ಬಲೂಚಿಸ್ತಾನದಲ್ಲಿ ಗುರುವಾರ ಎರಡು ಪ್ರತ್ಯೇಕ ಭೀಕರ ದಾಳಿಗಳು ನಡೆದಿದ್ದು, 25 ಮಂದಿ ಪಾಕಿಸ್ತಾನಿ ಸೇನಾ ಸಿಬ್ಬಂದಿಯನ್ನು ಹತ್ಯೆ ಮಾಡಿರುವುದಾಗಿ ಬಲೂಚ್ ಲಿಬರೇಶನ್ ಆರ್ಮಿ (ಬಿಎಲ್‌ಎ) ಗುಂಪು ಹೇಳಿಕೊಂಡಿದೆ. ಅಲ್ಲದೆ, ಸೇನೆಯ ಮೂರು ವಾಹನಗಳನ್ನು ನಾಶಪಡಿಸಿರುವುದಾಗಿಯೂ ಅದು ತಿಳಿಸಿದೆ.
ಬಿಎಲ್‌ಎ ವಕ್ತಾರ ಜೀಯಂದ್ ಬಲೂಚ್ ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿದ್ದಾನೆ. ಜಿಯಾರತ್ ಕ್ರಾಸ್‌ನಲ್ಲಿ ಸೇನಾ ಬೆಂಗಾವಲು ಪಡೆಯ ನಾಲ್ಕು ವಾಹನಗಳ ಮೇಲೆ ತಮ್ಮ ಹೋರಾಟಗಾರರು ದಾಳಿ ನಡೆಸಿದ್ದಾರೆ. ಸೇನಾ ಟ್ರಕ್ ಸೇರಿದಂತೆ ಎರಡು ವಾಹನಗಳನ್ನು ಧ್ವಂಸಗೊಳಿಸಲಾಗಿದ್ದು, 18 ಮಂದಿ ಸೇನಾ ಸಿಬ್ಬಂದಿಯನ್ನು ಹತ್ಯೆ ಮಾಡಲಾಗಿದೆ ಎಂದು ಆತ ತಿಳಿಸಿದ್ದಾನೆ.
ದಾಳಿಯ ವೇಳೆ ಗಾಯಗೊಂಡಿದ್ದ ಐವರು ಯೋಧರು ಸ್ಥಳದಿಂದ ತಪ್ಪಿಸಿಕೊಂಡಿದ್ದಾರೆ. ಬೆಂಗಾವಲು ಪಡೆಯಲ್ಲಿದ್ದ ಶಸ್ತ್ರಾಸ್ತ್ರಗಳನ್ನು ದಾಳಿಕೋರರು ವಶಪಡಿಸಿಕೊಂಡಿದ್ದಾರೆ ಎಂದು ವಕ್ತಾರ ಹೇಳಿಕೊಂಡಿದ್ದಾನೆ. ಬಿಎಲ್‌ಎಯ ‘ಫತೇಹ್ ಸ್ಕ್ವಾಡ್’ (Fateh Squad) ಈ ದಾಳಿಯಲ್ಲಿ ಭಾಗಿಯಾಗಿತ್ತು ಎಂದು ಹೇಳಿಕೆಯಲ್ಲಿ ಉಲ್ಲೇಖಿಸಲಾಗಿದೆ.
ದಾಳಿಗೆ ಸಂಬಂಧಿಸಿದಂತೆ ಗುಂಪು ತನ್ನ ಅಧಿಕೃತ ಮಾಧ್ಯಮ ಚಾನೆಲ್ ‘ಹಕ್ಕಲ್’ (Hakkal) ಮೂಲಕ ಒಂದು ನಿಮಿಷ 11 ಸೆಕೆಂಡುಗಳ ವಿಡಿಯೊ ತುಣುಕನ್ನು ಸಹ ಬಿಡುಗಡೆ ಮಾಡಿದೆ. ಜಿಯಾರತ್ ಕ್ರಾಸ್‌ನಲ್ಲಿ ನಡೆದ ದಾಳಿಯ ದೃಶ್ಯಗಳು ಇದರಲ್ಲಿವೆ ಎಂದು ಅದು ಹೇಳಿಕೊಂಡಿದೆ. ವಿಡಿಯೊದಲ್ಲಿ ಸೇನಾ ವಾಹನಗಳು ಹೊತ್ತಿ ಉರಿಯುತ್ತಿರುವುದು, ಮೃತದೇಹಗಳು ಹಾಗೂ ವಶಪಡಿಸಿಕೊಂಡ ಶಸ್ತ್ರಾಸ್ತ್ರಗಳ ದೃಶ್ಯಾವಳಿಗಳು ಕಂಡುಬಂದಿವೆ. ಸಂಪೂರ್ಣ ವಿಡಿಯೊವನ್ನು ಶೀಘ್ರದಲ್ಲೇ ಬಿಡುಗಡೆ ಮಾಡುವುದಾಗಿ ಗುಂಪು ತಿಳಿಸಿದೆ.
ಮತ್ತೊಂದು ಪ್ರತ್ಯೇಕ ಘಟನೆಯಲ್ಲಿ, ಸೂರಬ್‌ನ ಹಾಜಿಕಾ ಪ್ರದೇಶದಲ್ಲಿ ಬಿಎಲ್‌ಎಯ ವಿಶೇಷ ತಾಂತ್ರಿಕ ಕಾರ್ಯಾಚರಣೆ ಪಡೆ (STOS) ಸೇನಾ ವಾಹನವನ್ನು ಗುರಿಯಾಗಿಸಿಕೊಂಡು ಸ್ಫೋಟಕ ತುಂಬಿದ್ದ ವಾಹನವನ್ನು ರಿಮೋಟ್ ಮೂಲಕ ಸ್ಫೋಟಿಸಿದೆ. ಈ ದಾಳಿಯಲ್ಲಿ 7 ಮಂದಿ ಯೋಧರು ಸಾವನ್ನಪ್ಪಿದ್ದು, ವಾಹನ ಸಂಪೂರ್ಣವಾಗಿ ನಾಶವಾಗಿದೆ ಎಂದು ಬಿಎಲ್‌ಎ ಹೇಳಿಕೊಂಡಿದೆ.
ಈ ದಾಳಿಗಳ ಕುರಿತಾದ ಹೆಚ್ಚಿನ ವಿವರಗಳನ್ನು ತಮ್ಮ ಸಾಪ್ತಾಹಿಕ ವರದಿಯಲ್ಲಿ ಬಿಡುಗಡೆ ಮಾಡುವುದಾಗಿ ಬಿಎಲ್‌ಎ ತಿಳಿಸಿದೆ. ಆದರೆ, ಬಿಎಲ್‌ಎ ಮಾಡಿರುವ ಈ ಗಂಭೀರ ಆರೋಪಗಳ ಬಗ್ಗೆ ಪಾಕಿಸ್ತಾನ ಸರ್ಕಾರ ಅಥವಾ ಸೇನಾ ಅಧಿಕಾರಿಗಳು ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ.
