ವೈದ್ಯರು ಸೇರಿ ರಚಿಸಿರುವ ಗಾನ ವೈದ್ಯಲೋಕ ತಂಡವು ತನ್ನ 5ನೇ ವಾರ್ಷಿಕೋತ್ಸವದ ಅಂಗವಾಗಿ ಮೈಸೂರಿನ ರಾಮಕೃಷ್ಣನಗರದಲ್ಲಿರುವ ರಮಾ ಗೋವಿಂದ ರಂಗಮಂದಿರದಲ್ಲಿ ಭಾನುವಾರ ‘ಎಂದೂ ಮರೆಯದ ಹಾಡು -14ನೇ’ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ಆಯೋಜಿಸಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಗಾನ ವೈದ್ಯಲೋಕ ಸಂಸ್ಥೆಯ ಗೌರವಾಧ್ಯಕ್ಷ ಡಾ. ವೈ.ಡಿ. ರಾಜಣ್ಣ ಮಾತನಾಡಿ, “ತಂಡದ ಎಲ್ಲಾ ಸದಸ್ಯರೂ ವೈದ್ಯರಾಗಿದ್ದು, ಸದಾ ತುರ್ತು ಸೇವೆಯಲ್ಲಿ ನಿರತರಾಗಿರುವುದರಿಂದ ಅವರನ್ನು ಒಂದೇ ವೇದಿಕೆಯಲ್ಲಿ ಸೇರಿಸಿ ತಾಲೀಮು ನಡೆಸುವುದು ದೊಡ್ಡ ಸವಾಲು ಎಂದು ಹೇಳಿದರು. ಇಂತಹ ಸವಾಲುಗಳ ನಡುವೆಯೇ ಸಂಸ್ಥೆ ನಾಲ್ಕು ವರ್ಷಗಳನ್ನು ಯಶಸ್ವಿಯಾಗಿ ಪೂರೈಸಿ, ಐದನೇ ವರ್ಷಕ್ಕೆ ಪಾದಾರ್ಪಣೆ ಮಾಡಿರುವುದು ಗಮನಾರ್ಹ ಸಾಧನೆ” ಎಂದು ಅವರು ಅಭಿಪ್ರಾಯಪಟ್ಟರು.
“ಇದುವರೆಗೆ 14 ಕಾರ್ಯಕ್ರಮಗಳನ್ನು ಆಯೋಜಿಸಿರುವ ಗಾನ ವೈದ್ಯಲೋಕ ತಂಡವು ಸಂಗೀತದ ಮೂಲಕ ಉತ್ತಮ ಬಾಂಧವ್ಯವನ್ನು ಬೆಸೆಯುವ ಕಾರ್ಯವನ್ನೂ ಮಾಡುತ್ತಿದೆ. ಯಾವುದೇ ವೃತ್ತಿಯಲ್ಲಿಯೂ ಕಲಿಕೆಯ ಮೇಲೆ ಶ್ರದ್ಧೆ ಮುಖ್ಯ ಎಂಬುದನ್ನು ವೈದ್ಯರ ಈ ತಂಡ ಸಾಬೀತುಪಡಿಸಿದೆ ಎಂದು ಅವರು ಹೇಳಿದರು. ಇತರ ಗಾಯನ ತಂಡಗಳ ಸಹಕಾರದಿಂದ ಗಾನ ವೈದ್ಯಲೋಕ ಈ ಮಟ್ಟಿಗೆ ಬೆಳವಣಿಗೆ ಕಂಡಿದೆ” ಎಂದು ತಿಳಿಸಿದರು.
ಕಾರ್ಯಕ್ರಮವನ್ನು ಪತ್ರಕರ್ತ ಅಂಶಿ ಪ್ರಸನ್ನ ಕುಮಾರ್ ಉದ್ಘಾಟಿಸಿದರು. ಗಾನ ವೈದ್ಯಲೋಕ ಸಂಸ್ಥೆಯ ಅಧ್ಯಕ್ಷ ಡಾ. ಟಿ. ರವಿಕುಮಾರ್ ಅವರು ಮಾತನಾಡಿದರು.
ಈ ಸುದ್ದಿ ಓದಿದ್ದೀರಾ? ಮೈಸೂರು | ಯುವಜನತೆ ರಾಜಕೀಯದಲ್ಲಿ ಸಕ್ರಿಯವಾಗಿ ಭಾಗವಹಿಸಬೇಕು: ಡಾ. ಹೆಚ್.ವಿ. ವಾಸು
ಡಾ. ವೈ.ಡಿ. ರಾಜಣ್ಣ, ಡಾ. ಟಿ. ರವಿಕುಮಾರ್, ಡಾ. ಶಾಮ್ ಪ್ರಸಾದ್, ಡಾ. ಸುರೇಂದ್ರ, ಡಾ. ಚಿನ್ನ ನಾಗಪ್ಪ, ಡಾ. ಸುಮಾ, ಡಾ. ವಾಣಿ, ಡಾ. ಮಂಜುನಾಥ್ ಹಾಗೂ ಸಿ.ಎಸ್. ವಾಣಿ ಅವರು ಗಾಯನವನ್ನು ಪ್ರಸ್ತುತಪಡಿಸಿ ಪ್ರೇಕ್ಷಕರ ಮನ ಗೆದ್ದರು. ಕಾರ್ಯಕ್ರಮವನ್ನು ಉಪನ್ಯಾಸಕ ಯಡಿಯೂರು ಸಮಿಉಲ್ಲಾ ನಿರೂಪಿಸಿದರು.
ಪಶುಸಂಗೋಪನೆ, ವೈದ್ಯಕೀಯ, ಕೃಷಿ ಸೇರಿದಂತೆ ವಿವಿಧ ಇಲಾಖೆಗಳ ಅಧಿಕಾರಿಗಳು ಹಾಗೂ ಅವರ ಕುಟುಂಬ ಸದಸ್ಯರು ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು.
