ಯುವಕರಲ್ಲಿ ಮನವಿ ಮಾಡಿದ್ದಾರೆ.
