ನೇಪಾಳದಲ್ಲಿ ಸಂಭವಿಸಿದ ಭೀಕರ ಪ್ರವಾಹದಲ್ಲಿ ಶಾಲೆಯೊಂದು ಕೊಚ್ಚಿ ಹೋಗುವ ಕೇವಲ 10 ನಿಮಿಷಗಳ ಮೊದಲು 900 ವಿದ್ಯಾರ್ಥಿಗಳನ್ನು ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸುವ ಮೂಲಕ ಮುಖ್ಯಶಿಕ್ಷಕರೊಬ್ಬರು ಅಷ್ಟೂ ಮಕ್ಕಳ ಪ್ರಾಣ ಉಳಿಸಿದ ಸಾಹಸಗಾಥೆ ಬೆಳಕಿಗೆ ಬಂದಿದೆ.
ನುವಾಕೋಟ್ ಜಿಲ್ಲೆಯ ತ್ರಿಭುವನ್ ತ್ರಿಶೂಲಿ ಪ್ರೌಢಶಾಲೆಯ ಮುಖ್ಯಶಿಕ್ಷಕ ರಾಜೇಂದ್ರ ದಾವಾಡಿ ಅವರು ಈ ಸಮಯಪ್ರಜ್ಞೆ ಮೆರೆದವರು. ಬೆಳಿಗ್ಗೆ 9:10ರ ಸುಮಾರಿಗೆ ಪ್ರವಾಹದ ಮುನ್ಸೂಚನೆ ನೀಡುವ ನಾಲ್ಕು ಕರೆಗಳು ಬಂದ ತಕ್ಷಣವೇ ಎಚ್ಚೆತ್ತ ಅವರು, ವಿದ್ಯಾರ್ಥಿಗಳನ್ನು ಎತ್ತರದ ಪ್ರದೇಶಗಳಿಗೆ ಓಡಿಹೋಗುವಂತೆ ಸೂಚಿಸಿದರು. ಅಲ್ಲದೆ, ಮಕ್ಕಳನ್ನು ಕರೆತರಲು ಬರುತ್ತಿದ್ದ ಶಾಲಾ ಬಸ್‌ಗಳನ್ನು ಹಿಂದಿರುಗುವಂತೆ ಆದೇಶಿಸಿದರು. “ನಾವು ತ್ವರಿತ ನಿರ್ಧಾರ ತೆಗೆದುಕೊಳ್ಳದಿದ್ದರೆ, ಕೇವಲ 10 ನಿಮಿಷ ವಿಳಂಬವಾಗಿದ್ದರೂ, ವಿದ್ಯಾರ್ಥಿಗಳು ಮತ್ತು ನಾನು ಇಂದು ನಿಮ್ಮೊಡನೆ ಮಾತನಾಡಲು ಬದುಕಿರುತ್ತಿರಲಿಲ್ಲ,” ಎಂದು ದಾವಾಡಿ ವಿವರಿಸಿದ್ದಾರೆ.
ಕೆಲವೇ ನಿಮಿಷಗಳ ಅಂತರದಲ್ಲಿ ನಾಲ್ಕು ವಿಭಿನ್ನ ವ್ಯಕ್ತಿಗಳಿಂದ ಎಚ್ಚರಿಕೆ ಕರೆಗಳು ಬಂದಿದ್ದವು. “ಓರ್ವ ಪೋಷಕರು ಶಾಲೆಗೆ ಧಾವಿಸಿ, ‘ದೊಡ್ಡ ಪ್ರವಾಹ ಬರುತ್ತಿದೆ, ನನ್ನ ಮಗಳನ್ನು ಕರೆದೊಯ್ಯಲು ಬಂದಿದ್ದೇನೆ’ ಎಂದಾಗ ಪರಿಸ್ಥಿತಿಯ ಗಂಭೀರತೆ ಅರಿವಾಯಿತು. ಬಲವಾದ ಕಾರಣವಿಲ್ಲದೆ ಪೋಷಕರು ಹೀಗೆ ಧಾವಿಸಿ ಬರುವುದಿಲ್ಲ. ಹೀಗಾಗಿ ಒಂದು ಕ್ಷಣವೂ ವಿಳಂಬ ಮಾಡದೆ ಮಕ್ಕಳನ್ನು ಸ್ಥಳಾಂತರಿಸಲು ನಿರ್ಧರಿಸಿದೆ. ಒಂದು ವೇಳೆ ಪ್ರವಾಹ ಬರದೇ ಇದ್ದರೂ ಕೇವಲ ಒಂದು ದಿನದ ತರಗತಿ ನಷ್ಟವಾಗುತ್ತಿತ್ತಷ್ಟೆ. ಇಷ್ಟು ಜೀವಗಳನ್ನು ಉಳಿಸಿದೆವು ಎಂಬ ಹೆಮ್ಮೆ ನನಗಿದೆ,” ಎಂದು ಅವರು ತಿಳಿಸಿದ್ದಾರೆ.
ಪ್ರವಾಹದ ರಭಸಕ್ಕೆ ಶಾಲಾ ಕಟ್ಟಡವು ಸಂಪೂರ್ಣವಾಗಿ ಮಣ್ಣು ಮತ್ತು ಅವಶೇಷಗಳಡಿ ಸಿಲುಕಿದೆ. ನದಿಯಿಂದ ಕೇವಲ 100 ಮೀಟರ್ (328 ಅಡಿ) ದೂರದಲ್ಲಿದ್ದ ಹಾಸ್ಟೆಲ್ ಕಟ್ಟಡವು ಕ್ಷಣಾರ್ಧದಲ್ಲಿ ಜಲಸಮಾಧಿಯಾಯಿತು. ನೇಪಾಳದಲ್ಲಿ ಸಂಭವಿಸಿದ ಈ ಜಲಪ್ರಳಯದಲ್ಲಿ ಈವರೆಗೆ ಕನಿಷ್ಠ 794 ಜನರು ಮೃತಪಟ್ಟಿದ್ದು, 2,426 ಜನರು ನಾಪತ್ತೆಯಾಗಿದ್ದಾರೆ.
16 ವರ್ಷದ ವಿದ್ಯಾರ್ಥಿನಿ ಯುನಿಶಾ ಅಮಾತ್ಯ, ಪ್ರವಾಹ ಅಪ್ಪಳಿಸುವ ಕೇವಲ 10 ಸೆಕೆಂಡುಗಳ ಮೊದಲು ತನ್ನ ಸ್ನೇಹಿತರೊಂದಿಗೆ ಪ್ರಾಣಾಪಾಯದಿಂದ ಪಾರಾಗಿದ್ದಾಳೆ. “ಶಿಕ್ಷಕರು ಬಂದು ಪ್ರವಾಹದ ಬಗ್ಗೆ ತಿಳಿಸಿ ಮನೆಗೆ ಹೋಗಲು ಹೇಳಿದಾಗ ಅನೇಕರಿಗೆ ಗಂಭೀರತೆ ಅರಿವಾಗಿರಲಿಲ್ಲ. ಶಾಲೆಯ ಹಿಂಭಾಗದ ಕಿರಿದಾದ ಮೆಟ್ಟಿಲುಗಳ ಮೂಲಕ ಬೆಟ್ಟವನ್ನು ಹತ್ತಿ ನಾವು ಪಾರಾದೆವು. ಆತುರದಲ್ಲಿ ತಪ್ಪಿಸಿಕೊಳ್ಳುವಾಗ ಶೂ ಗ್ರಿಪ್ ಇಲ್ಲದಿದ್ದರೆ ನಾನು ಕೆಳಗೆ ಬೀಳುತ್ತಿದ್ದೆ. ಬೇರೆ ದಾರಿಯಲ್ಲಿ ಹೋದವರು ಪ್ರವಾಹಕ್ಕೆ ಕೊಚ್ಚಿಹೋದರು. ನಮ್ಮ ಕಣ್ಣೆದುರೇ ಇಡೀ ಮಾರುಕಟ್ಟೆ ಕೊಚ್ಚಿಹೋಯಿತು,” ಎಂದು ಆಕೆ ಆತಂಕದ ಕ್ಷಣಗಳನ್ನು ಬಿಚ್ಚಿಟ್ಟಿದ್ದಾಳೆ.
ರಸ್ತೆ ಸಂಪರ್ಕ ಕಡಿತಗೊಂಡಿದ್ದರಿಂದ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ನೆರೆಯ ಹಳ್ಳಿಯೊಂದರಲ್ಲಿ ಎರಡು ರಾತ್ರಿ ಕಳೆದಿದ್ದಾರೆ. ನಂತರ ಮುಖ್ಯಶಿಕ್ಷಕರು ಹಾಗೂ ಯುನಿಶಾಳನ್ನು ಹೆಲಿಕಾಪ್ಟರ್ ಮೂಲಕ ರಕ್ಷಿಸಿ ಮನೆಗೆ ತಲುಪಿಸಲಾಗಿದೆ.
ಯುನಿಶಾಳ ಪೋಷಕರಾದ ಯುವರಾಜ್ ಅಮಾತ್ಯ ಮತ್ತು ಸಬೀನಾ ಕುಮಾರಿ ಶ್ರೇಷ್ಠ ಅವರು ಮಗಳಿಗಾಗಿ ಪಟ್ಟ ಪಾಡು ಅಷ್ಟಿಷ್ಟಲ್ಲ. ಪ್ರವಾಹದ ಸುದ್ದಿ ತಿಳಿದ ತಕ್ಷಣ ತಂದೆ ಯುವರಾಜ್ ಶಾಲೆಗೆ ಧಾವಿಸಿದ್ದರು. ಆದರೆ ತ್ರಿಶೂಲಿ ಬಜಾರ್ ಸಂಪೂರ್ಣವಾಗಿ ಕೊಚ್ಚಿಹೋಗಿದ್ದನ್ನು ಕಂಡು ಮಗಳು ಬದುಕುಳಿದಿರುವ ಬಗ್ಗೆ ಭರವಸೆಯನ್ನೇ ಕಳೆದುಕೊಂಡಿದ್ದರು. ಸರಿಸುಮಾರು ಒಂದು ಗಂಟೆಯ ಬಳಿಕ ಮಗಳೊಂದಿಗೆ ಫೋನ್ ಸಂಪರ್ಕ ಸಾಧಿಸಿದಾಗ ಅವರ ಜೀವಕ್ಕೆ ಜೀವ ಬಂದಂತಾಯಿತು. ಮೂರು ದಿನಗಳ (ಶುಕ್ರವಾರ) ಬಳಿಕ ಮಗಳನ್ನು ನೋಡಿ ಪೋಷಕರು ನಿಟ್ಟುಸಿರು ಬಿಟ್ಟಿದ್ದಾರೆ.
ಪ್ರಾಣಾಪಾಯದಿಂದ ಪಾರಾಗಿರುವ ಯುನಿಶಾಗೆ ಈಗ ತನ್ನ ಮುಂದಿನ ವಿದ್ಯಾಭ್ಯಾಸದ ಬಗ್ಗೆ ಚಿಂತೆ ಶುರುವಾಗಿದೆ. ಈ ಬಗ್ಗೆ ಮಾತನಾಡಿರುವ ಮುಖ್ಯಶಿಕ್ಷಕ ದಾವಾಡಿ, “ಸೈರನ್ ಮತ್ತು ಮುನ್ಸೂಚನಾ ಎಚ್ಚರಿಕೆ ವ್ಯವಸ್ಥೆಗಳು ಇದ್ದಿದ್ದರೆ ಸ್ಥಳೀಯರು ಇನ್ನೂ ವೇಗವಾಗಿ ಸ್ಪಂದಿಸಲು ಸಾಧ್ಯವಾಗುತ್ತಿತ್ತು. ಆದರೆ, ನನ್ನ ಆ ಕ್ಷಣದ ನಿರ್ಧಾರವು ದೊಡ್ಡ ದುರಂತವನ್ನು ತಪ್ಪಿಸಿದೆ” ಎಂದು ಹೇಳಿದ್ದಾರೆ.
