ವಾರಕ್ಕೊಂದು ಅನುವಾದಿತ ಕವಿತೆ ಮಾಲಿಕೆಯಲ್ಲಿ ಈ ಬಾರಿಯ ಕವಿತೆ ಉರ್ದು ಕವಿ ಅಲಿ ಸರ್ದಾರ್‌ ಜಾಫ್ರಿ ಅವರ ʼರಕ್ತʼ. ಕನ್ನಡಕ್ಕೆ ಅನುವಾದಿಸಿದ್ದಾರೆ ಹಿರಿಯ ಅನುವಾದಕಿ ಸಿ ಹೆಚ್‌ ಭಾಗ್ಯ
ರಕ್ತ
ಈ ರಕ್ತ ತೊಗೊಂಡು ನೀನೇನು ಮಾಡುತ್ತೀ
ಈ ರಕ್ತ
ಚುಂಬನದ ಬಿಸುಪು, ಗುಲಾಬಿಯ ಕೆಂಪು
ಈಗತಾನೆ ಹುಟ್ಟಿದ ಮಕ್ಕಳ ಮುಗುಳು ನಗು
ವರುಷ ವರುಷಗಳಿಂದ ತುಟಿಗಳು ಉಸುರಿದ ಆಶೀರ್ವಚನ
ಇದು ಅರ್ಧ ನಿಮೀಲಿತ ನಯನಗಳಿಗೆ ಹಚ್ವಿದ ಕಾಡಿಗೆ
ಮೃದು ಕೈಗಳ ಮದರಂಗಿ
ರೂಬಾಬು ಗಾಯಕರ ಹಾಡು
ಕವಿಗಳ ಕಹಳೆಯ ಮೊಳಗು
ಪ್ರೇಮದ ದೃಢತೆಯ ಭರವಸೆ.
ಈ ರಕ್ತ ಪಾಷಂಡಿಯಲ್ಲ, ಕಾಫಿರನಲ್ಲ,
ಮುಸ್ಲಿಮನಲ್ಲ
ಇದು ವೇದದ ಗೀತದ ಸಂಗೀತ
ಪವಿತ್ರ ಗ್ರಂಥದ ಸೊಲ್ಲು
ಇದು ಬದುಕಿನ ಪುಸ್ತಕದ ಮೊದಲ ಅಕ್ಷರ
ವಾಂಛೆಯ ಮೊದಲ ಪೆಂಪು
ಪ್ರವಚನದ ಮೂಲ *ತೋರ ಹಾಗೂ ಸಾಮ್ಸ್ ನ ಹೃದಯ
ಈ ಬೂದಿಮುಚ್ಚಿದ ಕೆಂಡ ಕತ್ತಿಯ ದಾಹವನ್ನು ತಣಿಸದು
ಈ ರಕ್ತ ತೊಗೊಂಡು ನೀನೇನು ಮಾಡುತ್ತೀ
ಬಿಸಿ ಕೆಂಪು ಜವ್ವನದ ಈ ರಕ್ತ
ನೆಲದ ಮೇಲೆ ಬಿದ್ದರೆ
ಭೂಮಿಯ ಗರ್ಭವನ್ನು ಸುಟ್ಟುಹಾಕುತ್ತದೆ
ಆಕಾಶದಿಂದ ಯಾವ ಹರಕೆಗಳೂ ಹರಿದು ಬರುವುದಿಲ್ಲ
ಯಾವ ಬೀಜವೂ ಮೊಳೆಯುವುದಿಲ್ಲ
ಯಾವ ಮುಗುಳೂ ನಗುವುದಿಲ್ಲ
ಯಾವ ಹೂವೂ ಘಮಘಮಿಸುವುದಿಲ್ಲ
ಕಣ್ಣಿನ ಬೆಳಕು ಕದಪಿನ ಕೆಂಪು
ಹೃದಯದ ಹಿಗ್ಗು
ಇದು* ಫರಾನ್ ಪರ್ವತದ ಮೇಲಿನ ಸೂರ್ಯ
*ಸಿನೈ ಹಾಗೂ * ತುರ್ ಪರ್ವತಗಳ ಭವ್ಯತೆ
ಇದು ಬೆಳಕೆಂಬ ನಿಜ ನುಡಿಯ ಕಾಂತಿ
ಇದು ಸತ್ಯ ಎಂಬ ಪದದ ಕಿಡಿ
ದಹಿಸುವ ಹೃದಯವ ಸಂತೈಸಲಾಗದ ಯಾತನೆ
ಈ ರಕ್ತ
ನನ್ನದು ನಿನ್ನದು ಎಲ್ಲರದು.
ಟಿಪ್ಪಣಿ
- ತೋರ– ಜುದಾಯಿಸಂ ನ ಬುನಾದಿ ರೂಪದ ಆಖ್ಯಾನಗಳನ್ನು ಒಳಗೊಂಡಿರುವ ಪವಿತ್ರ ಗ್ರಂಥ
- ಸಾಮ್ಸ್– ಪವಿತ್ರ ಗ್ರಂಥದ ಪದ್ಯಗಳು
- ಫರಾನ್– ತೋರದಲ್ಲಿ ಬರುವ ಮೆಕ್ಕಾದ ಪ್ರಸ್ತಾಪ
- ಸಿನೈ- ಪ್ರವಾದಿ ಮೋಸೆಸ್ ರಿಗೆ ಹತ್ತು ಆಜ್ಞೆಗಳು ದೊರೆಯಿತೆಂದು ಹೇಳಲಾದ ಪರ್ವತ
- ತುರ್ ಪರ್ವತ– ಪ್ರವಾದಿ ಮಹಮ್ಮದರಿಗೆ ಜಿಬ್ರೈಲ್ ಮೂಲಕ ಆಯತ್ ಗಳು ದೊರೆತ ಸ್ಥಳ.
