ಕಲಾಪ ನಡೆಯುತ್ತಿದ್ದ ಸಂದರ್ಭದಲ್ಲಿ ಸಂಸದರು ಕುಸ್ತಿಪಟುಗಳಂತೆ ಒಬ್ಬರಿಗೊಬ್ಬರು ಹೊಡೆದಾಡಿದ ಘಟನೆ ಮಾಲ್ಡೀವ್ಸ್ ಸಂಸತ್ತಿನಲ್ಲಿ ನಡೆದಿದೆ.
ವಿಶೇಷ ಅಧಿವೇಶನದಲ್ಲಿ ಅಧ್ಯಕ್ಷ ಮೊಹಮದ್ ಮೋಯಿಝು ಅವರ ಸಂಪುಟ ಸಚಿವರಿಗಾಗಿ ಧ್ವನಿ ಮತದ ಮೂಲಕ ಅನುಮೋದನೆ ಪಡೆಯುವ ಸಂದರ್ಭದಲ್ಲಿ ಆಡಳಿತ ಹಾಗೂ ವಿಪಕ್ಷದ ಸಂಸದರು ಕಿತ್ತಾಡಿದ್ದಾರೆ.
ಆಡಳಿತ ಪಕ್ಷದ ಪಿಎನ್‌ಸಿ, ಪಿಪಿಎಂ ಹಾಗೂ ವಿಪಕ್ಷದ ಎಂಡಿಎಂ ಸದಸ್ಯರು ಪರಸ್ಪರ ಹೊಡೆದಾಡಿಕೊಂಡಿದ್ದಾರೆ.
ವೈರಲ್‌ ಆಗುತ್ತಿರುವ ವಿಡಿಯೋದಲ್ಲಿರುವಂತೆ ಒಬ್ಬರು ಸಂಸದರು ಇನ್ನೊಬ್ಬ ಸಂಸದರನ್ನು ಕೆಳಕ್ಕೆ ಬೀಳಿಸಿ ಒದೆಯುವುದು, ಹೊಡೆಯುವುದು ಮಾಡುತ್ತಿದ್ದಾರೆ. ಮತ್ತೊಬ್ಬ ಸಂಸದರು ಗಲಾಟೆಯನ್ನು ಬಿಡಿಸುತ್ತಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ಈ ದಿನ ಸಂಪಾದಕೀಯ | ಮೂವರು ಮಾನಗೆಟ್ಟ ನಾಯಕರು ಮತ್ತು ರಾಮ ರಾಜಕಾರಣ
ಇನ್ನೊಂದು ದೃಶ್ಯದಲ್ಲಿ ಸಂಸದರೊಬ್ಬರು ಸ್ಪೀಕರ್‌ ಅವರ ಕೂದಲು ಎಳೆದು ತುತ್ತೂರಿ ತರಹದ ವಾದ್ಯ ಊದುತ್ತಿರುವುದು ಕಂಡಿಬಂದಿದೆ.
ಅಧ್ಯಕ್ಷ ಮೊಹಮದ್ ಮೋಯಿಝು ಅವರ ಸಂಪುಟಕ್ಕೆ ನಾಲ್ವರು ಸಚಿವರನ್ನು ಅನುಮೋದಿಸುವುದನ್ನು ನಿರಾಕರಿಸಲು ಆಡಳಿತ ಪಕ್ಷದ ಸಂಸದರನ್ನು ವಿಪಕ್ಷ ಪಕ್ಷದ ಸದಸ್ಯರು ಸದನಕ್ಕೆ ಪ್ರವೇಶಿಸದಂತೆ ತಡೆಯುವ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ ಎಂದು ಹೇಳಲಾಗಿದೆ.
ಆದಾಗ್ಯೂ ಆಡಳಿತ ಪಕ್ಷದ ಮುಖ್ಯ ಸಲಹೆಗಾರರಾದ ಅಬ್ದುಲ್ ರಹೀಮ್ ಅಬ್ದುಲ್ಲ ಸಚಿವರ ಮರು ನೇಮಕವನ್ನು ಸಮರ್ಥಿಸಿಕೊಂಡರು. ಅನುಮತಿ ನಿರಾಕರಿಸುವುದು ವಿಪಕ್ಷಗಳ ಬೇಜವಾಬ್ದಾರಿಯುತ ನಡೆ ಎಂದು ತಿಳಿಸಿದರು. ಇದನ್ನು ವಿಪಕ್ಷ ಸಂಸದರು ವಿರೋಧಿಸಿದ್ದು, ಸ್ಪೀಕರ್‌ ರಾಜೀನಾಮೆಗೆ ಒತ್ತಾಯಿಸಿದೆ.
