- ಏಪ್ರಿಲ್‌ 24ರಂದು ಮಸೂದೆಗೆ ತಡೆ ನೀಡಿದ್ದ ಎಂ ಕೆ ಸ್ಟಾಲಿನ್
- ಕಾರ್ಮಿಕರ ಕೆಲಸದ ಅವಧಿ 8ರಿಂದ 12 ತಾಸಿಗೆ ಹೆಚ್ಚಿಸುವ ಮಸೂದೆ
ಕೈಗಾರಿಕೆಗಳಲ್ಲಿ ಕಾರ್ಮಿಕರಿಗೆ ಕೆಲಸದ ಸಮಯ ಹೆಚ್ಚಿಸುವ ಕಾರ್ಖಾನೆಗಳು (ತಿದ್ದುಪಡಿ), 2023 ಮಸೂದೆಯನ್ನು ಹಿಂಪಡೆಯುವುದಾಗಿ ತಮಿಳುನಾಡು ಮುಖ್ಯಮಂತ್ರಿ ಎಂ ಕೆ ಸ್ಟಾಲಿನ್ ಸೋಮವಾರ (ಮೇ 1) ಘೋಷಿಸಿದ್ದಾರೆ.
ಕಾರ್ಮಿಕ ಸಂಘ ಹಾಗೂ ಪ್ರತಿಪಕ್ಷಗಳ ತೀವ್ರ ವಿರೋಧದಿಂದ ಸ್ಟಾಲಿನ್ ಈ ನಿರ್ಧಾರ ಕೈಗೊಂಡಿದ್ದಾರೆ.
ಚೆನ್ನೈನಲ್ಲಿ ಆಡಳಿತಾರೂಢ ಡಿಎಂಕೆ ಸಂಯೋಜಿತ ಕಾರ್ಮಿಕ ಪ್ರಗತಿಪರ ಒಕ್ಕೂಟ ಆಯೋಜಿಸಿದ್ದ ಕಾರ್ಮಿಕ ದಿನಾಚರಣೆ ಕಾರ್ಯಕ್ರಮದಲ್ಲಿ ಎಂ ಕೆ ಸ್ಟಾಲಿನ್ ಈ ಘೋಷಣೆ ಮಾಡಿದ್ದಾರೆ.
ಮಸೂದೆಯನ್ನು ಯಾವುದೇ ಹಿಂಜರಿಕೆಯಿಲ್ಲದೆ ಹಿಂಪಡೆಯಲಾಗಿದೆ. ಇದಕ್ಕೆ ಧೈರ್ಯ ಬೇಕು ಎಂದು ಸ್ಟಾಲಿನ್ ಹೇಳಿದ್ದಾರೆ. “ತಿದ್ದುಪಡಿ ಮಸೂದೆಯನ್ನು ಡಿಎಂಕೆ ಸರ್ಕಾರ ತಂದಿದ್ದರೂ ಡಿಎಂಕೆ ಮಿತ್ರ ಪಕ್ಷ ಎಲ್‌ಪಿಎಫ್‌ ಮಸೂದೆ ವಿರೋಧಿಸಿತು. ಇದನ್ನು ನಾನು ಅಭಿನಂದಿಸುತ್ತೇನೆ. ಇದು ಡಿಎಂಕೆ ಎಷ್ಟು ಪ್ರಜಾಸತ್ತಾತ್ಮಕವಾಗಿದೆ ಎಂದು ತೋರಿಸುತ್ತದೆ” ಎಂದು ಸ್ಟಾಲಿನ್ ಹೇಳಿದರು.
ಆಡಳಿತಾರೂಢ ಡಿಎಂಕೆ ಪಕ್ಷದ ಬೆಂಬಲಿತ ಸಂಘಟನೆಗಳು ಮತ್ತು ರಾಜಕೀಯ ಮಿತ್ರ ಪಕ್ಷಗಳು ಎಂ ಕೆ ಸ್ಟಾಲಿನ್ ಅವರ ಈ ಮಸೂದೆಯನ್ನು ವಿರೋಧಿಸಿವೆ. ಇದರಲ್ಲಿ ಕಾಂಗ್ರೆಸ್ ಹಾಗೂ ಎಡಪಕ್ಷಗಳೂ ಸೇರಿವೆ.
ಮೊದಲಿಗೆ ಏಪ್ರಿಲ್‌ 21ರಂದು ರಾಜ್ಯ ವಿಧಾನಸಭೆ ಮಸೂದೆ ಅಂಗೀಕರಿಸಿತ್ತು. ಇನ್ನೂ ಚರ್ಚೆಗಳು ಬಾಕಿ ಇರುವುದರಿಂದ ಮಸೂದೆಗೆ ತಡೆ ನೀಡಲಾಗಿದೆ ಎಂದು ಸ್ಟಾಲಿನ್ ಏಪ್ರಿಲ್‌ 24ರಂದು ಹೇಳಿದ್ದರು.
ಸರ್ಕಾರ ಕಾರ್ಮಿಕ ವಿರೋಧಿ ಬಿಜೆಪಿ ಬೆಂಬಲಿತ ನೀತಿ ಸುಧಾರಣೆಗಳ ಪ್ರತಿಬಿಂಬವಾಗಿದೆ ಎಂದು ಕಾರ್ಮಿಕ ಸಂಘಟನೆಗಳು ದೂರಿದ್ದವು.
ಈ ಸುದ್ದಿ ಓದಿದ್ದೀರಾ? ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಸಕ್ರಿಯವಾಗಿರುವ ಚೀನಾ ನೌಕಾಪಡೆ ಮೇಲೆ ನಿಗಾ
ಕಾರ್ಖಾನೆಯ ಕಾರ್ಮಿಕರ ದೈನಂದಿನ ಕೆಲಸದ ಅವಧಿಯನ್ನು 12 ಗಂಟೆವರೆಗೆ ವಿಸ್ತರಿಸುವ ಬಗ್ಗೆ ಮಸೂದೆ ಪ್ರಸ್ತಾಪಿಸುತ್ತದೆ. ವಾರದಲ್ಲಿ 4 ದಿನ ಎಂಟು ಗಂಟೆ ಬದಲಿಗೆ 12 ಗಂಟೆ ಕೆಲಸದ ಅವಧಿ ಆಯ್ಕೆ ಮಾಡಬಹುದು ಎಂದು ಮಸೂದೆ ಹೇಳುತ್ತದೆ.
ಕಾರ್ಮಿಕರ ಕೆಲಸದ ಅವಧಿಯನ್ನು ಹೆಚ್ಚಿಸುವ ಎಂ ಕೆ ಸ್ಟಾಲಿನ್ ಸರ್ಕಾರದ ಮಸೂದೆಯನ್ನು ಅಧಿಕಾರಿಗಳು ಈ ಹಿಂದೆ ಸಮರ್ಥಿಸಿಕೊಂಡಿದ್ದರು.
