ಘಾನಾ ಪ್ರೀಮಿಯರ್ ಲೀಗ್‌ನ ಪ್ರತಿಭಾವಂತ ಫುಟ್‌ಬಾಲ್ ಆಟಗಾರ 20ರ ಹರೆಯದ ಡೊಮಿನಿಕ್ ಫ್ರಿಂಪಾಂಗ್ ಭೀಕರ ದರೋಡೆಕೋರರ ದಾಳಿಯಲ್ಲಿ ಮೃತಪಟ್ಟಿದ್ದಾರೆ. ಪಂದ್ಯ ಮುಗಿಸಿ ಹಿಂದಿರುಗುತ್ತಿದ್ದ ತಂಡದ ಬಸ್ ಮೇಲೆ ಶಸ್ತ್ರಸಜ್ಜಿತ ದರೋಡೆಕೋರರು ನಡೆಸಿದ ಗುಂಡಿನ ದಾಳಿಯಿಂದ ಇಡೀ ದೇಶದ ಫುಟ್‌ಬಾಲ್ ಸಮುದಾಯದಲ್ಲಿ ಸೂತಕದ ಛಾಯೆ ಆವರಿಸಿದೆ.
ಹೇಗಾಯ್ತು ಘಟನೆ?
ಭಾನುವಾರ (ಏ.12) ರಾತ್ರಿ ಸುಮಾರು 10:30ರ ಸುಮಾರಿಗೆ ಘಾನಾದ ಅಹೈರೆಸು-ಕ್ವಾಮೆ ದ್ವುಮೋರ್ ಸ್ರೆಸೊ ರಸ್ತೆಯಲ್ಲಿ ಈ ಘಟನೆ ಸಂಭವಿಸಿದೆ. ‘ಬೆರೆಕುಮ್ ಚೆಲ್ಸಿಯಾ ಎಫ್‌ಸಿ’ ತಂಡದ ಆಟಗಾರರು ಹೊರಗಿನ ಪಂದ್ಯವನ್ನು ಮುಗಿಸಿ ವಾಪಸ್ ಆಗುತ್ತಿದ್ದರು. ಈ ವೇಳೆ ಮುಖವಾಡ ಧರಿಸಿದ್ದ ದರೋಡೆಕೋರರು ರೈಫಲ್‌ಗಳೊಂದಿಗೆ ಬಸ್ ಮೇಲೆ ಏಕಾಏಕಿ ಗುಂಡಿನ ದಾಳಿ ನಡೆಸಿದ್ದಾರೆ. ಪ್ರಾಣ ಉಳಿಸಿಕೊಳ್ಳಲು ಆಟಗಾರರು ಬಸ್‌ನಿಂದ ಇಳಿದು ಹತ್ತಿರದ ಪೊದೆಗಳಲ್ಲಿ ಅಡಗಿಕೊಳ್ಳಬೇಕಾಗಿ ಬಂತು.
ಗುಂಡಿನ ಚಕಮಕಿಯ ನಡುವೆ ಡೊಮಿನಿಕ್ ಫ್ರಿಂಪಾಂಗ್ ಅವರಿಗೆ ಗುಂಡು ತಗುಲಿದೆ. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ ಎಂದು ಪೊಲೀಸರು ಖಚಿತಪಡಿಸಿದ್ದಾರೆ. ಕೇವಲ ಜೀವ ಹಾನಿಯಲ್ಲದೆ, ದರೋಡೆಕೋರರು ಹತ್ತಿರದಲ್ಲಿದ್ದ ಜಾರ್ಜ್ ಓವುಸು ಅಫ್ರಿಯೆ ಎಂಬುವವರಿಂದ ಸುಮಾರು 4,500 ಸೆಡಿಸ್ (ಸುಮಾರು 34,000 ರೂಪಾಯಿ) ಹಣವನ್ನು ದೋಚಿದ್ದಾರೆ.
ಡೊಮಿನಿಕ್ ಫ್ರಿಂಪಾಂಗ್ ಅವರ ನಿಧನಕ್ಕೆ ಘಾನಾ ಫುಟ್‌ಬಾಲ್ ಅಸೋಸಿಯೇಷನ್ ತೀವ್ರ ಸಂತಾಪ ಸೂಚಿಸಿದೆ. “ಡೊಮಿನಿಕ್ ಒಬ್ಬ ಭರವಸೆಯ ಯುವ ಪ್ರತಿಭೆಯಾಗಿದ್ದರು. ಅವರ ಸಮರ್ಪಣೆ ಮತ್ತು ಆಟದ ಮೇಲಿನ ಉತ್ಸಾಹವು ಇಡೀ ಲೀಗ್‌ಗೆ ಸ್ಫೂರ್ತಿಯಾಗಿತ್ತು. ಇದು ಕೇವಲ ಬೆರೆಕುಮ್ ಚೆಲ್ಸಿಯಾ ಕ್ಲಬ್‌ಗೆ ಮಾತ್ರವಲ್ಲದೆ ಇಡೀ ದೇಶದ ಫುಟ್‌ಬಾಲ್‌ಗೆ ದೊಡ್ಡ ನಷ್ಟ,” ಎಂದು ಅಸೋಸಿಯೇಷನ್ ಕಂಬನಿ ಮಿಡಿದಿದೆ.
ಇದನ್ನೂ ಓದಿ: ಅಸ್ಸಾಂ | ಉಗ್ರ ಸಂಘಟನೆ ULFA-I ಮುಖ್ಯಸ್ಥ ಪರೇಶ್ ಬರುವಾ ಮನೆ ಬಳಿ ಗುಂಡಿನ ಸದ್ದು
ಈ ವರ್ಷದ ಆರಂಭದಲ್ಲಷ್ಟೇ ‘ಅಡುವಾನಾ ಸ್ಟಾರ್ಸ್ ಎಫ್‌ಸಿ’ಯಿಂದ ಸಾಲದ ಆಧಾರದ ಮೇಲೆ ಬೆರೆಕುಮ್ ಚೆಲ್ಸಿಯಾ ತಂಡಕ್ಕೆ ಸೇರಿದ್ದ ಫ್ರಿಂಪಾಂಗ್, ಈಗಾಗಲೇ 13 ಪಂದ್ಯಗಳನ್ನು ಆಡಿ ಎರಡು ಗೋಲುಗಳನ್ನು ಗಳಿಸುವ ಮೂಲಕ ಎಲ್ಲರ ಗಮನ ಸೆಳೆದಿದ್ದರು.
