ನೇಪಾಳದ ಇತಿಹಾಸದಲ್ಲೇ ಅತ್ಯಂತ ಭೀಕರ ಎನ್ನಲಾದ ಜಲಪ್ರಳಯ ಮತ್ತು ಹಿಮನದಿ ಕುಸಿತದಿಂದಾಗಿ ತ್ರಿಶೂಲಿ ನದಿ ಕಣಿವೆಯ ಜಲವಿದ್ಯುತ್ ಯೋಜನೆಗಳು ಧ್ವಂಸಗೊಂಡಿವೆ. ಹಠಾತ್ ಹರಿದುಬಂದ ಭಾರಿ ಪ್ರವಾಹವು ಕೋಟ್ಯಂತರ ಟನ್ ಕೆಸರು, ಕಲ್ಲು ಹಾಗೂ ಮರಮುಟ್ಟುಗಳನ್ನು ತಂದೆಸೆದ ಪರಿಣಾಮ ಸುರಂಗ ಮಾರ್ಗಗಳು ಸಂಪೂರ್ಣವಾಗಿ ಮುಚ್ಚಿಹೋಗಿವೆ. ಸುರಂಗದೊಳಗೆ ಸಿಲುಕಿರುವ ನೂರಾರು ನೌಕರರ ಜೀವ ರಕ್ಷಣೆಗೆ ಈಗ ಆಧುನಿಕ ತಂತ್ರಜ್ಞಾನ ಮತ್ತು ಎಂಜಿನಿಯರ್‌ಗಳ ಸಮಯಪ್ರಜ್ಞೆ ಜೀವಾಳವಾಗಿದೆ. ಸುರಂಗಗಳ ನಿಖರ ಮಾಹಿತಿ ನೀಡಲು ಎಂಜಿನಿಯರ್‌ಗಳು ಸೃಷ್ಟಿಸಿಕೊಂಡಿರುವ ‘ವಾಟ್ಸ್ಯಾಪ್ ಗ್ರೂಪ್’ ರಕ್ಷಣಾ ಪಡೆಗಳಿಗೆ ಅತಿ ದೊಡ್ಡ ಶಕ್ತಿಯಾಗಿ ಹೊರಹೊಮ್ಮಿದೆ.
ದುರಂತ ಸಂಭವಿಸುವುದಕ್ಕೂ ಮುನ್ನವೇ ತಾಂತ್ರಿಕ ಚರ್ಚೆಗಳಿಗಾಗಿ ರಚಿಸಲಾಗಿದ್ದ ಈ ವಾಟ್ಸ್ಯಾಪ್ ಗ್ರೂಪ್‌ನಲ್ಲಿ ಪ್ರಸ್ತುತ 500ಕ್ಕೂ ಹೆಚ್ಚು ತಜ್ಞರಿದ್ದಾರೆ. ಇದರಲ್ಲಿ ಪ್ರಸ್ತುತ ಯೋಜನೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಿವಿಲ್ ಮತ್ತು ಮೆಕ್ಯಾನಿಕಲ್ ಎಂಜಿನಿಯರ್‌ಗಳು, ಈ ಹಿಂದೆ ಯೋಜನೆಯ ನಿರ್ಮಾಣದಲ್ಲಿ ಭಾಗಿಯಾಗಿದ್ದ ನಿವೃತ್ತ ನೌಕರರು, ನೇಪಾಳ ಸರ್ಕಾರದ ವಿದ್ಯುತ್ ಪ್ರಾಧಿಕಾರದ ಉನ್ನತಾಧಿಕಾರಿಗಳು ಹಾಗೂ ರಕ್ಷಣಾ ಕಾರ್ಯದಲ್ಲಿರುವ ಸೇನಾ ಅಧಿಕಾರಿಗಳು ಸದಸ್ಯರಾಗಿದ್ದಾರೆ.
ಇದನ್ನೂ ಓದಿ: ನೇಪಾಳ | ಎಲ್ಲವನ್ನೂ ಕೊಚ್ಚಿಕೊಂಡು ಹೋದ ಪ್ರವಾಹ ಇದೊಂದು ಮನೆಯನ್ನ ಬಿಟ್ಟದ್ದು ಹೇಗೆ?
ವಿಪತ್ತು ನಿರ್ವಹಣೆಯಲ್ಲಿ ವಾಟ್ಸ್ಯಾಪ್ ಗ್ರೂಪ್ ಸಹಾಯ ಮಾಡುತ್ತಿರುವುದು ಹೇಗೆ?
ಪ್ರವಾಹದ ಬಳಿಕ ಸುತ್ತಮುತ್ತಲಿನ ಬೆಟ್ಟ-ಗುಡ್ಡಗಳು ಕುಸಿದು ಸ್ಥಳೀಯ ಭೌಗೋಳಿಕ ಚಿತ್ರಣವೇ ಬದಲಾಗಿದೆ. ಸುರಂಗಗಳ ದ್ವಾರ ಎಲ್ಲಿದೆ ಎಂದು ಪತ್ತೆ ಹಚ್ಚುವುದೇ ರಕ್ಷಣಾ ಪಡೆಗಳಿಗೆ ದೊಡ್ಡ ಸವಾಲಾಗಿತ್ತು. ರಕ್ಷಣಾ ಸಿಬ್ಬಂದಿ ವಾಟ್ಸ್ಯಾಪ್ ಗ್ರೂಪ್‌ನಲ್ಲಿ ಸಂದೇಶ ಕಳುಹಿಸಿದ ತಕ್ಷಣ, ಯೋಜನೆಯ ಹಳೆಯ ಎಂಜಿನಿಯರ್‌ಗಳು ಸುರಂಗದ ನಿಖರ ‘ಬ್ಲೂಪ್ರಿಂಟ್’ ಹಾಗೂ ಆಟೋಕ್ಯಾಡ್ ನಕ್ಷೆಗಳನ್ನು ಗ್ರೂಪ್‌ನಲ್ಲಿ ಶೇರ್ ಮಾಡುತ್ತಿದ್ದಾರೆ.
ಸುರಂಗ ನಿರ್ಮಾಣ ಮಾಡುವಾಗ ತುರ್ತು ಪರಿಸ್ಥಿತಿಗಾಗಿ ನಿರ್ಮಿಸಲಾಗುವ ಗಾಳಿ-ಹಿಡಿದಿಟ್ಟುಕೊಳ್ಳುವ ಕೊಠಡಿಗಳು (Air Chambers) ಎಲ್ಲಿವೆ ಎಂಬುದನ್ನು ಯೋಜನೆ ವಿನ್ಯಾಸಗೊಳಿಸಿದ ತಜ್ಞರು ಗುರುತಿಸುತ್ತಿದ್ದಾರೆ. ಕತ್ತಲಲ್ಲಿ ಬಾಕಿಯಾಗಿರುವ ಕಾರ್ಮಿಕರು ಎಲ್ಲಿ ಆಶ್ರಯ ಪಡೆದಿರಬಹುದು ಎಂಬ ನಿಖರ ಊಹೆ ಇದರಿಂದ ಸಾಧ್ಯವಾಗಿದೆ.
ಸುರಂಗದ ಮೇಲ್ಭಾಗದಿಂದ ರಂಧ್ರ ಕೊರೆದು ಒಳಗಿರುವವರಿಗೆ ಆಮ್ಲಜನಕ ಹಾಗೂ ದ್ರವಾಹಾರ ತಲುಪಿಸಲು ಸೂಕ್ತವಾದ ಸ್ಥಳವನ್ನು ಗ್ರೂಪ್‌ನಲ್ಲಿರುವ ಮೆಕ್ಯಾನಿಕಲ್ ಎಂಜಿನಿಯರ್‌ಗಳು ಸೂಚಿಸುತ್ತಿದ್ದಾರೆ. ಕಲ್ಲಿನ ಪದರಗಳು ಎಲ್ಲೆಲ್ಲಿ ತೆಳುವಾಗಿವೆ ಎಂಬುದನ್ನು ನಕ್ಷೆಯ ಮೂಲಕ ತೋರಿಸಿ ರಕ್ಷಣಾ ಕಾರ್ಯಾಚರಣೆಯ ವೇಗ ಹೆಚ್ಚಿಸಿದ್ದಾರೆ.
ಇದನ್ನೂ ಓದಿ: ನೇಪಾಳ ಪ್ರವಾಹ: ಸಾವಿನ ದವಡೆಯಿಂದ ಬಚಾವ್; 9 ದಿನಗಳ ನಂತರ 170 ಮೀಟರ್ ಆಳದ ಸುರಂಗದಲ್ಲಿ ಇಬ್ಬರು ಜೀವಂತ ಪತ್ತೆ!
ಸಿಲುಕಿಕೊಂಡಿರುವ ಕಾರ್ಮಿಕರ ಹೆಸರು, ಅವರ ಕೊನೆಯ ಲೊಕೇಶನ್ ಮತ್ತು ಮೊಬೈಲ್ ಸಂಖ್ಯೆಗಳನ್ನು ಗ್ರೂಪ್‌ನಲ್ಲಿ ಕ್ರೋಢೀಕರಿಸಿ, ಉಪಗ್ರಹ ಫೋನ್ ಹಾಗೂ ಟೆಲಿಕಾಂ ಸಂಸ್ಥೆಗಳ ನೆರವಿನಿಂದ ಸಿಗ್ನಲ್ ಪತ್ತೆ ಹಚ್ಚಲು ಪ್ರಯತ್ನಿಸಲಾಗುತ್ತಿದೆ.
9 ದಿನಗಳ ಕತ್ತಲ ನಂತರ ಲಭಿಸಿತು ಜೀವದಾನ
ಈ ಗ್ರೂಪ್ ನೀಡಿದ ನಿಖರ ಬ್ಲೂಪ್ರಿಂಟ್ ಮಾಹಿತಿಯನ್ನೇ ಆಧಾರವಾಗಿಟ್ಟುಕೊಂಡು ನೇಪಾಳ ಸೇನೆ ಮತ್ತು ಸಶಸ್ತ್ರ ಪೊಲೀಸ್ ಪಡೆ ಕಾರ್ಯಾಚರಣೆ ನಡೆಸಿವೆ. ‘ಅಪ್ಪರ್ ತ್ರಿಶೂಲಿ 3A’ ಜಲವಿದ್ಯುತ್ ಯೋಜನೆಯ ಸುಮಾರು 22 ಲಕ್ಷ ಟನ್ ಕೆಸರು ತುಂಬಿದ್ದ ಸುರಂಗದಿಂದ, ಘಟನೆ ನಡೆದ ಒಂಬತ್ತು ದಿನಗಳ ನಂತರ ಇಬ್ಬರು ಕಾರ್ಮಿಕರನ್ನು (ಸಂಜಯ್ ಶಾ ಮತ್ತು ಕಬೀರ್ ಮಹರ್ಜನ್) ಜೀವಂತವಾಗಿ ಹೊರತೆಗೆಯಲಾಗಿದೆ. ಸುರಂಗದೊಳಗೆ ಆಮ್ಲಜನಕದ ಪಾಕೆಟ್‌ನಲ್ಲಿದ್ದ ಕಾರಣ ಅವರು ಬದುಕಿ ಉಳಿಯಲು ಸಾಧ್ಯವಾಗಿದೆ.
ಸದ್ಯ ಸ್ಥಳದಲ್ಲಿ ಹೆಲಿಕಾಪ್ಟರ್, ಡ್ರೋನ್ ಮತ್ತು ಬೃಹತ್ ಜೆಸಿಬಿ ಯಂತ್ರಗಳೊಂದಿಗೆ ಕಾರ್ಯಾಚರಣೆ ಮುಂದುವರಿದಿದ್ದು, ಈ ವಾಟ್ಸ್ಯಾಪ್ ಗ್ರೂಪ್ ಕ್ಷಣಕ್ಷಣಕ್ಕೂ ರಕ್ಷಣಾ ಪಡೆಗಳಿಗೆ ಮಾರ್ಗದರ್ಶಕ ದೀಪವಾಗಿ ಕೆಲಸ ಮಾಡುತ್ತಿದೆ.
