ಸಾರ್ವಕಾಲಿಕ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಒಬ್ಬರೆಂದು ಪರಿಗಣಿಸಲಾದ ವೆಸ್ಟ್ ಇಂಡೀಸ್‌ನ ದಂತಕಥೆ, ಮಾಜಿ ಆಲ್‌ರೌಂಡರ್ ಸರ್ ಗ್ಯಾರಿ ಸೋಬರ್ಸ್ ಅವರು ತಮ್ಮ 89ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ.
1954 ರಿಂದ 1974 ರವರೆಗೆ ವೆಸ್ಟ್ ಇಂಡೀಸ್ ತಂಡವನ್ನು ಪ್ರತಿನಿಧಿಸಿದ್ದ ಸೋಬರ್ಸ್, 93 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು 8,032 ರನ್ ಗಳಿಸಿದ್ದಾರೆ ಮತ್ತು 235 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ. 1958ರಲ್ಲಿ ಪಾಕಿಸ್ತಾನದ ವಿರುದ್ಧ ಅವರು ಬಾರಿಸಿದ ಅಜೇಯ 365 ರನ್‌ಗಳ ಐತಿಹಾಸಿಕ ಇನಿಂಗ್ಸ್, ಸತತ 36 ವರ್ಷಗಳ ಕಾಲ ಟೆಸ್ಟ್ ಕ್ರಿಕೆಟ್‌ನ ಗರಿಷ್ಠ ವೈಯಕ್ತಿಕ ಮೊತ್ತದ ದಾಖಲೆಯಾಗಿ ಉಳಿದುಕೊಂಡಿತ್ತು. ಅವರು ಕೇವಲ ಶ್ರೇಷ್ಠ ಬ್ಯಾಟರ್ ಮಾತ್ರವಲ್ಲದೆ, ಸ್ಪಿನ್ ಮತ್ತು ಸೀಮ್ ಎರಡೂ ಶೈಲಿಯಲ್ಲಿ ಬೌಲಿಂಗ್ ಮಾಡುವ ಅಸಾಧಾರಣ ಪ್ರತಿಭೆ ಹೊಂದಿದ್ದ ಬಹುಮುಖಿ ಬೌಲರ್ ಆಗಿದ್ದರು.
ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಒಟ್ಟು 28,314 ರನ್ (ಇದರಲ್ಲಿ ನಾಟಿಂಗ್‌ಹ್ಯಾಮ್‌ಶೈರ್ ಪರ ಗಳಿಸಿದ 7,041 ರನ್ ಸೇರಿದೆ) ಹಾಗೂ 1,043 ವಿಕೆಟ್‌ಗಳನ್ನು ಗಳಿಸಿರುವ ಇವರು, ಅದ್ಭುತ ಫೀಲ್ಡರ್ ಕೂಡ ಆಗಿದ್ದರು. 1968ರಲ್ಲಿ ಇಂಗ್ಲೆಂಡ್‌ನ ಕೌಂಟಿ ಕ್ರಿಕೆಟ್‌ನಲ್ಲಿ ನಾಟಿಂಗ್‌ಹ್ಯಾಮ್‌ಶೈರ್ ಪರ ಆಡುವಾಗ ಒಂದೇ ಓವರ್‌ನ ಎಲ್ಲ ಆರು ಎಸೆತಗಳನ್ನು ಸಿಕ್ಸರ್‌ಗಟ್ಟುವ ಮೂಲಕ, ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಈ ಸಾಧನೆ ಮಾಡಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಅಲ್ಲದೆ, 1965 ರಿಂದ 1972 ರವರೆಗೆ ಅವರು ವೆಸ್ಟ್ ಇಂಡೀಸ್ ತಂಡದ ನಾಯಕರಾಗಿಯೂ ಯಶಸ್ವಿಯಾಗಿ ಕಾರ್ಯನಿರ್ವಹಿಸಿದ್ದರು
ಕ್ರಿಕೆಟ್ ಕ್ಷೇತ್ರಕ್ಕೆ ಅವರು ನೀಡಿದ ಅಪಾರ ಕೊಡುಗೆಯನ್ನು ಪರಿಗಣಿಸಿ 1975ರಲ್ಲಿ ಅವರಿಗೆ ಪ್ರತಿಷ್ಠಿತ ‘ನೈಟ್‌ಹುಡ್’ (ಸರ್) ಗೌರವವನ್ನು ಪ್ರದಾನ ಮಾಡಲಾಗಿತ್ತು. ‘ವಿಸ್ಡನ್’ ಹೆಸರಿಸಿದ 20ನೇ ಶತಮಾನದ ಐವರು ಶ್ರೇಷ್ಠ ಕ್ರಿಕೆಟಿಗರಲ್ಲಿ ಸೋಬರ್ಸ್ ಕೂಡ ಒಬ್ಬರಾಗಿದ್ದರು. ಪಾಪ್ ಗಾಯಕಿ ರಿಹಾನ್ನಾ ಅವರನ್ನು ಹೊರತುಪಡಿಸಿದರೆ, ಬಾರ್ಬಡೋಸ್ ದೇಶದ ‘ಜೀವಂತ ರಾಷ್ಟ್ರೀಯ ಹೀರೋ’ ಎಂಬ ಹೆಗ್ಗಳಿಕೆ ಹೊಂದಿದ್ದ ಏಕೈಕ ವ್ಯಕ್ತಿ ಇವರಾಗಿದ್ದರು. ಕೇವಲ 16ನೇ ವಯಸ್ಸಿನಲ್ಲಿ ಬಾರ್ಬಡೋಸ್ ಪರ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಅವರು, 17ನೇ ವಯಸ್ಸಿನಲ್ಲಿ ವೆಸ್ಟ್ ಇಂಡೀಸ್ ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಿದ್ದರು.
ಸೋಬರ್ಸ್ ನಿಧನಕ್ಕೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಅಧ್ಯಕ್ಷ ಜಯ್ ಶಾ ತೀವ್ರ ಸಂತಾಪ ಸೂಚಿಸಿದ್ದು, “ಕ್ರಿಕೆಟ್ ಜಗತ್ತು ತನ್ನ ಶ್ರೇಷ್ಠ ದಿಗ್ಗಜನೊಬ್ಬನನ್ನು ಕಳೆದುಕೊಂಡಿದೆ. ಅವರು ಬ್ಯಾಟ್, ಬಾಲ್ ಹಾಗೂ ಫೀಲ್ಡಿಂಗ್‌ನಲ್ಲಿ ತೋರಿದ ಶ್ರೇಷ್ಠತೆಯು ಮುಂದಿನ ತಲೆಮಾರಿಗೆ ಮಾದರಿಯಾಗಿದೆ” ಎಂದು ಬಣ್ಣಿಸಿದ್ದಾರೆ. ಕ್ರಿಕೆಟ್ ವೆಸ್ಟ್ ಇಂಡೀಸ್ ಅಧ್ಯಕ್ಷ ಕಿಶೋರ್ ಶಾಲೋ ಅವರು ಸೋಬರ್ಸ್ ಅವರನ್ನು “ಕೆರಿಬಿಯನ್ ಶ್ರೇಷ್ಠತೆ, ಸ್ಥೈರ್ಯ ಮತ್ತು ಸಾಧ್ಯತೆಗಳ ಸಂಕೇತ” ಎಂದು ಸ್ಮರಿಸಿದ್ದಾರೆ.
ಸೋಬರ್ಸ್ ಅವರ ನಿಧನದ ಹಿನ್ನೆಲೆಯಲ್ಲಿ ಅವರ ತವರು ದೇಶವಾದ ಬಾರ್ಬಡೋಸ್‌ನ ಪ್ರಧಾನಿ ಮಿಯಾ ಮೊಟ್ಲಿ ಅವರು ಶುಕ್ರವಾರದಂದು ಹಾಗೂ ಸೋಬರ್ಸ್ ಅವರ ಅಂತ್ಯಕ್ರಿಯೆ ನಡೆಯುವ ದಿನದಂದು ‘ರಾಷ್ಟ್ರೀಯ ಶೋಕಾಚರಣೆ’ಯನ್ನು ಘೋಷಿಸಿದ್ದಾರೆ.
