ಜರ್ಮನಿ ಮೂಲಕ ಇತರೆ ದೇಶಗಳಿಗೆ ತೆರಳುವ ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವ ಪ್ರಯಾಣಿಕರಿಗೆ ಜರ್ಮನಿ ಸರ್ಕಾರ ಮಹತ್ವದ ಸೌಲಭ್ಯವೊಂದನ್ನು ಘೋಷಿಸಿದ್ದು, ಇನ್ನು ಮುಂದೆ ಜರ್ಮನಿ ವಿಮಾನ ನಿಲ್ದಾಣಗಳಲ್ಲಿ ‘ವೀಸಾ ರಹಿತ ಟ್ರಾನ್ಸಿಟ್’ (Visa-free transit) ಸೌಲಭ್ಯ ಕಲ್ಪಿಸುವುದಾಗಿ ತಿಳಿಸಿದೆ.
ಜರ್ಮನಿಯ ಛಾನ್ಸಲರ್ ಫ್ರೆಡ್ರಿಕ್ ಮೆರ್ಜ್ (Friedrich Merz) ಅವರ ಭಾರತ ಭೇಟಿಯ (ಜ. 12-13) ಬಳಿಕ ಸೋಮವಾರ ಹೊರಡಿಸಲಾದ ಭಾರತ-ಜರ್ಮನಿ ಜಂಟಿ ಹೇಳಿಕೆಯಲ್ಲಿ ಈ ನಿರ್ಧಾರವನ್ನು ಪ್ರಕಟಿಸಲಾಗಿದೆ. ಮೆರ್ಜ್ ಅವರು ಜರ್ಮನಿಯ ಫೆಡರಲ್ ಛಾನ್ಸಲರ್ ಆಗಿ ಅಧಿಕಾರ ವಹಿಸಿಕೊಂಡ ನಂತರ ಏಷ್ಯಾ ಖಂಡಕ್ಕೆ ಮತ್ತು ಭಾರತಕ್ಕೆ ನೀಡಿದ ಮೊದಲ ಅಧಿಕೃತ ಭೇಟಿ ಇದಾಗಿದೆ.
ಏನಿದು ವೀಸಾ ರಹಿತ ಟ್ರಾನ್ಸಿಟ್?
ಸರಳವಾಗಿ ಹೇಳುವುದಾದರೆ, ಇನ್ನುಮುಂದೆ ಭಾರತೀಯ ಪ್ರಯಾಣಿಕರು ಬೇರೊಂದು ದೇಶಕ್ಕೆ ತೆರಳುವಾಗ ಜರ್ಮನಿಯ ವಿಮಾನ ನಿಲ್ದಾಣಗಳ ಮೂಲಕ ಹಾದುಹೋಗಬೇಕಿದ್ದರೆ (Layover), ಪ್ರತ್ಯೇಕವಾಗಿ ‘ಟ್ರಾನ್ಸಿಟ್ ವೀಸಾ’ ಪಡೆಯುವ ಅಗತ್ಯವಿರುವುದಿಲ್ಲ. ಈ ಕ್ರಮದಿಂದಾಗಿ ಪ್ರಯಾಣಿಕರಿಗೆ ಕಾಗದಪತ್ರಗಳ (Paperwork) ಹೊರೆ ಕಡಿಮೆಯಾಗಲಿದ್ದು, ಪ್ರಯಾಣದ ಪ್ರಕ್ರಿಯೆ ತ್ವರಿತ ಮತ್ತು ಸುಗಮವಾಗಲಿದೆ.
ಇದನ್ನು ಓದಿದ್ದೀರಾ? ಈ ದಿನ ಸಂಪಾದಕೀಯ | ‘ರೋಮಿಯೋ-ಜ್ಯೂಲಿಯೆಟ್ ವಿನಾಯಿತಿ’ ಸುಪ್ರೀಮ್ ಸೂಚನೆ ಯಾಕಾಗಿ ಸೂಕ್ತ?
ಜನರ ನಡುವಿನ ಬಾಂಧವ್ಯ ವೃದ್ಧಿ
ಈ ಹೊಸ ಸೌಲಭ್ಯವು ಕೇವಲ ಪ್ರಯಾಣವನ್ನು ಸುಲಭಗೊಳಿಸುವುದಲ್ಲದೆ, ಉಭಯ ದೇಶಗಳ ಜನರ ನಡುವಿನ ಸಂಪರ್ಕವನ್ನು (People-to-people links) ಮತ್ತಷ್ಟು ಗಾಢವಾಗಿಸಲಿದೆ ಎಂದು ಜಂಟಿ ಹೇಳಿಕೆ ತಿಳಿಸಿದೆ. ಜನರ ನಡುವಿನ ಬಲವಾದ ಬಾಂಧವ್ಯವು ನಮ್ಮ ವ್ಯೂಹಾತ್ಮಕ ಪಾಲುದಾರಿಕೆಯ ಪ್ರಮುಖ ಆಧಾರಸ್ತಂಭವಾಗಿದೆ ಎಂದು ಉಭಯ ನಾಯಕರು ಪುನರುಚ್ಚರಿಸಿದ್ದಾರೆ.
ಶಿಕ್ಷಣ ಮತ್ತು ಕೌಶಲಕ್ಕೆ ಒತ್ತು
ಮಾತುಕತೆಯ ವೇಳೆ ಶಿಕ್ಷಣ ಮತ್ತು ಕೌಶಲ್ಯಾಭಿವೃದ್ಧಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಯಿತು. ಜರ್ಮನಿಯಲ್ಲಿ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚುತ್ತಿರುವುದನ್ನು ಸ್ವಾಗತಿಸಿದ ನಾಯಕರು, ಉನ್ನತ ಶಿಕ್ಷಣ ಸಂಸ್ಥೆಗಳ ನಡುವಿನ ಸಹಯೋಗ, ದ್ವಿಪದವಿ ಕಾರ್ಯಕ್ರಮಗಳ ವಿಸ್ತರಣೆ ಕುರಿತು ಚರ್ಚಿಸಿದರು.
ಜರ್ಮನಿಯ ಆರ್ಥಿಕತೆ, ನಾವೀನ್ಯತೆ ಮತ್ತು ಸಾಂಸ್ಕೃತಿಕ ಕ್ಷೇತ್ರಕ್ಕೆ ಭಾರತೀಯ ಸಮುದಾಯ ನೀಡುತ್ತಿರುವ ಕೊಡುಗೆಯನ್ನು ಇದೇ ವೇಳೆ ಶ್ಲಾಘಿಸಲಾಯಿತು. ಸಂಶೋಧನೆ, ವೃತ್ತಿಪರ ತರಬೇತಿ ಮತ್ತು ಯುವ ವಿನಿಮಯ ಕಾರ್ಯಕ್ರಮಗಳನ್ನು ವಿಸ್ತರಿಸುವ ಮೂಲಕ ಪರಸ್ಪರ ಸಹಕಾರವನ್ನು ಹೆಚ್ಚಿಸಲು ನಿರ್ಧರಿಸಲಾಯಿತು
