ವಿಜಯಪುರ ಜಿಲ್ಲೆಯ ಇಂಡಿ ತಾಲೂಕಿನ ರೈತ ಮಹಿಳೆ ರಾಜಶ್ರೀ ಅನಂತ ಜೈನ್ ಜಪಾನ್ ಮೂಲದ ಅತ್ಯಂತ ದುಬಾರಿ ಮಿಯಾಝಕಿ ತಳಿಯ ಮಾವಿನ ಹಣ್ಣುಗಳನ್ನು ಯಶಸ್ವಿಯಾಗಿ ಬೆಳೆದು ಗಮನ ಸೆಳೆದಿದ್ದಾರೆ. ತಮ್ಮ ತೋಟದಲ್ಲಿ ಬೆಳೆದ ಈ ವಿಶಿಷ್ಟ ಮಾವಿನ ಹಣ್ಣುಗಳನ್ನು ಜಿಲ್ಲಾ ಉಸ್ತುವಾರಿ ಸಚಿವ ಎಂ ಬಿ ಪಾಟೀಲ ಅವರಿಗೆ ಉಡುಗೊರೆಯಾಗಿ ನೀಡಿ ಸಂತೋಷ ಹಂಚಿಕೊಂಡಿದ್ದಾರೆ.
ಮಿಯಾಝಕಿ ಮಾವು ವಿಶ್ವದಲ್ಲೇ ಅತಿ ದುಬಾರಿ ಮಾವಿನ ತಳಿಗಳಲ್ಲೊಂದು ಎಂದು ಪರಿಗಣಿಸಲಾಗುತ್ತದೆ. ಕೆಜಿಗೆ ಲಕ್ಷ ರೂ. ವರೆಗೂ ಬೆಲೆ ಪಡೆಯುವ ಈ ಹಣ್ಣು ಬೆಳೆಸಲು ಹೆಚ್ಚಿನ ಕಾಳಜಿ, ತಾಪಮಾನ ನಿಯಂತ್ರಣ ಹಾಗೂ ವಿಶೇಷ ಪೋಷಕಾಂಶಗಳ ಅಗತ್ಯವಿದೆ. ಇದನ್ನೇ ಸವಾಲಾಗಿ ಸ್ವೀಕರಿಸಿದ ರಾಜಶ್ರೀ ಜೈನ್, ಆಂಧ್ರ ಪ್ರದೇಶದ ರಾಜಮಂಡ್ರಿಯಿಂದ ಒಂದು ಸಸಿಗೆ ₹10 ಸಾವಿರದಂತೆ 25 ಗಿಡಗಳನ್ನು ಖರೀದಿಸಿ ಸುಮಾರು ₹2.5 ಲಕ್ಷ ಹೂಡಿಕೆ ಮಾಡಿ ತೋಟವನ್ನು ಆರಂಭಿಸಿದ್ದಾರೆ ಎಂದು ಸಚಿವರು ತಿಳಿಸಿದ್ದಾರೆ.
ಇದನ್ನೂ ಓದಿ> ವಿಜಯಪುರ | ಓದುವುದರ ಜತೆಗೆ ಸಂಪಾದನೆ: ಮಹಿಳಾ ವಿವಿಯ ವಿನೂತನ ಯೋಜನೆ
ಸಮರ್ಪಕ ಸಂರಕ್ಷಣೆ, ನೀರಾವರಿ ಹಾಗೂ ತೋಟಗಾರಿಕಾ ತಂತ್ರಜ್ಞಾನ ಬಳಸಿ ಬೆಳೆದ ಗಿಡಗಳು ಈಗ ಉತ್ತಮ ಫಲ ನೀಡುತ್ತಿವೆ. ಇದರ ಮೂಲಕ ಲಕ್ಷಾಂತರ ರೂಪಾಯಿ ಆದಾಯ ಸಾಧ್ಯತೆ ಕಂಡುಬಂದಿದ್ದು, ರೈತರಿಗೆ ಹೊಸ ದಾರಿ ತೋರಿಸಿದ್ದಾರೆ ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು.
ಕೃಷಿಯನ್ನು ಉದ್ಯಮದ ರೂಪಕ್ಕೆ ತರಬೇಕೆಂಬ ಆಶಯಕ್ಕೆ ಇಂತಹ ಪ್ರಯತ್ನಗಳು ಬಲ ನೀಡುತ್ತಿವೆ. ರಾಜಶ್ರೀ ಜೈನ್ ಅವರ ಸಾಧನೆ ಸ್ಥಳೀಯ ರೈತರಿಗೂ ಪ್ರೇರಣೆಯಾಗಿದ್ದು, ಬಸವನಾಡಿನಲ್ಲಿ ಹೊಸ ತಳಿಗಳ ತೋಟಗಾರಿಕೆಗೆ ಉತ್ತೇಜನ ನೀಡಿದೆ ಎಂದು ಸಚಿವರು ತಿಳಿಸಿದರು. ಈ ಸಂದರ್ಭದಲ್ಲಿ ಕಾಂಗ್ರೆಸ್ ಮಹಿಳಾ ಘಟಕದ ಜಿಲ್ಲಾ ಅಧ್ಯಕ್ಷೆ, ಕಾಂಗ್ರೆಸ್ ಕಾರ್ಯಕರ್ತರು ಉಪಸ್ಥಿತರಿದ್ದರು.
