ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ನಾಲ್ಕು ದಿನಗಳ ಪ್ರವಾಸಕ್ಕಾಗಿ ಅಮೆರಿಕಕ್ಕೆ ತೆರಳಿದ್ದಾರೆ. ಸ್ವತಃ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಆಹ್ವಾನದ ಮೇರೆಗೆ ತಮ್ಮ ಒಂಭತ್ತು ವರ್ಷಗಳ ಅಧಿಕಾರವಧಿಯಲ್ಲಿ ಮೊದಲ ಬಾರಿಗೆ ಅಧಿಕೃತವಾಗಿ ಭೇಟಿ ನೀಡಿದ್ದಾರೆ.
ವಿಶ್ವದ ದಿಗ್ಗಜ ಹಾಗೂ ಶ್ರೀಮಂತ ರಾಷ್ಟ್ರಕ್ಕೆ ಪ್ರಧಾನಿ ನರೇಂದ್ರ ಮೋದಿ ಭೇಟಿ ನೀಡಿರುವುದರಿಂದ ಆರ್ಥಿಕವಾಗಿ ಭಾರತಕ್ಕೆ ಸಾಕಷ್ಟು ಲಾಭವಾಗುವುದು ಎಂದು ಬಿಜೆಪಿ ಭಕ್ತರು ಸಂಭ್ರಮಿಸುತ್ತಿದ್ದಾರೆ. ಆದರೆ ಅಮೆರಿಕ ಆಹ್ವಾನದ ಅಸಲಿ ಉದ್ದೇಶವೇ ಬೇರೆಯಿದೆ.
ಸತ್ಯಗಳ ಮೇಲೆ ಸಾಮಾಜಿಕ ಕಾರ್ಯಕರ್ತೆ ಭಾವಿಕಾ ಕಪೂರ್‌ ತಮ್ಮ ಟ್ವೀಟ್‌ ಮೂಲಕ ಬೆಳಕು ಚೆಲ್ಲಿದ್ದಾರೆ.
“ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಭಾರತ ತನ್ನ ದೊಡ್ಡ ಸ್ನೇಹಿತ ಎಂದು ಮೋದಿಯವರನ್ನು ಆಹ್ವಾನಿಸಿಲ್ಲ. ಬದಲಿಗೆ ಆ ದೇಶದ ಹದಗೆಟ್ಟ ಆರ್ಥಿಕ ಸ್ಥಿತಿಯಿಂದಾಗಿ, ಅಮೆರಿಕ ತನ್ನ ಶಸ್ತ್ರಾಸ್ತ್ರಗಳನ್ನು ಮಾರಾಟ ಮಾಡಬೇಕಾಗಿದೆ. ಈ ಹಿನ್ನೆಲೆಯಲ್ಲಿ ಭಾರತದ ಪ್ರಧಾನಿಯನ್ನು ಹಲವು ಟ್ರಿಲಿಯನ್ ಡಾಲರ್ ಮೌಲ್ಯದ ಶಸ್ತ್ರಾಸ್ತ್ರ ಒಪ್ಪಂದಕ್ಕೆ ಆಹ್ವಾನಿಸುತ್ತಿದೆ. ಭಾರತದಲ್ಲಿ ಮೋದಿ ಮಾತ್ರವಲ್ಲದೆ ಬೇರೆ ಯಾರೇ ಪ್ರಧಾನಿಯಾಗಿದ್ದರೂ ಈ ಪರಿಸ್ಥಿತಿಯಲ್ಲಿ ಅಮೆರಿಕದಿಂದ ಇದೇ ರೀತಿಯ ಸ್ವಾಗತ ಪಡೆಯುತ್ತಿದ್ದರು” ಎಂದು ತಿಳಿಸಿದ್ದಾರೆ.
“ಒಪ್ಪಂದದ ಪ್ರಕಾರ ಭಾರತವು ಅಮೆರಿಕನ್ ಡ್ರೋನ್‌ಗಳನ್ನು ಖರೀದಿಸಲಾಗುವುದು ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಆದರೆ ಬೇರೆ ಇನ್ನೇನು ಖರೀದಿಸಲಾಗುತ್ತದೆ ಎಂಬುದು ಯಾರಿಗೂ ಗೊತ್ತಿಲ್ಲ. ಪ್ರಧಾನಿಯವರು ಎಷ್ಟು ಕೋಟಿ ರಕ್ಷಣಾ ಒಪ್ಪಂದಗಳಿಗೆ ಸಹಿ ಹಾಕಿದ್ದಾರೆ ಎಂಬುದನ್ನು ಬಹಿರಂಗಪಡಿಸಿಲ್ಲ. ಇವೆಲ್ಲವನ್ನು ಬಹಿರಂಗಪಡಿಸದಿರುವುದು ಕೂಡ ಭಾರತದ ಪ್ರಧಾನಿಯ ಬಗ್ಗೆ ಅಮೆರಿಕ ಮೆಚ್ಚುಗೆ ವ್ಯಕ್ತಪಡಿಸಲು ಕಾರಣವಾಗಿದೆ” ಎಂದು ಟ್ವೀಟ್‌ನಲ್ಲಿ ತಿಳಿಸಿದ್ದಾರೆ.
“ಇವೆಲ್ಲ ಕಾರಣದಿಂದ, ದಡ್ಡ ಗೋಧಿ ಮಾಧ್ಯಮಗಳು ಮೋದಿಯನ್ನು ವ್ಯಕ್ತಿಗತವಾಗಿ ವೈಭವೀಕರಿಸುವುದು, ಹಣ ಕೊಟ್ಟು ಜನಸಂದಣಿ ತೋರಿಸುವ ಸಂಭ್ರಮ, ಸಂಘಿ ಕಾರ್ಯಕರ್ತರು ಆಯೋಜಿಸುತ್ತಿರುವ ಕಾರ್ಯಕ್ರಮಗಳು ಮತ್ತು `ಮೋದಿ-ಮೋದಿ-ಮೋದಿ’ ಎಂಬ ಘೋಷಣೆಗಳು ಎಲ್ಲವೂ ಮೂರ್ಖತನದ ಪರಮಾವಧಿಯಾಗಿದೆ. ಒಬ್ಬ ವ್ಯಕ್ತಿಯ ವೈಭವೀಕರಣಕ್ಕಾಗಿ ತೆರಿಗೆ ಪಾವತಿದಾರರ ಹಣ ಸಂಪೂರ್ಣ ಪೋಲಾಗುತ್ತಿರುವುದು ನಿಜವಾಗಿಯೂ ಬೇಸರದ ಸಂಗತಿ ಎಂದು ಹೇಳಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ತನ್ನ ಪಕ್ಷವನ್ನು ಕಾಂಗ್ರೆಸ್‌ನೊಂದಿಗೆ ವಿಲೀನಗೊಳಿಸಲು ಮುಂದಾದ ವೈ ಎಸ್‌ ಶರ್ಮಿಳಾ
“ಇಲ್ಲಿ ನಾವೆಲ್ಲರೂ ನೆನಪಿಡಬೇಕಾಗಿರುವುದೇನೆಂದರೆ, ಇದು ಭಾರತದ ಪ್ರಧಾನಿಯ ಭೇಟಿಯೇ ವಿನಃ ವೈಯಕ್ತಿಕವಾಗಿ ಮೋದಿ ಭೇಟಿ ಅಲ್ಲ. ಅಮೆರಿಕಕ್ಕೆ ಲಾಭ ಮಾಡಿಕೊಡುವ ಸಾವಿರಾರು ಕೋಟಿಯ ಶಸ್ತ್ರಾಸ್ತ್ರ ಖರೀದಿ ಭೇಟಿಯ ಏಕೈಕ ಉದ್ದೇಶವಾಗಿದೆ” ಎಂದು ವಾಸ್ತವವನ್ನು ತೆರದಿಟ್ಟಿದ್ದಾರೆ.
ಪ್ರಧಾನಿ ಮೋದಿ ಅಮೆರಿಕಾದ ನೆಲಕ್ಕೆ ಬಂದಿಳಿಯುವ ಮುನ್ನವೇ, ಶ್ವೇತಭವನದ ರಾಷ್ಟ್ರೀಯ ಭದ್ರತಾ ಮಂಡಳಿಯ ವಕ್ತಾರ ಜಾನ್ ಕಿರ್ಬೆ ಮಾತನಾಡಿ, “ಭಾರತ ಸೂಪರ್ ಪವರ್ ರಾಷ್ಟ್ರ ಆಗಲು ನಾವು ಬೆಂಬಲಿಸುತ್ತೇವೆ. ರಕ್ಷಣಾ ಕ್ಷೇತ್ರದಲ್ಲಿ ಭಾರತ ಮತ್ತು ಅಮೆರಿಕ ನಡುವಿನ ಆಳವಾದ ಸಂಬಂಧವನ್ನು ಸುಧಾರಿಸಲು ನಾವು ಬಯಸುತ್ತೇವೆ. ಇದು ಶ್ವೇತಭವನದಲ್ಲಿ ಬಹಳ ಮುಖ್ಯವಾದ ವಾರವಾಗಲಿದೆ. ಮೋದಿ ಅವರ ಈ ಭೇಟಿ ಭಾರತ ಮತ್ತು ಅಮೆರಿಕ ನಡುವಿನ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸಲಿದೆ” ಎಂದು ಹಾಡಿ ಹೊಗಳಿದ್ದರು.
