ದೇಶದಲ್ಲಿ ಯಾವುದೇ ನೈಜ ಆರ್ಥಿಕ ಬೆಳವಣಿಗೆ ನಡೆಯುತ್ತಿಲ್ಲ ಎಂಬ ಕಟು ಸತ್ಯವನ್ನು ಸರ್ಕಾರ ಅರಿತುಕೊಳ್ಳಬೇಕು. ಅಂಕಿಅಂಶಗಳನ್ನು ತಿದ್ದಿ ಶೇ 7.8 ಬೆಳವಣಿಗೆ ಎಂದು ಸುಳ್ಳು ಸಂಭ್ರಮ ಆಚರಿಸುವ ಬದಲು, ಆರ್ಥಿಕತೆಯನ್ನು ಮೇಲೆತ್ತಲು ಅಗತ್ಯವಿರುವ ನೈಜ ಮತ್ತು ಕಠಿಣ ಸುಧಾರಣಾ ಕ್ರಮಗಳನ್ನು ಕೈಗೊಳ್ಳುವುದು ಇಂದಿನ ತುರ್ತು ಅಗತ್ಯವಾಗಿದೆ ಎಂದು ಕೇಂದ್ರದ ಮಾಜಿ ಹಣಕಾಸು ಕಾರ್ಯದರ್ಶಿ ಸುಭಾಷ್ ಚಂದ್ರ ಗರ್ಗ್ ಆಗ್ರಹಿಸಿದ್ದಾರೆ.
ದೇಶದ ಆರ್ಥಿಕತೆಯು ವೇಗವಾಗಿ ಬೆಳೆಯುತ್ತಿದೆ, ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿ ಜಿಡಿಪಿ ಶೇ 7.8 ರಷ್ಟು ದಾಖಲಾಗಿದೆ ಎಂದು ಪ್ರಧಾನಿ ಮೋದಿ ಮತ್ತು ಅವರ ಸರ್ಕಾರವು ವ್ಯಾಪಕ ಪ್ರಚಾರ ಪಡೆಯುತ್ತಾ ಸಂಭ್ರಮಿಸುತ್ತಿದೆ. ಆದರೆ, ಕೇಂದ್ರದ ಮಾಜಿ ಹಣಕಾಸು ಕಾರ್ಯದರ್ಶಿ ಸುಭಾಷ್ ಚಂದ್ರ ಗರ್ಗ್ ಅವರು ಸುದ್ದಿವಾಹಿನಿಯೊಂದರ ಸಂದರ್ಶನದಲ್ಲಿ ಈ ಅಂಕಿಅಂಶಗಳ ಹಿಂದಿನ ‘ಮ್ಯಾಜಿಕ್’ ಅನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದು, ದೇಶದ ನೈಜ ಜಿಡಿಪಿ ಬೆಳವಣಿಗೆ ಕೇವಲ ಶೇ 2.6 ರಷ್ಟಿದೆ ಎಂಬ ಆಘಾತಕಾರಿ ಸತ್ಯವನ್ನು ಹೊರಹಾಕಿದ್ದಾರೆ.
ಮೇಲ್ನೋಟಕ್ಕೆ ಶೇ. 7.8 ಬೆಳವಣಿಗೆಯು ಅದ್ಭುತವಾಗಿ ಕಂಡರೂ, ಇದು ವಾಸ್ತವವಲ್ಲ, ಬದಲಾಗಿ ಕೇವಲ ಅಂಕಿಅಂಶಗಳ ಕಣ್ಕಟ್ಟು ಎಂದು ಗರ್ಗ್ ವಿಶ್ಲೇಷಿಸಿದ್ದಾರೆ. ಮೋದಿ ಸರ್ಕಾರವು ಪ್ರಸ್ತುತ ವರ್ಷದ ಜಿಡಿಪಿಯನ್ನು ಹೆಚ್ಚು ದೃಢವಾಗಿ ತೋರಿಸಿಕೊಳ್ಳುವ ಉದ್ದೇಶದಿಂದ, ಕಳೆದ ವರ್ಷದ ಜಿಡಿಪಿ ಅಂಕಿಅಂಶಗಳನ್ನು ತಿದ್ದಿ ಕಡಿತಗೊಳಿಸುವ ತಂತ್ರವನ್ನು ಬಹಳ ಜಾಣ್ಮೆಯಿಂದ ಬಳಸಿದೆ. ಕಳೆದ ವರ್ಷ ಮೊದಲ ತ್ರೈಮಾಸಿಕದಲ್ಲಿ 86 ಟ್ರಿಲಿಯನ್ ರೂಪಾಯಿಗಳಷ್ಟಿದ್ದ(86 ಲಕ್ಷ ಕೋಟಿ ರೂ) ಜಿಡಿಪಿಯನ್ನು, ಈ ವರ್ಷ ಸರ್ಕಾರವು ಹೊಸ ಸರಣಿಯ (ನ್ಯೂ ಸೀರೀಸ್) ನೆಪವೊಡ್ಡಿ ಏಕಾಏಕಿ 80 ಟ್ರಿಲಿಯನ್ ರೂಪಾಯಿಗಳಿಗೆ(80 ಲಕ್ಷ ಕೋಟಿ ರೂ) ಇಳಿಸಿ ಪರಿಷ್ಕರಿಸಿದೆ. ಇದು ಸರ್ಕಾರದ ಆರ್ಥಿಕ ವೈಫಲ್ಯವನ್ನು ಮುಚ್ಚಿಹಾಕುವ ಸ್ಪಷ್ಟ ಯತ್ನವಾಗಿದೆ.
ಈ ಆರ್ಥಿಕ ತಂತ್ರಗಾರಿಕೆಯನ್ನು ಜನಸಾಮಾನ್ಯರು ಕೂಡ ಸರಳವಾಗಿ ಅರ್ಥಮಾಡಿಕೊಳ್ಳಬಹುದು. ಕಳೆದ ವರ್ಷದ ನೈಜ ಜಿಡಿಪಿ 86 ಟ್ರಿಲಿಯನ್ ರೂಪಾಯಿಗಳಷ್ಟಿತ್ತು(86 ಲಕ್ಷ ಕೋಟಿ ರೂ), ಮತ್ತು ಈ ವರ್ಷ ಅದು ವಾಸ್ತವಿಕವಾಗಿ 88 ಟ್ರಿಲಿಯನ್ ರೂಪಾಯಿಗಳಿಗೆ (88 ಲಕ್ಷ ಕೋಟಿ ರೂ) ತಲುಪಿದೆ. ಆದರೆ ಸರ್ಕಾರವು ಕಳೆದ ವರ್ಷದ 86 ಟ್ರಿಲಿಯನ್(86 ಲಕ್ಷ ಕೋಟಿ ರೂ) ಅನ್ನು 80 ಟ್ರಿಲಿಯನ್ (80 ಲಕ್ಷ ಕೋಟಿ ರೂ) ಎಂದು ತಿದ್ದಿ ಬರೆದ ಪರಿಣಾಮವಾಗಿ, ಈ ವರ್ಷದ 88 ಟ್ರಿಲಿಯನ್ (88 ಲಕ್ಷ ಕೋಟಿ ರೂ) ಜಿಡಿಪಿಯು ಬರೋಬ್ಬರಿ ಶೇ. 10.3 (ಪ್ರಸ್ತುತ ಬೆಲೆಗಳಲ್ಲಿ) ಏರಿಕೆಯಾದಂತೆ ಕಾಣುತ್ತಿದೆ. ಮೂಲ ಅಂಕಿಅಂಶಗಳೊಂದಿಗೆ ಆಟವಾಡುವ ಮೂಲಕ ಮೋದಿ ಸರ್ಕಾರವು ಕೃತಕ ಆರ್ಥಿಕ ಬೆಳವಣಿಗೆಯ ಭ್ರಮೆಯನ್ನು ಸೃಷ್ಟಿಸಿ ದೇಶದ ಜನರನ್ನು ದಾರಿ ತಪ್ಪಿಸುತ್ತಿದೆ.
ಒಂದು ವೇಳೆ ಕೇಂದ್ರ ಸರ್ಕಾರವು ಲೆಕ್ಕಾಚಾರದಲ್ಲಿ ಯಾವುದೇ ಮ್ಯಾಜಿಕ್ ಮಾಡದೆ, ಕಳೆದ ವರ್ಷದ 86 ಟ್ರಿಲಿಯನ್ ರೂಪಾಯಿಗಳ(86 ಲಕ್ಷ ಕೋಟಿ ರೂ) ಜಿಡಿಪಿ ಅಂಕಿಅಂಶವನ್ನು ಹಾಗೆಯೇ ಉಳಿಸಿಕೊಂಡಿದ್ದರೆ, ಪ್ರಸ್ತುತ ವರ್ಷದ 88 ಟ್ರಿಲಿಯನ್ ರೂಪಾಯಿಗಳ(86 ಲಕ್ಷ ಕೋಟಿ ರೂ) ಜಿಡಿಪಿಯ ನೈಜ ಬೆಳವಣಿಗೆಯು ಕೇವಲ ಶೇ. 2.6 ಮಾತ್ರ ಆಗಿರುತ್ತಿತ್ತು ಎಂದು ಸುಭಾಷ್ ಗರ್ಗ್ ಅವರು ಅಂಕಿಅಂಶಗಳ ಸಮೇತ ಸ್ಪಷ್ಟಪಡಿಸಿದ್ದಾರೆ. ಅಂದರೆ, ಜಾಗತಿಕ ಸವಾಲುಗಳ ನಡುವೆಯೂ ಭಾರತದ ಆರ್ಥಿಕತೆ ಶರವೇಗದಲ್ಲಿ ಬೆಳೆಯುತ್ತಿದೆ ಎಂಬ ಸರ್ಕಾರದ ಹೇಳಿಕೆಗಳು ಕೇವಲ ರಾಜಕೀಯ ಪ್ರೇರಿತ ಎಂಬುದನ್ನು ಈ ನೈಜ ಶೇ. 2.6 ಬೆಳವಣಿಗೆ ದರವು ಸಾಬೀತುಪಡಿಸುತ್ತದೆ.
ಕೇವಲ ಒಟ್ಟಾರೆ ಜಿಡಿಪಿ ಮಾತ್ರವಲ್ಲದೆ, ದೇಶದ ಪ್ರಮುಖ ಆರ್ಥಿಕ ವಲಯಗಳ ಸ್ಥಿತಿ ಕೂಡ ಅತ್ಯಂತ ಚಿಂತಾಜನಕವಾಗಿದೆ. ‘ಮೇಕ್ ಇನ್ ಇಂಡಿಯಾ’ದಂತಹ ಬೃಹತ್ ಯೋಜನೆಗಳ ಬಗ್ಗೆ ಕೇಂದ್ರ ಸರ್ಕಾರ ನಿರಂತರವಾಗಿ ಪ್ರಚಾರ ಮಾಡುತ್ತಿದ್ದರೂ, ವಾಸ್ತವದಲ್ಲಿ ಉತ್ಪಾದನಾ ವಲಯವು ತೀವ್ರ ಹಿನ್ನಡೆ ಅನುಭವಿಸಿದೆ. ಕಳೆದ ವರ್ಷದ ತಿದ್ದದ ನೈಜ ಅಂಕಿಅಂಶಗಳಿಗೆ ಹೋಲಿಸಿದರೆ, ಪ್ರಸ್ತುತ ವರ್ಷದಲ್ಲಿ ಉತ್ಪಾದನಾ ವಲಯದ ಬೆಳವಣಿಗೆಯು ವಾಸ್ತವವಾಗಿ ‘ಋಣಾತ್ಮಕ’ (ನೆಗೆಟಿವ್) ಆಗಿದೆ ಎಂದು ಮಾಜಿ ಹಣಕಾಸು ಕಾರ್ಯದರ್ಶಿಗಳು ಬೆಟ್ಟು ಮಾಡಿದ್ದಾರೆ. ಕೃಷಿ ಮತ್ತು ಗಣಿಗಾರಿಕೆ ವಲಯಗಳು ಕೂಡ ನಿರೀಕ್ಷಿತ ಮಟ್ಟದಲ್ಲಿಲ್ಲ.
ಸಾಮಾನ್ಯ ಜನರ ಕೊಳ್ಳುವ ಸಾಮರ್ಥ್ಯವು ಆರ್ಥಿಕತೆಯ ನೈಜ ಕನ್ನಡಿಯಾಗಿರುತ್ತದೆ. ಆದರೆ, ಮೋದಿ ಸರ್ಕಾರದ ಆಡಳಿತದಲ್ಲಿ ಜನಸಾಮಾನ್ಯರ ಬಳಕೆಯ (ಕನ್ಸಂಪ್ಷನ್) ಪ್ರಮಾಣವು ತೀವ್ರವಾಗಿ ಕುಸಿದಿದೆ. ಎಫ್‌ಎಂಸಿಜಿ (FMCG) ಉತ್ಪನ್ನಗಳು, ಕಾರುಗಳು ಸೇರಿದಂತೆ ಜನರ ದಿನಬಳಕೆಯ ವಸ್ತುಗಳ ಖರೀದಿಯ ಮೇಲಿನ ಖರ್ಚಿನ ಅಂಕಿಅಂಶಗಳನ್ನು ಗಮನಿಸಿದರೆ, ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಬಳಕೆಯ ಪ್ರಮಾಣವು ಋಣಾತ್ಮಕ ಬೆಳವಣಿಗೆಯನ್ನು ಕಂಡಿದೆ. ಇದು ಜನಸಾಮಾನ್ಯರು ಪ್ರತಿದಿನ ಅನುಭವಿಸುತ್ತಿರುವ ಆರ್ಥಿಕ ಸಂಕಷ್ಟವನ್ನು ಮತ್ತು ಸರ್ಕಾರದ ನೀತಿಗಳ ವೈಫಲ್ಯವನ್ನು ಎತ್ತಿತೋರಿಸುತ್ತದೆ.
ಆರ್ಥಿಕತೆಯ ಈ ಕತ್ತಲೆಯಲ್ಲಿ ಸರ್ಕಾರವು ಮಾಡಿರುವ ಬಂಡವಾಳ ವೆಚ್ಚ (ಕ್ಯಾಪಿಟಲ್ ಎಕ್ಸ್‌ಪೆಂಡಿಚರ್) ಮಾತ್ರ ಕೊಂಚ ಸಕಾರಾತ್ಮಕವಾಗಿದೆ. ರಸ್ತೆಗಳು, ಸೇತುವೆಗಳು ಮತ್ತು ಮೂಲಸೌಕರ್ಯಗಳ ಮೇಲಿನ ಹೂಡಿಕೆಯಲ್ಲಿ ಸುಮಾರು ಶೇ. 20 ರಷ್ಟು ಬೆಳವಣಿಗೆ ಕಂಡುಬಂದಿದೆ. ಹಳೆಯ ಅಂಕಿಅಂಶಗಳ ಆಧಾರದ ಮೇಲೆ ನೈಜವಾಗಿ ಲೆಕ್ಕ ಹಾಕಿದರೂ ಇದು ಶೇ. 15 ರಷ್ಟು ದೃಢವಾದ ಬೆಳವಣಿಗೆಯನ್ನು ತೋರಿಸುತ್ತದೆ. ಆದರೆ, ಕೇವಲ ಬಂಡವಾಳ ವೆಚ್ಚದ ಏರಿಕೆಯು, ದೇಶದ ಉತ್ಪಾದನೆ ಮತ್ತು ಬಳಕೆಯ ತೀವ್ರ ಕುಸಿತವನ್ನು ಸಂಪೂರ್ಣವಾಗಿ ಸರಿದೂಗಿಸಲು ಸಾಧ್ಯವಿಲ್ಲ ಎಂಬುದೇ ಆರ್ಥಿಕ ತಜ್ಞರ ವಾದವಾಗಿದೆ.
ಆರ್ಥಿಕತೆಯನ್ನು ಸರಿದಾರಿಗೆ ತರಲು ಮೋದಿ ಸರ್ಕಾರವು ಮೊದಲು ವಾಸ್ತವವನ್ನು ಒಪ್ಪಿಕೊಳ್ಳುವ ಧೈರ್ಯ ತೋರಬೇಕು ಎಂದು ಸುಭಾಷ್ ಗರ್ಗ್ ಎಚ್ಚರಿಸಿದ್ದಾರೆ. ದೇಶದಲ್ಲಿ ಯಾವುದೇ ನೈಜ ಆರ್ಥಿಕ ಬೆಳವಣಿಗೆ ನಡೆಯುತ್ತಿಲ್ಲ ಎಂಬ ಕಟು ಸತ್ಯವನ್ನು ಸರ್ಕಾರ ಅರಿತುಕೊಳ್ಳಬೇಕು. ಅಂಕಿಅಂಶಗಳನ್ನು ತಿದ್ದಿ ಶೇ 7.8 ಬೆಳವಣಿಗೆ ಎಂದು ಸುಳ್ಳು ಸಂಭ್ರಮ ಆಚರಿಸುವ ಬದಲು, ಆರ್ಥಿಕತೆಯನ್ನು ಮೇಲೆತ್ತಲು ಅಗತ್ಯವಿರುವ ನೈಜ ಮತ್ತು ಕಠಿಣ ಸುಧಾರಣಾ ಕ್ರಮಗಳನ್ನು ಕೈಗೊಳ್ಳುವುದು ಇಂದಿನ ತುರ್ತು ಅಗತ್ಯವಾಗಿದೆ ಎಂದು ಅವರು ನೇರವಾಗಿ ಸಲಹೆ ನೀಡಿದ್ದಾರೆ.
ಸುಭಾಷ್ ಚಂದ್ರ ಗರ್ಗ್ ಅವರ ವಿಶ್ಲೇಷಣೆಯು ಮೋದಿ ಸರ್ಕಾರದ ಆರ್ಥಿಕ ನಿರ್ವಹಣೆಯ ಬೂಟಾಟಿಕೆಯನ್ನು ನಿರ್ದಾಕ್ಷಿಣ್ಯವಾಗಿ ತೆರೆದಿಟ್ಟಿದೆ. ಕಳೆದ ವರ್ಷದ ಅಂಕಿಅಂಶಗಳನ್ನು ಕಡಿತಗೊಳಿಸಿ ಈ ವರ್ಷದ ಸಾಧನೆ ಎಂದು ಬಿಂಬಿಸಿಕೊಳ್ಳುವ ಸರ್ಕಾರದ ಈ ತಂತ್ರವು, ದೇಶದ ನೈಜ ಆರ್ಥಿಕ ಬಿಕ್ಕಟ್ಟನ್ನು ಮರೆಮಾಚುವ ವಿಫಲ ಯತ್ನವಾಗಿದೆ. ಅಂಕಿಅಂಶಗಳ ಕಣ್ಕಟ್ಟಿನಿಂದ ತಾತ್ಕಾಲಿಕವಾಗಿ ರಾಜಕೀಯ ಲಾಭ ಪಡೆಯಬಹುದೇ ಹೊರತು, ಕೇವಲ ಶೇ. 2.6 ದರದಲ್ಲಿ ತೆವಳುತ್ತಿರುವ ದೇಶದ ನೈಜ ಆರ್ಥಿಕತೆಯನ್ನು ಎಂದಿಗೂ ಅಭಿವೃದ್ಧಿಯ ಪಥದತ್ತ ಕೊಂಡೊಯ್ಯಲು ಸಾಧ್ಯವಿಲ್ಲ ಎಂಬುದು ಸುಸ್ಪಷ್ಟವಾಗಿದೆ.
