ರಾಯಚೂರು ಜಿಲ್ಲೆ ದೇವದುರ್ಗ ತಾಲೂಕಿನ ಹೇಮನಾಳ ಗ್ರಾಮ ಪಂಚಾಯಿತಿಗೆ ಹತ್ತು ವರ್ಷಗಳಿಂದ ಚುನಾವಣೆ ನಡೆಯದೆ ಗ್ರಾಮದಲ್ಲಿ ಅಭಿವೃದ್ಧಿ ಕುಂಠಿತವಾಗಿದ್ದು, ಸ್ಥಳೀಯರು ತಹಶೀಲ್ದಾರ್, ಜಿಲ್ಲಾಧಿಕಾರಿ ಕಚೇರಿಗೆ ಅಲೆದಾಡುವ ಸ್ಥಿತಿ ಎದುರಾಗಿದೆ ಎನ್ನುತ್ತಾರೆ ಗ್ರಾಮಸ್ಥರು.
ಹೇಮನಾಳ ಪಂಚಾಯಿತಿಗೆ ಖಾನಾಪುರ ಹಾಗೂ ಮದರಕಲ್ ಗ್ರಾಮವು ಎರಡೂ ಒಂದೇ ಹೇಮನಾಳ ಪಂಚಾಯಿತಿ ವ್ಯಾಪ್ತಿಯಲ್ಲಿ ಬರುತ್ತಿದ್ದವು. ಸರ್ಕಾರದ ಸರ್ವೇ ಮೂಲಕ ಖಾನಾಪುರ ಪಂಚಾಯಿತಿಯನ್ನು ಹೇಮನಾಳ ಸೇರಿಸಿ, ಮದರಕಲ್ ಗ್ರಾಮವನ್ನು ಶಾವಂತಗೆರಾ ಪಂಚಾಯಿತಿಗೆ ಸೇರಿಸಲಾಗಿದೆ. ಇದರಿಂದ ಮನನೊಂದು ಮದರಕಲ್ ಗ್ರಾಮದವರು ಹೇಮನಾಳ ಗ್ರಾಮ ಪಂಚಾಯಿತಿಗೆ ಸೇರಿಸಬೇಕು. ಇದು ಕೇವಲ 2 ಕಿಮೀ ದೂರವಿದ್ದು, ನಮಗೆ ಅನುಕೂಲವಾಗುತ್ತದೆಂದು ನ್ಯಾಯಾಲಯಕ್ಕೆ ಮೊರೆ ಹೋದರು.
ಖಾನಾಪುರ ಗ್ರಾಮವು ಹೇಮನಾಳ ಪಂಚಾಯಿತಿಗೆ ಸರಿ ಸುಮಾರು 10 ಕಿಮೀ ಆಗುತ್ತದೆ. ಆದ್ದರಿಂದ ಅದನ್ನು ಕೈ ಬಿಟ್ಟು, ಅವರನ್ನು ಶಾವಂತಗೇರಾ ಪಂಚಾಯಿತಿಗೆ ಸೇರಿಸಬೇಕೆಂದು ಮದರಕಲ್ ಗ್ರಾಮದ ಜನರ ಬೇಡಿಕೆ. ಈ ವಾದ ವಿವಾದದಲ್ಲಿ ಅಭಿವೃದ್ಧಿ ಕಾಣದೆ ಗ್ರಾಮವು ಕತ್ತಲೆಯಾಗಿದೆಯೆಂದು ಹೇಮನಾಳ ಗ್ರಾಮದ ಜನರು ಗೋಳಾಗಿದೆ.
“ಹೇಮನಾಳ ಗ್ರಾಮ ಪಂಚಾಯತಿಗೆ ಮದರಕಲ್ ಗ್ರಾಮವು 2 ಕಿಲೋಮೀಟರ್ ಇರುವುದರಿಂದ ಸಾರ್ವಜನಿಕ ಗ್ರಾಮ ಪಂಚಾಯಿತಿ ಕಾರ್ಯಾಲಯ ಹೇಮನಾಳ, ಜನರಿಗೆ ಅನುಕೂಲಕರವಾಗುತ್ತದೆ. ಮದರಕಲ್ ಗ್ರಾಮವನ್ನು ಹೇಮನಾಳ ಪಿ ಎಚ್ ಸೆಂಟರ್ ಮತ್ತು ಸುರಕ್ಷಿತ ರಸ್ತೆ ಸಂಪರ್ಕ ಇರುವುದರಿಂದ ತುಂಬಾ ಅನುಕೂಲಕರವಾಗುತ್ತದೆ” ಎಂದು ಮದರಕಲ್ ಗ್ರಾಮದ ಜನರು ಅಭಿಪ್ರಾಯ ವ್ಯಕ್ತಪಡಿಸಿದರು.
“ಶಾವಂತಗೇರಾ ಗ್ರಾಮ ಪಂಚಾಯಿತಿಗೆ ಖಾನಾಪೂರು ಗ್ರಾಮವು 4 ಕಿಲೋಮೀಟರ್ ಇರುವುದರಿಂದ ಸಾರ್ವಜನಿಕರಿಗೆ ಅನುಕೂಲಕರವಾಗುತ್ತದೆ. ಖಾನಾಪೂರ ಗ್ರಾಮವು ಹೇಮನಾಳ ಪಂಚಾಯತಿಗೆ 12 ಕಿಲೋಮೀಟರ್ ದೂರವಾಗುತ್ತದೆ. ಆದಕಾರಣ ಸಾರ್ವಜನಿಕರಿಗೆ ತೊಂದರೆಯಾಗುತ್ತದೆ. ಖಾನಾಪೂರ ಗ್ರಾಮವನ್ನು ಶಾವಂತಗೇರಾ ಪಿಎಚ್ ಸೆಂಟರ್ ಮತ್ತು ಸುರಕ್ಷಿತ ರಸ್ತೆ ಸಂಪರ್ಕ ಇರುವುದರಿಂದ ತುಂಬಾ ಅನುಕೂಲಕರವಾಗುತ್ತದೆ” ಎಂದು ತಿಳಿಸಿದರು.
ಹೇಮನಾಳ ಗ್ರಾಮದ ನಿವಾಸಿ ಶಾಂತಕುಮಾರ ಹೊನ್ನಟಗಿ ಮಾತನಾಡಿ, “ಈ ಸಮಸ್ಯೆಯಿಂದ ಸುಮಾರು 10 ವರ್ಷಗಳಿಂದ ಚುನಾವಣೆಗಳು ನಡೆದಿಲ್ಲ. ಗ್ರಾಮದಲ್ಲಿ ದಿನನಿತ್ಯ ಕುಡಿಯುವ ನೀರು, ಮೂಲಭೂತ ಸೌಕರ್ಯಗಳಿಂದ ಗ್ರಾಮದ ಜನರು ವಂಚಿತರಾಗಿದ್ದಾರೆ” ಎಂದರು.
“ಚುನಾವಣೆ ನಡೆಯದೆ ಹೋದರೆ ಗ್ರಾಮ ಪಂಚಾಯಿತಿಗಳಲ್ಲಿ ಅಭಿವೃದ್ಧಿ ಕಾರ್ಯಗಳು ನಡೆಯುವುದಿಲ್ಲ. ಸರ್ಕಾರದಿಂದ ಬಂದಂತಹ ಅನುದಾನವೆಲ್ಲ ಏನಾಗುತ್ತಿದೆ ಎಂಬುದರ ಕುರಿತು ಯಾರ ಬಳಿ ಸಮಸ್ಯೆ ಹೇಳಿಕೊಳ್ಳಬೇಕು ಎನ್ನುವ ಗೊಂದಲದಲ್ಲಿದ್ದಾರೆ. ಈ ಗ್ರಾ.ಪಂ.ಗಳಲ್ಲಿ ಸದಸ್ಯರಿಲ್ಲದೆ ಅಧಿಕಾರಿಗಳು ಆಡಿದ್ದೇ ಆಟ ಎನ್ನುವಂತಾಗಿದೆ. ಆದರೆ ಅಧಿಕಾರಿಗಳು ಮಾತ್ರ ನಾವು ಮಾಡಿದ್ದೇ ಸರಿ ಎನ್ನುತ್ತಿದ್ದಾರೆ” ಎಂದರು.
“ಸಾರ್ವಜನಿಕರಿಗೆ ಯಾವುದೇ ಸೌಲಭ್ಯಗಳು ಸಿಗುವುದಿಲ್ಲ. ಮೂಲಭೂತ ಸೌಕರ್ಯಗಳಿಲ್ಲದೆ ವಂಚಿತ ಗ್ರಾಮವಾಗುತ್ತಿವೆ. ಅಧಿಕಾರಿಗಳು ಮತ್ತು ಸಿಬ್ಬಂದಿ ವರ್ಗದವರು ಸರಿಯಾಗಿ ಪಂಚಾಯಿತಿಗೆ ಬಾರದೆ ಪ್ರಭಾವಿ ವ್ಯಕ್ತಿಗಳ ಕೈಗೊಂಬೆಯಾಗಿ ಕಾರ್ಯನಿರ್ವಹಿಸುತ್ತಾರೆ” ಎಂದು ಆರೋಪಿಸಿದರು.
“ತಾಲೂಕಿನ ಹೇಮನಾಳ ಹಾಗೂ ಶಾವಂತಗೇರಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಸುಮಾರು 13 ಹಳ್ಳಿಗಳು ಹೊಂದಿವೆ. ಚುನಾವಣೆ ಸಂಭ್ರಮದ ಮರೆಯಾಗಿದೆ. ಆದರೆ ಜನರು ಚುನಾವಣೆ ನಡೆಯಬೇಕು” ಎಂದು ಒತ್ತಾಯಿಸುತ್ತಿದ್ದಾರೆ.
ಈ ಸುದ್ದಿ ಓದಿದ್ದೀರಾ? ರಾಯಚೂರು | ಆಕ್ರಮವಾಗಿ ಸೇಂದಿ ಮಾರಾಟ; ಆರೋಪಿಗಳು ಪೊಲೀಸರ ವಶ
“ಗ್ರಾಮಸ್ಥರು, ಜನಪ್ರತಿನಿಧಿಗಳು ಇಲ್ಲದ ಕಾರಣ ಅಧಿಕಾರಿಗಳು ಜನರ ಕೈಗೆ ಸಿಗುತ್ತಿಲ್ಲ. ಚುನಾಯಿತ ಸದಸ್ಯರಿದ್ದರೆ ಅವರ ಬಳಿ ಸಮಸ್ಯೆ ಹೇಳಿಕೊಂಡು ಪರಿಹಾರ ಪಡೆಯಬಹುದು. ಮನರೇಗಾ ಸೇರಿದಂತೆ ವಿವಿಧ ಯೋಜನೆಗಳು ಹಾಗೂ ಮೂಲಸೌಲಭ್ಯ ಪಡೆಯಲು ಗ್ರಾಮಸ್ಥರು ಪರದಾಡುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿಯವರು ಸಭೆ ಕರೆದು ಇದನ್ನು ಬಗೆಹರಿಸಬೇಕು. ಅಧಿಕಾರಿಗಳು ನಿರ್ಲಕ್ಷ್ಯ ಮಾಡಿದರೆ ಹೋರಾಟಕ್ಕೆ ಮುಂದಾಗಬೇಕಾಗುತ್ತದೆ” ಎಂದು ಎಚ್ಚರಿಕೆ ನೀಡಿದರು.
ರಫಿ ಗುರುಗುಂಟ
ಗುಲಬರ್ಗಾ ವಿವಿಯಿಂದ ಪತ್ರಿಕೋದ್ಯಮದಲ್ಲಿ ಎಂ ಎ ಪದವಿ, ಕಲ್ಯಾಣ ಕರ್ನಾಟಕ ವಲಯ ಕೋರ್ಡಿನೇಟರ್
