ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮಿಚಿಗನ್‌ನ ಫೋರ್ಡ್ ಘಟಕಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ, ವ್ಯಕ್ತಿಯೊಬ್ಬರು ಟೀಕಿಸಿ ಕೂಗಾಡಿದ ಪರಿಣಾಮ ಟ್ರಂಪ್ ಅಸಭ್ಯವಾಗಿ (ಮಧ್ಯದ ಬೆರಳು ತೋರಿಸುವ ಮೂಲಕ) ಪ್ರತಿಕ್ರಿಯಿಸಿದ್ದಾರೆ.
ಮಂಗಳವಾರ ಮಧ್ಯಾಹ್ನ ಟ್ರಂಪ್ ಅವರು ಡಿಯರ್‌ಬೋರ್ನ್‌ನಲ್ಲಿರುವ ಫೋರ್ಡ್‌ನ ರಿವರ್ ರೂಜ್ ಸಂಕೀರ್ಣವನ್ನು ವೀಕ್ಷಿಸುತ್ತಿದ್ದಾಗ ಈ ಘಟನೆ ನಡೆದಿದೆ. ಟ್ರಂಪ್ ಅವರನ್ನು ಉದ್ದೇಶಿಸಿ ವ್ಯಕ್ತಿಯೊಬ್ಬರು “ನೀವು ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಎಸಗುವವರ ರಕ್ಷಕ” ಎಂದು ಜೋರಾಗಿ ಕೂಗಿದ್ದಾರೆ. ಇದಕ್ಕೆ ಪ್ರತಿಯಾಗಿ ಅಧ್ಯಕ್ಷರು ಕೋಪಗೊಂಡು ಅಸಭ್ಯ ಸನ್ನೆ ಮಾಡಿದ್ದಾರೆ ಎನ್ನಲಾದ ವಿಡಿಯೊವನ್ನು ಟಿಎಂಝಡ್ (TMZ) ಸುದ್ದಿಸಂಸ್ಥೆ ಹಂಚಿಕೊಂಡಿದ್ದು, ಅದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಸುಮಾರು 15 ಸೆಕೆಂಡುಗಳ ಈ ವಿಡಿಯೊದಲ್ಲಿ, ಟ್ರಂಪ್ ಅವರು ಮೇಲಿನ ರೈಲಿಂಗ್ ನಿಂದ ಕೆಳಗೆ ನೋಡುತ್ತಿದ್ದರೆ, ಫೋರ್ಡ್ ಘಟಕದ ಮಹಡಿಯಿಂದ ವ್ಯಕ್ತಿಯೊಬ್ಬರು ಜೋರಾಗಿ ಕೂಗುತ್ತಿರುವುದು ಕೇಳಿಸುತ್ತದೆ. ಪ್ರತ್ಯಕ್ಷದರ್ಶಿಗಳ ಪ್ರಕಾರ ಟ್ರಂಪ್ ಕೂಡ ಆ ವ್ಯಕ್ತಿಗೆ ಬೈಗುಳದ ಮೂಲಕವೇ ಉತ್ತರಿಸಿದ್ದಾರೆ ಎನ್ನಲಾಗಿದೆ.
ಇದನ್ನು ಓದಿದ್ದೀರಾ? ‘ಟ್ರಂಪ್‌ಗೆ ಆಕರ್ಷಕ ಎಳೆಯರೆಂದರೆ ಪಂಚಪ್ರಾಣ’; ನಾಸರ್‌ಗೆ ಎಪ್‌ಸ್ಟೀನ್ ಬರೆದಿದ್ದ ಸ್ಫೋಟಕ ಸಂಗತಿ ಬಹಿರಂಗ!
ಶ್ವೇತಭವನದ ಸಮರ್ಥನೆ
ಘಟನೆಯ ಬಗ್ಗೆ ಪ್ರತಿಕ್ರಿಯಿಸಿರುವ ಶ್ವೇತಭವನದ ಸಂಪರ್ಕ ನಿರ್ದೇಶಕ ಸ್ಟೀವನ್ ಚೆಯುಂಗ್, ಟ್ರಂಪ್ ಮಧ್ಯದ ಬೆರಳು ತೋರಿಸಿದ್ದಾರೆಯೇ ಎಂಬುದನ್ನು ಸ್ಪಷ್ಟಪಡಿಸಿಲ್ಲ. ಆದರೆ, “ಹುಚ್ಚನೊಬ್ಬ ರೊಚ್ಚಿಗೆದ್ದು ಅಸಭ್ಯವಾಗಿ ಕಿರುಚಾಡುತ್ತಿದ್ದಾಗ, ಅದಕ್ಕೆ ಸೂಕ್ತ ಮತ್ತು ಸ್ಪಷ್ಟವಾದ ಪ್ರತಿಕ್ರಿಯೆಯನ್ನೇ ನೀಡಲಾಗಿದೆ,” ಎಂದು ಅವರು ‘ಗಾರ್ಡಿಯನ್’ ಪತ್ರಿಕೆಗೆ ತಿಳಿಸಿದ್ದಾರೆ.
ಇದೇ ವೇಳೆ ಫೋರ್ಡ್ ಕಂಪನಿಯ ವಕ್ತಾರರು ಮಾತನಾಡಿ, “ನಮ್ಮ ಉದ್ಯೋಗಿಗಳ ಬಗ್ಗೆ ನಮಗೆ ಹೆಮ್ಮೆಯಿದೆ. ಆದರೆ ಘಟಕದ ಒಳಗೆ ಯಾರಾದರೂ ಅನುಚಿತವಾಗಿ ವರ್ತಿಸುವುದನ್ನು ನಾವು ಒಪ್ಪುವುದಿಲ್ಲ. ಅಂತಹ ಸಂದರ್ಭಗಳಲ್ಲಿ ಕ್ರಮ ಕೈಗೊಳ್ಳಲು ನಮ್ಮದೇ ಆದ ಪ್ರಕ್ರಿಯೆ ಇದೆ,” ಎಂದು ಹೇಳಿದ್ದಾರೆ.
ಎಪ್‌ಸ್ಟೀನ್ ಕಡತಗಳ ನಂಟು
ಕುಖ್ಯಾತ ಉದ್ಯಮಿ ಮತ್ತು ಲೈಂಗಿಕ ಕಳ್ಳಸಾಗಣೆದಾರ ಜೆಫ್ರಿ ಎಪ್‌ಸ್ಟೀನ್ ಪ್ರಕರಣಕ್ಕೆ ಸಂಬಂಧಿಸಿದ ಕಡತಗಳನ್ನು ಬಿಡುಗಡೆ ಮಾಡುವಂತೆ ಟ್ರಂಪ್ ಆಡಳಿತದ ಮೇಲೆ ಒತ್ತಡ ಹೆಚ್ಚುತ್ತಿರುವ ಸಂದರ್ಭದಲ್ಲೇ ಈ ಘಟನೆ ನಡೆದಿದೆ. ಡಿಸೆಂಬರ್ ಮಧ್ಯದ ವೇಳೆಗೆ ಎಪ್‌ಸ್ಟೀನ್ ಕಡತಗಳನ್ನು ಪೂರ್ಣವಾಗಿ ಬಿಡುಗಡೆ ಮಾಡಬೇಕೆಂಬ ಫೆಡರಲ್ ಕಾನೂನು ಇದ್ದರೂ, ನ್ಯಾಯಾಂಗ ಇಲಾಖೆ ಇದುವರೆಗೆ ಶೇ. 1ಕ್ಕಿಂತ ಕಡಿಮೆ ಕಡತಗಳನ್ನು ಮಾತ್ರ ಬಿಡುಗಡೆ ಮಾಡಿದೆ.
ಅಮೆರಿಕದ ಅಟಾರ್ನಿ ಜನರಲ್ ಪಾಮ್ ಬೊಂಡಿ ಅವರು ಸಂತ್ರಸ್ತರ ಗುರುತು ರಕ್ಷಿಸಲು ಈ ವಿಳಂಬವಾಗುತ್ತಿದೆ ಎಂದು ಸಮರ್ಥಿಸಿಕೊಂಡಿದ್ದಾರೆ. ಆದರೆ, ಬಿಡುಗಡೆಯಾದ ಕಡತಗಳಲ್ಲಿ ಹೆಚ್ಚಿನ ಮಾಹಿತಿಯನ್ನು ಮರೆಮಾಚಲಾಗಿರುವುದು ಡೆಮಾಕ್ರೆಟಿಕ್ ಸದಸ್ಯರು ಮತ್ತು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
