ಟೆಸ್ಟ್ ಮತ್ತು ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳಿಂದ ನಿವೃತ್ತಿ ಹೊಂದಿರುವ ಹೊರತಾಗಿಯೂ, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ತಮ್ಮ ಎ ಪ್ಲಸ್ ಗುತ್ತಿಗೆಗಳನ್ನು ಉಳಿಸಿಕೊಂಡಿರುವುದನ್ನು ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯ ಖಚಿತಪಡಿಸಿದ್ದಾರೆ.
2024-25ರ ಸಾಲಿನ ಗುತ್ತಿಗೆಗಳಲ್ಲಿ, ಅತ್ಯುನ್ನತ ಎ ಪ್ಲಸ್ ದರ್ಜೆಯಲ್ಲಿ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಜಸ್‌ಪ್ರಿತ್ ಬುಮ್ರಾ ಮತ್ತು ರವೀಂದ್ರ ಜಡೇಜ ಅವರನ್ನು ಉಳಿಸಿಕೊಳ್ಳಲಾಗಿದೆ.
‘ಅಂತಾರಾಷ್ಟ್ರೀಯ ಟಿ20 ಮತ್ತು ಟೆಸ್ಟ್‌ಗಳಿಂದ ನಿವೃತ್ತಿ ಹೊಂದಿದ ಹೊರತಾಗಿಯೂ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾರ ಎ ಪ್ಲಸ್ ದರ್ಜೆಯ ಗುತ್ತಿಗೆಗಳು ಮುಂದುವರಿಯಲಿವೆ. ಅವರು ಈಗಲೂ ಭಾರತೀಯ ಕ್ರಿಕೆಟ್ ತಂಡದ ಭಾಗವಾಗಿದ್ದಾರೆ. ಅವರು ಎ ಪ್ಲಸ್ ದರ್ಜೆಯ ಗುತ್ತಿಗೆಯ ಎಲ್ಲ ಸೌಲಭ್ಯಗಳನ್ನು ಪಡೆಯಲಿದ್ದಾರೆ’’ ಎಂದು ಸೈಕಿಯ ಹೇಳಿದರು.
ವಿರಾಟ್ ಕೊಹ್ಲಿ ಐದು ಪಂದ್ಯಗಳ ಟೆಸ್ಟ್ ಸರಣಿಗಾಗಿ ಇಂಗ್ಲೆಂಡ್ ಪ್ರವಾಸಕ್ಕೆ ಮುನ್ನ, ಇತ್ತೀಚೆಗೆ ಟೆಸ್ಟ್ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದಾರೆ. ಅವರು 14 ವರ್ಷಗಳ ಕ್ರೀಡಾ ಜೀವನದ ಅವಧಿಯಲ್ಲಿ 123 ಪಂದ್ಯಗಳಿಂದ 46.85ರ ಸರಾಸರಿಯಲ್ಲಿ 9,230 ರನ್‌ಗಳನ್ನು ಗಳಿಸಿದ್ದಾರೆ. ಇದರಲ್ಲಿ 30 ಶತಕಗಳು ಮತ್ತು 31 ಅರ್ಧ ಶತಕಗಳಿವೆ. ಅವರ ಗರಿಷ್ಠ ಸ್ಕೋರ್ ಅಜೇಯ 254.
ಇದನ್ನು ಓದಿದ್ದೀರಾ? ಟೆಸ್ಟ್ ಕ್ರಿಕೆಟ್ ನಾಯಕನ ಸ್ಥಾನ ಬೇಡ ಎಂದ ವಿರಾಟ್; ಯುವ ಆಟಗಾರನಿಗೆ ಪಟ್ಟ ನೀಡಲು ಬಿಸಿಸಿಐ ಒಲವು
ರೋಹಿತ್ ಶರ್ಮಾ ಮೇ 7ರಂದು ಟೆಸ್ಟ್ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದಾರೆ. ಅವರು 11 ವರ್ಷಗಳ ತನ್ನ ಕ್ರೀಡಾ ಜೀವನದ ಅವಧಿಯಲ್ಲಿ 67 ಪಂದ್ಯಗಳಿಂದ 40.57ರ ಸರಾಸರಿಯಲ್ಲಿ 4,301 ರನ್‌ಗಳನ್ನು ಸಂಗ್ರಹಿಸಿದ್ದಾರೆ. ಅದರಲ್ಲಿ 12 ಶತಕಗಳು ಮತ್ತು 18 ಅರ್ಧ ಶತಕಗಳಿವೆ. ಅವರು 2019ರಲ್ಲಿ ದಕ್ಷಿಣ ಆಫ್ರಿಕಾದ ವಿರುದ್ಧ ತನ್ನ ಗರಿಷ್ಠ 212 ರನ್‌ಗಳನ್ನು ಬಾರಿಸಿದ್ದಾರೆ.
ಬಿಸಿಸಿಐ ಸಾಮಾನ್ಯವಾಗಿ ಕೇಂದ್ರ ಗುತ್ತಿಗೆ ಆಧಾರದಲ್ಲಿ ಒಟ್ಟು 4 ಗ್ರೇಡ್‌ಗಳನ್ನು ಮಾಡಿದೆ. ಈ ವೇಳೆ ಈ ಶ್ರೇಣಿಗಳಿಗೆ ಅನುಗಣವಾಗಿ ಆಟಗಾರರಿಗೆ ವೇತನವನ್ನು ಸಹ ನೀಡುತ್ತದೆ. ಬಿಸಿಸಿಐ ಆಟಗಾರರ ಆಟದ ಗುಣಮಟ್ಟವನ್ನು ಆಧರಿಸಿ ಅವರ ಗ್ರೇಡ್ ನಿರ್ಧರಿಸುತ್ತದೆ.
ಅಂದ ಹಾಗೆ ಗ್ರೇಡ್ ಎ ಪ್ಲಸ್, ಗ್ರೇಡ್ ಎ, ಗ್ರೇಡ್ ಬಿ ಮತ್ತು ಸಿ ಸೇರಿವೆ. ಗ್ರೇಡ್ ಎ ಪ್ಲಸ್‌ನಲ್ಲಿ ಕೇವಲ ನಾಲ್ವರು ಆಟಗಾರರು ಮಾತ್ರ ಇದ್ದಾರೆ. ಇದರಲ್ಲಿ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಜಸ್ಪ್ರೀತ್ ಬುಮ್ರಾ ಮತ್ತು ರವೀಂದ್ರ ಜಡೇಜಾ ಸೇರಿದ್ದಾರೆ.
ಗ್ರೇಡ್ ಎ ಪ್ಲಸ್‌ಗೆ 7 ಕೋಟಿ ಜೊತೆಗೆ ಪಂದ್ಯ ಶುಲ್ಕ, ಗ್ರೇಡ್ ಎ ಗ್ರೇಡ್‌ಗೆ 5 ಕೋಟಿ ಜೊತೆಗೆ ಪಂದ್ಯ ಶುಲ್ಕ, ಗ್ರೇಡ್ ಬಿ ಪ್ಲಸ್‌ಗೆ 3 ಕೋಟಿ ಜೊತೆಗೆ ಪಂದ್ಯ ಶುಲ್ಕ, ಗ್ರೇಡ್ ಸಿ ಪ್ಲಸ್‌ಗೆ 1 ಕೋಟಿ ಜೊತೆಗೆ ಪಂದ್ಯ ಶುಲ್ಕ ನೀಡಲಾಗುತ್ತದೆ. ಗುತ್ತಿಗೆ ಪಟ್ಟಿಯಲ್ಲಿ ಇಬ್ಬರು ಕನ್ನಡಿಗರಾದ ಕೆ ಎಲ್‌ ರಾಹುಲ್ ಹಾಗೂ ಪ್ರಸಿದ್ಧ ಕೃಷ್ಣ ಸ್ಥಾನ ಪಡೆದಿದ್ದಾರೆ.
