ಜಗತ್ತಿನ ಸೂಪರ್ ಪವರ್‌ಗಳಾದ ಅಮೆರಿಕ ಮತ್ತು ಚೀನಾ ದೇಶಗಳ ಬಗ್ಗೆ ಜಾಗತಿಕ ಮಟ್ಟದಲ್ಲಿ ಜನರ ದೃಷ್ಟಿಕೋನ ಭಾರಿ ಪ್ರಮಾಣದಲ್ಲಿ ಬದಲಾಗುತ್ತಿದೆ ಎಂದು ‘ಪ್ಯೂ ರಿಸರ್ಚ್ ಸೆಂಟರ್’ನ ಸಮೀಕ್ಷಾ ವರದಿ ಹೇಳಿದೆ.
ಈ ವರ್ಷದ ಆರಂಭದಲ್ಲಿ ನಡೆಸಲಾದ ಬೃಹತ್ ಸಮೀಕ್ಷೆಯಲ್ಲಿ; ಅಮೆರಿಕ ಮತ್ತು ಅದರ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ಗಿಂತ ಚೀನಾ ಮತ್ತು ಅಲ್ಲಿನ ಅಧ್ಯಕ್ಷ ಕ್ಷಿ ಜಿನ್‌ಪಿಂಗ್ ಅವರ ಮೇಲೆಯೇ ಜಗತ್ತಿನ ಬಹುತೇಕ ರಾಷ್ಟ್ರಗಳು ಹೆಚ್ಚಿನ ವಿಶ್ವಾಸ ಮತ್ತು ಸಕಾರಾತ್ಮಕ ಧೋರಣೆಯನ್ನು ವ್ಯಕ್ತಪಡಿಸಿವೆ ಎಂಬುದು ಬಹಿರಂಗಗೊಂಡಿದೆ. ಇದು ಜಾಗತಿಕ ರಾಜಕೀಯದಲ್ಲಿ ಆಗುತ್ತಿರುವ ದೊಡ್ಡ ಬದಲಾವಣೆಯ ಮುನ್ಸೂಚನೆಯನ್ನು ಸೂಚಿಸಿದೆ.
ಪ್ಯೂ ರಿಸರ್ಚ್ ಸಂಸ್ಥೆಯು ಜಗತ್ತಿನಾದ್ಯಂತ ಒಟ್ಟು 36 ದೇಶಗಳ ಸುಮಾರು 42,151 ವಯಸ್ಕ ನಾಗರಿಕರ ಅಭಿಪ್ರಾಯವನ್ನು ಪಡೆದು ಈ ವರದಿಯನ್ನು ಸಿದ್ಧಪಡಿಸಿದೆ. ಈ ಸಮೀಕ್ಷೆಯ ಇತಿಹಾಸದಲ್ಲೇ ಇದೇ ಮೊದಲ ಬಾರಿಗೆ, 36 ದೇಶಗಳ ಪೈಕಿ 25 ದೇಶಗಳು ಚೀನಾದ ಪರವಾಗಿ ತಮ್ಮ ಒಲವನ್ನು ತೋರಿಸಿವೆ. ಕೇವಲ ಆರು ದೇಶಗಳು ಮಾತ್ರ ಚೀನಾಕ್ಕಿಂತ ಅಮೆರಿಕವನ್ನೇ ಹೆಚ್ಚು ನಂಬಿಕಾರ್ಹವಾಗಿ ನೋಡಿವೆ.
ಭಾರತ, ಜಪಾನ್, ದಕ್ಷಿಣ ಕೊರಿಯಾ, ಇಸ್ರೇಲ್, ಪೋಲೆಂಡ್ ಮತ್ತು ಫಿಲಿಪೈನ್ಸ್ ದೇಶಗಳು ಈ ಪಟ್ಟಿಯಲ್ಲಿದ್ದು, ಇವೆಲ್ಲವೂ ಅಮೆರಿಕದ ಸಾಂಪ್ರದಾಯಿಕ ಮಿತ್ರರಾಷ್ಟ್ರಗಳಾಗಿವೆ ಎಂಬುದು ಗಮನಾರ್ಹ. ಆದರೆ, ಅಮೆರಿಕದ ತೀರ ಹತ್ತಿರದ ನೆರೆಹೊರೆಯ ದೇಶಗಳಾದ ಕೆನಡಾ ಮತ್ತು ಮೆಕ್ಸಿಕೋ ರಾಷ್ಟ್ರಗಳು ಅಮೆರಿಕಕ್ಕಿಂತ ಚೀನಾದ ಕಡೆಗೇ ಹೆಚ್ಚು ಒಲವು ತೋರುತ್ತಿವೆ. ಇದು ಅಮೆರಿಕಕ್ಕೆ ಭಾರೀ ಹಿನ್ನಡೆಯಾಗಿದೆ.
ನಾಯಕರ ವಿಶ್ವಾಸಾರ್ಹತೆಯನ್ನು ಗಮನಿಸಿದರೆ, ಜಾಗತಿಕ ವ್ಯವಹಾರಗಳಲ್ಲಿ ಸೂಕ್ತ ನಿರ್ಧಾರಗಳನ್ನು ತೆಗೆದುಕೊಳ್ಳುವ ವಿಚಾರದಲ್ಲಿ ಡೊನಾಲ್ಡ್ ಟ್ರಂಪ್ ಮತ್ತು ಕ್ಷಿ ಜಿನ್‌ಪಿಂಗ್ ಇಬ್ಬರ ಮೇಲೂ ಜಗತ್ತಿನಾದ್ಯಂತ ಹೆಚ್ಚಿನ ವಿಶ್ವಾಸವೇನೂ ಕಂಡುಬಂದಿಲ್ಲ. ಆದರೆ, ಇಬ್ಬರ ನಡುವಿನ ಹೋಲಿಕೆಯಲ್ಲಿ ಕ್ಷಿ ಜಿನ್‌ಪಿಂಗ್ ಅವರು ಟ್ರಂಪ್‌ಗಿಂತ ಮುಂದಿದ್ದಾರೆ. ಕೆನಡಾ, ಮೆಕ್ಸಿಕೋ ಹಾಗೂ ಯುರೋಪಿನ ಪ್ರಮುಖ ರಾಷ್ಟ್ರಗಳಾದ ಫ್ರಾನ್ಸ್, ಜರ್ಮನಿ ಮತ್ತು ಯುನೈಟೆಡ್ ಕಿಂಗ್‌ಡಮ್ ಒಳಗೊಂಡಂತೆ 22 ದೇಶಗಳಲ್ಲಿ ಟ್ರಂಪ್‌ಗಿಂತ ಜಿನ್‌ಪಿಂಗ್ ಅವರ ಮೇಲೆಯೇ ಹೆಚ್ಚು ನಂಬಿಕೆ ವ್ಯಕ್ತವಾಗಿದೆ. ಜಿನ್‌ಪಿಂಗ್ ಅವರಿಗೆ ಅತ್ಯಂತ ಹೆಚ್ಚಿನ ಬೆಂಬಲ ಪಾಕಿಸ್ತಾನದಿಂದ ಸಿಕ್ಕಿದ್ದರೆ, ಜಪಾನ್‌ನಲ್ಲಿ ಅತ್ಯಂತ ಕಡಿಮೆ ನಂಬಿಕೆ ವ್ಯಕ್ತವಾಗಿದೆ. ಅದೇ ರೀತಿ, ಟ್ರಂಪ್ ಅವರಿಗೆ ಫಿಲಿಪೈನ್ಸ್‌ನಲ್ಲಿ ಅತಿ ಹೆಚ್ಚು ಬೆಂಬಲ ವ್ಯಕ್ತವಾಗಿದ್ದರೆ, ವೆಸ್ಟ್ ಬ್ಯಾಂಕ್ ಮತ್ತು ಪೂರ್ವ ಜೆರುಸಲೇಂನಲ್ಲಿ ಕೇವಲ 4%ರಷ್ಟು ಜನರು ಮಾತ್ರ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ತನ್ನ ನಾಗರಿಕರ ವೈಯಕ್ತಿಕ ಸ್ವಾತಂತ್ರ್ಯವನ್ನು ಗೌರವಿಸುವ ವಿಷಯದಲ್ಲಿ ಮಾತ್ರ ಇಂದಿಗೂ ಜಗತ್ತಿನ ಜನರು ಚೀನಾಕ್ಕಿಂತ ಅಮೆರಿಕವನ್ನೇ ಉತ್ತಮವೆಂದು ಭಾವಿಸುತ್ತಿದ್ದಾರೆ. ಆದಾಗ್ಯೂ, ಕಳೆದ ಐದು ವರ್ಷಗಳಲ್ಲಿ ಈ ವಿಷಯದಲ್ಲೂ ಅಮೆರಿಕದ ಮೇಲಿದ್ದ ಭರವಸೆ ತೀವ್ರವಾಗಿ ಕುಸಿದಿದೆ. ಸ್ವೀಡನ್, ಕೆನಡಾ, ಫ್ರಾನ್ಸ್ ಮತ್ತು ದಕ್ಷಿಣ ಕೊರಿಯಾದಂತಹ ದೇಶಗಳಲ್ಲಿ ಅಮೆರಿಕದ ಮೇಲಿದ್ದ ನಂಬಿಕೆ 25% ರಷ್ಟು ಕುಸಿದಿದೆ.
ಇನ್ನು, ಬೇರೆ ದೇಶಗಳ ಆಂತರಿಕ ವ್ಯವಹಾರಗಳಲ್ಲಿ ಹಸ್ತಕ್ಷೇಪ ಮಾಡುವ ವಿಚಾರದಲ್ಲಿ ಅಮೆರಿಕವೇ ಅತ್ಯಂತ ಹೆಚ್ಚು ಹಸ್ತಕ್ಷೇಪ ಮಾಡುತ್ತದೆ ಎಂದು ಜಗತ್ತಿನ 75%ರಷ್ಟು ಜನರು ನಂಬಿದ್ದಾರೆ.
ಇತ್ತೀಚಿನ ಗ್ಯಾಲಪ್ ಸಮೀಕ್ಷೆಯೂ ಕೂಡ ಜಾಗತಿಕ ನಾಯಕತ್ವದ ಅನುಮೋದನೆಯಲ್ಲಿ ಚೀನಾವು ಅಮೆರಿಕವನ್ನು ಹಿಂದಿಕ್ಕಿರುವುದನ್ನು ಖಚಿತಪಡಿಸಿದೆ. ಸೂಪರ್ ಪವರ್‌ಗಳ ಬಗೆಗಿನ ಜಾಗತಿಕ ದೃಷ್ಟಿಕೋನ ಈಗ ವೇಗವಾಗಿ ಬದಲಾಗುತ್ತಿದೆ ಎಂಬುದನ್ನು ಈ ವರದಿಗಳು ಸ್ಪಷ್ಟವಾಗಿ ಸೂಚಿಸಿವೆ.
